Ravoravo fianakavian̈any Betelany Etazonia tamy joma 5 Zie 2013, koa nivolan̈a Anthony Morris, an̈isany Filankevipitantan̈ana: “Vita nomoaly kamisy 4 Zie 2013 fifan̈arahan̈a momba fivarotan̈a iro tran̈obe tsiota, an̈isanizen̈y araiky amy 117 Adams Street ndreky 90 Sands Street tan̈y Brooklyn. a Ke tsy maintsy miala amy Tran̈obe Voanalohany firaka Faha-5 atsika, lan̈iny voalohandohany fanjava Aoty ho avy izio io.”

Asa ma tamy zen̈y! Tran̈o dimy io mitovy habezan̈a amy tany fisoman̈a laboly 11. Kanefa, tsy maintsy niala tao fianakavian̈any Betela tan̈atiny fanjava aroe.

Tan̈atiny taon̈o taon̈o, nisy fitaovan̈a fan̈anovan̈a pirinty ndreky fitaovan̈a mampitambatra boky. Kanefa, nafindra tan̈y Wallkill, New York, fitaovan̈a aby io tamy 2004.

Koa fa nandeha fotoan̈a, tamy tran̈obe aby io nan̈ambilan̈a entan̈a ndreky nikobabian̈a fitaovan̈a ilain̈y jiaby, na fitaovan̈a nampiasain̈y tamy fan̈oren̈ana zen̈y na fitaovan̈a biro, baka io raha jiaby nilain̈y tamy fan̈oren̈ana tan̈y Etazonia ndreky tany hafa.

Efa nisy fandaminan̈a tsara tsarabe natao, amy zay tatra fotoan̈a nifan̈arahan̈a momba fialan̈a tamy tran̈obe io. Natao lisity antsendriky entan̈a jiaby tamy tran̈obe io, amy zay hita tsarabe ino entan̈a tokony halafo na harian̈a na hakajin̈y. Nisy fandaharan̈a maromaro koa natao hialan̈a tamy tran̈o aby io tan̈atiny fotoan̈a fohiky, kanefa tsy hisiany antambo.

Ten̈a niasa mare fianakavian̈any Betela tamy fifindran̈a io. Nisy olo 41, baka amy faritry maro tan̈y Etazonia, voakaiky han̈ano asa antsitrapo. Ankamarozandro niasa antsitrapo io tanora tsy manambady sady matanjaka tsarabe. Iro io nikahin̈y hiasa amy Betela an̈atiny fanjava araiky sy tapany na fanjava aroe sy tapany. Iro io tsy maintsy niala havandro ndreky namandro, baka io asandro, han̈anovan̈a asa io. Akory fahitandro asa nataondro tan̈y?

Jordan, tsaikilelahy 21 taon̈o, baka amy Fanjakan̈any Washington, nivolan̈a karaha ty: “Koa haiko karaha in̈y, nalefako talohaloha fangatahan̈anaka.”

Baka Texas ndraiky Steven, 20 taon̈o. Karaha ty nivolan̈iny: “Nanjary hitako tsarabe fa miaraka miasa amy rahalahy erantany zaho. Iro io tsy vitany mazoto miasa, fa ten̈a ravoravo koa fa man̈ano zen̈y.”

Justin, tsaikilelahy 23 taon̈o, nivolan̈a: “Ten̈a mahatamana zaho amy Betela ato. Iro tia olo, misy jery, baka io iro jiaby kamarady.”

Mipetraka an̈y Porto Rico ndraiky, Adler 20 taon̈o. Karaha ty nivolan̈iny: “An̈isany raha sarotro taminaka taloha nifoha maraindrain̈y zen̈y. Kanefa, zaho koa fa navy tatỳ, zaho nahazo naman̈a vaovao, tsy zen̈y fo fa zahay nanjary kamarady mandrakizay.”

Ke tatrandro tamy fotoan̈a io edy ma asandro zen̈y? Ia, fotony tsy ampy fanjava aroe, efa vitandro asa jiaby. Tan̈atiny 55 andra fo iro efa nahavita nifindra.