Ty antony telo mahavy Vavolombelon̈o Jehovah tsy mety mandeha miady:

1.   Man̈araka volan̈a Zan̈ahary. Baiboly mivolan̈a fa olony Zan̈ahary tokony “hanefy sabatrandro hatao angadinaomby”, ke iro “tsy hianatra hiady eky.”—Isaia 2:4.

2.   Man̈araka volan̈a Jesosy. Volan̈iny Jesosy taminy apostoly Petera: “Akajia amy tran̈ony sabatranao, fa zay olo mampiasa sabatra hivonen̈y amy sabatra.” (Matio 26:52) Hita baka amy volan̈a Jesosy zen̈y fa olo ten̈a kristianin̈y tsy tokony hitana basy.

    Jesosy koa nivolan̈a tamy pianatranany fa iro tsy tokony ho “an̈isanolo amy donia ty.” Iro man̈araka volan̈a Jesosy zen̈y, ke iro tsy man̈ano politiky foeky. (Jaona 17:16) Ndray zen̈y ndraiky, iro tsy mandrova olo han̈ano maramila. Iro koa tsy manohitry raha ataondro maramila aby io.

3.   Tia olo jiaby. Jesosy nivolan̈a fa pianatranany tokony ‘hifankatia.’ (Jaona 13:34, 35) Ndray aia ndray aia tany misy iro, efa mira olo kibo araiky iro. Zen̈y mahavy iro tsy mety foeky mandeha miady, ke hamono rahalahindro ndreky anabavindro.—1 Jaona 3:10-12.

4.   Mangala tahaka raha nataondro Kristianin̈y taloha tan̈y. Karaha ty koran̈iny boky araiky Rakipahaizan̈a Momba Fivavahan̈a Ndreky Ady (Angiley): ‘Iro pianatra Jesosy taloha tan̈y tsy nety nandeha niady ndreky nan̈ano maramila, fotony efa nampianarin̈y iro fa iro tokony hifankatia ndreky tia fahavalondro.’ Misy teolojianin̈y aliman araiky zay, Peter Meinhold an̈arany, nivolan̈a fa pianatra Jesosy taloha tan̈y “tsy nety nan̈ano maramila zen̈y.”

 Vavolombelon̈o Jehovah man̈ano raha hahatsara fiarahamonin̈y, fa tsy mikorontan̈a olo zen̈y. Zahay man̈aja manampahifan̈a, fotony Baiboly mivolan̈a karaha ty:

•   ‘Man̈ajà manampahifan̈a.’—Romanina 13:1.

•   ‘Ifà amy Kaisara edy raha tokony hifain̈y amy Kaisara, fa zay raha mila hifain̈y amy Zan̈ahary, ifà amy Zan̈ahary.”—Matio 22:21.

 Ke zahay man̈aja lalàn̈a, man̈efa latety ndreky man̈eky raha mahatsara vahoaka, ataony manampahifan̈a.