ZƐŊ-LƐƐI 30
Iwɛli-kɛ-maa-ɓelai Da Pɔri Ŋɔnɔ Kɛi Ɣele Ma!
Saa a pa a lii-too-polu tamaa. Nyiŋi ɓe gɛ Ŋala-kɔlɔi kɛ saa toli a kpɔara-nuu. (1 Kɔleŋtiɛŋ 15:26) Zɛŋ-lɛɛi 27 su, I maa-kɔri a gɛɛ Ziova a pai gbɔara-nuui ti yee mɛi ɣalei. Kɛlɛ le ɓe pai kɛi a diai daa saai? Zɛŋ-lɛɛi ŋi su, ya pai mɛni tamaa maa-kɔrii e pilaŋ Ziova ŋɔkono-tee-ŋai nɛlɛɛ tɔnɔ ma—a pai nuu ŋɔmiliyɔŋ tamaa mu siɣei saa-yeei dikɛ ɣeniɛ wɔlɔ-wɔlɔ da wɔlɔ-wɔlɔ. A pai dimu siɣei saa-yeei! I laai la nyiŋi a pɔri kɛi? Da pai dimu siɣei saa yeei a gɛɛ di li ɣala-taa kpaa dikɛ nɔii ma?
1. Le ɓe Ziova a ŋwɛlii e gɛ kuwɛli-kɛ-maa-ɓelai daa saai mɛni ma?
Ziova a ŋwɛlii kpɔ a gɛɛ e zaa-ɓelai mu siɣe saa yeei. Laa-la e kɛ Ŋala-nuui Zoo yeei a gɛɛ Ɣala fe pai nĩai ma a saa. E mo Ɣala ma nyɛɛi: “Ya pai toli ɓoi, nyaŋ ŋa pai faai iwoo mu [Moloŋ su].”—Zoo 14:13-15 (NWT) lono.
2. Ku gɔlɔŋ leŋ a gɛɛ zaa-ɓelai da pɔri dimu siɣei saa yeei?
Tãi Zisɛ e kɛ la nɔii mai, Ɣala e wala-walalaa tɛɛ bɔ a gɛɛ e nua mu siɣe saa yeei. Zisɛ e koraŋ puu kao feerɛ (12) nɛni-loo da pɔɔ-nɛni tɔnɔ noŋ mu siɣe saa yeei. (Maki 5:41, 42; Luu 7:12-15) Naa polu ma, Zisɛ naoi Lazara e saa. Berei maŋ Lazara e saa la di noo e gɛ a folo-kuu naaŋ, Zisɛ e mu siɣe saa yeei. Gɛɛ Zisɛ aa kpɛɛ Ɣala fɛlii, e mo nyɛɛi: “Lazara, kula!” Nyaŋ “zaa-nuui e kula”—a vulu! (Zɔŋ 11:43, 44) I kili-ŋa sia e pilaŋ berei ma Lazara ŋɔkaayɔɔi da naoi-ni lii e kɛ a nɛ̃ɛi lai!
3. Kili-kɛ-zu kɛɛ leŋ ɓe naa Iwɛli-kɛ-maa-ɓelai daa saai mɛni mai?
Ŋala-kɔlɔi e mo nyɛɛi: “Mu-siɣe saa-yeei a pai kɛi naa.” (Dikɛ-mɛni-ŋai 24:15) Diai Zisɛ e wɔlɔ dimu siɣei saa yeei, dife li ni ɣala-taa. (Zɔŋ 3:13) Di lii e kɛ a nɛ̃ɛ a gɛɛ e dimu siɣe saa yeei nɔii ma ɓɛ. Bere sii tɔnɔi ti su, Zisɛ a pai nuu ŋɔbiliyɔŋ tamaa mu siɣei saa yeei tãi kpua yee mu, a gɛɛ di kɛ-ɣeniɛ ŋaa-nɛ̃ɛ kula wɔlɔ-wɔlɔ da wɔlɔ-wɔlɔ paredai lɔii ma. E mo a gɛɛ “nuui kelee moloŋ sui”—diai kpiŋ tãi ta kwaa nĩa diai kɛlɛ dikaa Ɣala kili-ŋai, da pai dimu siɣei saa yeei.—Zɔŋ 5:28, 29.
MƐNI TAMAA MAA-KƆRI
Mɛnii kaa gɛ kwa pɔri laai la a gɛɛ wala-walalaa kaa Zisɛ yeei a gɛɛ e zaa-ɓelai mu siɣe saa yeei, nyaŋ a pai gɛi ti. Berei kaa mu-siɣe saa-yeei a pɔri iŋaa nɛnɛi la, e kili-kɛ-zu tɛɛ ipɔ.
4. Zisɛ e nɛ a zu ponoɔ a gɛɛ a pɔri zaa-ɓelai mu siɣei saa yeei
Mɛni tamaa maa-kɔri e pilaŋ mɛnii ma Zisɛ e gɛ naoi Lazara mɛni mai. Zɔŋ 11:14, 38-44 lono, gɛ ni ka lono e pilaŋ mare-kɛɛ-ŋai ŋi dia:
-
Ku gɔlɔŋ leŋ a gɛɛ Lazara e saa kpɔ a tɔ̃ya?—Ŋoo-kpua 39 kaa.
-
A kɛ Lazara e li ɣala-taa, I laai la nii eei pa kɛi a nɛ̃ɛ a gɛɛ Zisɛ e pa a nyaa polu nɔii ma ɓɛ?
5. Nua tamaa da pai dimu siɣei saa yeei!
Ŋule-wooi 37:29 lono, gɛ ni ka lono e pilaŋ mare-kɛɛ ŋi ma:
-
Mi ɓe nuu ŋɔbiliyɔŋ tamaai nyii-ŋai pai dimu siɣei saa yeei da pai kɛi naa?
Ziova fɛli-ɓela nɔ fe Zisɛ a pai dimu siɣei saa yeei, kɛlɛ a pai nua tamaa mu siɣei saa yeei. Dikɛ-mɛni-ŋai 24:15 lono, gɛ ni ka lono e pilaŋ mare-kɛɛ ŋi ma:
-
Gbɛɛ ɓe ya pai ŋwɛlii I gaa a mu-siɣe saa-yeei tãi?
Ikili-ŋa sia e pilaŋ nyiŋi ma: Zisɛ a pɔri nuu ta mu siɣei saa yeei yɛɛ berei nɔ naŋ-nuu a noŋ nyii gaa nyii ŋaa ɓo lai
6. Mu-siɣe saa-yeei a pɔri pai a ŋaa-nɛnɛ da kili-kɛ-zu ipɔ
Mɛnii Ŋala-kɔlɔi e mo e pilaŋ Zailɔ noŋ nɛnii mai, aa nua tamaa ŋaa nɛnɛ nyii-ŋai saa aa too diai. Dɔ̃ya mɛni-pelei ti lono Luu 8:40-42, 49-56 su.
Zisɛ e lɛɛ pai Zailɔ loŋ nɛnii mu siɣei saa yeei, e mo Zailɔ ma nyɛɛi: “Ife yao, laa nɔ [a Ɣala].” (Ŋoo-kpua 50 kaa.) Mu-siɣe saa-yeei maa kili-kɛ-zui a pɔri kpɔnii leŋ ya . . .
-
iwɛli-kɛ-maa nuu a saa?
-
ya kɛ tɛɛi mɛni-kpɔlu su?
VILOI su kaa, gɛ ni ka lono e pilaŋ mare-kɛɛ ŋi ma.
-
Mu-siɣe saa-yeei maa kili-kɛ-zui e Phelicity kaa-ɓela ŋaa nɛnɛ leŋ?
NUA TAŊA DA MO DIYƐƐ: “Zaa-ɓelai da pai dimu siɣei saa yeei Ɣala-taa, kɛɛ nɔii ma fei.”
-
Ikili-ŋa-siai ɓa le?
-
Ɣala-kɔlɔ-kpua kɛɛ leŋ ɓe ya pɔri tii kɛi la nyii nɛi a gɛɛ nua tamaa da pai dimu siɣei saa yeei nɔii ma ɓɛ?
MƐNI-ŊUŊ-ŊAI YAA MAA-KƆRII
Ŋala-kɔlɔi e mo a gɛɛ nuu ŋɔbiliyɔŋ tamaa da pai dimu siɣei saa yeei. Ziova a ŋwɛlii a gɛɛ dikɛ ŋɔnɔ ɣele ma nyaŋ aa wala-walalaa tɛɛ Zisɛ pɔ a gɛɛ e dimu siɣe saa yeei.
Gili-too-ŋa mare-kɛɛ-ŋai
-
Ku gɔlɔŋ leŋ a gɛɛ Ziova da Zisɛ da ŋwɛlii a gɛɛ di zaa-ɓelai mu siɣe saa yeei?
-
Mi ɓe nuu ŋɔbiliyɔŋ tamaai nyii-ŋai pai dimu siɣei saa yeei da pai kɛi naa—ɣala-taa kpaa nɔii ma? Le mɛni ma?
-
Le ɓe gɛ ikɛ laa la a gɛɛ iwɛli-kɛ-maa-ɓelai da pɔri dimu siɣei saa yeei?
MƐNI TAKPƐNI-ŊA MAA-KƆRI
Mɛni-ŋai kaa a pɔri kpɔnii ya saa a too ya.
“Gbɔŋ Maai Diai Saa Aa Too Diai Mɛni Ma” (Kɛ-a-iŋɛi! No. 3 2018)
Ŋala-kɔlɔi ŋɔtɔ̃ya-ŋuŋ-ŋai da pɔri kpɔnii nuu ta ma nyii saa aa too mai?
Nĩa-pɛlɛɛ da pɔri ŋaa-nɛnɛ sɔlɔ ɓoi leŋ diwɛli-kɛ-maa-nuu a saa?
Nua da pai dimu siɣei saa yeei di li ɣala-taa? Gbɛɛ-ni ɓe dife pai dimu siɣei saa yeei?
“Mu-siɣe Saa-yeei Sukulai Ɓa Le?” (Zɛŋ-lɛɛi ŋi kaa jw.org fãai ŋa)