Hely tavela, ho tapitry faharetan̈any Jehovah amy donia ty. Ho ravan̈a fivavahan̈a diso jiaby, baka io iro firenena aby io hanafiky vahoakany Zan̈ahary, avio Jehovah handripaka olo ratsy fan̈ahy, aminy Aramagedona. Efa tsy din̈intsika haviany fotoan̈a maventy aby zen̈y.

Marin̈y fa tsy ten̈a haintsika aminy antsipiriany raha jiaby momba fahorian̈a be io. Ohatra, tsy haintsika ombian̈a hanomboko fahorian̈a be, ino mahavy iro pitondra arapolitiky aby io hanafiky fivavahan̈a, firy andra iro firenena aby io hanafiky vahoakany Jehovah ndreky akory han̈anaovandro zen̈y. Tsy haintsika koa ino ampiasainy Jehovah handripahan̈a olo ratsy fan̈ahy, aminy Aramagedona.

Ndray zen̈y, koran̈iny Soratra Masin̈y raha jiaby tokony ho haintsika, baka atsika hisy korazy hiatriky raha mbala ho avy. Ohatra, haintsika fa atsika miain̈y amy tapany farany aminy “andra farany.” (2Ti 3:1) Haintsika fa “nahen̈y” fotoan̈a hanafihan̈a fivavahan̈a diso io, amy zen̈y tsy ravan̈a fivavahan̈a marin̈y. (Mt 24:22) Haintsika fa Jehovah hamonjy vahoakanany. (2Pe 2:9) Haintsika koa fa ten̈a mahery ndreky man̈ano ny rariny Araiky nifidiny Jehovah handripaka olo ratsy fan̈ahy, avio hiaro iro vahoaka be aminy Aramagedona io. ​—Ap 19:11, 15, 16.

Maro olo ho “toran̈a tahotro” izikoa fa miboaka iro raha maro maventy ho avy io. Fa atsika ndraiky ‘hitsangana ndreky hisan̈andra’ fotony atsika matoky fa famonjian̈a atsika efa marikitry. Fa atsika fo mila mamaky ndreky misaintsain̈y fomba namonjiany Jehovah vahoakanany taloha tan̈y ndreky raha efa nambarany momba raha mbala ho avy.​—Lk 21:26, 28.