Anao koa mizaha listiny volan̈a amy pazy ty, hiboaka listy an̈aran̈a volan̈a mandilatra 300 karazany. Tranonkala io zaraiky fo misy amy volan̈a maro be karaha zen̈y!

Karaha efa maro tranonkala malaza izioty, ke mbala tsisy mahadin̈y izy fo? Ia! Atsika edy hangala ohatra e: Karaha ataony tamy Zie 2013, tranonkalany Firenena Mikamban̈a, misy amy volan̈a tsiota karazany fo. Misy araiky koa Europa an̈arany, tranonkala ofisialiny Vondrona Eoropeanina, amy volan̈a 24 karazany. Google ndraiky, misy amy volan̈a 71 karazany fo, baka io Wikipedia, amy volan̈a 287 karazany.

Tsy mora mampiditry volan̈a 300 karazany zen̈y, fotony lera maro lany amy zen̈y! Ankamarozany asa jiaby io ataony Vavolombelon̈o Jehovah mandilatra zato erantany. Iro man̈ano izio, fotony iro man̈iry han̈amia voninahitry Jehovah. Isaka karazan̈a volan̈a, efa misy ekipy voalamin̈y mandika volan̈a angiley io amy volan̈a fampiasainolo amy tany misy iro.

Misy pazy mandilatra 200000 amy tranonkala jw.org. Ankamarozandro io adika amy volan̈a mandilatra 300 karazany.

Efa maro koa olo mahay jw.org io, ke tia mizaha izio. Ahitan̈a zen̈y fandinihan̈a nataony kompan̈ie Alexa, pandiniky raha momba fampiasan̈a Internet. Tan̈atiny diniky nataondro io, ahitan̈a “Religion and Spirituality” (“Fivavahan̈a Ndreky Finoan̈a”), misy tranonkala kadiriny 87000. An̈atinizen̈y iro tranonkalany fivavahan̈a maventy ndreky fikamban̈ana pan̈amboatra boky momba fivavahan̈a ndreky fikamban̈ana maro miramira amy zen̈y. Tamy listy natao tamy Zie 2013 io, jw.org nahazo laharan̈a faharoe! Nahazo voanalohany tamizio tranonkala ahitan̈a fandikanteniny Baiboly isankarazany. Man̈efa koa fa mizaha tranonkala io.

Taminy Oktobra 2013, olo mandilatra 890000 nizaha jw.org io, isanandra. Fan̈irianay mbala hanohy han̈amia olo erantany fan̈azavan̈a maro momba Baiboly, tsy an̈ifan̈a vola.