Erantany, maro olo nahita hatsaran̈a baka tamy jw.org. Maro koa olo nandefa fankasitrahan̈a tamy foibeny Vavolombelon̈o Jehovah talohany May 2014, ke ty sasantsasany amy zen̈y:

“Zaho mananjanaka lelahy hely mbala mianatra. Isaka izy mody baka lekoly, izy tsy maintsy mitondra rahany namany fo. Misy izy mitondra crayon, soma hely. Indraiky andra, linety foeky nindesiny. Mamango zaho man̈azava aminany fa mangalatra mangala raha tsy nintena zen̈y ndreky ratsy mangalatra, fa tsy nahoany. Farany, nalainay tamy jw.org tao video Ratsy ny Mangalatra in̈y. Nisy vokany tsara taminany raha hitany tao. Ndray izy tihan̈ampody raha nalainy. Izioty, hikeny sain̈inay fa halany Zan̈ahary ankitin̈y mangalatra zen̈y. Ten̈a nan̈ampy zahay tranonkala io!”—D. N., Afrika.

“Tiany zanako mare tranonkala io. Iro matetiky mangala videony tsaiky aby io. Izio ten̈a nan̈ampy iro han̈araka toro lalan̈a amy Baiboly momba vandy ndreky halatra. Nanjary manan̈a toetry tsara hafa ilaindro amy fiain̈ana koa iro, ke iro nanjary ten̈a ilain̈y amy fiarahamonin̈y.”—O. W., Antilles.

“Rango zay zaho nieritreritry fa fianaran̈a zen̈y mandany lera. Ndray zaho efa tsaiky voly nianatra foeky. Tandraraiky zaho namaky lahatsoratra tamy jw.org tao. Titranany io ‘Tokony Tsy Hianatra Intsony ve Aho?’ Nanjary hitako tsarabe fa ilain̈y marin̈y fianaran̈a, fotony izio han̈ampy zaho hiatriky fiain̈ana aminy hoavy ndreky hahay handray andraikitry.”—N. F., Afrika.

“Maro torohevitry natao niny tanora amizio ao nampianatra zaho ho tsara fitondranten̈a izikoa fa a lekoly an̈y. Tao koa zaho nahita sosokevitry nan̈ampy zaho hifantoko tsara izikoa fa a lekoly fa tsy ho varian̈a amy raha hafa.”—G., Afrika.

“Nisy olo fiasan̈a araiky taminaka nitarain̈y fa nisy olo nampijaly zanany man̈angy ta lekoly tan̈y. Nisy tsaiky man̈angy araiky zen̈y tan̈y sefony fampijalian̈a zanany io. Nanjary nisy vokany ratsy tamy zanany raha zen̈y, fotony zanany io nanjary navozo mare isaka izy handeha lekoly, ndraiky izy tsy nan̈eky nandeha lekoly foeky tan̈atiny andra maromaro. Nikoran̈iko taminolo miaraka miasa aminaka io amy zay hevitry sasany hitako tamy sarisary Ahoana no Hanoherana ny Mpampijaly Nefa Tsy Hamono Azy? amy jw.org tao. An̈isany sosokevitry tiany, araiky mivolan̈a fa mila mahay mikidiky anao amy zay olo mampijaly anao io lany hevitry. Izikoa fa nikoran̈iny tamy zanany raha zen̈y, tsaiky io nanjary natoky ten̈a mare, baka io tsy dia nisy olo eky nampijaly izy ta lekolindro tan̈y. Ndray tsaiky man̈angy nampijaly izy zen̈y nanjary tsara fan̈ahy taminany ke!”—V. K., Eoropa Atinan̈iana.

“Mersy anaro nan̈ano lahatsoratra ‘Fa Maninona Aho no Lasa Mampijaly Tena?’ Izio an̈isany raha manahiran̈a zaho rango ela. Zaho nieritreritry fa zaho zaraiky fo tatrany raha karaha zen̈y fa tsisy olo hafa, ke raha zen̈y tsy nikoran̈iko taminolo foeky. Ten̈a nan̈ampy zaho lahatsoratra io. Kaiky mbala misy olo fo an̈y mahay raha mahazo zaho!”—Tsaiky man̈angy araiky mipetraka an̈y Ostralia.

“Nanjary mora taminaka nahita torohevitry momba problemony tanora rango nisiany jw.org io. Nisy lahatsoratra araiky zay nan̈ampy zaho hahay karakory mankadaly man̈angy zen̈y. Tsy nampoiziko foeky fa kaiky zaho ty mba avoany raha karaha zen̈y. Hitako tao koa raha tokony hataoko izikoa fa misy olo mankadala zaho.”—T. W., Antilles.

“Zanako lelahy farandraha tsaiky mihetsiky eky. Tsy haiko foeky raha hataoko izy ndraikindraiky, fotony miovaova be toetrinany sady tsy an̈atiny jerinao foeky raha mety hataony. Nanjary tsy nahay nifampikoran̈a eky zahay. Indraiky andra zaho nizaha raha tamy jw.org tao. Misy torohevitry natao ninolo fivadiany ndreky raimandreny ao. Nahita lahatsoratra tsarabe zay zaho nan̈ampy zaho hahita fomba hikoran̈ana tamy zanako. Ndray izy mba nahita hatsaran̈a baka tamy tranonkala io ke! Zahay izio mifampikoran̈a tsarabe, sady izy koa tsy misalasala foeky mikoran̈a aminaka raha mamparavoravo na mampiasa loha izy.”—C. B., Afrika.

“Tianay raimandreny foeky jw.org io, fotony misy fomba tsara indesinay mampianatra zanakanay amizio ao. Karaha ataony sarisary man̈azava ten̈a naman̈a in̈y izio ten̈a nan̈ampy zanakanay. Nanjary haindro olo karakory ten̈a naman̈a zen̈y. Haindro koa nifidy naman̈a mahavita mitariky iro han̈ano raha tsara. Matetiky, amy fotoan̈a ten̈a ilanay izy miboaka amy jw.org ao lahatsoratra aby io. Nan̈ampy zahay raha zen̈y hahita raha tokony hatao izikoa fa misy raha manahiran̈a zanakanay. Tsara aby torohevitry hita ao e!”—E. L., Eoropa.

“Efa tsiota taon̈o vadian̈anay. Zahay samy amy fomba fikoran̈anay na fahitanay raha, karaha olo fivadiany jiaby fo. Fa ny raha ten̈a tiako tamy zaho nizaha jw.org, lahatsoratra araiky zay. Titranany io ‘Henoy Tsara ny Vadinao.’ Koran̈inizio ao karakory mahay mitandren̈y zen̈y. Nivakiko tsarabe lahatsoratra io, baka io nikoran̈iko tamy vadiko. Zahay izio mifen̈y man̈araka torohevitry hitanay ao.”—B. B., Antilles.

“Efa taon̈o araiky zaho nifandray tamy Vavolombelon̈o Jehovah, ke ten̈a mankasitraka anaro zaho amy fisiany jw.org io. Maro raha nianarako tamy tranonkala io, an̈isanizen̈y karakory hatao izikoa fa meloko mare ndreky raha tokony hataoko baka zaho hanjary vady tsara ndreky baba be fitiavan̈a. Tsy asitriko anaro fa nan̈avotro tokantran̈onaka tranonkala io!”—L. G., Antilles.

“Nan̈ampy zaho ho ravoravo amy fiain̈ana ndraiky jw.org io. Nahay nitombo fo fahaizako teniny tanana, zaho koa fa nizaha video amy Teniny Tanana Amerikanina. Taloha zaho nieritreritry fa tsy afaka manakatra tanjon̈o zen̈y foeky amy fiain̈ana. Kanefa tafiditry tamy fonaka tsarabe raha hitako tamy video Efa Misy Amin’ny Fiteniko ny Tenin’Andriamanitra, ke izioty zaho nanjary tapakevitry fo hizaha lafy tsarany fiain̈ana.”—J. N., Afrika.

‘Ten̈a tsara tranonkala io. Man̈ampy olo maren̈iny baka asanaka, fa ny ten̈a marin̈y aminany, tanora maren̈iny. Maro raha efa avoadika amy teniny tanana amy tranonkala io, ke nanjary nahainitombo fo fahaizako teniny tanana. Izioty zaho mahavita mikoran̈a aminolo raha tokony hataondro izikoa tiandro ho tsara tokantran̈ondro ndreky fifandraisandro amy namandro.’—K. J., Antilles.

“Zaho io jamba, fa hitako nahatsara zaho jw.org. Maro fan̈azavan̈a azoko. Izikoa fan̈azavan̈a aby zen̈y nalefa posty, fanjava maromaro kony vo avy aminaka aty e! Tranonkala io nankatsara tokantran̈onaka, sady nahavy zaho hahavita han̈ampy olo. Zaho ndreky iro namako tsy jamba aby io mahazo fan̈azavan̈a amy fotoan̈a mitovy fo.”—C. A., Amerika Atsimo.

“Ten̈a man̈ampy olo tsy mahay mamaky soratra Braille, na olo tsy manambola hivanga boky amy soratra Braille jw.org io. Antena ndray jamba manjary maharaka fan̈azavan̈a farany fo, fotony maro raha nalain̈y feo ao. Ten̈a natao ninolo jiaby tranonkala io. Izio zaho mahita fa misy dikany sady ilain̈y amy fiarahamonin̈y fo zahay ndray jamba.”—R. D., Afrika.

“Izikoa anao mizaha tranonkala momba fivavahan̈a, maro volan̈a tsy mazava an̈aty ao. Pitariky fivavahan̈a fo mahazo raha koran̈iny. Tsy karaha zen̈y ndraiky tranonkalanaro io. Izikoa antena tototro fan̈azavan̈a, ndray raha hiraisin̈y tsy hita. Tranonkalanaro io ndraiky tsotra sady mivantan̈a fa tsy maro kabaro na feno filozofỳ. Hitako tamizio tao fa tsy sarotro aby man̈ano raha hanan̈ana finoan̈a zen̈y, fa olo jiaby mahavita man̈ano zen̈y, ndray olo tsotra.”—A. G., Azia.

“Mahinakinaka zaho mandiniky fiain̈ananaka izikoa tsy tio jw.org io. Tranonkala io mira jiro mazava amy donia mahiziky arapan̈ahy ty. Zaho koa fa tihamaky na tihitandren̈y lahatsoran̈a man̈azava volan̈a Zan̈ahary na valiny fan̈ontanian̈a momba fiain̈ana, efa io fo zahako.”—J. C., Antilles.

‘Zaho ravoravo fotony izio ten̈a man̈ampy zaho hifandray amy Zan̈ahary, ndray ankodahoda aty. Zaho kony mira olo very izikoa tsy tio tranonkala io e!’—M. F., Amerika Atsimo.