NAN̈INO IZIO TEN̈A ILAIN̈Y? Fianaran̈a manokan̈a io man̈ampy atsika “hahatakatra tsarabe ampohiny, alavasany, habosany ndreky halalin̈any” fahamarin̈ana amy Volan̈a Zan̈ahary ao. (Ef 3:18) Izio koa man̈ampy atsika hadio fo ndreky tsy hisy tsin̈y amy donia ratsiny Satana ty ndreky ‘hitana mare volan̈a man̈amia fiain̈ana.’ (Fi 2:15, 16) Amy fianaran̈a manokan̈a io koa atsika afaka mifidy raha tiantsika hianaran̈a arakaraka raha ilaintsika amy fiain̈ana. Akory hahavy atsika hahazo hatsaran̈a farany be baka amy famakian̈a ndreky fianaran̈a Baiboly?

AKORY AN̈ANOVAN̈A ZEN̈Y?

• Tsara izikoa anao misy Baiboly natokan̈anao hianaran̈a, na vita pirinty zen̈y na elektroniky. Mety tsipihinao na ataonao kolera amy zay iro andininy aby io. Mety soratinao ao koa hevitry tianao tadidin̈y

• Anao koa fa mamaky Baiboly, man̈ontania ten̈a karaha ty: ‘Azovy? Ino? Ombian̈a? Taia? Nan̈ino? Karakory?’

• Ataova mazava tsarabe aminao raha hianaranao. Ampiasà fitaovan̈a fikarohan̈a misy aminao, hitadiavan̈a fotokevitry na andininy tianao ho hay

• Diniha tsarabe raha vakinao baka ho hitanao nan̈ino izio mahakasiky anao

• Areha raha nianaranao.—Lk 6:47, 48

ZAHAVA VIDEO ‘TANA MARE VOLAN̈A AZAHOAN̈A FIAIN̈ANA’, KE MAN̈ANOVA FIANARAN̈A MANOKAN̈A BAKA IO VALIA FAN̈ONTANIAN̈A ABY TY:

• Nan̈ino ilain̈y man̈ano fianaran̈a manokan̈a io?

• Nan̈ino ten̈a ilain̈y mivavaka antsendriky alohany hianatra?

• Ino raha mety han̈ampy atsika hahazo tsarabe raha koran̈iny Baiboly?

• Ino aby karazan̈a lamariky mety hampiasaintsika amy Baiboly fianarantsika manokan̈a io ao?

• Nan̈ino ten̈a ilain̈y misaintsain̈y izikoa fa mianatra Volan̈a Zan̈ahary?

• Mila ataontsika karakory raha aby nianarantsika in̈y?