Tamy Zie 2013, nisy taratasy nanaitry baka tamy Filankevipitantan̈any Vavolombelon̈o Jehovah nazondro misionera ndreky iro panompo manontolo andra manokan̈a manompo antany hafa. Nikoran̈iny taratasy io fa iro io nikahin̈y han̈aton̈o fivoriambeny vondroparitry ndreky fivoriambe iraisampirenena natao tamy 2014 ndreky fanombohany 2015.

Dia io nan̈ampy iro pitory aby io han̈aton̈o fivoriambe io, baka io koa iro mahavita mamangy tany naviandro ndreky fanojy havandro ndreky kamaradindro an̈y. Nikoran̈iny tamy taratasy io koa fa fandaminan̈a fo miantoko bieny aviondro mandeha ndreky mimpody.

Efa nisy karaha zen̈y talohanio, fa tamy taon̈o io ten̈a hafa. Eraka taridalan̈a baka tamy Komitiny Fampianaran̈a amy Filankevipitantan̈ana, nisy sampandraharaha vaovao natsangana, Sampandraharaha amy Foibe Erantany Pikarakara Dia an̈arany, nikarakara fitadiavan̈a pilasy taminy avion.

Tsy elany nandifasan̈a taratasy nan̈ambaran̈a dia in̈y, efa nandeha tsihelihely fivangan̈a bie. Tamy Zanvie 2014, efa nahainaro fo bie nivangain̈y. Sampandraharaha io fo nitady pilasy ndreky nivanga biendro jiaby erantany nikahin̈y han̈aton̈o fivorian̈a io.

Tsy mora nikarakara dia sasany. Karaha iro baka Reykjavík, ta Islandy tan̈y, nila nandeha ta Cochabamba, a Bolivia nangala avion. Sasany baka ta Nouméa, a Nouvelle-Calédonie tan̈y nila nibedan̈a tan̈y Antananarivo, a Madagasikara vo nahazo avion nandeha tamy tany nisy fivoriambendro tan̈y. Nisy koa baka ta Port Moresby, a Papouasie-Nouvelle-Guinée nila nandeha ta Seattle, a Etazonia tan̈y antsendriky, baka io koa sasany baka ta Ouagadougou, a Burkina Faso nila nandalo ta Winnipeg, a Kanada.

Misy olo dimy an̈atiny ekipy pikarakara dia io. Iro nikarakara dia kadiriny 19 000 taminy avion. Fan̈amezan̈a antsitrapo nataony Vavolombelon̈o Jehovah fo nan̈ifandro bienolo kadiriny 4 300, baka tamy tany 176.

Ten̈a nankasitraka fandaharan̈a io iro nahazo taratasy io. Misy misionera fivadiany nanoratra karaha ty: “Niany zahay himpody amy tany nan̈irahan̈a zahay an̈y Azia Atsimoantin̈iana an̈y. Zahay ten̈a man̈ano mersy anaro nan̈ampy zahay handeha an̈y Angletera, tany nitirahanay, fotony efa dimy taon̈o zahay tsy nahita havanay. Izikoa tsy anaro nan̈ampy, zahay mbala tsendriky honohono himpody taty. Ke mbala man̈ampody man̈ano mersy anaro jiaby zahay. Ten̈a amy fonay jiaby ivolan̈anay zen̈y.”

Misy misionera a Paragoay an̈y koa nanoratra karaha ty: “Zahay ndreky vadiko ten̈a mankasitraka anaro nikaiky zahay han̈aton̈o fivoriambe iraisampirenena a New Jersey, a Etazonia. Tamy 2011 zahay efa nan̈ano programo handeha a Etazonia hizaha foibeny Vavolombelon̈o Jehovah erantany. Efa namory vola edy zahay tamy zen̈y. Fa tamy fanjava Ziain tamy taon̈o io fo, zahay nirahin̈y hitsidiky fiangonan̈a amy teniny tan̈ana ta Paragoay. Nila nandeha lavitry zahay tamy zen̈y. Zahay koa fa nandiniky, zahay nanapakevitry hivanga tomabily hindesinay manompo amy tany vo nan̈irahan̈a zahay, fa hambelanay dianay handeha a Etazonia in̈y. Tanteraka eky nofinay in̈y e! Ten̈a mankasitraka Jehovah zahay, fotony tsara izy ndreky ten̈a tia zahay.”

Misy olo fivadiany baka a Malawi koa nanoratra karaha ty: “Han̈anovan̈a mersy anaro fo nandifasanay e-mail ty! Hitanay tsarabe fa ten̈a niasa mare anaro, nandany fotoan̈a nikarakara dianolo marobe karaha in̈y. Ten̈a mankasitraka asa mare nataonaro zahay, baka io koa an̈abon̈abony jiaby, mankasitraka fandaminany Jehovah zahay, fotony iro ten̈a tsy matity nikaiky zahay nan̈aton̈o fivorian̈a iraisampirenena in̈y ndreky nan̈amia fotoan̈a niarahanay taminy havanay ndreky kamaradinay.”

Hita tamy raha nivolan̈indro pikarakara dia io koa fa ten̈a tiandro nan̈ano izio. Karaha ty nivolan̈iny Mileivi: “Ten̈a tsisy karaha izy fikarakaran̈a iro misionera aby io hamangy havandro ndreky kamaradindro.” Misy araiky koa, Doris an̈arany nivolan̈a karaha ty: “Izin̈y nan̈ampy zaho hankasitraka fitiavan̈a maventy anan̈any fandaminan̈a, fotony iro ten̈a tia iro panompo manontolo andra manokan̈a manompo amy tany hafa.” Karaha ty koa nikoran̈iny Rodney, piandraikitry sampandraharaha mikarakara dia io: “Ravoravo mare zaho mba an̈isandro nan̈ano izin̈y.”

Vavolombelon̈o Jehovah erantany ravoravo man̈ampy iro rahalahindro ndreky ranabavindro mahafoe ten̈a, ke mazoto man̈ano fanompoan̈a amy tany an̈irahan̈a iro an̈y.