Adaŋ da Iî di nî̃a-pɛlɛɛ maa sɔlɔ ɓó, nyàŋ núu-kpune e nâa támaa nɔii ma. Ma tãi ti, Ŋâla-taa kelai tani-ŋa di pîlaŋ Sêtɔŋ pôlu ŋɔmɛni nyɔ́mɔɔ kɛ́ɛi su.

Di pà nɔii ma gɛ̀ ní di núu-kpune kɔlɔ siɣe à gɛ́ɛ di nɛɣâa kula. Di nɛɣâa-ŋai di lônii kpeya-kpeya, koya-koya ŋa maa-sɔlɔ ɓo, nyii ŋai kɛ́ a diŋɛi tɛɛi, di wala-wala, di wana-lɔɔ.

Ŋeniɛi laa e nâa fɛɛ a wana-lɔɔ ɓela támaa. Ŋâla-kɔlɔi e mo nyɛɛi: “núu-kpune ŋɔ wana-lɔɔi e kɛ́ a gɛ́tɛ nɔii ma dikoi-mɛni-ŋai dikɛ́ ɓo a nyɔ́mɔɔ a tãi kélee.”

Nôa e kɛ́ a núu sɔŋ lɛ́lɛɛ. Ziova e mo Nôa ma à gɛ́ɛ a pai mɛni nyɔ́mɔɔ kɛ́ ɓelai su karai a ya fɛɛ kɛ́tɛ.

Ɣâla e ŋɔ́nɔ mo Nôa ma à gɛ́ɛ é yaŋá-keleŋ kpɛtɛ é ŋɔkáayɔɔ-ŋai da sua sii kélee tɛ géleŋ zu.

Nôa e nûai lia-woo ɓo e pîlaŋ ǹyá-fɛɛi mɛni ma kɛ́lɛ dife diwóli tɔ́ɔ ni ma. Nûai dani-ŋa di ɣɛ́lɛ Nôa mà, di yola kula gbonoi; dani-ŋa di gbɔara.

Tãi di kpɛɛ la géleŋ kpɛtɛi, Nôa e zua-ŋai tɛ géleŋ su.