“Ten̈a tsara izio, fotony izio tsy basiny mampaloso eritreritry fo fa velon̈o koa tantara amizio ao.”

“Karaha efa ten̈a izy kony tantara koran̈inizio ao e!”

“Tsara foeky izio. Efa matetiky zaho maharen̈y tantara amy Baiboly ao, fa izioty vo ten̈a iain̈ako raha koran̈izio ao.”

Io sasantsasany amy raha nivolan̈inolo izikoa fa baka nitandren̈y tapany amy Baiboly amy teny angiley nalain̈y feo amy jw.org, tsy ino zen̈y fa bokiny Matio.

Rango tamy taon̈o 1978 Vavolombelon̈o Jehovah efa nan̈aboaka Baiboly nalain̈y feo. Tamy zen̈y izio efa naboaka tamy volan̈a 20, na izy jiaby zen̈y na tapany amizio.

Taminy 2013 Vavolombelon̈o Jehovah nan̈aboaka Fandikan-tenin’ny Tontolo Vaovao navaozin̈y, ke mila nampody nalain̈y feo ndraiky Baiboly. Tsy olo telo karaha taloha eky nalain̈y feo aminizio ao, fa olo maromaro man̈ano feonolo mandilatra 1000 amy Baiboly ao.

Mahatsara izy misy feonolo maromaro, manjary mora aminolo mitandren̈y izio mangala sary antsain̈y tantara amy Baiboly ao. Marin̈y ndraiky fa izio tsy mira tantara amy Baiboly tandrin̈esan̈a aby in̈y, fotony tsisy lamoziky na feondraha hafa. Kanefa, lera misy feonolo isankarazany aby io ren̈y, karaha efa ten̈a izy in̈y tantara amizio ao.

Misy lamin̈y mila arahin̈y tsarabe izikoa fa han̈ano tetikasa io, fotony marobe olo alain̈y feo amizio ao. Ke mila zahan̈a tsarabe azovy aminolo aby io mivolan̈a amy toko ndreky andininy tsiaraikiaraiky, baka io zahan̈a tsarabe ino hevitry ndreky fihetsehampo tian̈a haboaka. Izikoa apostoly mivolan̈a, kanefa tsy ton̈onin̈y amy tantara io ao an̈arany, mila zahan̈a tsarabe feonjovy mivolan̈a io. Izikoa hita baka amy raha volan̈iny fa olo mivolan̈a io an̈atiny fisalasalan̈a mare, zay olo man̈ano feony Tomasy irahin̈y man̈ano izio. Izikoa ndraiky feonolo taitaitry, zay olo man̈ano feony Petera irahin̈y man̈ano izy.

Mila zahan̈a tsarabe koa taon̈olo mivolan̈a io. Atsika hangala ohatra: Izikoa apostoly Jaona mbala tanora tadiavin̈y, dikanizen̈y feonolo tanora ilain̈y, fa izikoa ndraiky izy efa matoe, feonolo efa matoe ilain̈y.

Olo mahay mamaky teny tsarabe tadiavin̈y. Ankamarozanolo nifidin̈y miasa amy birony sampan̈any Vavolombelon̈o Jehovah an̈y Etazonia. Iro antsendriky nampan̈anovin̈y testy, ke fehintsoratra tamy gazety Mifohaza! raha nirahin̈y noman̈indro ndreky nivakindro. Koa fa vita zen̈y, iro nirahin̈y namaky volan̈anolo mifampikoran̈a, amy Baiboly ao, ke nizahan̈a tsarabe azovy amindro mahatafaboaka fihetsehampo amizio ao, karaha ataony olo meloko na malahelo na ravoravo na olo diso fan̈antinan̈a. Karaha zen̈y fo natao, ndreky farany hay karakory marin̈y fahaizan̈anolo nampan̈anovin̈y testy io, baka io feonjovy ten̈a mety aminany.

Zay olo voafidy amy zay amian̈a anjaranany, baka io alain̈y feo amy studio an̈y Brooklyn na Patterson na an̈y Wallkill. Efa misy olo araiky irahin̈y man̈amia sosokevitry izy, ke olo io fo mizaha, mety feonolo alain̈a io sa karakory, tafiboaka tsarabe fihetsehampo amy tantara io sa karakory. Iro pan̈amia sosokevitry io koa samy manan̈a raha handeha hivakin̈y io, baka io efa hita amizio ao toromariky ilain̈y, ohatra, aia olo io tokony hijanon̈o hely, na ino raha mila hamafisiny aminy andininy tsiaraikiaraiky hivakin̈y io. Pan̈amia sosokevitry io koa mampiasa Baiboly Fandikan-tenin’ny Tontolo Vaovao efa nalain̈y feo taloha, amy zay ho hitany fomba fan̈anovan̈a vakiteny io.

An̈atiny iro mangala feo io, adoso zay feo tsy ilain̈y. Mety ho hisy volan̈a na fehezanteny sasany himpodimpody alain̈y. Ke zay tsara amy feo aby io atambatambatra, baka raha nalain̈y feo io ho tafiboaka tsarabe.

Mbala tsendriky hay ombian̈a marin̈y vo vita fangalan̈a feo Baiboly Fandikan-tenin’ny Tontolo Vaovao navaozin̈y taminy 2013 io. Fa zay boky vita, halefa amy jw.org, ke ho hisy sariny fitaovan̈a fitandrin̈esan̈a feo ho hitanao marikitry an̈aran̈a boky io, amy pazy misy ““Boky ao Amin’ny Baiboly.”