Tanora Nampianarin̈y Raha Tokony Hatao Izikoa Ampijaliny Tsaiky a Lekoly
Misy tsaiky araiky, Hugo an̈arany ta Grande-Bretagne tan̈y, nahazo loka baka tamy fikambanan̈a pan̈ano asa soa. Tsaiky io nahay nan̈azava taminolo lekoly araiky aminany raha tokony hatao, izikoa ampijalinolo a lekoly.
Karaha ty nivolan̈iny Hugo: “Tamy videony Vavolombelon̈o Jehovah Akory Hatao Hiala Olo Mampijaly Kanefa Tsy Hamono Izy? amy jw.org ao fo nahavy zaho nahazo loka io.” Maro raha nianarako tamy video io, ke zaho nanjary nahay nan̈azava raha momba fampijalian̈a naman̈a io.
‘Fampijalian̈a tsaiky io misy erantany isanandra, fa ho vitanao fo hiatriky izio.’ (Volan̈a nalain̈y tamy video)
Papianatrandro antsendriky olo voanalohany nan̈aboahany Hugo video io. Lany fan̈ahy papianatra io, ke iro amy zay nan̈ano fotoan̈a nampizaha izio pianatra jiaby tao. Izioty, efa ankamarozany tsaiky valo taon̈o firaka folo taon̈o amy lekolindry Hugo io maharaka mizaha jw.org. Iro nivolan̈a fa maro raha haindro tamizio, tsy raha tokony hatao izikoa fa ampijaliny tsaiky fo fa momba fifidianan̈a kamarady koa, amy video Ahoana no Hahazoako Tena Namana? in̈y.
Fitaovan̈a Maro Han̈ampian̈a Tanora
Nisy tsaiky valo taon̈o tamy lekoly hafa koa ta Grande-Bretagne tan̈y, Elijah an̈arany. Iro jiaby tran̈o araiky nizaha video momba fampijalian̈a tsaiky in̈y. Iro baka tio niaraka nan̈ampody raha tokony hivolan̈iny ndreky raha tokony hatao, izikoa fa misy olo mampijaly. Baka tamy zen̈y nahavy Elijah natoky ten̈a tsarabe fa hahavita hiatriky raha manahiran̈a karaha zen̈y. Tsy ela, tan̈atiny fetiny herin̈iandrany fampijalian̈a tsaiky io, direkiterandry Elijah nan̈aboaka video tamy pianatra jiaby tao.
Tsy a Grande-Bretagne zaraiky fo misy tsaiky mampijaly naman̈a io, fa erantany. Ke video io ten̈a man̈ampy iro tanora ndreky iro tsaiky aby io.
Ta Etazonia koa, nisy tsaiky man̈angy araiky folo taon̈o, Ivie an̈arany, navozo tsaiky lekoly araiky aminany tia mampijaly izy. Ke izy koa fa baka nizaha video io, izy nanjary tsy navozo tsaiky nampijaly izy io eky. Nambarany papianatrandro raha ataony tsaiky io izy, ke papianatra io nan̈ano raha niarovan̈a Ivie. Farany tsaiky io nan̈ano azafady, ke izy ndreky Ivie nanjary fankahazo tsarabe.
Vavolombelon̈o Jehovah ten̈a mizaha raha mahatsara olo jiaby. Zahay mbala tsy voly man̈aboaka fan̈azavan̈a misy torohevitry maro tsara arehan̈a amy fiain̈ana, an̈isanizen̈y araiky momba fampijalian̈a tsaiky io.