Misy man̈angy araiky mipetraka a Mongolia an̈y, Odval an̈arany. Tsy hainy tsarabe taon̈onany, fa araka fivolan̈any fo, izy teraka kadiriny tamy taon̈o 1921 tan̈y zen̈y. Taon̈o araiky fo izy nandeha lekoly, ke tsendriky mahay mamaky teny. Mitarimy raha asanany rango izy mbala hely. Vo tsy ela zay, nisy boky feno sary nahaizany raha momba Zan̈ahary ndreky raha maro tsara amy fiain̈ana amaray an̈y, ho azonolo mitandren̈y Zan̈ahary. Tiany mare raha aby nianarany zen̈y.

Tamy taon̈o 2011, boky io naboakany Vavolombelon̈o Jehovah. Misy karazany aroe izio. Iro io samy feno sary maro tsara, fa araiky fo tsy maro soratra.

Araiky feno soratra io izioty efa misy amy volan̈a 583 karazany. An̈aranizio, Tandrin̈esa Zan̈ahary Baka Anao Velon̈o Tsisy Farany. Araiky tsy maro soratra ndraiky, amy volan̈a 483 karazany. An̈aranizio, Tandrin̈esa Zan̈ahary. Ndray Fan̈ambaran̈a Iraisampirenena Momba Zonolombelon̈o naboakany Firenena Mikamban̈a mbala tsy honohono mahadin̈y zen̈y! Amy volan̈a 413 karazany fo izio, niboaka taminy Oktobra 2013. Ke izikoa atambatra isany boky aroe io natao pirinty, efa tsy ela ho 80 tapitrisa an̈y.

Misy man̈angy araiky efa bebe taon̈o koa ta Brezily tan̈y nahazo boky Tandrin̈esa Zan̈ahary. Izy nivolan̈a karaha ty: “Ravoravo zaho! Kaiky mba misy olo mba mijery olo karaha ataonay ty. Zaho letrizay tsiary nangala gazetinaro, fotony zaho tsy mahay mamaky teny. Efa boky karaha ty edy miady aminaka.”

Tsy mahay mamaky teny koa Brigitte, mipetraka a France an̈y. Karaha ty nivolan̈iny: “Isanandra zaho tsy maintsy tafizaha sary amy boky io fo.”

Misy Vavolombelon̈o Jehovah araiky koa mipetraka an̈y Afrika Atsimo an̈y. Volan̈iny: “Io boky farany mora ikoran̈ana amy Sinoa, izikoa fa hampianatra ny marin̈y baka amy Baiboly. Zaho nitory taminy Oniversite ndreky nitory taminolo tsy mahay mamaky teny. Tsy ampy antsasaka lera aby zaho efa nahavita nikoran̈a taminolo raha ten̈a ampianariny Baiboly.”

An̈y Allemagne an̈y koa misy olo fivadiany samy nahita fianaran̈a, nampianariny Vavolombelon̈o Jehovah tamy boky io. Araiky lelahy ten̈a tia boky io. Karaha ty nambarany: “Tsaiky tara hely fo navianaro nitondra boky ty taminaka! Efa izity edy nahaizako tsarabe tantara maro ndreky raha koran̈iny Baiboly.”

Misy man̈angy maren̈iny zay koa an̈y Aostralia nivolan̈a karaha ty: “Efa ela eky nipitrahako tamy tran̈ondry masera zay fa iro tsiary ndraiky nampianatra zaho raha momba Fanjakan̈any Zan̈ahary zen̈y foeky, kanefa zaho farany marikitry iro pitondra fivavahan̈a aby io. Tamy sary tamy boky io edy nahaizako tsarabe dikany raha koran̈iny Matio 6:10.”

Karaha ty koa nisoratiny birony sampan̈a Vavolombelon̈o Jehovah a Kanada an̈y: “Olo maro baka Sierra Leone mipetraka atỳ ravoravo nahita boky Tandrin̈esa Zan̈ahary amy volan̈andro, volan̈a krio. Iro man̈eky marin̈y fa mifen̈y mare Vavolombelon̈o Jehovah man̈ambara aminolo raha baka amy Baiboly ao. Sasany nivolan̈a karaha ty: ‘Hafa fo anaro e! Anaro ten̈a mikarakara olo.’”