ZƐŊ-LƐƐI 07
Le Ɓe Ku Gɔlɔŋ E Pilaŋ Ziova Ma?
Ya ikili-ŋa sia e pilaŋ Ziova Ɣala ma, le ɓe a pa ikili-ŋa? I laai la gɛi koyai kua nyaŋ kufa pɔri lɛɣɛi a nyaa, yɛɛ berei bɛmɛlɛŋ-kao-ŋai kɛi koyai la kuai? Kpaa gaa ikili-ŋa a gɛɛ ŋwala-walai, kɛɛ tua-pere sii kelee ta fe gbonoi yɛɛ ŋele gbana? Le kpɔ ɓe ku gɔlɔŋ e pilaŋ Ziova ma? Ziova aa ŋɔtua-pere lɛlɛɛ-ŋai taŋa lɛ kua Ŋala-kɔlɔi su. E ŋɔnɔ nɛ a gɛɛ gbaaŋɔɔi imɛni ma.
1. Le mɛni ɓe kufa pɔri Ɣala kaai lai?
“Ɣala kaa a mɔleŋ.” (Zɔŋ 4:24) Ziova kpono fe ma yɛɛ berei kukaa lai. Gaa a Mɔleŋ ɣala-taa, kwaa ma nyii kufa pɔri gaai.
2. Ziova ŋɔtua-pere lɛlɛɛ-ŋai taŋa ɓa le?
Kufa pɔri Ziova kaai. Kɛɛ kwa mɛni maa-kɔri e pilaŋ ma, kwa ŋwɛli, kpɛni fei tua-pere lɛlɛɛ-ŋa kaa gbonoi. Ŋala-kɔlɔi e mo nyɛɛi: “Yawɛɛ e tɔ̃ya mɛni wɛlini. Va nyee kula diai mu di teniŋ ɓoɔɔi dikili tɔɔ mai.” (Ŋule-wooi 37:28) A ŋɔnɔ “wɛli-kɛ-maa da maloŋ-kaa” lɛ diai mɔ̃lɛi titi dia. (Zĩi 5:11) “Diai dilii toɔɔi polui, [Ziova] kaa dikɔlɛ. A diai ŋuŋ ma ɓo kili kɛ-zu fe ŋɔnɔ diyeei.” (Ŋule-wooi 34:18) Nyaŋ I gɔlɔŋ a gɛɛ ya pɔri Ziova lii nɛ̃ɛi kpaa I nii too polu itua-pere su? Nuui nyii a mɛni nyɔmɔɔ-ŋa kɛi, a nii too polu. (Ŋule-wooi 78:40, 41) Kɛɛ Nuui nyii a mɛni lɛlɛɛ-ŋa kɛi, a pa a lii-nɛ̃ɛ bɔ.—Tare-woo-ŋa 27:11 lono.
3. Ziova a nɛ leŋ a gɛɛ kuwɛli kaa ma?
Ziova ŋɔtua-pere lɛlɛɛ-ŋai ŋuŋ ɓa, wɛli-kɛ-maa. Tɔ̃ya ma, “Ɣala kaa a wɛli-kɛ-maa.” (1 Zɔŋ 4:8) Kufa Ziova ŋɔwɛli-kɛ-maai kaa nɔ Ŋala-kɔlɔi su, kɛɛ kwa ŋɔnɔ gaa gbɛtɛ sãa su. (Dikɛ-mɛni-ŋai 14:17 lono.) Gɔɔŋ-maa ɓa, ikili-ŋa sia e pilaŋ berei ma e ku kpɛtɛ lai. E ku kpɛtɛ a bere sii nyii kwa pɔri sãa pɔ̃yɛ lɛlɛɛ-ŋa, wule lɛlɛɛ-ŋa ŋaa-nɛ̃ɛ kulai da mii-sɛŋ. A ŋwɛlii a gɛɛ ku kɛ-ɣeniɛ ŋaa-nɛ̃ɛ kula.
MƐNI TAMAA MAA-KƆRI
Mɛni maa-kɔri e pilaŋ berei ma Ziova a mɛni lɛlɛɛ-ŋa kɛ lai. Gɛ ni berei kaa Ziova a ŋɔtua-pere lɛlɛɛ-ŋai lɛ la kua.
4. Mɔleŋ maa waai kaa a Ɣala ŋɔwala-walalaai
Yɛɛ berei kwa tii kɛ la a kuyeei, bere nɔ ɓe Ziova a tii kɛ la a ŋɔmɔleŋ maa waai. Ŋala-kɔlɔi aa nɛ a gɛɛ mɔleŋ maa waai fe a nuu kpɔɔi, kɛɛ gaa a ŋwala-walalaai Ɣala a tii kɛ la a gɛɛ e gbɛtɛ-mɛni ŋaa-see kɛ. Luu 11:13 da Dikɛ-mɛni-ŋai 2:17 lono, gɛ ni ka lono e pilaŋ mare-kɛɛ-ŋai ŋi dia:
-
Ɣala a pai ‘ŋɔmɔleŋ pui nuu kelee kponoi’ nyii-ŋai da mare kɛ ŋɔmɔleŋ maa waai mɛni ma. Mɛni ma, I laai la mɔleŋ maa waai kaa a nuu kpɔɔi kpaa gaa a Ɣala ŋɔwala-walalaai? Le mɛni ma?
Ziova a tii kɛ a ŋɔmɔleŋ maa waai a gɛɛ e mɛni lɛlɛɛ-ŋa kɛ. Ŋule-wooi 33:6 (NWT) da 2 Pitɛ 1:20, 21 lono, gɛ ni ka lono e pilaŋ mare-kɛɛ ŋi ma:
-
Bere sii-ŋai Ziova aa tii kɛ la a ŋɔmɔleŋ maa waai taŋa ɓa le?
5. Tua-pere lɛlɛɛ-ŋa kaa Ziova kponoi
Mose e kɛ a Ɣala fɛli-nuu lɛlɛɛ, kɛɛ e kɛ ŋwɛlii e Ɣala kɔlɔŋ a nɛlɛɛ. Mɛni ma, Mose e mo ma nyɛɛi: “inia-mɛnii lɛ naa ma a gɛɛ ŋa gɔlɔŋ.” (Ɛsedɔ 33:13) Naa polu ma, Ziova e ŋɔtua-pere lɛlɛ-ŋai taŋa lɛ Mose ma. Ɛsedɔ 34:4-6 lono, gɛ ni ka lono e pilaŋ mare-kɛɛ-ŋai ŋi dia:
-
Ziova ŋɔtua-pere lɛlɛɛ-ŋai nenɛ ɓe e nɛ Mose ma?
-
Ziova ŋɔtua-pere lɛlɛɛ-ŋai nenɛ ɓe ŋwɛli kaa ya?
6. Ziova kpaaŋɔɔi nua mɛni ma
Ɣala ŋɔnuai nyii-ŋai kɛ a Ibulu-ŋai, dikɛ a luwɛ-ŋa Ize lɔii su. Ziova lii e kɛ leŋ tãi dikɛ mɔ̃lɛi lai? ŊALA-KƆLƆ LONO-WOOI ŋa-tɛ kpaa Ɛsedɔ 3:1-10 lono. Gɛ ni ka lono e pilaŋ mare-kɛɛ-ŋai ŋi dia.
-
Le ɓe mɛnii ŋi e nɛ ya e pilaŋ berei ma Ziova lii a kɛ la nua da kɛ mɔ̃lɛi?—Ŋoo-kpua-kpua 7 da 8 kaa.
-
I laai la Ziova a ŋwɛlii e kpɔŋ maa tɛɛ nuu-kpune pɔ, nyaŋ a pɔri gɛi ti? Le mɛni ma?
7. Kwa Ziova ŋɔtua-pere lɛlɛɛ-ŋai kaa gbɛtɛ sãa su
Ziova a ŋɔtua-pere lɛlɛɛ-ŋai lɛ kua gbɛtɛ sãa sarai. VILOI su kaa. Lomaŋ 1:20 lono, gɛ ni ka lono e pilaŋ mare-kɛɛ ŋi ma.
-
Ziova ŋɔtua-pere lɛlɛɛ-ŋai nenɛ ɓe ya gaa gbɛtɛ sãa sarai?
NUA TAŊA DA MO DIYƐƐI: “Ɣala fe a nuu kpɔɔi, kɛɛ gaa kwaa kelee ma.”
-
Ikili-ŋa-siai ɓa le?
-
Le mɛni ma?
MƐNI-ŊUŊ-ŊAI YAA MAA-KƆRII
Kufa Ziova kaa kpɛni fei gaa a Mɔleŋ. Tua-pere lɛlɛɛ tamaa kaa gbonoi, yɛɛ wɛli-kɛ-maa.
Gili-too-ŋa mare-kɛɛ-ŋai
-
Kufa Ziova kaa le mɛni ma?
-
Le ɓa mɔleŋ maa waai?
-
Ziova ŋɔtua-pere lɛlɛɛ-ŋai taŋa ɓa le?
MƐNI TAKPƐNI-ŊA MAA-KƆRI
Mɛni tamaa maa-kɔri e pilaŋ Ziova ŋɔtua-pere lɛlɛɛ-ŋai naaŋ ma nyii mɛni kpanaŋɔɔi.
Mɛni-ŋa kaa nyii nɛ a gɛɛ Ziova fe kwaa kelee, gɛ sɛŋ kelee su.
“Ɣala Kaa Kwaa Kelee, Gɛ Sɛŋ Kelee Su?” (Zɛŋ-lɛɛi ŋi kaa jw.org fãai ŋa)
Mɛnii Ŋala-kɔlɔi e mɔleŋ maa waai kɔɔŋ la Ɣala yee mai, kaa.
E kɛ a gbanaŋɔɔ a gɛɛ ŋɛi pu naloŋ ta e laa la a gɛɛ Ɣala e ŋwɛlini. Mɛnii kaa nii maa faleŋ.
“Ŋaa Naa Gaa A Gɛɛ Ŋa Pɔri Kpɔŋ Maa Tɛɛi Nua Pɔ” (Nyeŋkeŋ, Ŋweei 1, 2015)