Nanomboko tamy Zanvie 2018, misy raha mety koran̈iny fo amy fon̈ony Fomba Fiain̈ana Kristianin̈y Ndreky Fanompoan̈a: Boky Fianaran̈a. Akory tokony hampiasantsika izio?

Lera Anao Mahazo Anjara: Anao tokony hampiasa fan̈ontanian̈a, andininy vakin̈y, ndreky raha hikoran̈iny amy man̈araka, amy raha mety koran̈iny. Zen̈y tsy mivolan̈a fa mila ataontsika tsianjery volan̈a jiaby amy videonizio. Mety ivoanao tany itorianao, fampidiran̈a koran̈a, fomba hitondrasanao fan̈azavan̈a, na raha hafa. Anao koa mety man̈amia araiky amy Fitaovan̈a Fampianaran̈a fo, ndray tsy voakoran̈a amy toromariky momba anjaranao raha zen̈y.

Lera Manompo: Raha mety koran̈iny io natao han̈ampian̈a atsika hahita hevitry fo. Ke izikoa misy olo araiky lian̈a, ke tihahay raha maro, efa mety tohizanao amy raha mety koran̈iny lera mitsidiky edy koran̈a. Mety ivoanao hely koa raha mety koran̈iny io, avio anao mety mampiasa hevitry hafa foeky. Asa fotokevitry tamy fanjava loso in̈y mbala mety amy faritaninaro izioty? Sa misy andininy hafa hitanao ten̈a mahalian̈a olo? Asa misy raha nandalo vo tsy ela na vaovao malaza amy faritaninaro? Na ino na ino raha mety koran̈iny tianao hampiasain̈y, tanjon̈onao tokony ‘han̈ano raha jiaby mety atao nohony vaovao tsara, ke hitorian̈a izio aminolo.’—1Ko 9:22, 23.