An̈isany raha ahaizanolo Vavolombelon̈o Jehovah asa fandikanteny. Tamy Novambra 2014, efa nadikanay amy volan̈a 125 Baiboly, fa boky ndreky gazetinay aby io ndraiky nadika amy volan̈a 742. Tamy Zanvie 2015, efa niboaka tamy volan̈a 398 video Ino ma Raha Atao amy Tran̈o Fivorian̈a An̈y?, fa video Nan̈ino ma Anao Tokony Hianatra Baiboly? ndraiky efa misy amy volan̈a 569. Akory ahavitanay asa marobe zen̈y, baka io nan̈ino zahay mifen̈y man̈ano zen̈y?

Tamy Marsy 2014, Filankevipitantan̈ana nandrisiky birony sampan̈a jiaby erantany hangala feo video amy volan̈a farany maro. Fotony nan̈ino? Hampandeha asa fampianaran̈a Baiboly ten̈a tanjon̈o.

Misy dingana maromaro tsy maintsy arehan̈a izikoa fa handika video zen̈y. Raha voanalohany atao, ekipany pandikateny mandika lahatsoratra amy video io. Koa fa vita zen̈y, iro mifidy azovy han̈ano anjara tsiaraikiaraiky aminany io, ke olo mahay volan̈a nandikan̈a izio tsarabe alain̈y feo. Iro ekipa mikarakara fangalan̈a feo ndreky video ndraiky, mangala feo sady man̈adio feo io. Izikoa misy soratra amy video io, apetraka amy tany tokony ho hisy izy soratra aby zen̈y. Atambatra amy zay feo, soratra ndreky sary, baka io alefa amy tranonkalanay aminy Internet, amy zen̈y mora aminolo mangala izy.

Efa misy olo efa nampiofanin̈y hangala feo ndreky tany mety hangalan̈a feo amy birony sampan̈a sasany. Fa karakory fo basy atao mangala feo volan̈a ampiasain̈y ndreky adika amy tany mitokana an̈y?

Amy tany fangalan̈a feo jiaby erantany, efa misy teknisianin̈y pangala feo mitondra fitaovan̈a fangalan̈a feo mety hindesin̈y mandehandeha. Iro man̈amboatra tany fangalan̈a feo mety hampiasain̈y mekimeky, na amy biro zen̈y na amy Tran̈o Fivorian̈a na antran̈onolo. Iro koa manan̈a mikro ndreky ordinatera misy programo fangalan̈a feo. Ke olo mahay volan̈a nandikan̈a video io fo irahin̈y mamaky, ndreky man̈amia torohevitry, baka io mankamarin̈y raha nivakin̈y io. Izikoa fa vita fangalan̈a feo, ke man̈eky olo jiaby fa mety tsarabe izio, teknisianin̈y io amy zay mifindra antany hafa miaraka amy fitaovan̈a jiaby in̈y.

Zen̈y mahavy videonay aby io nanjary misy amy volan̈a intelony volan̈a nandikan̈a izy taloha.

Tianolo mare video aby io. Aminolo maro, efa video naboakanay aby io edy video voanalohany hitany tamy volan̈anany.

Efa misy amy volan̈a pitjantjatjara koa videonay aby io. Izio an̈isany volan̈a ampiasainolo an̈y Ostralia, ke olo mandilatra 2 500 mampiasa izio. Natao tan̈y Alice Springs, amy Faritany Avaratra fangalan̈a feo. Karaha ty nambarany Callan Thomas, an̈isany nan̈ampy tamy fangalan̈a feo: “Tianolo mare video aby io. Iro tsy mety hempaka mizaha izio. Matetiky iro man̈ontany aia mety hahitandro video hafa. Mahalan̈a anao mahita boky ndreky gazety amy volan̈a io. Ke lany fan̈ahy iro koa fa maharen̈y raha amy volan̈andro, intsaka eky raha mety zahan̈a amy volan̈a io.”

Indraiky andra, nisy Vavolombelon̈o Jehovah aroe ta Cameroun, nandeha lakana nan̈araka ten̈arano. Iro nidoko tamy tanàna hely araiky. Pygmée karazan̈anolo nipetraka tamy tany io, ke olo beny tanàna tao papianatra. Nikoran̈a taminany Vavolombelon̈o Jehovah aby io, ke haindro amy zay fa volan̈a bassa volan̈a nampiasainy. Iro nitondra tablette, ke naboakandro izy video Nan̈ino ma Anao Tokony Hianatra Baiboly? Lany fan̈ahy lelahy io nahita video io tamy volan̈anany, ke izy nangataka boky ndreky gazety.

Tamy tanàna araiky an̈y Indonezia, tsy tia Vavolombelon̈o Jehovah mare pitariky fivavahan̈a tao. Boky ndreky gazety jiaby nirasain̈y tamy faritry io niroany aby. Olo sasany ndraiky nampavozo sady nivolan̈a fa hiroandro zen̈y Tran̈o Fivorian̈a. Izikoa fa nandeha fotoan̈a, nisy polisy efatra navy tantran̈ony Vavolombelon̈o Jehovah araiky, nan̈ontany ino marin̈y raha ataondro an̈atiny Tran̈o Fivorian̈a. Naboakany ranabavy io iro amy zay video Ino ma Raha Atao amy Tran̈o Fivorian̈a An̈y?, amy volan̈a indonezianina.

Araiky tamindro polisy aby io koa fa baka nizaha video io, izy nivolan̈a karaha ty: “Izioty haiko fa tsy marin̈y aby raha volan̈inolo momba anaro. Raha ny marin̈y, iro tsy mahay anaro foeky.” Sasany tamindro polisy aby io nangataka video io. Tiandro haboaka olo hafa izio baka ho hainolo tsarabe Vavolombelon̈o Jehovah. Nanjary tia Vavolombelon̈o Jehovah mare polisy tamy tany io, sady miaro iro.

Izikoa anao mbala tsy nahita video aby zen̈y, nan̈ino ma anao tsy mizaha izio amy volan̈anao?