Ehe. Vavolombelon̈o Jehovah tsy sekty. Zahay Kristianin̈y, ke mifen̈y man̈araka modely namiany Jesosy ndreky man̈araka raha nampianariny.

 Tsy mira fahaizanolo dikany “sekty” io. Atsika hizaha dikany aroe, ahitan̈a fa zahay Vavolombelon̈o Jehovah tsy sekty zen̈y.

•   Misy olo mivolan̈a fa sekty zen̈y fivavahan̈a vaovao. Zahay Vavolombelon̈o Jehovah tsy namoron̈o fivavahan̈a vaovao. Fivavahan̈a kristianin̈y tamy faha apostoly fo arehanay. Voasoratra amy Baiboly ao raha nataondro ndreky raha nampianarindro. (2 Timoty 3:16, 17) Ikenay fa Soratra Masin̈y fo afaka mivolan̈a fa marin̈y fivavahan̈a araiky na tsy marin̈y.

•   Olo sasany ndraiky mivolan̈a fa sekty zen̈y fivavahan̈a mampatahotro taritinolo araiky. Tsy olombelon̈o mitariky zahay Vavolombelon̈o Jehovah. Karaha ty raha nivolan̈iny Jesosy momba pianatranany aby io: “Araiky fo Pitariky anaro, tsy azovy zen̈y fa Kristy.”​—Matio 23:10.

 Vavolombelon̈o Jehovah tsy fivavahan̈a mampatahotro zen̈y foeky. Iro pivavaka ao ndreky olo antanàna samy mahazo hatsaran̈a baka amizio. Ohatra araiky, baka amy fanompoan̈a ataonay mahavy olo maro tsy nihina jamala eky na tsy mamolava eky. Zahay mampianatra olo mamaky teny ndreky manoratra, ke olo andrivony erantany mahazo hatsaran̈a baka amy zen̈y. Izikoa fa misy antambo, zahay koa man̈ampy olo sahiran̈a. Isanandra zahay mifen̈y man̈araka raha koran̈iny Baiboly amy fiain̈ananay jiaby, fotony zen̈y raha nivolan̈iny Jesosy tamy pianatranany.​—Matio 5:13-​16.