Mbala 6.45 maraindrain̈y andra a Tuxedo, New York. Tsara andra, baka io misy lagilasy matify mandrakotro farihy hely amy tanàna io. Misy lelahy ndreky man̈angy maro matanjaka man̈ano akanjo ndreky kiraro findesin̈y miasa, miditry amy tran̈o maventy araiky misy etazy efatra, marikitry farihy io. Iro io samy amy tany faviandro. Sasany mipetraka an̈y fo, sasany mitoby amy lotely. Misy koa baka a Patterson, Walkill, sasany baka a Brooklyn an̈y, mbala 80 kilometara baka a Tuxedo io.

Ankamarozandro io olo baka amy faritry Etazonia fo. Efa refindrefin̈y iro navy ta New York, hiasa antsitrapo. Sasany mahadin̈y herin̈iandra, sasany fanjava araiky sy tapany, misy koa mahadin̈y ela. Iro tompiny fo miantoko diandro, baka io koa iro io tsy karamain̈y miasa eto, fa iro ravoravo mare.

Kadiriny zato ropolo iro piasa antsitrapo tamy zen̈y, fa iro io mety mbala hiampy fo ato ho ato. Iro koa fa amy tran̈o fihinanan̈a, folo iro latabatra araiky. Ao iro migiaka kafe. Efa ren̈indro tono komankory efa man̈itry baka amy lakoziny. Isaka 7.00 maraindrain̈y iro miaraka mandiniky Soratra Masin̈y, fa iro fo man̈araka fan̈azavan̈a baka amy tele. Koa fa vita zen̈y, iro mihina. Mofo ndreky antody ndreky avoàny hanin̈indro miaraka amy tono komankory nangitry be in̈y. Zay hanin̈y e!

Iro koa fa baka mihina, iro mivavaka. Iro mandeha amy tany fiasandro. Iro amy zay koa fa alohany hiasa, iro misikiny raha jiaby miaro iro amy raha mety handratra na hamono, karaha ataony kasky ndreky linety. An̈atinizen̈y iro ravoravo mikoran̈a amy namandro.

Ino fo ma asa ataondro eto io? Karaha ty izy: Tany io hivoan̈a tany fan̈apitrahan̈a fitaovan̈a ndreky raha jiaby ilain̈y amy fan̈oren̈ana io. Teto taloha nisy Orinasa Iraisampirenena Pan̈amboatra Taratasy, fa izioty foibeny Vavolombelon̈o Jehovah haorin̈y a Warwick, tanàna tsy dia lavitry eto. Iro tran̈o aby efa teto aby io amy zay hatao tany ipitrahan̈a, biro, tran̈o fiasan̈a, ndreky magazay. Tomponandraikitriny fan̈ajarisan̈a tanàna efa nan̈eky plany tran̈o hatao eto, tamy talata 12 Marsy 2013 tio in̈y.

Tsara fandraisan̈a zay piasa antsitrapo avy eto. Karaha ty nivolan̈iny William baka New Jersey: “Miaraka anao avy a Tuxedo eto, efa ambarandro anao raha jiaby tsara hainao, karaha ataony tran̈o ipitrahanao ndreky fampiasan̈a lakile. Tsisy olo mihafahafa aminao. Isaka baka mihina maraindrain̈y, alohany anao hiasa, mila man̈aton̈o olo miandraikitry asanao antsendriky, ke izy amy zay man̈azava raha tokony hataonao.”

Karakory ma fiain̈anandro miasa eto? Misy olo fivadiany baka a Porto Rico an̈y, man̈ampy amy fan̈amboaran̈a riba plakoplatra. Karaha ty volan̈iny araiky man̈angy, Yajaira an̈arany: “Isanandra zahay mifoha 4.30 maraindrain̈y, mamafa tran̈onay ndreky migiaka kafe, baka io mitrapa bisy pangala zahay. Kajo mare zahay izikoa fa hariva andra, fa zahay fo ravoravo mare, fotony tokiky fo fiain̈ananay.”

Mbala feno atiala faritry Warwick io. Baka a Minnesota ry Zach ndreky Beth. Fivadiany iro io, man̈ampy amy fan̈amboaran̈a tany han̈anovan̈a fan̈oren̈ana io. Iro koa fa nan̈ontanian̈a antony naviandro atỳ, karaha ty nivolan̈iny Beth: “Zahay mino fa izikoa antena mbala velon̈o, tsisy raha tsara mandilatra manompo Jehovah, ke zen̈y mahavy zahay mampiasa fahaizan̈a hely anan̈anay anompoan̈a izy atỳ.”