Diniha hely baka, anao niain̈y taminandrany Jesosy tan̈y, ke nipetraka ta Galilia. Hankalaza Fetiny Tran̈o Rantsankazo a Jerosalema anao. Feno olo tanàna, fotony maro piaramanompo baka lavitry navy. Tihan̈ano fan̈atitry niny Jehovah anao, ke loso anao namakivaky tanàna io miaraka amy bengy ataonao fan̈atitry, ndray somary maletry ndreky feno olo mare lalan̈a. Anao koa fa navy tamy tempoly tao, efa feno olo han̈ano fan̈atitry tao. Koa fa elaela, latoronao amy zay. Fa lera anao handeha han̈amia bengy io pisoron̈o aby io, nahatsiaro anao fa misy alahelo aminao rahalahinao. Mety amindro olo marobe ao izy aminio, na antanàna ao. Jesosy nan̈azava ino raha tokony hataonao. (Vakia Matio 5:24.) Ino raha hataonao ndreky rahalahinao io baka anaro hihavan̈a ndraiky? Ataova lamariky valiny marin̈y amy listy ambany io.

ANAO TOKONY...

• tsy hikoran̈a amy rahalahinao foeky izikoa tsy ten̈a misy antony maventy tokony nampameloko izy

• hiezaka han̈itsy rahalahinao fotony anao mihevitry fa izy sarotin̈y loatra na mba nisy hadisovan̈anany koa

• hitandren̈y tsarabe raha volan̈iny rahalahinao, ke ndray tsy ten̈a mazava aminao raha tiany havian̈a, anao von̈ono hiala tsin̈y aminany fo, fotony anao nan̈ano raha nampalahelo na nampaneloko izy

RAHALAHINAO TOKONY...

• hitantara aminolo amy fiangonan̈a raha tsy mety nataonao taminany

• hasiaka mare aminao, ndreky hivolan̈a raha jiaby tsy nety nataonao, baka io tsy han̈eky izikoa anao tsy mifono aminany

• han̈eky fa nila fanetrenten̈a ndreky ezaka mare baka aminao navitanao nan̈aton̈o izy, ke ten̈a hamela helokonao izy

Tsy man̈ano fan̈atitry biby eky atsika amy zioty. Fa izikoa volan̈a Jesosy dinihin̈y, ino ifandraisany fihavan̈antsika amy rahalahintsika ndreky fanompoan̈a ikeny Zan̈ahary?