Tamy 5 ndreky 6 Oktobra 2013, nisy 1413676 olo tamy firenena 31 nan̈aton̈o fivorian̈a faha-129 nataony fikamban̈ana Watch Tower Bible and Tract Society of Pennsylvania io. Sasany tamindro io nan̈araka mivantan̈a programo io tamy Tran̈o Fan̈anovany Vavolombelon̈o Jehovah Fivoriambe ta Jersey City, an̈y Etazonia. Sasany ndraiky nan̈araka programo io baka tamy video nalefa taminy Internet.

Guy Pierce, an̈isany Filankevipitantan̈any Vavolombelon̈o Jehovah, nanolotro fandaharan̈a. Efa tsy din̈inolo jiaby haharen̈y fan̈azavan̈a, fotony nivolan̈a izy fa hisy fan̈ontanian̈a maventy momba Baiboly ndreky fahamarin̈ana hazavain̈y ao. Hisy hanin̈y arapan̈ahy “amy fotoan̈a mety” koa ho hita ao.—Matio 24:45; Ohabolana 4:18.

“Fampisehoan̈a Man̈amia Voninahitry Jehovah.”

Mark Sanderson, an̈isany Filankevipitantan̈ana, nan̈azava fisiany fampisehoan̈a amy foibeny Vavolombelon̈o Jehovah a Brooklyn, Etazonia an̈y io. Lohateniny fampisehoan̈a io: “Baiboly Ndreky An̈aran̈a Zan̈ahary.” Nazavainy tamy zen̈y fa an̈aran̈a Zan̈ahary io tokony ho hita amy Soratra Hebreo ndreky Soratra Griky Kristianin̈y. Tsy zen̈y fo fa hita ao koa Baiboly maro efa kay ndreky raha sasany efa nikajy ela tan̈y, baka io paziny Baiboly efa nisy rango tamy taon̈o 500-1500 tan̈y.

An̈isany raha mampiavaka izio koa paziny Baiboly maromaro nadikany William Tyndale tamy taon̈o 1500 tan̈y. William Tyndale voanalohany nampiasa an̈aran̈a Zan̈ahary tamy Baiboly nadikany tamy volan̈a angiley. Misy pazy araiky koa ao, ahitan̈a an̈aran̈a Zan̈ahary “Iehova” amy Baiboly nadikany Reina Valera, tamy volan̈a espaniola, tamy taon̈o 1602 tan̈y. Misy Baiboly hafa koa aboaka ao, karaha ataony Baiboly Maventy (natao pirinty tamy taon̈o 1549) ndreky Baiboly nadikany Elias Hutter. Amy Baiboly nadikany Hutter io ahitan̈a toko ndreky andininy miaraka miboaka amy volan̈a 12 (naboaka taminy 1599, Polyglotte de Nuremberg an̈arany), ndreky Baiboliny Genève (natao pirinty tamy taon̈o 1603). Baiboly aroe io samy ahitan̈a an̈aran̈a Zan̈ahary.

Rahalahy Sanderson amy zay nandrisiky olo jiaby han̈ano programo handeha hizaha tany misy izio a Etazonia an̈y. Karaha ty nivolan̈iny: “Mangataka amy Jehovah zahay ... baka izio han̈ampy olo tsara fo jiaby, na tanora izy na matoe, na nandeha lekoly na tsy nandeha, ho tia mare raha aroe ten̈a tiantsika: Baiboly Volan̈a Zan̈ahary, ndreky an̈aran̈a Zan̈ahary Jehovah io.”

Fotokevitriny Taon̈o 2014.

Gerrit Lösch, an̈isany Filankevipitantan̈ana, nan̈ano Famintin̈ana Tilikambo Fiambenana fianaran̈a taminy herin̈iandra io. Vita zen̈y, Rahalahy Pierce nan̈ambara fotokevitriny taon̈o 2014. Izio nalain̈y tamy Matio 6:10, mivolan̈a karaha ty: “Irarian̈a ho avy fanjakan̈anao.” Fotokevitry io ndraiky mety atao isaka taon̈o, fa tamy taon̈o ty fo nifidin̈y izio, fotony feno 100 taon̈o amy 2014 ty nioren̈any Fanjakan̈any Zan̈ahary io tandan̈itry tan̈y.

“Kado Ten̈a Tsara Baka amy Zan̈ahary.”

Tafaranizen̈y, olo jiaby nan̈araka fandaharan̈a tao nizaha video momba tantarany Fandikan-tenin’ny Tontolo Vaovao. Izio Baiboly naboakany Vavolombelon̈o Jehovah. Maro olo mankasitraka izio, fotony iro mivolan̈a fa mazava tsarabe zen̈y fandikanteny io. Tamy Fivoriambe Iraisampirenena tamy 1950, Nathan Knorr nan̈aboaka voanalohany tapany tamy fandikanteny io. Lohateniny fivoriambe io tamy zen̈y “Mamokatra Asany Zan̈ahary.” Ty misy koran̈a nataony tamy zen̈y, mbala mahatsara atsika firaka izioty: Vakia rango amy voanalohany firaka amy farany Baiboly io, ianara izio, baka io ampia olo hafa hianatra izio, amy zen̈y iro hikaiky an̈aran̈a Jehovah.

“Mahatsiarotsiaro ny Taloha.”

Samuel Herd, an̈isany Filankevipitantan̈ana, nan̈azava izio. Nisy sary misy fan̈adikadin̈ana olo efatra nahita fan̈aboahan̈a boky tsiota tamy Fandikan-tenin’ny Tontonlo Vaovao voanalohany, tan̈elan̈elan̈a taon̈o 1950 ndreky 1960. Iro efatra io an̈isanolo manompo amy Betelany Etazonia an̈y.

Eunice Timm nitantara fomba nampiasany Fandikan-tenin’ny Tontolo Vaovao io tamy fivorian̈andro. Tiany mare fomba fan̈anovan̈a fikarohan̈a aby tao, an̈isanizen̈y fanondroan̈a andininy hafa. Nivolan̈a fo izy fa nanahiran̈a nitondra boky tsiota aby io isaka mandeha mivory, ke zay ten̈a niasa tamindro fo nindesiny. Izy koa nitondra Baiboly hely tandry poso, Dikan-tenin’ny Panjaka Jacques an̈arany, fampiasainy izikoa fa misy andininy hafa tsy nampoizin̈y nivakindro tan̈y.

Nankatsara fanompoan̈a Jehovah koa Baiboly vaovao io. Ohatra, Fred Rusk nitantara fa talohany taon̈o 1950 tan̈y, olo nisolo ten̈a fianakavian̈any Betela koa fa nivavaka, nampiasa volan̈a baka tamy Dikan-tenin’ny Panjaka Jacques, kanefa volan̈a io efa tsy fampiasainolo. Raha nisy fo, tsy ela tafarany niboahany Fandikan-tenin’ny Tontolo Vaovao io, iro efa tsy nampiasa volan̈a taloha in̈y eky, fa nampiasa volan̈a fampiasainolo andavanandra baka tamy Fandikan-tenin’ny Tontolo Vaovao.

John Wischuk ndraiky nivolan̈a fa tsy hatsaran̈any Baiboly io fo raha nampagaga izy, fa toetrindro an̈isany Komitiny Fandikan̈a Baiboliny Tontolo Vaovao io koa. Iro ten̈a nanetry ten̈a. Karaha ty nivolan̈iny: “Tsy tiandro ho hainolo foeky an̈arandro, na iro velon̈o na iro efa maty. Amindro, Jehovah zaraiky fo tiandro hamian̈a voninahitry.” Farany, Charles Molohan nisolo ten̈a iro jiaby nivolan̈a karaha ty: “Nan̈ampy zahay hatoky fahamarin̈ana tamy fonay jiaby Fandikan-tenin’ny Tontolo Vaovao io sady nankafatatra finoan̈anay, ke nanjary nahavita nan̈ampy olo hankafatatra finoan̈andro koa zahay.”

“Iro mivolan̈a amy volan̈antsika momba asa mahagaga nataony Zan̈ahary.”

(Asan’ny Apostoly 2:11) Geoffrey Jackson, an̈isany Filankevipitantan̈ana nan̈ano kabaro io, ke naboaka taminio Fandikan-tenin’ny Tontolo Vaovao navaozin̈y, amy volan̈a angiley. Koa fa vita kabaro io, olo jiaby navy tao samy nahazo Baiboly araiky. Nahazo koa ankamarozandro nan̈araka programo io tamy video.

Rahalahy Jackson nivolan̈a fa efa mandilatra 60 taon̈o zay niboahany boky voanalohany tamy Fandikan-tenin’ny Tontolo Vaovao io. Tan̈atiny fotoan̈a lavabe zen̈y, efa maro volan̈a miova aminy angiley io, fa kanefa tanjon̈ontsika mandika Baiboly mbala tsy niova, handika Volan̈a Zan̈ahary io arabakiteny, izikoa mbala mety fo, fa tsy han̈ova hevitry Zan̈ahary.

Nanomboko tamy taon̈o 2005, Filankevipitantan̈ana mbala nandrisiky mare handikan̈a Baiboly io amy volan̈a isankarazany. Izioty, Fandikan-tenin’ny Tontolo Vaovao io efa misy amy volan̈a 121 karazany, fa talohanizen̈y mbala 52 fo. Mbala misy volan̈a 45 karazany koa izioty efa nanomboko nandikan̈a izio. Pandika teny aby io koa fa nandika Baiboly io, iro nan̈ontany dikany volan̈a sasany amizio ao. Mandilatra 52000 fan̈ontanian̈andro nazo ndreky nivalin̈y. Hita baka tamy fan̈ontanian̈a aby io fa ten̈a mila havaozin̈y Fandikan-tenin’ ny Tontolo Vaovao amy volan̈a angiley io.

Ohatra araiky nikoran̈iny tamy zen̈y 1 Samoela 14:11. Izikoa tamy fandikanteny taloha, mety ho ratsy fandraisanolo volan̈a nampiasain̈y tao ivolan̈ana fa Jonatana ndreky olo pitondra raha fandesiny miady nandeha tamy tobiny Filistiny. Ke amy Baiboly navaozin̈y io, nivoan̈a volan̈a hafa, mazava tsarabe amy 1 Samoela 14:11 ao. Nadika arabakiteny koa Mika 2:6 amy Baiboly taloha. Karaha ty raha voasoratra ao: “Aza ambelanaro vahoaka ho hisy volan̈a latsaka. Nambelandro ho latsaka foeky volan̈a.” Aminy araiky navaozin̈y io ndraiky, izio nivoan̈a karaha ty: “Iro nitory karaha ty: ‘Aza mitory eky!’”

Filankevipitantan̈ana nanendry komity araiky hiandraikitry fan̈aboahan̈a Fandikan-tenin’ny Tontolo Vaovao io tamy volan̈a angiley, efa dimy taon̈o loso zay, ke hita fa ten̈a nahomby izio. Baiboly navaozin̈y io tsy vitany tsara sora fo fa mora vakin̈y, fatatra ndray efa ampiasain̈y matetiky. Nambarany Rahalahy Jackson koa fa ho vita tsy ho ela Fandikan-tenin’ny Tontolo Vaovao amy volan̈a angiley amy soratra maventy ndreky araiky madiniky tandry poso in̈y.

“Man̈azava volan̈any fahamarin̈ana io eraka ny marin̈y tsarabe.”

Nalain̈y baka tamy 2 Timoty 2:15 fotokevitry io, ke Stephen Lett, an̈isany Filankevipitantan̈ana nan̈azava izio. Dikany “man̈azava eraka ny marin̈y tsarabe” zen̈y, “manapaka mahitsy.” Dikanizen̈y, mila atao mahitsy, na marin̈y tsarabe, “sabatrany fan̈ahy” io. (Efesianina 6:17) Nivolan̈a Rahalahy Lett tamy zen̈y fa man̈ampy atsika hahavita zen̈y raha mampiavaka Baiboly vaovao io.

1. Voanalohany koran̈a amy Baiboly io: Misy toko ndreky andininy maro baka amy Baiboly mamaly fan̈ontanian̈a 20 momba raha ten̈a ampianariny Baiboly.

2. Fan̈ampiny Fan̈azavan̈a A: Miavaka Baiboly io, fotony nivoan̈a fomba fanoratan̈a ao ndreky volan̈a ampiasain̈y. Koran̈iny ao koa raha momba fampiasan̈a an̈aran̈a Zan̈ahary.

3. Fan̈ampiny Fan̈azavan̈a B: Misy fizaran̈a 15 miaraka sarintany ndreky sary maro misy kolera, ilain̈y koa fa man̈ano fianaran̈a manokan̈a ndreky mampianatra olo.

4. “Topy Maso”: Isaka amy voanalohany amy boky araiky amy Baiboly ahitan̈a izio, mamintin̈y raha koran̈iny boky io, baka io man̈ampy olo mamaky mba malakilaky mahita zay toko tiany zahavan̈a. Izio solony lohateny an̈abony pazy tamy Baiboly araiky taloha in̈y.

5. “Fan̈azavan̈a Volan̈a amy Baiboly Ato”: Misy dikany volan̈a mandilatra zato ampiasain̈y amy Baiboly ao.

6. “Fanondroan̈a Volan̈a amy Baiboly Ato”: Maro iro tao nadoso. Lan̈iany volan̈a, toko ndreky andininy ten̈a fampiasain̈y lera mivory ndreky mitory fo natao ao.

7. Fanondroan̈a andininy hafa: An̈ivony pazy ahitan̈a izio. Nahen̈y koa isanizio. Zay ten̈a ilain̈y amy fanompoan̈a fo natao ao.

8. Lamariky amy pazy ambany: Hita ao fomba hafa mety andikan̈a volan̈a io, na dikany volan̈a arabakiteny, na fan̈azavan̈a hafa mifandray aminy andininy in̈y.

JW Library.

John Ekrann, an̈isany Komitiny Sampan̈a an̈y Etazonia an̈y nan̈azava raha momba programo vaovao io. Izio mety ampiasain̈y amy fitaovan̈a elektroniky, karaha ataony tablette ndreky smartphone. Programo io ahavitan̈a mizaha Fandikan-tenin’ny Tontolo Vaovao navaozin̈y amy volan̈a angiley, baka io koa ahavitan̈a mizaha fandikanteniny Baiboly dimy hafa koa. Izio niboaka tamy 7 Oktobra 2013, baka io tsy man̈efa mangala izio.

“Karakory ma Nandikan̈a Baiboly io Baka Miboaka Tsarabe Ten̈a Hevitry An̈aty Ao?”

Anthony Morris, an̈isany Filankevipitantan̈ana nan̈azava raha maro momba raha fataondro Komitiny Fandikan̈a Baiboliny Tontolo Vaovao io. Iro io nan̈araka raha koran̈iny amy 1 Korintianina 14:8, 9 amy zen̈y tsy sarotro aminolo mahay dikany volan̈a amy Baiboly haboaka io. Iro tsy mandika arabakiteny, izikoa hitandro fa mety hampadiso dikany volan̈a ao zen̈y.

Ohatra araiky amy zen̈y, amy Genesisy 31:20 ty, izikoa adika arabakiteny: “Jakoba nangalatra fony Labana.” Tsy mira dikany volan̈a io amy volan̈a angiley ndreky amy volan̈a hebreo. Zen̈y nahavy Fandikan-tenin’ny Tontolo Vaovao angiley navaozin̈y: “Jakoba namitaka Labana.” Mira zen̈y koa 1 Korintianina 7:39. Karaha ty dikany arabakiteny: Izikoa “matoro” vadiny man̈angy araiky, izy mahazo manambady zay lelahy tiany. Baka miboaka tsarabe ten̈a hevitry, amy Baiboly angiley navaozin̈y io, “matoro amy fahafatesan̈a” nandikan̈a izy, fotony ndraikindraiky amy Baiboly, “toromaso” koa ivolan̈ana fahafatesan̈a.

Karaha ty nivolan̈iny Rahalahy Morris: “Volan̈a fampiasainolo andavanandra fo nanoratan̈a Baiboly io, volan̈anolo pamboly ndreky piambin̈y ondrikondriky, baka io olo pan̈arato. Ke izikoa Baiboly io voadika tsarabe, tokony hazava aminolo jiaby raha tiany volan̈iny.”

“‘Volan̈a Tsara’ ndreky ‘Volan̈a fahamarin̈ana Tsisy Diso Nampiasain̈y.’”

David Splane, an̈isany Filankevipitantan̈ana, nan̈azava fotokevitry io, nalain̈y baka tamy Mpitoriteny 12:10. Iro panoratra Baiboly io nitandrin̈y tsarabe izikoa fa nanoratra volan̈a Zan̈ahary. Karaha zen̈y koa nataony Komitiny Fandikan̈a Baiboliny Tontolo Vaovao voanalohany. Mbala tsy niova fomba fiasa io izikoa fa navaozin̈y Fandikan-tenin’ny Tontolo Vaovao. Natao miboaka tsara “volan̈a fahamarin̈ana tsisy diso” io, baka io natao mazava tsarabe hafatra Zan̈ahary.

Rahalahy Splane nivolan̈a karaha ty: “Ndraikindraiky volan̈a angiley araiky misy dikany maromaro.” Karaha ataony amy 2 Timoty 1:13, amy Fandikan-tenin’ny Tontolo Vaovao angiley taloha, misy fivolan̈ana “filaharany volan̈a mahatsara” zen̈y. Kanefa amy volan̈a angiley, “filaharany” zen̈y misy dikany maromaro, an̈atinizen̈y “sary tsara.” Ke nisy olo nieritreritry fa dikany volan̈a io, tsara ankitin̈y fampianaran̈a amy Baiboly ao. Kanefa izikoa volan̈a nampiasain̈y tamy voanalohany tan̈y zahavan̈a, “modely tsara halain̈y tahaka” tiany koran̈iny. Izikoa fa navaozin̈y Baiboly io, karaha ty nandikan̈a izio: “Modeliny volan̈a mahatsara.”

Rahalahy Splane nivolan̈a fa nila nivoan̈a volan̈a sasany, fotony miovaova dikany volan̈a angiley sasany. Ohatra araiky amy zen̈y volan̈a ivolan̈ana fomba namonoan̈a Jesosy, amy Fandikan-tenin’ny Tontolo Vaovao angiley taloha. Matetiky dikanizio, vatan̈anolo io tombohin̈y amy kakazo marangitry lohany, baka io kakazo io aorin̈y amy tany. Jesosy tsy nitombohin̈y taminy hazofijalian̈a. Zen̈y mahavy Baiboly araiky navaozin̈y io mivolan̈a fa Jesosy “nifantsihin̈y tamy kakazo araiky mitsatoko.”—Matio 27:22, 23, 31.

Karaha ty nivolan̈iny Rahalahy Splane tamy farany kabaronany: “Angatahinay mare amy Jehovah baka anaro hahay harikitry izy fo, izikoa fa mamaky ndreky mianatra Fandikan-tenin’ny Tontolo Vaovao navaozin̈y io. Ke ataova Babanao, Zan̈aharinao ndreky Kamaradinao fo Jehovah.”

Famaran̈ana.

Rahalahy Pierce nivolan̈a fa Baiboly navaozin̈y io mira hanin̈y farany tsara amy “fihinanan̈a hanin̈y farany tsara ndreky isankarazany” ataony Jehovah. (Isaia 25:6) Izy baka io nan̈iraka olo hitsangana han̈ano hira faha-114, amy fihirana Mihirà ho An’i Jehovah. Mety tsarabe raha zen̈y fotony fotokevitry hira io: “Harena Sarobidy ny Bokin’Andriamanitra.”