Tanten̈anten̈any taon̈o 1999 ndreky 2015, kadiriny 5 000 Tran̈o Fivorian̈a niasainy Vavolombelon̈o Jehovah tan̈y Amérique Central * ndreky Meksiky. Baka ho ampy tsara tany fivorian̈a ampiasainy Vavolombelon̈o Jehovah ndreky olo hafa man̈aton̈o fivorian̈a amy faritry io, nisy 700 Tran̈o Fivorian̈a fan̈ampiny tsy maintsy namboarin̈y.

Taloha, sarotro tamy fiangonan̈a amy tany io nahita toeran̈a mety han̈oren̈ana tran̈o fivavahan̈a. Karaha ataony ta Meksiky, ankamarozany Vavolombelon̈o Jehovah nan̈ano fivorian̈andro tantran̈onolo, fotony tan̈atiny taon̈o maro, lalàn̈a tsy nan̈omba fivavahan̈a hivanga tany han̈oren̈ana tran̈o fivavahan̈a. Izikoa fa niova lalàn̈a io taminy 1990, nanomboko nan̈amboatra Tran̈o Fivorian̈a maro be iro Vavolombelon̈o Jehovah tan̈y. Sady matetiky iro koa fa man̈orin̈y izio, fanjava fo efa vita edy.

Nahainandroso fo tetikasa io taminy 1999, izikoa fa nisy Ekipy Pan̈amboatra Tran̈o Fivorian̈a nalefa nan̈orin̈y Tran̈o Fivorian̈a amy tany sahiran̈a, karaha ataony Meksiky ndreky tanàna fito an̈y Amérique Central. Nanomboko tamy 2010, sampan̈a ta Meksiky nan̈aramaso tetikasa fan̈oren̈ana tamy faritry jiaby io.

Ndray izy man̈ano zen̈y, maro raha sarotro niaretandro pan̈amboatra Tran̈o Fivorian̈a aby io izikoa iro fa nan̈ano asa io tamy tanàna mitokana. Ta Panama, iro tsy maintsy nandeha sambo kadiriny lera telo nan̈araka sisindranomasin̈y, zay vo navy tamy tany niasandro. Tamy Fanjakan̈any Chiapas an̈y Meksiky ndraiky, iro tsy maintsy nandeha avion madiniky izikoa fa nitondra fitaovan̈a nampiasaindro tamy fan̈oren̈ana tamy tany araiky mitokana sady lavitry.

Ndray iro olo tsy Vavolombelon̈o Jehovah aby io mba ravoravo nahita Tran̈o Fivorian̈a vaovao tamy tany nisy iro. Ohatra izio nisy lelahy araiky nipetraka ta Honduras nivolan̈a fa talohany iro Vavolombelon̈o Jehovah aby io nan̈orin̈y Tran̈o Fivorian̈a tamy tany io, maro olo tsaiky hivanga tany taminany han̈anovan̈a discothèque, fa izy tsy nan̈eky. Vavolombelon̈o Jehovah aby io amy zay koa fa nivolan̈a taminany fa tiandro hiasan̈a Tran̈o Fivorian̈a izio, izy nivolan̈a: “Tsisy hatsaran̈a bebenizen̈y!”

Amy tany maro ndraiky, maro olo gaga mahita Vavolombelon̈o Jehovah mazoto miasa. Nisy lelahy araiky ta Goatemalà nivolan̈a: “Amy fombanay, andakoziny fo asany man̈angy. Fa eto ndraiky, man̈angy man̈ano asany lelahy. Lany fan̈ahy zaho nahita man̈angy manambatra vy ndreky mipaindira riba. Tsy nampoiziko foeky!” Maro koa olo tantanàna nan̈atitry hanin̈y ndreky raha manintsinintsy nigiahindro pan̈amboatra Tran̈o Fivorian̈a aby io.

Maro koa olo gaga izikoa fa nahita fomba fan̈oren̈ana Tran̈o Fivorian̈antsika. Ta Nikaragoà, nisy enzeniera nivolan̈a tamy mairany tanàna tamy tany araiky fa ten̈a tsara fitaovan̈a ndreky fomba fan̈oren̈ana Tran̈o Fivorian̈a tamy tany io tao. Tsisy tran̈o tsara mandilatra io amy tanàna io.

Ia, ravoravo Vavolombelon̈o Jehovah manan̈a tran̈o tsara ampiasain̈y amy fanompoampivavahan̈a. Hitandro koa fa, ndray iro pianatra Baiboly aby io nanjary nazoto nan̈aton̈o fivorian̈a rango nivitany Tran̈o Fivorian̈a vaovao io. Nisy olo tamy fiangonan̈a ta Meksiky nan̈ampy iro pan̈amboatra Tran̈o Fivorian̈a aby io. Iro ten̈a nankasitraka asa io, ke iro samy nivolan̈a karaha ty: “Man̈ano mersy Jehovah zahay nambelany nan̈orin̈y Tran̈o Fivorian̈a tsara sady man̈amia voninahitry an̈aranany ty.”