Mira fo boky Ampianariny Atsika ndreky Ampianariny Baiboly. Iro boky aroe io samy ampianaran̈a Baiboly. Mira fo fahamarin̈ana an̈atinizio ao ndreky fomba filaharany, fa araiky Ampianariny Atsika io fo natao tsotra ndreky mora azo. Izio ampianaran̈a olo sahiran̈a mianatra amy boky Ampianariny Baiboly. Tsisy fan̈ampiny fan̈azavan̈a an̈atinizio ao, fa fan̈azavan̈a tsotra ahitan̈a dikany volan̈a sasany ndreky hevitry maventy nianaran̈a tamy toko tao. Tsisy fan̈ontanian̈a isaka voanalohany toko, baka io koa tsisy fameren̈ana isaka farany toko, fa misy famintin̈ana ny marin̈y amy Baiboly hita tan̈atiny toko tao. Boky io mira boky Ampianariny Baiboly fo, ke mety amian̈a olo, nata tsy an̈isany raha apetraka amy fanjava. Karakory fomba fampiasan̈a raha mampiavaka boky Ampianariny Atsika io, koa fa mampianatra Baiboly?

FAMINTIN̈ANA: Matetiky atsika koa fa mampianatra amy boky Ampianariny Baiboly, atsika mamaky fehintsoratra, baka io man̈ontany. Mety tsara aminolo maro mianatra amy boky io zen̈y. Misy ndraiky pianatra tsy zatra volan̈a boky io na tsy mahay mamaky teny tsarabe. Ino raha mety hatao? Anao mety mampiasa boky Ampianariny Atsika. Mety hiarahanao midiniky aminany famintin̈ana toko tsiaraikiaraiky, fa ampirisiha izy hamaky toko jiaby firaka amy farany. Mety vita an̈atiny 15 minity fianaran̈a izio. Mila man̈oman̈a tsarabe pitory, baka io mangala onon̈o raha ilainy pianatra, fotony tsisy fan̈azavan̈a be karaha an̈atiny toko amy famintin̈ana io. Izikoa ndraiky toko io atao fiarahan̈a midiniky miaraka amy pianatra, famintin̈ana io mety atao fameren̈ana.

FAN̈AZAVAN̈A: Mira filaharany amy toko ao fo fan̈azavan̈a volan̈a ndreky hevitry hita amizio. Anjarany papianatra manapakevitry na tokony hidinihin̈y miaraka amy pianatra fan̈azavan̈a io, na tsy tokony.