Tamy taon̈o 1987, Lyman Swingle, an̈isany Filankevipitantan̈any Vavolombelon̈o Jehovah, nikoran̈a taminolo mandeha 63 580, nivory taminy haramanjany Plaza Monumental ta Valencia, an̈y Venezoelà. Maro olo nandeha bisy nan̈iakandra, hitandren̈y izy. Karaha ty nivolan̈iny Rahalahy Swingle tamindro: “Amy zioty, sampan̈a misy anaro ty tsy zanakazanaka sampan̈a eky, fa efa vantombantony. Zaho matoky fa teteky io ho avy ‘100 000 pitory amy faritry misy anaro ty’!”

Tamy taon̈o 1987, efa nisy pitory 38 000 ta Venezoelà, ke iro io nazoto nikoran̈a taminolo vaovao tsara momba Fanjakan̈any Zan̈ahary. Tamy zen̈y, mbala tany valo fo nahatatra tamponisany pitory mandeha 100 000.

Mahagaga fa mahaimaro fo Vavolombelon̈o Jehovah erantany. Kanefa tafarany Ady Lehibe I, mbala andrivony fo iro nan̈ambara taminolo raha momba Fanjakan̈any Zan̈ahary. Tsy ela raha zen̈y niova. Amy Diariny Vavolombelon̈o Jehovah tamy taon̈o 1943 mivolan̈a karaha ty: “Marin̈y fa tsy feno tatitry nazontsika tamy taon̈o 1942, fotony mbala ratsy fomba fifandraisan̈a tamy zen̈y, kanefa ny raha hita, Jehovah mitahy asantsika. Izikoa tatitry erantany amy zioty zahan̈a, misy 106 000 Vavolombelon̈o Jehovah mitory vaovao tsara io erantany.” Ndray tamy fotoan̈any Ady Lehibe II, maro olo nanjary nan̈eky fahamarin̈ana amy Baiboly. Tamy taon̈o 1950, mandilatra 100 000 Vavolombelon̈o Jehovah nitory ta Etazonia fo.

Tamy taon̈o 1974, Nizeria tany faharoe nahatatra tamponisany pitory mandeha 100 000 io.

Tamy taon̈o man̈araka, mandilatra 100 000 isany pitory ta Brezila ndreky Allemagne. Nahitan̈a fitombosan̈a aby tamy kontinanta efatra. Hita baka amy zen̈y fa ten̈a tianolo fahamarin̈ana amy Baiboly io, na aia na aia tany misy olo.

Mahaimitombo fo olo nan̈eky vaovao tsara io erantany. Zen̈y raha koran̈iny Baiboly aminy Isaia 60:22: “Ny vitsy ho loso arivo, baka io ny hely hanjary firenena mahery. Zaho, Jehovah, han̈ano raha hampalaky zen̈y amy fotoan̈any.”

Izikoa zahan̈a tatitry nazo tamy taompanompoan̈a 2014 farany tio in̈y, mandilatra 100 000 pitory amy tany 24. An̈isanizen̈y Venezoelà, fotony tamy taon̈o 2007 efa tatrandro tamponisa io. Amy zioty, efa ho 8 201 545 totaliny Vavolombelon̈o Jehovah amy fiangonan̈a misy 115 416 erantany.