Zahay Vavolombelon̈o Jehovah mifen̈y man̈ano raha hampaharitry tokantran̈o, na ninay zen̈y, na niny hafa. Zahay man̈aja Zan̈ahary fotony izy namoron̈o tokantran̈o io. (Genesisy 2:21-24; Efesianina 3:14, 15) Ampianariny zahay amy Baiboly ao toro lalan̈a efa nan̈ampy olo maro erantany hankafatatra ndreky hampasambatra vadian̈andro.

 Zahay mifen̈y man̈araka torohevitry baka amy Baiboly. Izio man̈ampy zahay hanjary vady tsara ndreky raimandreny mahay mitaiza. (Ohabolana 31:10-31; Efesianina 5:22–6:4; 1 Timoty 5:8) Mety samby manan̈a finoan̈andro olo tran̈o araiky. Ndray zen̈y, fahendrena hita an̈aty Baiboly ao afaka man̈ampy iro hanan̈a tokantran̈o maharitry. (1 Petera 3:1, 2) Ty ohatra raha nivolan̈inolo sasany tsy Vavolombelon̈o Jehovah, izikoa fa vadindro nanjary Vavolombelon̈o Jehovah:

•   “Tsiota taon̈o voanalohany nampa fivadiany zahay, niasa nimalo ndreky niady fo zahay. Fa baka tio Ivete loso Vavolombelon̈o Jehovah. Nanomboko tamy zen̈y, izy nanjary nahaibe fitiavan̈a ndreky naharidraha. Ten̈a niova izy. Ke zen̈y raha nan̈avotro vadian̈anay”​—Clauir, baka a Brezily.

•   “Chansa vadiko koa fa nanomboko nianatra Baiboly tamy Vavolombelon̈o Jehovah, zaho tsy nan̈eky. Zaho baka nieritreritry fa iro io handeha hampisaraka zahay. Fa baka tio, hitako fa kaiky Baiboly io nan̈ampy vadian̈anay.”​—Agness, baka a Zambie.

 Zahay koa fa mitory na mampianatra Baiboly, haboakanay olo amy karakory fan̈arehan̈a torohevitry feno fahendrena an̈aty Baiboly ao afaka han̈ampy iro:

•   Hahay hifidy vady

•   Hahomby amy taon̈o voanalohany havitany mariazindro

•   Hahay hiaraka aminy havambady

•   Hahay hitantan̈a vola

•   Tsy himalo

•   Hianatra hifan̈ambela hadisovan̈a

•   Hahay hitahiza

 Ia, ndraikindraiky. Ohatra iziô, tamy tatitry naboakany Sofres, fikambanan̈a araiky pan̈ano fikarohan̈a taminy 1998, nahitan̈a fa vadian̈a 1 amy vadian̈a 20 tojo problemo be izikoa fa nisy araiky tamindro nanjary Vavolombelon̈o Jehovah.

 Jesosy efa nivolan̈a fa lan̈iany olo man̈araka izy ho halany havany. (Matio 10:32-36) Misy pahay tantara kahian̈a Will Durant nivolan̈a fa mbala tamy fitondrasan̈any Ampira Romanin̈y “Fivavahan̈a kristianin̈y voampanga fa mandravan̈a tokantran̈o.” a Misy Vavolombelon̈o Jehovah koa amy zioty volan̈inolo fa mandrobaka tokantran̈onolo. Ke dikanizen̈y ma Vavolombelon̈o Jehovah man̈ano raha hahavy iro hisaraka amy vadindro?

 Fitsaran̈a Eropeanin̈y Momba Zonolombelon̈o izikoa fa nitsara fiampangan̈a natao tamy Vavolombelon̈o Jehovah, izy nivolan̈a fa matetiky fianakavian̈a tsy Vavolombelon̈o man̈ano raha mahavy ady io ke mahavy tokantran̈o ravan̈a. Fotony iro tsy mety “man̈eky ndreky man̈aja zony havandro hifidy fivavahan̈a tiandro harehan̈a.” Karaha ty nambarany Fitsaran̈a io: “Maro vadian̈anolo tsy mitovy finoan̈a ahitan̈a raha karaha zen̈y, fa tsy niny Vavolombelon̈o Jehovah fo.” b Ndray iro havakavahan̈a baka amy fivavahan̈andro, Vavolombelon̈o Jehovah mifen̈y fo man̈araka torohevitriny Baiboly ty: “Na azovy nan̈ano ratsy taminaro na azovy, aza mamaly faty. ... Izikoa raha mbala mety atao, ke miankiny aminaro koa, ataova fo raha ihavan̈anaro aminolo jiaby.” ​—Romanina 12:17, 18.

 Vavolombelon̈o Jehovah von̈ono han̈araka raha koran̈iny Baiboly ty: ‘Manambady amy Tompo ao fo.’ Dikanizen̈y, manambady olo mitovy finoan̈a aminany. (1 Korintianina 7:39) Zen̈y didy amiany Baiboly, sady izio ten̈a mahatsara. Nisy lahatsoratra tamy Gazety Momba Mariazy avio Tokantran̈o, taminy 2010, ohatra nivolan̈a fa “olo fivadiany mitovy fivavahan̈a, fomba, ndreky finoan̈a” ny ten̈a manan̈a fifandraisan̈a tsara. c

 Fa ndray zen̈y, Vavolombelon̈o Jehovah tsy mandrisiky olo man̈araka finoan̈andro hisaraka amy vadindro tsy Vavolombelon̈o. Baiboly mivolan̈a: “Izikoa misy lelahy manambady tsy pino, ke man̈eky hiaraka mipetraka aminany fo vadiny, izy tsy tôkony hiala vadiny. Izikoa misy man̈angy manambady tsy pino, ke man̈eky hidoko aminany fo vadiny, izy tsy tôkony hiala vadiny.” (1 Korintianina 7:12, 13) Vavolombelon̈o Jehovah man̈araka didy zen̈y.