Nan̈amia toromariky momba fandaharan̈a vaovao araiky, Filankevipitantan̈any Vavolombelon̈o Jehovah, tamy 2014, baka hitorian̈a hafatra amy Baiboly aminolo amy farany avaratrany Eoropa an̈y ndreky Amerika Avaratra. (Asan’ny Apostoly 1:8) Natao voanalohany antsendriky tany sasasany an̈y Alaska (Etazonia), Laponie (Failandy), Nunavut, ndreky Faritany an̈y Avaratrandrefa (Kanada).

Efa rango ela Vavolombelon̈o Jehovah nitory tan̈y amindro faritry mitokan̈a aby io. Kanefa iro matetiky mandalo betibetiky fo ndreky raha mandrasa boky momba Baiboly fo.

Izikoa fa natao fandaharan̈a vaovao io, nivolan̈a tamy pitory manontolo andra (pisava lalan̈a) baka handeha an̈y telo fanjava, farafaratsiny, birony sampan̈a miandraikitry asany Vavolombelon̈o Jehovah an̈y amy faritry avaratra. Ke amy zen̈y iro afaka mijanon̈o ela tsarabe sady afaka man̈ano fivorian̈a natao ninolo jiaby, izikoa misy olo maro tihianatra Baiboly an̈y.

Karaha tany jiaby, misy raha koa tsy mampamora asa fitorian̈a amy tany Avaratra an̈y. Nipetraka tan̈y amy faritry atsimony Kalifornia ndreky tan̈y Géorgie, an̈y Etazonia, pisava lalan̈a aroe voatendry handeha an̈y Barrow, an̈y Alaska. Nijotso 38 degre ambaniny zero (-36°F) tamperatira, tan̈atiny ririn̈iny voanalohany naviandro tan̈y. Tan̈atiny fanjava vitsivitsy fo ndraiky efa nila ho voatsidikindro tran̈o jiaby tamy tanàna io, sady nanomboko fampianaran̈a Baiboly efatra iro. An̈isanolo ampianarindro tsaiky lelahy araiky, an̈aranany John. Mianatra amy boky Ino ma Raha Ten̈a Ampianariny Baiboly? izy ndreky tsaiky man̈angy miaraka aminany. Koran̈iny John amy kamaradiny ndreky piaraka miasa aminany zay raha ianarany. Mampiasa programo JW Library amy telefoninany koa izy han̈anovany teny vakina isanandra amy Fandinihana ny Soratra Masina Isan’andro.

An̈atiny faritaniny Nunavut, an̈y Kanada ndraiky, misy tanàna araiky Rankin Inlet zay, ke tsisy lalan̈a mandeha an̈y. Nandeha ropilany tan̈y amy tanàna hely io pisava lalan̈a aroe, baka io nanomboko nampianatra Baiboly olo maro. Izikoa fa navy nizaha video Ino ma Raha Atao amy Tran̈o Fivorian̈a An̈y? lelahy araiky zay, nan̈ontany izy ombian̈a han̈oren̈ana Tran̈o Fivorian̈a amindro an̈y. Karaha ty koa raha nivolan̈iny: “Izikoa zaho mbala io, lera anaro man̈orin̈y Tran̈o Fivorian̈a an̈y, handeha hivory zaho.”

A Savukoski, an̈y Failandy, impolonisakanolo an̈y isakany serfa. Voatendry handeha an̈y pisava lalan̈a aroe ke nivolan̈a karaha ty iro: “Atỳ manintsy e! Sady misy lanezy oe.” Kanefa iro nikoran̈a fa tsara faviandro tan̈y. Iro roe lahy koa nivolan̈a: “Nahavita nikoran̈a taminolo jiaby zahay. Adosonolo lanezy amy lalan̈a mandeha ambanivolo ndreky tanàna lavitry. Ke olo tsy mandeha miboaka fotony manintsy be andra.”

Mahavarian̈a olo mahita atsika mifen̈y mitory hafatra baka amy Baiboly amy tany lavitry be avaratra an̈y. Nisy pisava lalan̈a aroe ohatra, nandeha nitsidika beny tanànany tany araiky tan̈y Alaska. Nitantara raha tsara momba raha nikoran̈indro beny tanàna io, tamy tranonkala araiky fandifasan̈a vaovao, sady nataony sariny trakty Ino ma Fanjakan̈any Zan̈ahary Zen̈y? tao.

Nan̈ano fivorian̈a tamy biblioteky fandiananolo maro pisava lalan̈a aroe tan̈y Haines, an̈y Alaska, ke nisy olo valo navy. Nisy gazety tamy tanàna io aby nikoran̈a, fa navy ao antanàna lelahy aroe baka Texas ndreky Caroline Avaratra, ke miangavy olo tsiaraikiaraiky ampianarindro Baiboly antran̈ondro an̈y. Karaha ty tamy farany raha io: “Midira ao amy jw.org izikoa mila fan̈ampiny fan̈azavan̈a.”