Zahay Vavolombelon̈o Jehovah io kristianin̈y, ke zahay mifen̈y man̈araka raha nampianariny Jesosy ndreky raha nataondro apostolinany aby io. Lahatsoratra ty mamintin̈y raha inoanay.

1. Zan̈ahary. Zahay manompo Zan̈ahary tokan̈a sady Farany Mahery. Izy niasa raha jiaby. Jehovah an̈aranany. (Salamo 83:18; Apokalypsy 4:11) Izy Zan̈ahariny Abrahama, Mosesy, ndreky Jesosy.—Eksodosy 3:6; 32:11; Jaona 20:17.

2. Baiboly. Ikenay fa Baiboly io misy hafatra Zan̈ahary handeha aminolombelon̈o. (Jaona 17:17; 2 Timoty 3:16) Miorin̈y amy boky 66 ao raha jiaby inoanay. Samy inoanay “Testamenta Taloha” ndreky “Testamenta Vaovao.” Jason BeDhun, papianatra momba fivavahan̈a, nanoratra fa “miorin̈y amy Baiboly ao raha jiaby inoany Vavolombelon̈o Jehovah ndreky raha jiaby ataondro, fa tsy raha namboamboarin̈y hifan̈araka aminy eritreritrindro manokan̈a fo.” *

   Zahay ndraiky man̈eky raha jiaby koran̈iny Baiboly, fa tsy volan̈a jiaby ao mety raisin̈y arabakiteny aby. Misy sarinteny koa ao.—Apokalypsy 1:1.

3. Jesosy. Zahay man̈araka raha nampianariny Jesosy ndreky raha nataony. Zahay koa man̈eky fa izy Zanaka Zan̈ahary, nirahiny Zan̈ahary hamonjy atsika. (Matio 20:28; Asan’ny Apostoly 5:31) Kristianin̈y ankitin̈y zahay. (Asan’ny Apostoly 11:26) Nianaranay tamy Baiboly fo fa Jesosy io tsy Zan̈ahary Farany Mahery, baka io koa tsy baka amy Baiboly ao fampianaran̈a momba Zan̈ahary tokan̈a olo telo, na Trinite masin̈y zen̈y.—Jaona 14:28.

4. Fanjakan̈any Zan̈ahary. Izio fanjakan̈a ten̈a misy andan̈itry an̈y, fa tsy raha an̈aty fonolo kristianin̈y zen̈y. Izio zaraiky fo hanjaka amy tany ty, ke hadosony fanjakan̈anolombelon̈o jiaby. Izio han̈atanteraka fikasan̈any Zan̈ahary momba tany ty. (Daniela 2:44; Matio 6:9, 10) Efa tsy ho ela han̈anovany zen̈y, fotony koran̈iny faminanian̈a amy Baiboly fa atsika izioty efa an̈atiny “andra farany.”—2 Timoty 3:1-5; Matio 24:3-14.

   Jesosy Panjakany Fanjakan̈any Zan̈ahary andan̈itry an̈y. Taminy 1914 izy nanomboko nanjaka.—Apokalypsy 11:15.

5. Fan̈avotan̈a. Baka amy soron̈o nataony Jesosy mahavy atsika mety ho afaka amy fahotan̈a ndreky fahafatesan̈a. (Matio 20:28; Asan’ny Apostoly 4:12) Tsy ampy izikoa mino Jesosy fo. Lan̈iany olo man̈iry hahazo hatsaran̈a baka amy soron̈o io, tsy maintsy man̈ova fomba fiain̈ana ndreky atao batisa. (Matio 28:19, 20; Jaona 3:16; Asan’ny Apostoly 3:19, 20) Baka amy raha ataonolo araiky ahitan̈a fa velon̈o ankitin̈y finoan̈anany. (Jakoba 2:24, 26) Zen̈y tsy mivolan̈a fa baka amy raha ataontsika hahavoavonjy atsika. Izio ho azontsika baka ‘aminy hatsarampan̈ahy tsisy karaha izy baka amy Zan̈ahary.’—Galatianina 2:16, 21.

6. Lan̈itry. Zan̈ahary Jehovah, Jesosy Kristy, ndreky iro anjely tsy mivadiky amy Zan̈ahary aby io mipetraka andan̈itry an̈y.  * (Salamo 103:19-21; Asan’ny Apostoly 7:55) Olo vitsy, 144 000 fo hivilomin̈y hengo andan̈itry an̈y, hiaraka hanjaka amy Jesosy amy Fanjakan̈any Zan̈ahary.—Daniela 7:27; 2 Timoty 2:12; Apokalypsy 5:9, 10; 14:1, 3.

7. Tany. Jehovah niasa tany ty hipitrahanolo mandrakizay. (Salamo 104:5; 115:16; Mpitoriteny 1:4) Izy hitahy olo jiaby man̈araka volan̈anany, ke iro tsy harary eky, ndreky hiain̈y tsisy farany amy Paradisa ambony tany.—Salamo 37:11, 34.

8. Jaly ndreky raha ratsy jiaby. Baka taminy anjely araiky nivadiky tamy Zan̈ahary navianizio. (Jaona 8:44) Nanjary “Satana” ndreky “Devoly” an̈arany anjely io, izy koa fa namitaka olo fivadiany voanalohany, ke nahavy atsika jiaby taranakandro fivadiany io nanjary nijaly. (Genesisy 3:1-6; Romanina 5:12) Baka handaminan̈a raha manahiran̈a baka amy Satana io, nambelany Zan̈ahary hitohy ela jaly ndreky raha ratsy io, fa izio fo tsy hambelany hitohy mandrakizay.

9. Fahafatesan̈a. Olo maty efa tsisy eky. (Salamo 146:4; Mpitoriteny 9:5, 10) Iro tsy mijaly amy motrobe zen̈y.

   Zan̈ahary hamelon̈o olo maty antapitrisany. (Asan’ny Apostoly 24:15) Ndray izy man̈ano zen̈y, lan̈iany olo nivilomin̈y ke tsy man̈eky fampianarany Zan̈ahary, mbala hofoaty mandrakizay koa, ke tsy hivilomin̈y eky.—Apokalypsy 20:5.

10. Fianakavian̈a. Zahay man̈araka fitsipiky Zan̈ahary momba vadian̈a, fotony tamy voanalohany tan̈y nataony man̈angy araiky ndreky lelahy araiky fo. Fijangajangan̈a zaraiky fo antony mahazo isarahan̈a. (Matio 19:4-9) Zahay man̈eky tsarabe fa fahendrena amy Baiboly ao ten̈a mampasambatra tokantran̈o.—Efesianina 5:22–6:1.

11. Fivavahan̈a. Zahay tsy mampiasa lakroa ndreky sary masin̈y, izikoa fa mivavaka. (Deoteronomia 4:15-19; 1 Jaona 5:21) Ty karazan̈a fanompoan̈a ataonay:

    • Mivavaka amy Zan̈ahary.—Filipianina 4:6.

    • Mamaky ndreky mianatra Baiboly.—Salamo 1:1-3.

    • Mieritreritry raha ianaran̈a baka amy Baiboly ao.—Salamo 77:12.

    • Mivory ke miaraka mivavaka, mianatra Baiboly, mihira, mikoran̈a momba Zan̈ahary, ndreky mifankahery.—Kolosianina 3:16; Hebreo 10:23-25.

    • Mitory “vaovao tsarany Fanjakan̈any Zan̈ahary.”—Matio 24:14.

    • Man̈ampy naman̈a sahiran̈a.—Jakoba 2:14-17.

    • Man̈orin̈y ndreky mikobaby Tran̈o Fivorian̈a ndreky tran̈o fampiasain̈y aminy asa fampianaran̈a Baiboly.—Salamo 127:1.

    • Mamonjy olo amy tany nandalovany antambo.—Asan’ny Apostoly 11:27-30.

12. Fikamban̈ananay. Zahay zarazarain̈y fiangonan̈a maro, baka io misy antipan̈ahy maro miandraikitry fiangonan̈a aby io. Iro antipan̈ahy aby io tsy hafa mandilatra olo jiaby ao, baka io koa iro tsy karamain̈y. (Matio 10:8; 23:8) Zahay tsy man̈ano ampahafolo, tsy man̈ano tanty rakitry. (2 Korintianina 9:7) Baka amy vola amianolo tsy miton̈ono an̈aran̈a an̈anovan̈a asanay jiaby.

    Misy Kristianin̈y matotro vitsivitsy amy foibenay an̈y man̈amia taridalan̈a Vavolombelon̈o Jehovah erantany. Filankevipitantan̈ana ivolan̈anay zen̈y.—Matio 24:45.

13. Firaisantsain̈y. Mira fo raha inoanay jiaby erantany. (1 Korintianina 1:10) Mifen̈y mare zahay jiaby baka tsy han̈avakavaka, fa ho mira fo. (Asan’ny Apostoly 10:34, 35; Jakoba 2:4) Ndray zen̈y, anjarany tsiaraikiaraiky aminay mifidy raha tiany hatao, an̈atinizen̈y raha momba fiain̈ananany manokan̈a, mifan̈araka amy raha nianarany tamy Baiboly ndreky eritreritrinany.—Romanina 14:1-4; Hebreo 5:14.

14. Fitondranten̈anay. Zahay mifen̈y mare, baka tsy ho tia ten̈a amy raha jiaby ataonay. (Jaona 13:34, 35) Zahay tsy man̈ano raha fataonolo kanefa tsy mamparavoravo Zan̈ahary, an̈isanizen̈y fampiasan̈a lio, ke ampidirin̈y aminy ain̈inolo. (Asan’ny Apostoly 15:28, 29; Galatianina 5:19-21) Zahay tia fihavan̈ana, ke zahay tsy miady. (Matio 5:9; Isaia 2:4) Zahay man̈aja lalàn̈any fanjakan̈a, izikoa mbala tsy mifanohitry amy lalàn̈any Zan̈ahary.—Matio 22:21; Asan’ny Apostoly 5:29.

15. Fifandraisan̈a aminolo. Jesosy nivolan̈a: “Tiava namanao, karaha ataonao tia ain̈inao in̈y.” Nivolan̈iny koa fa Kristianin̈y “tsy an̈isany donia ty.” (Matio 22:39; Jaona 17:16) Zahay ndray tsy man̈ano politiky ndreky tsy mibidabida fivavahan̈a hafa, zahay mifen̈y “han̈ano ny tsara aminolo jiaby.” (Galatianina 6:10; 2 Korintianina 6:14) Ndray zen̈y, zahay man̈aja safidinolo amy resaka politiky ndreky fivavahan̈a.—Romanina 14:12.

Izikoa misy raha mbala tianao han̈ontanian̈a momba raha inoany Vavolombelon̈o Jehovah, anao mety mamaky raha momba zahay aminy tranonkalanay, na mifandray amy bironay, na man̈aton̈o fivorian̈a amy Tran̈o Fivorian̈a tsy lavitry anao, na mikoran̈a amy Vavolombelon̈o Jehovah amy tany misy anao.