ZƐŊ-LƐƐI 21
Pere Sii Kɛɛ Leŋ Ɓe Duŋ Lɛlɛɛi A Ɓoi La?
Tãi kpua yee mu, Ziova a pai kumɛni-kpɔlu-ŋai kelee kperai Ŋɔkaloŋ-laai sarai. Duŋ ti kaa a tuŋ lɛlɛɛ nyii maa nɛ̃ɛi nuu kelee e mɛni. Zisɛ e kɛ ŋwɛlii a gɛɛ bolu-ɓela di duŋ lɛlɛɛi ŋi ɓo nuu kelee ma! (Maafiu 28:19, 20) Ziova Ŋɔsere-faa Kɛ-ɓelai da siai leŋ a mɛnii Zisɛ e moi?
1. Maafiu 24:14 ŋaa-see kaa saa kɛi leŋ?
Zisɛ e mo nyɛɛi: “Galoŋ-laai maa tuŋ lɛlɛɛi ŋi a pai ɓoi nɔii gwaa kelee.” (Maafiu 24:14) Ziova Ŋɔsere-faa Kɛ-ɓelai lii nɛ̃ɛi a gɛɛ di dii mɛni-kpanaŋɔɔi ŋi kɛ. Kwa duŋ lɛlɛɛi ɓoi ŋeniɛi gwaa kelee sii-woo tamaa su, e tɛɛ sii-woo wala tɔnɔ (1,000) ma! A gɛɛ ku dii kɛtɛi ŋi kɛ, maa nɛ̃ɛi ku tii kɛ a kutãi da kuwala-walalaai a nɛlɛɛ, ku mɛni pu ŋɛli ma. Ziova a wala kpɔŋ kua, kufa pɔri dii ŋi kɛi.
2. Le mɛni-ŋa ɓe kwa gɛ a gɛɛ ku ɣala-woo ɓo nua dia?
Kwa ɣala-woo ɓo ɓɛi kelee kwa nua kaa naai. Yɛɛ Korai-ɓelai kɛ zia-ɓelai ditãi mai, kwa ɣala-woo ɓo “pɛrɛ kelee la.” (Dikɛ-mɛni-ŋai 5:42) Ŋala-woo-ɓo perei ŋi a kpɔŋ kua a gɛɛ ku lono nuu ŋɔmiliyɔŋ tamaa pɔ a koraŋ kelee. Ee nua difa kɛ dipɛrɛ-ŋai la a tãi kelee, kwa ŋɔnɔ ɣala-woo ɓo ɓɛi kelee kwa nua tamaa kaa naai. Kwa pere kɔri a tãi kelee a gɛɛ kulono nua pɔ e pilaŋ Ziova ma da ŋɔkpɛtɛ-mɛni-ŋai.
3. Gbɛɛ-ni ɓe maa nɛ̃ɛi di duŋ lɛlɛɛ ŋi ɓo?
Maa nɛ̃ɛi tɔ̃ya Korai-ɓela kelee di duŋ lɛlɛɛ ŋi ɓo nua dia. Kwa dii ŋi maa mɛni siɣe a gbanaŋɔɔ. Kwa ɣala-woo ɓo a bere sii kelee kwa pɔri gɛi lai, kpɛni fei ku gɔlɔŋ a gɛɛ dii ŋi a pɔri fulu-laa tɛɛi nua pɔ. (1 Temete 4:16 lono.) Difa ku fela fe dii ŋi mɛni ma, kpɛni fei Ŋala-kɔlɔi e mo nyɛɛi: “Berei ka zɔlɔ-ɓo la kpɛni-kpɛni, ka dɛɛ nɔ ti kpɛni-kpɛni.” (Maafiu 10:7, 8) Nuu kelee fe a nyee see kuworɛ-wooi mu. Kɛɛ kufa kpera kpɛni fei ŋala-woo-ɓo tii kaa a kuɣala-fɛli perei ta, nyaŋ a Ziova lii nɛ̃ɛ.
MƐNI TAMAA MAA-KƆRI
Mɛni tamaa maa-kɔri e pilaŋ berei ma Ziova Ŋɔsere-faa Kɛ-ɓelai da kɔ la a gɛɛ di ŋala-woo-ɓo tii kɛ ŋeniɛi gwaa kelee da berei Ziova a kpɔŋ maa tɛɛ la kupɔi.
Ŋala-woo-ɓo tii ŋeniɛi gwaa kelee: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Kwa kɔ a gbanaŋɔɔ a gɛɛ ku seri nuu kelee ma
Ziova Ŋɔsere-faa Kɛ-ɓelai da kɔ a gbanaŋɔɔ a gɛɛ di duŋ lɛlɛɛ ɓo nua dia kwaa kelee ma. VILOI su kaa, gɛ ni ka lono e pilaŋ mare-kɛɛ ŋi ma.
-
Le ɓe ilii kula e pilaŋ berei ma Ziova Ŋɔsere-faa Kɛ-ɓelai da kɔ la a gɛɛ di ɣala-woo ɓo nuu kelee ma?
Maafiu 22:39 da Lomaŋ 10:13-15 lono, gɛ ni ka lono e pilaŋ mare-kɛɛ-ŋai ŋi dia:
-
Kuɣala-woo-ɓo tii a nɛ leŋ a gɛɛ ku kukɔlɛ-ma-ɓelai wɛlini?
-
Ziova lii kaa leŋ e pilaŋ diai duŋ lɛlɛɛi ɓoi dia?—Ŋoo-kpua 15 kaa.
5. Kwa tii kɛi gie ma a Ɣala
Mɛni-kɔɔŋ-maa tamaa a nɛi a gɛɛ Ziova kaa dii ŋi teniŋ tɔɔi. Gɔɔŋ-maa ɓa, bɔlɔ ta nyii da kɛ ma Paul e nɛni ta kaa ŋɔpɛrɛi la a ɣele-wulii tɔnɔ ŋala-woo-ɓo tii su New Zealand lɔii su. Nɛnii e Ɣala fɛli a ŋele-walai ti, e doli a naa Ziova, e mare kɛ a gɛɛ nuu ta e pa e ɣala-woo ɓo ma. Paul e mo nyɛɛ, “Aɓa saaɓa tɛɛ polu ma, ŋa li ŋɔpɛrɛi la.”
1 Kɔleŋtiɛŋ 3:9 (NWT) lono, gɛ ni ka lono e pilaŋ mare-kɛɛ ŋi ma:
-
Mɛni-kɔɔŋ-maa-ŋai ŋi yɛɛ nyii kɛ New Zealand, a nɛ leŋ a gɛɛ Ziova kaa ŋala-woo-ɓo tii teniŋ tɔɔi?
Dikɛ-mɛni-ŋai 1:8 lono, gɛ ni ka lono e pilaŋ mare-kɛɛ ŋi ma:
-
Le mɛni ɓe maa nɛ̃ɛi Ziova e kpɔŋ la kua a gɛɛ ku ŋala-woo-ɓo tii kɛ?
I mɛnii kɔlɔŋ?
Lɔɔ-kuu kelee kwa mɛni maa-kɔri kulɔɔ-kuu sama koyaŋ su, nyii a kpɔŋ kua a gɛɛ ku ŋala-woo-ɓo tii kɛ. A kɛ ya ta li goyaŋ-ŋai ŋi ta su, ikili-ŋa-siai e kɛ leŋ e pilaŋ mɛnii ma di nɛ naai?
6. Kwa Ɣala ŋɔtɔŋ mɛi kaa a gɛɛ kuɣala-woo ɓo
Zia-ɓelai ditãi ma, diai kɛ a di tɔɔ ŋala-woo-ɓo tii mai di kɔ a gɛɛ di Zisɛ ŋɔpolu-ɓelai kpera ɣala-woo ɓoi. Korai-ɓelai wɔlɔ kɛi ‘ditɔɔ duŋ lɛlɛɛi mɛni ma’ a gbanaŋɔɔ. (Felepiɛŋ 1:7) Ziova Ŋɔsere-faa Kɛ-ɓelai da saa mɛni tɔnɔi ti kɛi. a
Dikɛ-mɛni-ŋai 5:27-42 lono, gɛ ni ka lono e pilaŋ mare-kɛɛ ŋi ma:
-
Le mɛni ɓe kufe pai kperai la ɣala-woo ɓoi?—Ŋoo-kpua-kpua 29 38, da 39 kaa.
NUU TA A PƆRI I MARE KƐI: “Le mɛni ɓe Ziova Ŋɔsere-faa Kɛ-ɓelai da li la pɛrɛ-ŋa lai?”
-
Ya pɔri kɛi le?
MƐNI-ŊUŊ-ŊAI YAA MAA-KƆRII
Zisɛ e mo ŋɔpolu-ɓelai dia a gɛɛ di duŋ lɛlɛɛi ɓo lɔii-ŋuŋ kelee su. Ziova a kpɔŋ maa tɛɛi ŋɔnuai pɔ a gɛɛ di dii ŋi kɛ.
Gili-too-ŋa mare-kɛɛ-ŋai
-
Pere sii kɛɛ leŋ ɓe duŋ lɛlɛɛi a ɓoi la ŋeniɛi gwaa kelee?
-
Kuɣala-woo-ɓo tii a nɛ leŋ a gɛɛ ku kukɔlɛ-ma-ɓelai wɛlini?
-
I laai la ŋala-woo-ɓo tii a kulii nɛ̃ɛ? Le mɛni ma?
MƐNI TAKPƐNI-ŊA MAA-KƆRI
Berei kaa Ziova Ŋɔsere-faa Kɛ-ɓelai da ɣala-woo ɓo la taa-lee kpayakpaya-ŋa sui.
Le ɓe Ziova Ŋɔsere-faa Kɛ-ɓelai daa gɛ a gɛɛ di ɣala-woo ɓo kɔ-pu-ɓela dia?
Berei Ziova Ŋɔsere-faa Kɛ-ɓelai Di Ɣala-woo Ɓo La Kɔ-pu-ɓela Dia (5:59)
Berei kaa kɛ-ɣeniɛ a kɛ a nɛlɛɛ la nuu a ŋɔtãi kelee siɣe panĩa tii kɛ mɛni ma.
Berei kaa koti mɛni-ŋai nyii-ŋai daa nɛ̃ɛ kuai, aa pere laa ɓo la a gɛɛ ŋala-woo-ɓo tii e li tuɛ pere.
a Ɣala ɓe mo a gɛɛ ku ŋala-woo-ɓo tii kɛ. Mɛni ma Ziova Ŋɔsere-faa Kɛ-ɓelai difa nuu-kpune gɔmɛti mare kɛ di lɛɛ pai duŋ lɛlɛɛ ɓoi.