ZƐŊ-LƐƐI 36

Kɛ A Iteniŋ Ɓoɔɔ Mɛni Kelee Su

ŊƆPÊLE KƐ

Nuu kelee a ŋwɛli a gɛɛ e laoi-laa kɛ a teniŋ-ɓo-ɓela. Ziova nyaa maŋ a ŋwɛlii a gɛɛ naoi-ni dia maŋ dikɛ a teniŋ-ɓo-ɓela. Kɛɛ nyiŋi kɛi a kɛ a gbanaŋɔɔ ŋeniɛi ŋi su ɓɛi nua tamaa dife wɛlini a teniŋ-ɓo-laai. Mɛni lɛlɛɛ-ŋa kɛɛ leŋ ɓe kwa pɔri zɔlɔ ɓoi kwa kɛ a kuteniŋ ɓoɔɔ mɛni kelee su?

1. Le mɛni ɓe nɛlɛɛi la a gɛɛ kukɛ a kuteniŋ ɓoɔɔ?

Kwa tua a nua a teniŋ ɓo pere, kwa nɛ a gɛɛ wɛli-kɛ-maa da ɓaa-kɛ-maa kaa kuyeei Ziova mɛni ma. Nyiŋi e lɛɛ ikili-ŋa: Ziova e kukili-ŋa-siai da mɛnii kelee kwa gɛi kɔlɔŋ. (Ibulu 4:13) A ku kaa kwa kɛ a kuteniŋ ɓoɔɔ, nyaŋ nyiŋi a nii nɛ̃ɛ. Ŋala-kɔlɔi e mo nyɛɛi: “Woya-ɓela ɓɛlɛ kpɛɛi Ziova koi, kɛlɛ gaa a teniŋ-ɓo-ɓela da tɔ̃ya-ɓela diwɛli-kɛ-maa-nuu.”—Tare-woo-ŋa 3:32, NWT.

2. Kwa pɔri kɛi leŋ a teniŋ-ɓo-ɓela kukɛ-ɣeniɛi su a ɣele kelee?

Ziova a ŋwɛlii a gɛɛ ku ‘tɔ̃ya ɓo kukie-ni dia.’ (Zɛkɛraya 8:16, 17) Nyiŋi sukulai ɓa le? Kwa kɛ lonoi nua pɔ yɛɛ kukaayɔɔi su-ɓela, kuɓaraŋ tii kɛ-ɓela, kubɔlɔ da sisɛ-ŋai, kpaa maŋ gɔmɛti-ɓela, kufe lɛɛ kɛ dia. Teniŋ ɓo-ɓela difa ŋuma kɛ diɓaraŋ-ŋa dia kpaa di difili. (Tare-woo-ŋa 24:28 da Ifisiɛŋ 4:28 lono.) Nyaŋ da diŋuŋ-fela-fe-ŋai kelee kpɛɛ. (Lomaŋ 13:5-7) Bere sii-ŋai ŋi kelee su, kwa kukpiŋ lɛ ‘pere sii kelee su a gɛɛ kukaa a tɔ̃ya-ɓela sãa-ŋa’ da teniŋ-ɓo-ɓela—Taitɔ 2:10.

3. Mɛni lɛlɛɛ-ŋa kɛɛ leŋ ɓe kwa zɔlɔ ɓo kwa kɛ a kuteniŋ ɓoɔɔ?

Nua da ku kɔlɔŋ a teniŋ-ɓo-ɓela, da laa a kua. Nyiŋi a pa a wɛli-kɛ-maa da kɛ-zu-tɔnɔ korai-toli-kpɔŋ su yɛɛ kaayɔɔ tɔnɔ. A gɛ kukili-ŋa-siai e kɛ a maa waa. Kuteniŋ-ɓo-laai a ŋɔnɔ “Kuɓalo-nuui Ɣala ŋɔsɛŋ-lɛɛi maa ɣiri,” e nua lii kula a gɛɛ di Ziova fɛli.—Taitɔ 2:10.

MƐNI TAMAA MAA-KƆRI

Berei kaa teniŋ-ɓo-laa a Ziova lii laa la, e I lɛɣɛ a nyaa da berei ya pɔri kɛi la a iteniŋ ɓoɔɔ mɛni kelee su ikɛ-ɣeniɛi su.

4. Teniŋ-ɓo-laa a Ziova lii laa

Ŋule-wooi 44:21 da Malakai 3:16 lono, gɛ ni ka lono e pilaŋ mare-kɛɛ-ŋai ŋi dia:

Le mɛni ɓe ve lɛlɛ ni la a gɛɛ ku gaa yɛɛ kwa pɔri dɔ̃yai looi Ziova ma?
I laai la Ziova lii a kɛ leŋ kwa dɔ̃yai ɓo a nɛɛ maŋ gɛi e kɛ a gbanaŋɔɔ?

Nĩa-pɛlɛɛ da tɔ̃ya ɓo, da dikaa-ɓela lii nɛ̃ɛ. Kwa tɔ̃ya ɓo, kwa Ziova lii nɛ̃ɛ

5. Tua a teniŋ ɓo pere a tãi kelee

Gaa nua tamaa kili-ŋa a gɛɛ ve lɛlɛ ni a gɛɛ ku tua a teniŋ ɓo pere a tãi kelee. Kɛlɛ mɛnii kaa nɛlɛɛi la a gɛɛ kukɛ a kuteniŋ ɓoɔɔ a tãi kelee. VILOI su kaa.

VILOI: Le Ɓe A Pa A Lii-nɛ̃ɛi?—Kili-ŋa Sia Maa Waa (2:32)

Ibulu 13:18 (NWT) lono, gɛ ni ka lono e pilaŋ berei ma kwa pɔri kɛi la a kuteniŋ ɓoɔɔ . . .

kukaayɔɔi su.
kutii kɛɛi su.
mɛni takpɛni-ŋa su.

6. Teniŋ-ɓo-laa a pa a mɛni lɛlɛɛ tamaa kupɔ

Tãi taŋa, teniŋ-ɓo-laa a pɔri pai a mɛni-kpanaŋ-ŋa. A nɛɛ maŋ e kɛ ti, teniŋ-ɓo-laa kaa a mɛni lɛlɛɛ. Ŋule-wooi 34:12-16 lono, gɛ ni ka lono e pilaŋ mare-kɛɛ ŋi ma: