Mandilatra 10 000 kilometara miala a Philippines tanànandro olo mivolan̈a tagalog aby io. Mandilatra arivo amindro io Vavolombelon̈o Jehovah. Iro nivory ta Rome, a Italy an̈y, tamy fivoriambeny vondroparitry manokan̈a, tamy le 24 firaka 26 Zie 2015.

Izikoa atao konty, efa mandilatra 850 000 iro olo baka a Philippines mipetraka a Eoropa an̈y. Efa misy fiangonan̈a Vavolombelon̈o Jehovah 60 an̈y, baka io koa misy andiampitory maro. Iro koa fa mivory ndreky mitory amindro olo baka a Philippines, mampiasa volan̈a tagalog.

Sambany iro fiangonan̈a ndreky andiampitory aby io niaraka nivory tamy fivoriambeny vondroparitry telo andra, tamy volan̈a tagalog, ta Rome tan̈y. Nisy 3 239 olo nivory taminio. Ravoravo mare iro jiaby io nahita Rahalahy Mark Sanderson, an̈isany Filankevipitantan̈any Vavolombelon̈o Jehovah, nan̈ano kabaro farany isanandra, fotony izy efa nanompo ta Philippines tan̈y taloha.

Ino ivolan̈ana fa tsy mira izikoa olo araiky man̈aton̈o fivoriambe amy volan̈a tsy ninany ndreky amy volan̈anany? Karaha ty nivolan̈iny Eva, man̈angy tokanten̈a zay: “Zaho ndraiky mahay teny angiley, fa fampianaran̈a jiaby natao tamy volan̈a tagalog io ten̈a niditry tan̈aty fonaka tsarabe. Mersy anaro nan̈ano fivoriambeny vondroparitry amy volan̈a io.” Izy ndreky iro zanany mianadahy efa zatra mivangavanga raha amy lalan̈a isaka herin̈iandra. Iro fo nanapakevitry tsy han̈ano zen̈y koa tsy indraiky isaka fanjava fo, baka misy vola an̈ifan̈a fre baka an̈y Espagne mandeha a Italy. Eva nivolan̈a: “Ten̈a nilainay nan̈ano zen̈y, fotony nazava taminaka raha jiaby nivolan̈indro tamy fivoriambeny vondroparitry io!”

Misy man̈angy araiky koa, Jasmin an̈arany, mipetraka an̈y Allemagne. Izy nangataka andra tsy iasan̈a fa han̈aton̈o fivoriambe io. Karaha ty nikoran̈iny: “Zaho koa fa tsy ela handeha, nivolan̈indro taminaka fa zaho tsy mahazo mandeha, fotony mbala misy asa mila vitain̈y. Zaho tsy taitry, fa nivavaka tamy Jehovah, baka io zaho nan̈aton̈o sefonaka. Nalamin̈inay fo fomba hankifan̈a asa io, ke zaho nahazo nandeha! Ten̈a tombontsoa maventy taminaka nivory niaraka tamindro ranadahy ndreky rahavavy aby baka a Philippines mipetraka a Eoropa an̈y.”

Marin̈y ndraiky fa iro baka a Philippines mipetraka a Eoropa an̈y ngoma tany naviandro ndreky kamaradindro nifindra amy tany hafa a Eoropa an̈y. Tamy fivoriambe io fo iro ravoravo fanojy anadahindro ndreky rahavavindro miaraka mivavaka amindro. (Matio 12:48-50) Misy lelahy zay koa, Fabrice an̈arany, nivolan̈a karaha ty: “Ravoravo mare zaho nahita olo haiko!” Izikoa fa vita fivoriambe io, nisy ranabavy araiky koa nan̈ampodipody volan̈a karaha ty: “Ty fivoriany fianakaviambe!”