Kú kélee kwa ŋwɛ́lii a kâpa à gɛ́ɛ kú kpɔŋ maa tɛɛ kúkaayɔɔ̂i pɔ. (Záŋ-woo-ŋai 30:8) Tɔ̃yâ ma, “sɛŋ-kao a núu maa-kɔ̃ɔ.” (Ikilisiase 7:12) Tãi támaa, a kɛ́ a gbanáŋɔɔ à gɛ́ɛ tûalaa su-ɓela di kâpa mɛni kpɛtɛɛ kɛ́, kɛ́lɛ, káfe nɛɛ naa kâpa mɛni fé sóoŋ too kátûalaai su. (Ifisɛŋ-ŋai 4:32) Maa-nɛ̃ɛi zurɔ̂ŋ da bɔ̂ŋ di láa à díkîe kâpa mɛni su, di tíi kɛ gîe ma berei da pɔri díkâpai kɔlɛi lai.

LÉ ƁÉ ŊÂLA-KƆLƆI È MÒI: “Gbɛ̂ɛ ɓe ŋ̀wɛ̂lii e kɔni-yeŋ-keŋ kôya tɔɔ va see fulɔi e dɔɔ-sɛŋ-kao su see e gáa à kɛ̀ gáa ǹyée ŋá e gbɛɛ la?” (Lûu 14:28) Maa-nɛ̃ɛi ka mɛni-kpɛtɛɛ kɛ é pîlaŋ berei ma ka pa kákâpai kɔlɛi lai. (Emɔ 3:3) Ka mɛni-kpɛtɛɛ kɛ é pîlaŋ zãai dîa ka ŋwɛ̂lii ka ǹyái da gâpai ka pɔri gbɛɛi dímɛni mai. (Záŋ-woo-ŋai 31:16) À kɛ̀ kâpa káa íyéeì sãa ya mɛni ma, vé a kpa à gɛ́ɛ I maa sãai ya nɔ́. Kɔ́ I íyée kula kpa soŋ mɛni su. Gâpai íyéeì nɔ́ ɓé I gɔlɛ.—Záŋ-woo-ŋai 21:5; 22:7.

LÉ ƁÉ YA PƆRI GƐI:

• Lɔ̂ku kélee kpaa ɣaloŋ kélee, ka kâpa loŋ ta sɔlɔ ɓó, ka mɛni-kpɛtɛɛ kɛ é pîlaŋ berei ma ka pa gɔlɛi lai

• Kɛ́lɛ, à kɛ̀ kpa a lɛɛ káa, ka káyée maa yéŋ kâpa kɔlɛɛ su. Gɔɔŋ-maa ɓa, íyée maa-yeŋ kâpa kɔlɛɛ miî-sɛŋ pɛlɛ-pɛlɛɛ ya-mɛni ma, kɛ́lɛ, íkpɔɔ leɣi ɣíli

LÉ ƁÉ ŊÂLA-KƆLƆI È MÒI: “Mɛni lɛ́lɛɛ kɛ́, kúfe gɛ̂i nɔ́ Kúnuu-namui ŋɛ́i mɛni ma, kɛ́lɛ, kwa gɛ̂i máŋ núu-kpune ŋɛ́i.” (2 Kɔleŋtiɛŋ-ŋai 8:21) Kɛ́ a ísã́a, gâpai ya zɔlɔ ɓói da gâpai ya gɔlɛi, ípɔ̂ŋ e kɛ a mɛni kɔ́lɔŋɔɔ é pîlaŋ ma.

Tãi kélee ka lɛɛ pâi kâpa kɛtɛ ta kɔlɛi, ka mɛni kpɛtɛɛ kɛ é pîlaŋ ma, ǹúui dɔnɔ fé gɛ̀ nɔ́ a nî̃a-pere. (Záŋ-woo-ŋai 13:10) Ka mɛni kpɛtɛɛ kɛ a tãi kélee é pîlaŋ kâpa mɛni ma, a pa a lii-see kátûalaai su. Ífe gâpai ya zɔlɔ ɓói káa a ya tɔnɔ ípɔɔ, kɛ́lɛ, gáa íkaayɔɔ̂i mɛni ma.—1 Temeti 5:8.

LÉ ƁÉ YA PƆRI GƐI:

• Ka lóno é pîlaŋ gâpai ma ka pɔri gɔlɛi kákîe-ni ŋɛ́i-pôlui

• Káfe maa kpɛŋ kɛ é lɛɛ la zu kâpa kɔlɛ-mɛni e kula káa ka lɛɛ pâi lónoi é pîlaŋ kákâpai kɔlɛ-pere ma