E siɣe tãi Sâmia e kɛ̀ la a lôloŋ ma, e kɛ̀ Ziova ŋɔpɛ́rɛi mu gɛ tíi kɛ naa. I berei kɔ́lɔŋ Sâmia e lì la Ziova ŋɔpɛ́rɛi mui? Kwa nâa m̀ɛnii maa-kɔ́ri Ŋâla-kɔlɔi e mò é pîlaŋ Sâmia ǹee, Ana mai.

Tãi su kôya, Ana a káa wɔ̀lɔ Ɣâla mà lóŋ mɛni ma, kɛ́lɛ, vé kɛ́ ní lóŋ maa sɔlɔ ɓói. Nya ɓe, ɣele tɔnɔ ta, e Ziova fɛli é gbelai fé à gɛ́ɛ e lóŋ tɛɛ bɔ. E mò Ziova ma à gɛ́ɛ a lóŋ surɔ̂ŋ tɛɛ bɔ, a pai dɛɛi pôlu Ziova pɔ́ à gɛ́ɛ maa lóŋ tí e kɛ́ Ziova ŋɔpɛ́rɛi mù e tíi kɛ́ mì. Ziova e ŋɔfɛli-wóoi su tòo, e lóŋ surɔ̂ŋ tɛɛ bɔ. E ǹáa see a Sâmia. Naa pôlu ma, Ana e gɛ̀ yɛ̂ɛ berei e gono-tee lai. Tâi Sâmia e kɛ la a kóraŋ saaɓai (3) kpaa kóraŋ náaŋ (4), Ana e dɛɛ Ziova ŋɔpɛ́rɛi la à gɛ́ɛ e kɛ́ naa.

Ŋele-ŋai tí su, Ila ɓe kɛ a zala-laa-sóŋ-nuu kɛ́tɛi Ziova ŋɔpɛ́rɛi la. Ila ǹóŋ sinâa feerɛ máŋ dikɛ tíi kɛi naa a sala-laa-soŋ-ɓela. E lɛ́ɛ íkili-ŋa à gɛ́ɛ nûai tíi kɛi Ziova ŋɔpɛ́rɛi mui, maa nɛ̃ɛi dítûa-sɔŋ e kɛ́ a ǹɛ́lɛɛ. Kɛ́lɛ, Ila nônii dikɛ mɛni nyɔ́mɔɔ támaa kɛi naa. Sâmia a káa m̀ɛni-nyɔ́mɔɔ-ŋai kélee káa dikɛ gɛi naai. Ilaai la Sâmia e màŋ Ila nônii dîa e pɛlɛ mɛni-nyɔ́mɔɔ kɛɛ ma?— Kpao, e gbɛtɛ gíli-ŋa à gɛ́ɛ e mɛni-sã́a kɛ, yɛ̂ɛ berei ŋɔnûa di dɔɔ lai.

Lé ɓe Ilaai la maa nɛ̃ɛi kɛ Ila e gɛ à ǹôŋ surɔ̂ŋ feerɛi?— Maa nɛ̃ɛi kɛ e dikula-maa kɛ. À kɛ̀ da wala kpera m̀ɛni-nyɔ́mɔɔ-ŋai ŋí kɛ́ɛ ma, maa nɛ̃ɛi kɛ e di kpera tíi kɛi Ziova ŋɔpɛ́rɛi la. Kɛ́lɛ, Ila fé gɛ̀ ní tí, nya ɓe Ziova e níi wana mà da ǹônii. Mɛni ma, Ziova e gbɛtɛ à gɛ́ɛ e dikula-maa kɛ.

E kɛ a kpíni tɔnɔ ta, Sâmia kɛ́ɛ nyii, e núu ta wóo mɛni gɛ̀ dóli nyɛɛi: ‘Sâmia!’ Nya ɓe e m̀u-siɣe e lí Ila pɔ́ a kirɛ e m̀arê kɛ́ nyɛɛ ma I ńdóli? Kɛ́lɛ, Ila e ŋ̀óo su tòo nyɛɛi: ‘ḿve ítóli ní.’ Nyíŋi e kɛ a nyaa gîei feerɛ. Zaaɓa ɣelei pôlu ma, Ila e mò Sâmia ma nyɛɛ ya ŋɔ́nɔ dóli-wóoi ŋí mɛni, mò yɛɛi: ‘Ŋa nuu-namu Ziova, ŋ̀óli káa ya, ye lóno.’ Bere nɔ́ ɓe Sâmia e gɛ̀ la tãi e dóli-wóoi mɛni la naa pôlu ma. Nya ɓe Ziova e pɛlɛ lónoɔ ma Sâmia pɔ́ nyɛɛi: ‘Mò Ila mà à gɛ́ɛ ŋa pai nyaa da ŋɔkáayɔɔi kula-maa kɛi m̀ɛni-nyɔ́mɔɔ-ŋai da gɛ́i mɛni ma.’ Ilaai la e kɛ a mɛni loŋ à gɛ́ɛ  Sâmia e ŋorɛ̂-wooi ŋí ɓó Ila mà?— Kpa, vé kɛ́ ní a yɛpɛ mɛni. Tɔ̃yâ ma, Sâmia e kɛ yaoi à gɛ́ɛ e ŋorɛ̂-wooi ŋí ɓo, kɛ́lɛ, e m̀ɛnii kɛ̀ Ziova e mò mai. M̀ɛnii Ziova e mòi, ŋa-see e kɛ́. Ila da ǹônii feerɛi di saa.

Sâmia káa a núu nyii ǹɛ́lɛɛi kú bɔɔkɔ̂ɔŋ. Berei máŋ e nûa támaa káa la mɛni nyɔ́mɔɔ kɛi, vé màŋ ní dîa, kɛ́lɛ e mɛni lɛ́lɛɛ kɛ. E kɛi a ya lé ɓe îi gɛi? Ya pɔri kɛi yɛ̂ɛ Sâmia ikɛ mɛni lɛ́lɛɛ kɛ? À kɛ̀ ya gɛ tí, ya pai Ziova da íkáa-ɓela lii nɛ̃ɛi.