Tãi kpua yee mu, Ziova ŋɔlii-kpelei a pai serii goyaŋ ma ŋeniɛi ŋi mɛni ma. Ziova a pai lɛɛ ɣala-mɛni su karai, lɔii-ŋuŋ-ŋa da pai pɛlɛi Ɣala ŋɔnuai dia, nyaŋ Ziova a pai ŋwana-lɔɔ-ɓelai sukarai Amagidɔŋ kɔi su. Korai-ɓela ŋɛi kaa tãi pelei mɛni-ŋai ŋi da pai kɛi lai.

Tɔ̃ya ma, kufe mɛni-ŋai kelee kɔlɔŋ pai kɛi a mɛni-kpɔlu kɛtɛi ŋɔtãi. Gɔɔŋ-maa ɓa, kufe tãi titi kɔlɔŋ mɛni-ŋi kɔɔ a pai pilanii lai. Kufe mɛni-ŋai kɔlɔŋ pai gɛi gɔmɛni-ɓelai dikɛ pɛlɛ ɣala-mɛni mai. Kufe gɔlɔŋ a kɛ gɔmɛni-ɓelai da pɛlɛ Ɣala ŋɔnuai dia a pai tãi tamaa siɣei kpaa mɛni-ŋai nyiŋi a pai pai lai. Nyaŋ kufe ŋɔnɔ berei titi kɔlɔŋ Ziova a pai ŋwana-lɔɔ-ɓelai sukurai la Amagidɔŋ kɔi su.

Kɛlɛ, Ŋala-kɔlɔi e mɛni-ŋai kelee lɛ kua maa nɛ̃ɛi ku gɔlɔŋ a gɛɛ laa-la e kɛ kuyeei mɛni-ŋai pai kɛi tinaa-tuɛ-perei mɛni ma. Gɔɔŋ-maa ɓa, ku gɔlɔ a gɛɛ kukaa naa “ŋele-ŋai gbɛɛ ŋai” kpɛɛ ŋa tãi su. (2Te 3:1) Ku kɔlɔŋ a gɛɛ ɣala-mɛni sukaraa a pai kɛi a ‘gbua’ a gɛɛ dɔ̃ya ɣala-mɛnii su faa kara la. (Mf 24:22) Ku kɔlɔŋ a gɛɛ Ziova a pai ŋɔnuai ŋuŋ maa ɓoi. (2Pi 2:9) Nyaŋ ku kɔlɔŋ a gɛɛ Nuui Ziova aa ziɣe a gɛɛ e ŋwana-lɔɔ-ɓelai sukarai, e gbɔŋ kɛtɛi su-ɓela maa-kɔ̃ɔ Amagidɔŋ kɔi sui kaa a tɔ̃ya nuu, nyaŋ wala-wala-laa kaa nyeei.​—Mɛ 19:11, 15, 16.

Mɛni-ŋai pai kɛi tinaa-tuɛ-perei a pai gɛi nua di ‘foa a yao.’ Kɛlɛ, kwa kukili-ŋa sia e pilaŋ berei ma Ziova e wɔlɔ ŋɔnuai ŋuŋ maa ɓo lai, da mɛni-ŋai aa nɛ e pilaŋ tinaa-tuɛ-pere mai, kwa pɔri ‘kuŋɛi tɛi ɣelei, ku kuŋuŋ mu siɣe,’ kpɛni fei, ku laai la a gɛɛ kuŋuŋ ma ɓo tãi aa lɛɣɛ.​—Lu 21:26, 28.