Ziova Ŋɔsêre-faa kɛ́-ɓelai ŋɛɛlu ɓé I gɔ́lɔŋ? Tãi ta ka dí tani-ŋa kákaa góli tɔnɔi su, kpaa kákaa tíi kɛ́i gîe ma, kpaa máŋ kákaa gɔlɔ-pɛ́rɛ tɔnɔi mu. À wala kɛ́ tí, tãi ta, da ɣâla-woo ɓo yâ kpîŋ. Kɛ́ɛ nyaŋ, gbɛ̂ɛ kpɔ̂ɔ ɓa kwa, nyaŋ lé mɛni ɓé kwa ɣâla-woo ɓo la nûa kélee dîa?

Kúkaa nɔ́ yɛ̂ɛ núu kélee. Kúkaa a núu-sîi takpɛ́ni-takpɛni-ŋa, kú kɛ ɓó a tíi takpɛ́ni-takpɛni-ŋa kɛ́ ɓela. Kú tani-ŋa kpîŋ kú kɛ́ ɣâla-mɛni takpɛ́ni-takpɛni-ŋa su, kú tani máŋ laa-la fé kɛ́ ní kúyéeì Ɣâla mɛni ma. Kɛ́ɛ, kú lɛɛ pâi kɛ́i a Ziova Ŋɔsêre-faa kɛ́-ɓelai da, kú kélee kú Ŋâla-kɔlɔi maa-kɔ́ri kpɔ́ a nɛ́lɛɛ à gɛ́ɛ kú gáa à kɛ̀ m̀ɛni-ŋai zui díkaa a tɔ̃yâ. (Zia-ɓelai Kɛ́-mɛni-ŋai 17:11) Kú m̀ɛni-ŋai kú dímaa-kɔ̂rii siɣe a tɔ̃yâ. Maa mɛni ma, kûa kpîŋ ɓé gbɛtɛ kúlii su à gɛ́ɛ kú kɛ́ a Ziova Ŋɔsêre-faa kɛ́-ɓelai ta.

Ŋâla-kɔlɔi maa-kɔ́riɛ a kpɔŋ maa tɛɛ kúpɔ. Yɛ̂ɛ núu-kpune kélee, mɛni kpɔlu a pa kúpɔ, nyaŋ kwa kpîŋ kwa pɔara-mɛni maa-ŋai kɛ. Kɛ́ɛ, ee kwa kɔ́ à gɛ́ɛ kú Ŋâla-kɔlɔi ŋɔlia-wooi dûa kɛ́ a ɣele kélee kúkɛ́-ɣeniɛi sui, kwaâ mɛni maa fáleŋɔɔ lɛ́lɛɛ támaa káa kúkɛ́-ɣeniɛi su. (Wule-woo-ŋa 128:1, 2) Nya ɓé gɛ kwa kɔ́ à gɛ́ɛ kú m̀ɛni lɛ́lɛɛ-ŋai kwaâ maa-kɔ́ri Ŋâla-kɔlɔi sui, lɛ́ nûa dîa.

Kwa m̀ɛni-ŋai kɛ́ kwa dímaa-kɔ́ri Ŋâla-kɔlɔi sui. M̀ɛni-ŋai Ŋâla-kɔlɔi a nɛ̀i, nɛ́lɛɛi kú mɛni ma, nyaŋ a gɛ ɓaa-kɛmaa é kɛ́ kúyéeì kúɓarâŋ-ŋai mɛni ma. A ŋɔ́nɔ gɛ̀ kú kɛ́ a teniŋ-ɓó da sɔŋ-lɛ́lɛɛ-ɓela. E tee nyíti ma, a kpɔŋ maa tɛɛ nûa pɔ́ à gɛ́ɛ dí kɛ a mɛni lɛ́lɛɛ kɛ́ ɓela. Gɛ ŋɔ́nɔ pa a lii-nɛ̃ɛ da lii-laa káayɔɔ pɔ́ é gɛ́ dí kɛ́-zu-tɔnɔ. Kú laai la à gɛ́ɛ “Ɣâla fa núu su ɣɛɛ,” mɛni ma, kúkaa zu tɔnɔ kwa kúɓarâŋ kôrai-ɓelai ŋéniɛi gwaa kélee laa-la tɔnɔ su, kúfa suɣɛɛ mɛni kɛ. Tɔ̃yâ ma, kúkaa nɔ́ yɛ̂ɛ núu kélee, kɛ́ɛ, kúkaa a wɛli-kɛ-maa ɓela.—Zia-ɓelai Kɛ́-mɛni-ŋai 4:13; 10:34, 35.

• Lé ɓé Ziova Ŋɔsêre-faa kɛ́-ɓelai kɛ́ nɔ́ yɛ̂ɛ núu kélee?

• Lé ɓa m̀ɛni-ŋuŋ-ŋai Ziova Ŋɔsêre-faa kɛ́-ɓelai daâ maa-kɔ́ri Ŋâla-kɔlɔi sui?