Iro pianatra aby tamy kilasy faha-136 io nandalin̈y Baiboly tan̈atiny dimy fanjava. Tamy sabotsy 8 Marsy 2014 in̈y firasan̈a diplomindro. Tamy fianaran̈a io, Vavolombelon̈o Jehovah efa zadraraha aby io nianatra fomba ten̈a tsara han̈anovan̈a fanompoan̈a, ndreky fomba hankafataran̈a finoan̈any Vavolombelon̈o Jehovah karaha iro. Olo 11548 nan̈aton̈o izio tan̈y, an̈atinizen̈y iro tamy tany nan̈anovan̈a izio ta Patterson a New York an̈y, ndreky olo aby nan̈araka izio tamy video ta Kanada, Jamaiky, Porto Rico, ndreky Etazonia.

“Irarian̈a Toetsain̈y ty Tsy Hiala Aminaro.” David Splane, an̈isany Filankevipitantan̈any Vavolombelon̈o Jehovah, panolotro fandaharan̈a. Nalainy baka tamy Filipianina 2:5-7 kabaro nataony. Koran̈inizio ao: “Irarian̈a toetsain̈y ty tsy hiala aminaro, fotony Kristy Jesosy mba nanan̈a izio koa.” Tamy Jesosy tambony tany teto, izy tsy nieritreritry toeran̈anany foeky. Nanetry ten̈a izy, baka io nazoto nan̈ano asany Zan̈ahary.

Ohatra, Devoly koa fa nitsapa finoan̈any Jesosy, izy nangala volan̈a tamy kabaro nataony Mosesy tamindro Israelita aby io. Isaka Devoly nitsapa finoan̈anany, izy nivolan̈a karaha ty: “Karaha ty voasoratra ao.” (Matio 4:4, 7, 10; Deoteronomia 6:13, 16; 8:3) Jesosy tsy nitoron̈o izy Zanaka Zan̈ahary, izikoa fa namaly volan̈a Satana, fa nanetry ten̈a, ke ten̈a nankasitraka asany Mosesy. Atsika koa tokony han̈eky fa tsy atsika zaraiky fo mahay raha, ke tokony hidera namantsika koa.

Nazavainy Rahalahy Splane koa toetsain̈iny Jesosy, tamy faramparany fiofan̈any tambony tany teto. Jesosy nivavaka karaha ty: “Zaho efa nan̈amia voninahitry anao, fotony efa vitako aby asa jiaby nan̈irahanao zaho tambony tany teto. Ke izioty Baba andan̈itry an̈y, amia voninahitry an̈ilanao zaho, voninahitry araiky nanan̈ako tan̈ilanao, talohany nisiany zao tontolo zao.” (Jaona 17:4, 5) Jesosy tsy nitady tombontsoa fan̈ampiny nanan̈any. Raha nangatahiny taminio, tiany izy hampody amy toeran̈anany taloha, izy koa fa tafipody andan̈itry an̈y. Karaha zen̈y koa iro nan̈ano Sekoliny Gileada io, tokony ho von̈ono han̈ano asa irahin̈y ataondro, fa tsy hieritreritry toeran̈andro. Tokony ho afapo fo iro, ndray tsy hahazo tombontsoa fan̈ampiny efa namian̈a iro, koa fa avy amy tany andifasan̈a iro an̈y.

“Aza Manen̈iny amy Raha efa Nialanaro.” William Malenfant, pan̈ampy amy Komitiny Fampianaran̈a amy Filankevipitantan̈ana, nandrisiky iro pianatra aby io hahafoe ten̈a, karaha nataony apostoly Paoly. Maro raha nialany Paoly, izy koa fa nanompo Jehovah. Ndray izy nan̈ano zen̈y, izy tsy niasa loha tamy raha nialany aby zen̈y. Karaha ty nivolan̈iny: “Man̈adin̈a raha efa nialan̈a ndreky mifen̈y manakatra ny aloha.”—Filipianina 3:13, 14.

Han̈ano karaha olony Zan̈ahary taloha tan̈y ndreky aminandra izioty iro pianatra aby io, izikoa tsy manen̈iny amy raha efa nialandro. Rahalahy Malenfant, nikoran̈a momba Clara Gerber Moyer. Izio nanompo Jehovah, rango izy mbala hely. Karaha ty nivolan̈iny ranabavy io: “Tsy nanen̈iny foeky zaho nanokanten̈a hanompo Jehovah, tan̈atiny 80 taon̈o zay. Ten̈a tombontsoa izio, ke izikoa mbala mety ampody edy, zaho mbala von̈ono han̈ano karaha in̈y koa!”

“Mitory Momba Fanjakan̈a io Miaraka Aminy Anjely Ndreky Mira Anjely.” Gerrit Lösch, an̈isany Filankevipitantan̈ana, nan̈azava tamy pianatra aby io tombontsoa aroe anan̈anolo pitory. Voanalohany, iro mira anjeliny Zan̈ahary, izikoa fa mitory momba vaovao tsarany Fanjakan̈any Zan̈ahary. Amy Baiboly ao, dikany “anjely” zen̈y, “pitondra hafatra” koa. Faharoe, anjely mitariky fitorian̈a ataony pianatra aby io, karaha tamy Filipo in̈y.—Asan’ny Apostoly 8:26-35.

Nitantarainy Rahalahy Lösch baka tio raha hitany Vavolombelon̈o Jehovah sasany tamy fitorian̈a. Ohatra, misy pitory araiky a Meksiky an̈y, Gabino an̈arany. Izy taloha koa fa mandeha mitory, indraiky indroe fo izy mikonkon̈o varavaran̈anolo. Tandraraiky ndraiky, inefatra izy nikonkon̈o tran̈o araiky. Lelahy tantran̈o io efa tsaiky hamono ten̈a. Izy koa fa niboaka, karaha ty nivolan̈iny tamy Gabino: “Anao koa tsy navy, hotrizay zaho efa naty! Hitanao, taminy fan̈inefatra anao nikonkon̈o in̈y, tendanaka efa nifehy. Namaha izy antsendriky zaho, zay vo nan̈abian̈a varavaran̈a. Mersy anao tsy voly nikonkon̈o e!”

Marin̈y ndraiky fa mety ho raha nifananjò fo naviany pitory io, izikoa tantara karaha zen̈y zahavan̈a. Haintsika baka amy zen̈y koa fa anjeliny Zan̈ahary ankitin̈y mitariky asa fitorian̈a io, fotony maro tantara karaha in̈y mankamarin̈y zen̈y.—Apokalypsy 14:6.

“Hitahin̈y Araiky Nahazo Voninahitry In̈y.” Nan̈azava fotokevitry io Michael Burnett, an̈isany papianatra tamy sekoly io. Nikoran̈a momba Jabeza, taranaka Joda izy, fotony izio “nahazo voninahitry mandilatra rahalahiny aby io.” Karaha ty vavakanany: “Anao koa hitahy zaho ankitin̈y, ke han̈itatra faritaninaka, tan̈anao tsy hiala aminaka, baka io anao hiaro zaho tsy ho voa raha, ...”—1 Tantara 4:9, 10.

Mety man̈ano karaha zen̈y koa iro pianatra aby io, izikoa fa mivavaka. Tokony ho voafaritry tsarabe vavaka ataondro amy Jehovah, baka izy han̈ampy iro han̈atanteraka tanjon̈o fianaran̈a io. Tsara koa iro mivavaka baka harovany Jehovah. Ino ma dikanizen̈y? Mangataka izy han̈ampy iro tsy halahelo mare ndreky tsy ho kivy mare amy raha ratsy mety misy amy donia ty, fa tsy hangataka Jehovah hiaro iro tsy ho voa raha foeky. Karaha nataony Jehovah namaly vavaka Jabeza in̈y, izy koa hamaly vavakandro pianatra aby io.

“Ambilà Mirehitry fo Motronaro.” Nalain̈y tamy 1 Tesalonianina 5:16-19 kabaro nataony Mark Noumair, papianatra sady pan̈ampy amy Komitiny Fampianaran̈a. Misy raha telo mitana motro mirehitry fo: Tsiko, lesansy, fana. Misy raha telo koa ilainy pianatra aby io baka iro hazoto fo amy fanompoan̈a.

Voanalohany, “miravoravoa fo.” (1 Tesalonianina 5:16) Ho ravoravo pianatra aby io, izikoa mieritreritry fa Jehovah mankasitraka iro. Fitahian̈a tsisy ambaka izy zen̈y. Izio mira lesansy, fotony mahavy iro mazoto manompo. Faharoe, “aza voly mivavaka.” (1 Tesalonianina 5:17) Vavaka io ndraiky mira tsiko mitana motro in̈y. Tokony lavalava vavaka ataontsika, izikoa fa mikoran̈a amy Jehovah raha an̈aty fontsika. Fahatelo, “misaora izy amy raha jiaby.” (1 Tesalonianina 5:18) Izikoa atsika tia mankasitraka Jehovah, hafana fihavan̈antsika aminany ndreky amy rahalahintsika aby io. Rahalahy Noumair nivolan̈a karaha ty: “Mahaiza mankasitraka fo, fotony zen̈y mira fana. Aza tia mankaratsy, fotony izio mira nintsy mare in̈y fo.”

“Midera Jehovah Miaraka amy Lan̈itry.” An̈isany papianatra koa Sam Roberson. Hevitry baka tamy Salamo nanombohany kabaronany. Izio mikoran̈a momba masoandra, fanjava ndreky lakintan̈a. (Salamo 19:1; 89:37; 148:3) Nivolan̈iny fa tombontsoa hanan̈any pianatra aby io koa, midera Jehovah. Baka tio, nirahiny nampodindro pianatra aby io tamy sehatra raha hitandro tamy fitorian̈a. Ty misy ohatra araiky: Nisy pianatra araiky nitondra tomobily, ke nisy lelahy araiky mandeha amy sezy misy laroa nitsaka lalabe. Najanon̈o pianatra io tomobilinany, lelahy io koa fa nitsaka. Lelahy io nan̈ano mersy izy, baka io izy koa nan̈ano mersy lelahy io. Nitohy koran̈andro, ke nan̈eky nianatra Baiboly lelahy io. Tsy man̈efa mianatra Baiboly io. Nahavita nitory taminolo namangy lelahy io tao koa pianatra io, tan̈atiny herin̈iandra maromaro. Olo fito aby nianatra Baiboly, tamy farany.

“Ampianariny Zan̈ahary ke Man̈ody Matanjaka Fo.” Donald Gordon an̈isany pan̈ampy amy Komity Miandraikitry Asa Fan̈anovan̈a Pirinty, nan̈adikadin̈y pianatra fivadiany aroe. Araiky tamindro efatra io nivolan̈a fa nipodipody tamy fianaran̈a io Efesianina 3:16-20. Nankafatatra iro ankitin̈y fahaizan̈a izio, fotony mandrisiky iro hanetry ten̈a, tsy hiavon̈o ndreky han̈eky fa mbala maro asa tiany Jehovah hampan̈anovin̈y Vavolombelon̈o Jehovah tsiaraikiaraiky. Nivolan̈a koa araiky tamindro nadikadin̈iny io fa nisy papianatra nandrisiky iro hitombo mira loko an̈aty ranomasin̈y, fa tsy han̈ano karaha loko tarimin̈y an̈aty bakoly, ke tsy mitombo eky. Nivolan̈iny karaha ty: “Misy fianaran̈a nazoko baka tamy zen̈y. Mila manetry ten̈a fo zaho, baka ampiany fandaminany Jehovah hitombo arapan̈ahy.”

“Irarian̈a Jehovah Hahatsiaro Anao ke Hankasitraka Anao.” Mark Sanderson, an̈isany Filankevipitantan̈ana, nan̈ano kabaro fototro nan̈azava momba vavaka nataony Nehemia ty: “Tsarova zaho Zan̈ahariko ô! Anò hahazo sitraka aminao zaho.” (Nehemia 5:19; 13:31) Nehemia tio tsy raha navozo tsao fo hadin̈any Jehovah fanompoan̈a jiaby nataony, fa izy nangataka Jehovah hahatsiaro izy, ke hankasitraka ndreky hitahy izy.

Pianatra aby io koa man̈araka tsarabe raha nianarandro, iro hatoky koa fa Jehovah hahatsiaro iro, ke hankasitraka ndreky hitahy iro. Ohatra, tokony ho fitiavandro Jehovah amy fo jiaby, raha voanalohany mahavy iro hivavaka aminany. (Marka 12:30) Abrahama tia Jehovah tamy fonany jiaby. Jehovah koa tia Abrahama, ke nahatsiaro izy. Efa arivo taon̈o tafarany nifatesany, Jehovah mbala nivolan̈a fa Abrahama io mbala kamaradinany.—Isaia 41:8.

Rahalahy Sanderson baka tio nampatsiaro pianatra aby io ho tia namandro, indrindraka fa rahalahindro ndreky anabavindro kristianin̈y. (Marka 12:31) Iro tokony han̈ano karaha Samaritany tsara fan̈ahy, nifen̈y hanjary kamaradiny lelahy nitafihiny dahalo in̈y, ke hifen̈y han̈ampy zay olo tokony hampian̈a. (Lioka 10:36) Nikoran̈iny tamy zen̈y Nicholas Kovalak, misionerany Gileada ndreky efa navy piandraikitry vondroparitry taloha. Izio olo malaza tsara fan̈ahy ndreky ten̈a tia olo. Nandrisiky piandraikitry pitety faritany araiky ndreky vadiny koa izy, indraiky andra, ke nivolan̈a tamindro fa tsara izikoa iro manomboko man̈ano fanompoan̈a “aloha fo isanandra, isaka herin̈iandra, isaka fanjava ndreky isaka taon̈o.” Izy amy zay koa fa nandiniky ranabavy io tan̈atiny andra vitsivitsy, izy nivolan̈a karaha ty: “Kaza jiren̈y raha nivolan̈iko in̈y, ranabavy, fotony anao efa man̈ano mare amy fanompoan̈a. Aza adin̈a fa zay ‘mandeha mora fo mahazo lavitry.’ Ke zen̈y fo ataova, izikoa tianao hahadin̈y amy fanompoan̈a.” Ten̈a nan̈ampy ranabavy io torohevitry feno hatsarampan̈ahy io, ke tan̈atiny taon̈o maro izy nan̈ano fanompoan̈a manontolo andra.

Nandrisiky iro pianatra aby io koa Rahalahy Sanderson, baka iro han̈atanteraka tanjon̈o fianaran̈a nataondro io, ke hampianatra ndreky hampiofan̈a olo hafa koa. (2 Timoty 2:2) Iro hahavita hankafatatra ndreky hankahery iro olo aby amy fiangonan̈a amy tany handifasan̈a iro an̈y, ke matoky fa hankasitraka iro Jehovah, izikoa fa hahatsiaro iro.—Salamo 20:1-5.

Famaran̈ana: Izikoa fa vita firasan̈a diplomy, nisy solonten̈any pianatra aby io namaky taratasy fisaoran̈a. Farany amy zay, nisy pianatra 15 nan̈ano hira faha-123, “Lehilahy ho Fanomezana Ireo Mpiandry”, amy boky Mihirà ho An’i Jehovah.