“Efa Karaha Fety Ataony Fianakavian̈a Araiky In̈y”, zen̈y titra hita tamy gazety Frankfurter Rundschau, piboaka an̈y Allemagne. Ke olo jiaby navy nan̈aton̈o tamy fivoriambe io tsy nifamatra volan̈a zen̈y.

“Efa karaha tsy vahiny in̈y zaho!”, nivolan̈iny Karla, baka Porto Rico

“Zaho kony mira nandeha nitsidiky ry havako kibo araiky aminaka mipetraka antany lavitry in̈y”, nambarany Sara, baka an̈y Ostralia.

Ino nahavy iro olo aby io nan̈aboaka volan̈a karaha zen̈y? Tsy ino fa navy tamy fivoriambe iraisampirenena nataony Vavolombelon̈o Jehovah naton̈indro natao ta Commerzbank-Arena ta Frankfurt, Allemagne. Izio natao tamy 18 firaka 20 Zie 2014 loso tio in̈y. Ke nisy olo kadiriny 37 000 navy nan̈aton̈o izio tao.

Fianaran̈a Baiboly raha ten̈a natao taminizio tao. Ke raha aby ty tamy programo tamy zen̈y: Vaky Baiboly, hira, vavaka, nisy tantara niorin̈y tamy Baiboly aroe, baka io kabaro mamelombelon̈o baka amy Baiboly maromaro.

Ankoatrany Vavolombelon̈o Jehovah mipetraka amy tany io, nisy olo mandilatra 3 000 baka Ostralia, Grande-Bretagne, Gresy, Libanona, Serbia, Afrika Atsimo, baka io Etazonia koa nan̈aton̈o izio. Mbala nisy Vavolombelon̈o Jehovah hafa kadiriny 234 baka tamy tany 70 koa navy tao. Ke iro io an̈isanolo man̈ano fanompon̈a manokan̈a aby, karaha ataony misionera.

Nisy sasany tamy programo io koa nalefa internet tamy tany hafa mandeha 19. An̈isany nandifasan̈a zen̈y izio tan̈y Otrisy ndreky ta Soisa. Ke nisy olo 204 046 nan̈atono izio tamy tany aby io.

Natao tamy volan̈a angiley, aliman, ndreky griky fandaharan̈a io ta Frankfurt. Fa fandaharan̈a tamy tany hafa ndraiky nadika tamy volan̈a mandeha 17. An̈isanizen̈y ohatra volan̈a arabo, sinoa, tamoul, tiorka, ndreky natao tamy teniny tanana misy aroe.

Tsy mitovy fomba fivolan̈andro Vavolombelon̈o Jehovah aby io. Iro tsy mitovy tany favian̈a, baka io fombandro tsy mitovy, fa iro ndraiky nifankatia mare. (Jaona 13:34, 35) Nifan̈aja mare koa iro sady nifampitondra karaha olo kibo araiky in̈y.

“Ten̈a mahavita mandresy raha manahiran̈a maro fahitako fifandraisan̈a misy amy rahalahintsika erantany”, nambarany Tobias baka Grande-Bretagne.

“Zaho izio nifanojy tamy rahalahy maro baka amy tamy mandilatra 20. Ke hita fa fitiavantsika Zan̈ahary ndreky fitiavantsika piaramanompo amintsika ten̈a nampitambatra atsika”, nambarany Davianna, baka Porto Rico.

“Zaho Vavolombelon̈o Jehovah amy tanàna hely araiky”, nambarany Malcom, pan̈atriky baka an̈y Ostralia. “Ela jiaby zay zaho raha namaky ndreky nizaha tamy video fo momba fifankatiavan̈a misy amy rahalahintsika erantany. Fa izioty, masonaka foeky mahita fifankatiavan̈a io. Eto haiko eky karakory marin̈y zen̈y. Nahay fo zaho nan̈aton̈o izy ty! Ten̈a mankafatatra finoan̈a mare izy ty.”

Nisy Vavolombelon̈o Jehovah baka tamy fiangonan̈a 58 ta Frankfurt ndreky man̈odidin̈y nan̈oman̈a kado ndreky fandaharan̈a natao hangalany pan̈atriky diandian̈a taminy hariva.

“Nahatsiro ho niraisin̈y tsara zahay”, nambarany Cynthia, baka Etazonia. “Tsy ho hadin̈ako foeky fitiavan̈a, hatsarampan̈ahy, ndreky fahalalantan̈ana naboakandro zahay.”

“Ten̈a fitiavan̈a ankitin̈y zen̈y, olo ravoravo mare, baka io tsy mifankafoe mira olo kibo araiky. Nanjary nifankahay mare koa zahay”, nikoran̈iny Simon, mipetraka an̈y Allemagne.

“Tamy fandaharan̈a hariva in̈y nan̈aboaka fa atsika tsy olo mafana fo be amy fivavahan̈a zen̈y, ke tsy man̈ano fety foeky. Atsika ten̈a mahay man̈ano fety, fa izy fo fety madio. Anao mahavita miravoravo tsara sady tsisy raha mampavozovozo.” Zen̈y raha nambarany Amỳ baka Ostralia.

Mbala araiky tamindro fivoriambe iraisampirenena natao tamy tany sivy araiky natao ta Frankfurt in̈y.

Izikoa han̈ontanian̈a olo, nan̈ano karakory marin̈y izy tan̈y. Karaha ty raha nambarany pan̈atriky araiky: “Iritrireta hely baka anao izio tojy havanao araiky, ohatra rahalahinao kibo araiky aminao kanefa anaro tsy fankahay. Fa taminy anao fanojy izy in̈y, anao nampidiriny tantran̈o, baka io izy tsara fan̈ahy mare taminao. Akory fahitanao zen̈y? Mety tsy ho hainao foeky fomba ivolan̈anao haravoan̈anao. Tsy olo araiky fo nan̈ano zen̈y taminao fa olo mandeha 37 000. Karakory koa tsapanao? Tsisy ny hafa amy zen̈y raha hitanay tan̈y.”