Zaho teraka tamy Calgary, a Kanada. Nisaraka ry olobeko tamy zaho mbala hely, ke zaho nindesin’ny mamako. Izy nandeha nifindra tamin’iry dadilahiko tan̈y. Tiandrô mare zahay roen’ny mama. Nahatsiaro sambatra mare zaho tamy fotoan̈a zen̈y. Mbala tsaroako fo fiain̈ananaka tamy zen̈y.

 Nifan̈ampody ndraiky mamako ndreky papako tamy zaho fito taon̈o, ke nivadiky ambony ambany fiain̈ananaka. Zahay nifindra ta St. Louis a Missouri, Etazony. Tsy ela, hitako fa papako olo kafiry mare. Ohatra, tamy zaho nody baka lekoly voanalohany, hitany zaho nipopohin’ny tsaiky kanefa tsy namaly, ke izy neloko mare. Zaho nipopohiny mareren’ny nataon’ny tsaiky aby io. Niditry tan̈atin’ny jerinaka raha nataony in̈y ke mbala vo fito taon̈o fo zaho efa niady tamy tsaiky.

 Helokon’ny papako in̈y nifindra tamy mamako koa ke izy nanjary melomeloko lava. Irô amy zay niasa nimalo fo. Tamy zaho 11 taon̈o, zaho nanomboko nihina jamala ndreky nigiaka toaka. Zaho nahaikafiry fo koa ke matetiky zaho nitady ady tamin’olo tamy lalan̈a. Zaho koa fa nahavita fianaran̈a tamy lise, zaho nahaikafiry fo.

 Tamy zaho 18 taon̈o, zaho niditry tamy tafiky an-dranomasin̈y amerikain. Zaho tao nampianarin̈y hamono olo. Afaka dimy taon̈o, zaho niala tao fa nandeha nianatra psikôlôzy. Zaho baka tihiasa tamy Birô Federaly Momba Enkaity (FBI). Zaho antsendriky nianatra tamin’ny inivairsite ta Etazony, baka iô zaho nanohy fianaran̈ananka ta Kanada.

 Tamy zaho tamin’ny inivairsite tan̈y, zaho diso fan̈antinan̈a tamin’olo ndreky tamy fiaraha-monin̈y. Karaha hitako tia ten̈a aby baka olo jiaby, tsisy dikany raha jiaby amy donia ty, aviô tsisy raha mavoavaha prôblemon’ny olombelon̈o. Zaho efa tsy nan̈anten̈a fa mbala ho vitan’olombelon̈o hankatsara fiain̈ana.

 Tsisy tanjon̈o fiain̈ananaka ke zaho nanomboko niagaka toaka, nihina jamala, nitsakaraka vola angôvo jiaby, aviô naloto fitondran-ten̈a. Nan̈ian̈a baly na nan̈ian̈a man̈angy fo tan̈aty jeriko. Tsisy raha navozoako fôtony zaho nahazo fampiofan̈ana tamy zaho nan̈ano maramila, ke zaho matetiky niady tamin’olo. Ho zaho, ‘zaho tômpiny fo mahay raha tsara ndreky ratsy.’ Ke lan̈ian’olo hitako nan̈ano raha tsy rariny tamin’olo efa namiako eky. Ny marin̈y aminany, zaho nanjary kafiry mare.

 Tandraraiky, zahay roen’ny namako tampin̈y jamala tan̈aty lakalin’ny tran̈onaka tao. Zahay tamy zen̈y nan̈oman̈a paken’ny jamala handeha hambidy mangigin̈y an-tany hafa. Namako io nan̈ontany zaho asa zaho mino Zan̈ahary, ke ho zaho taminany: “Izikoa baka amy Zan̈ahary mahavy jaly amy donia ty, zaho tsy tihahay raha momba izy foeky!” Tsy nampoiziko fan̈ontanian̈anany io fôtony baka mbala vo nomalin’izin̈y fo zaho nikoran̈a momba zen̈y. Ke zaho tihahay misimisy momba zen̈y. Tan̈atin’ny tsiota fanjava tafaran’izen̈y zahay niasa nikoran̈a momba Baiboly fo. Naboakany zaho baka tamy Baiboly sasany amy valin’ny fan̈ontanian̈anaka sarotro momba fiain̈ana.

 Tamy zen̈y, zahay roen’ny fiansenaka tran̈o araiky. Tamy fotoan̈a zen̈y mbala tsendriky tiako ambara izy raha nianarako. Tamy dimansy araiky zay, zaho nivolan̈a taminany fa nikahiako hianatra Baiboly tan-tran̈onay tao irô Vavolombelon̈on’i Jehovah aby io. Zaho koa fa nody baka niasa amarain’izin̈y, zahako izy fa tsy tao aviô nivongôsiny koa entan̈anay jiaby. Zaho niboaka tan-tany nitomoan̈y. Nivavaka tamy Zan̈ahary koa zaho ke niangavy izy han̈ampy zaho. Sambako tamy zen̈y nanon̈ono Jehovah, an̈aran̈an’ny Zan̈ahary, tamy vavaka.​—Salamo 83:18.

 Aroe andra tafaran’izen̈y, nisy Vavolombelon̈on’i Jehovah aroe fivadiany zay navy nampianatra Baiboly zaho voanalohany. Irô koa fa lôso, zaho mbala nanohy namaky boky fianaranay io fo, izio boky Azonao Atao ny Hiaina Mandrakizay ao Amin’ny Paradisa eto An-tany. a Tamin’ny alin̈y io fo efa voavakiko boky io. Niditry tan̈atin’ny fônaka raha nianarako momba Zan̈ahary Jehovah ndreky Jesosy Kristy Zanany. Hitako fa Jehovah io mahinakinaka olo sady malahelo izy mahita atsika mijaly. (Isaia 63:9) Ten̈a tiako koa nahay fa Jehovah tia zaho aviô Zanany nan̈ano sôron̈o ain̈inany hamojian̈a zaho. (1 Jaona 4:10) Tsapako fa ten̈a nahari-draha taminaka Jehovah “fôtony tsisy olo tiany ho ripaka fa tiany olo jiaby hibebaka.” (2 Petera 3:9) Zaho tian’i Jehovah hanjary kamaradinany.​—Jaona 6:44.

 Kômansy nandeha nivory zaho tamin’ny herin̈iandra io. Fan̈evanaka tamy zen̈y lava, zaho navoa kavin̈y, aviô mampavozo olo pôzinaka. Ndray zen̈y, zaho nataondrô Vavolombelon̈on’i Jehovah aby io mira havandrô efa ela tsy hitandrô in̈y. Hita amy raha ataondrô fa irô ten̈a Kristianin̈y ankitin̈y. Zaho tamy zen̈y tsapako karaha nimpody tamin’iry dadilahiko in̈y, fa izy fo mbala tsaratsaran’ny in̈y.

 Tsy ela, efa nanomboko nisy vokany tamy fiain̈ananaka raha nianarako tamy Baiboly. Nitapahako fan̈evanaka, zaho tsy nijangajanga eky, aviô zaho vôly nihina jamala ndreky nigiaka toaka. (1 Korintianina 6:9, 10; 11:14) Tiako han̈ano raha mamparavoravo Jehovah. Ke izikoa fa haiko fa misy amy raha ataoko tsy tiany, zaho direkty niova. Matetiky zaho nahatsapa fa zaho ten̈a nila niova ke ho zaho: ‘Zaho efa tsy mila man̈ano karaha ty eky e!’ Tsy nisalasala foeky zaho nan̈ova eritreritrinaka ndreky raha ataoko. Tsapako fa nahaitsaratsara tsihelihely fiain̈ananaka izikoa zaho fa nan̈ano raha nirahin’i Jehovah nataoko. Natao batisa zaho tamy 29 Zie 1989, tsiota fanjava tafaran’ny nianarako Baiboly.

 Baiboly nan̈ampy zaho nan̈ova toetrinaka. Taloha, zaho kafiry mare izikoa fa tôjy olo ratsy jery. Fa amy ziôty zaho mifen̈y ‘hihavan̈a amin’olo jiaby.’ (Romanina 12:18) Baka tamy Jehovah nahavitako zen̈y, Volan̈anany ndreky fan̈ahy masin̈y ten̈a mahavita man̈ova olo.​—Galatianina 5:22, 23; Hebreo 4:12.

 Zaho ziôty efa tsy andevon’ny jamala, hakafirianan̈a, ndreky fan̈irian̈a ratsy eky fa mifen̈y mamparavoravo Jehovah Zan̈ahary ndreky man̈amia izy ny farany tsara baka aminaka. An̈isan’izen̈y man̈ampy olo hahay izy. Taon̈o vitsivitsy tafaran’ny batisanaka, zaho nifindra tan-tany hafa mbala nila mpitory maro. Tan̈atin’ny taon̈o maro, ravoravo mare zaho nampianatra Baiboly olo maro ndreky nahita fa Baiboly io nan̈ova fiain̈anandrô koa. Ravoravo koa zaho fôtony mamako nanjary Vavolombelon̈on’i Jehovah. An̈isan’ny nahavy zen̈y, izy nahita fa niova toetrinaka ndreky fitondran-ten̈anaka.

 Tamin’ny 1999, zaho nahazo diplaomy tamy Sekolin’ny Mpitory Ilay Fanjakana (zen̈y an̈arany amy ziôty), ta Salvadaoro. Sekoly io nampiofan̈a zaho hazoto hitory vaovao tsara, hahay hampianatra, ndreky hahavita hikarakara Kristianin̈y an̈ivon’ny fiangonan̈a. Tamy faramparan’ny taon̈o io zahay roen’ny Eugenia nan̈ano mariazy. Mpitory manontolo andra a Goatemalà atỳ zahay.

 Sambatra amin’ny ankitin̈y zaho ziôty fa efa tsy diso fan̈antinan̈a amy fiain̈ana eky. Narehako raha ampianarin’ny Baiboly ke zaho efa tsy nijangajanga ndreky efa tsy kafiry eky. Zaho efa mihavan̈a tsara amin’olo ndreky mahatsapa ten̈a fitiavan̈a.