1. Le ɓe nua tamaa ŋɛi kaa saa mai?

 YAA BEREI kaa nua tamaa kpaaŋɔɔi nɔ la dikpiŋ mɛni mai? Gɔɔŋ-maa ɓa, nua tamaa da tii kɛ a ŋɔŋ-kɔli fãai a gɛɛ di gɛ nua ŋɛi e kɛ dia da mɛni-ŋai da gɛi. Kɛlɛ, nua tɛitɛi nɔ ɓe da saa laa-maa-tɛ tɛɛ Ziova Ɣala pɔ. Zɛŋ-lɛɛi ŋi su, kwa pai lonoi e pilaŋ laa-maa-tɛ tɛɛ Ziova pɔ sukulai ma, da mɛnii maa nɛ̃ɛi e kulii kula a gɛɛ ku gɛi. Kwa pai ŋɔnɔ mɛni maa-kɔrii e pilaŋ berei ma kwa pɔri naa-maa-tɛi gaa a Ɣala pɔɔi tɛɛi la bɔi da berei nya kpiŋ a pai ŋɔfolo-laai lɛi la tinaa-tuɛ-pere.

LAA-MAA-TƐ TƐƐ ZIOVA PƆ SUKULAI ƁA LE?

2. Le ɓe Ziova e gɛ Sana Yeei ma? (Ya pɔri ŋɔnɔ mai kaai.)

² Ŋala-kɔlɔi e mo a gɛɛ Ziova Ɣala wala-walai. Ziova e ŋɔwala-wala-laai lɛ a zu ponoɔ tãi kpua yee mu gɛɛ aa Eezuɛ-ŋai ŋuŋ maa ɓo Ize. Ikili-ŋa sia e pilaŋ nyiŋi ma: Eezuɛ-ŋai ŋɔmiliyɔŋ tamaa daa diŋa tɛ dikie ma Sana Yeei koo mu a gɛɛ di Diɣalai woo mɛni. Ɣele-kɔlɔŋ kole su kpiniɛɛ aa nyeei mɛi pɛlɛ, luru kɛ ɓo nɔii gwaa kelee; nɔii kɛ kpɛliŋ a zu kɛtɛ.  Ŋele-gbana mãla-mãla kɛ too nyeei ma. Turu woo su kpanaŋɔɔ kɛ tɛ naa. (Ɛs. 19:​16-18; 24:17; Ŋu. 68:8) Ikili-ŋa sia e pilaŋ berei ma Eezuɛ-ŋai lii e kɛ la tãi Ziova e mɛni-ŋai ŋi kɛ la nyii ŋɔwala-wala-laai lɛ a zu ponoɔi.

3. Ziova laa maa tɛɛ sukulai ɓa le?

³ Kɛlɛ nuu-kpune nyaŋ? I laai la kwa pɔri laa-maa-tɛ tɛɛi Ziova pɔ? Oweei. Bere sii dɔnɔ kwa pɔri gɛi lai ɓa lonoɔ nua pɔ e pilaŋ Ziova ŋɔwala-wala-laai ma da ŋɔtua-pere lɛlɛ-ŋai. Kwa ŋɔnɔ nyiŋi kɛ a laa-maa-tɛ tɛɛ bɔ mɛni-ŋai a kpɔŋ kua a gɛɛ ku gɛi mɛni ma. (Az. 26:12) Galoŋ Deeɓe e mɛni-kɔɔŋ-maa lɛlɛɛ lɛ a pa laa-maa-tɛ tɛɛ ma Ziova pɔ. Deeɓe ŋɔɣala-fɛli-wooi su nyii e gɛ Eezuɛ-ŋai ŋɛi, e mo Ɣala ma nyɛɛi: “Oo Yawɛɛ, ikɛtɛi, iwala-walaa, ifolo-laai kɛ ɓo naa. Ikaloŋ-laai su kɛtɛi. Zãai kelee gaa ŋelei su da nɔii mai dikaa a ipɔɔ.” Deeɓe kɛɛ aa kpɛɛ Ɣala fɛlii, ‘nuai kelee di Ziova laa maa tɛ.’—1 Kɔ. 29:​11, 20.

4. Zisɛ e Ziova laa maa tɛ leŋ?

⁴ Zisɛ kɛɛ nɔii mai, e Naŋ laa maa tɛ a moɔɔ nua dia a gɛɛ nya ɓe wala-wala-laa tɛɛ bɔ a gɛɛ e ŋɛi-kɛ-maa-ŋa kɛ. (Maki 5:​18-20, NWT) Zisɛ e ŋɔnɔ Ziova laa maa tɛ a berei e lono la e pilaŋ ma da berei a kaa tua la a nuai. Tãi tɔnɔ, Zisɛ e kɛ sɛŋ lɛi ŋala-fɛli-kerei mu. Nɛni tɔnɔ e kɛ diai kɛ diwoli tɔɔi sama nyii nyinaŋ nyɔmɔɔ e kɛ gbonoi a koraŋ puu-kao lɔɔlu mɛi saaɓa (18). Nyinaŋ nyɔmɔɔi ŋi e gɛ nɛnii ŋi e kpili a pere sii nyii va pɔri kɛ tɔɔi a zãa. Nyiŋi e kɛ a lii-too-polu ŋanaa! Ŋɛi-maloŋ-kaa e Zisɛ lii kula e mo nɛnii ma a ɓaa-kɛ-maa pere nyɛɛi: ‘Nɛni, yaa kula ikɔlɔ-felai su.’ Nya ɓe e nyee pɛlɛ ma, a naa maa felaa e tɔɔ a zãa e pɛlɛ ‘laa-maa-tɛ tɛɛi Ɣala pɔ.’ Nii e kɛ a nɛ̃ɛ kpɛni fei Ziova e gɛ gɔlɔi e pono! (Luu 13:​10-13) Nɛnii ti e Ziova laa maa tɛ mɛni-ŋuŋ lɛlɛɛ mɛni ma, nyaŋ bere nɔ ɓe gaa la a kua.

LE ƁE A KULII KULA A GƐƐ KU ZIOVA LAA MAA TƐ?

5. Le mɛni ɓe maa nɛ̃ɛi ku ɓaa-kɛ-maa tɛɛ la Ziova pɔ?

⁵ Kwa Ziova laa maa tɛ kpɛni fei ɓaa-kɛ-maa siŋɔɔ kaa kuyeei mɛni ma. Mɛni-ŋuŋ tamaa kaa kuyeei a gɛɛ ku ɓaa-kɛ-maa tɛɛ bɔ. Ziova kaa a ŋwala-wala kelee Ɣalai; ŋɔwala-wala-laai koyaŋ fe ma. (Ŋu. 96:​4-7) Gbɛtɛ-sãa a ŋɔtarei lɛ a zu ponoɔɔ. Nya ɓe fulu-laa tɛɛ kupɔ da zãai kelee maa kpaaŋ kaa kuai. (Mɛ. 4:11) A tɔɔ kupolu a tãi kelee. (Mɛ. 15:​4, NWT) Gɛ mɛni kelee a ɓuu ɓo, nyaŋ a ŋɔkono-tee-ŋai ŋaa-see kɛ a tãi kelee. (Za. 23:14) Nyiŋi ɓe gɛ Ɣala ŋɔlono-kɛ-nuui Zɛlemaya kɛ mo nyɛɛi: “Dare-ɓelai kelee nɔii-ŋuŋ-ŋai su, daa-ŋai kelee samai, nuu da fe naa e kɛ yɛɛ ya”! (Zl. 10:​6, 7) Tɔ̃ya ma, mɛni-ŋuŋ tamaa kaa kuyeei nyii maa nɛ̃ɛi ku ɓaa-kɛ-maa tɛɛ la kuɣala-taa Naŋ pɔ. Kufa ɓaa-kɛ-maa tɛɛ nɔ Ziova pɔ, kɛɛ ku ŋwɛlini.

6. Le mɛni ɓe ku Ziova wɛlini lai?

⁶ Kwa Ziova laa maa tɛ kpɛni fei ku ŋwɛlini a ŋanaa. Ku Ziova wɛlini kpɛni fei tua-pere lɛlɛ tamaa kaa nyeei. Gaa a ŋɛi-maloŋ-kaa Ɣala. (Ŋu. 103:13; Az. 49:15) E mɛnii kɔlɔŋ kwa tɛɛi zui. Kulii a too polu, nya maŋ nii a too polu. (Zk. 2:​8, NWT) A kpɔŋ kua a gɛɛ ku lɛɣɛ a nyaa, kukɛ a naoi. (Ŋu. 25:14; Dikɛ-mɛni-ŋai 17:27) Gaa a maa-yeŋ Ɣala; “a maa yeŋ a gɛɛ e ŋelei da nɔii maa kpɛɛ, gɛ golo-ɓelai kula tuluŋ su gɛ ti tɛ ɣelei.” (Ŋu. 113:​6, 7, NWT) Gbɛɛ ɓe ve pai ŋwɛlii e Ŋala kɛtɛ kɛɛ ŋi laa maa tɛi?—Ŋu. 86:12.

7. Tii mɛni kpanaŋɔɔ kɛɛ leŋ ɓe kuyeei?

⁷ Kwa Ziova laa maa tɛ kpɛni fei kwa ŋwɛlii  nua di gɔlɔŋ. Nua tamaa dife dɔ̃yai kɔlɔŋ e pilaŋ Ziova ma. Le mɛni ma? Kpɛni fei Setɔŋ aa lɛɛ tamaa kɛ a Ɣala laa, nyaŋ nua daa laa la. (2 Kl. 4:4) Setɔŋ aa gɛ nua daa laa la a gɛɛ Ziova kaa a lii ŋwana Ɣala, ve kpaaŋ ni kumɛni ma, nyaŋ nya ɓe mɔ̃lɛ-laai kelee polu ŋeniɛi su. Kɛlɛ ku dɔ̃yai kɔlɔŋ e pilaŋ Kuɣalai ma! Dii mɛni kpanaŋɔɔi kuyeei ɓa, ku dɔ̃yai lɛ nua dia e pilaŋ Ziova ma nyii pai gɛi di naa maa tɛ. (Az. 43:10) Ŋule-wooi 96 pilaŋɔɔi laa-maa-tɛ tɛɛ ma Ziova pɔ. Kwa pai mɛni maa-kɔrii ŋule-woo kɔlɔi ŋi su e pilaŋ berei ma kwa pɔri naa-maa-tɛi gaa a Ziova pɔɔi tɛɛi la bɔi.

KWA PƆRI NAA-MAA-TƐI GAA A ZIOVA PƆƆI TƐƐI LEŊ BƆ?

8. Bere sii-ŋai kwa pɔri Ziova laa maa tɛi lai tɔnɔ ɓa le? (Ŋule-wooi 96:​1-3)

⁸ Ŋule-wooi 96:​1-3 lono. Kwa pɔri Ziova laa maa tɛi a mɛnii kwa mo e pilaŋ mai. Ŋala-kɔlɔ-kpua-ŋai ŋi di mo a gɛɛ ku “wule too Yawɛɛ ma,” ku ‘naa maa tɛ,’ ku “ŋɔɓalo-laai maa tuŋ too,” ku ŋɔnɔ ‘ŋɔfolo-laai maa mɛni ɓo nɔii-ŋuŋ-ŋai kelee su.’ Bere sii-ŋai kwa kuɣala-taa Naŋ laa maa tɛ lai taŋa nɔ kaa ti. Zuu-ŋai da Korai-ɓelai wɔlɔ ti kɛi, di Ziova maa mɛni ɓo nua dia a dilii kelee da mɛni lɛlɛɛ-ŋai e gɛ dimɛni mai. (Da. 3:​16-18; Dikɛ-mɛni-ŋai 4:29) Kwa pɔri mɛni tɔnɔi ŋi kɛi leŋ?

9-10. Le ɓe I maa-kɔri Angelena ŋɔmɛni-kɔɔŋ-maai su? (Ya pɔri ŋɔnɔ votooi kaai.)

⁹ Kwaa Angelena a ŋɔmɛni-kɔɔŋ-maai kaa nyii kula Yuo-ŋa lɔii sui. E lono a lii-kpele pere e pilaŋ Ziova ma ŋɔtii kɛɛ su. Ee Angelena e pɛlɛ nɔ tii kɛi a ninai, di koyaŋ too a gɛɛ dii kɛ-ɓela nina-ŋai di lono e pilaŋ dikpiŋ ma. Angelena e fotoo-ŋa pu gie ma a gɛɛ e nɛ nuai dia nyii kɛ a bilaŋɔɔ nii nɛ̃ɛi ma aa ŋaa-nɛ̃ɛ kula Ziova fɛliɛ sui. Kɛlɛ ŋɔtãi e lɛɛ pai serii a gɛɛ e lono, dii kɛ-nuui dɔnɔ e mo a gɛɛ e ɓɔlɔ gaa-ɓela yeei nyii-ŋai kɛ a Ziova Ŋɔsere-faa Kɛ-ɓelai ta. E pɛlɛ mɛni nyɔmɔɔ-ŋa ɓoi e pilaŋ kulaa-lai ma. Angelena e mo nyɛɛi: “Ŋa pɛlɛ yaoi a ŋanaa. Kɛlɛ ŋa pɛlɛ ŋgili-ŋa siai: ‘Ŋa pai nɛɛi naa nuu ta e lɛɛ kɛ a Ziova laa kpaa ŋa pai dɔ̃yai ɓoi e pilaŋ ma?’”

¹⁰ Naloŋ kɛɛ aa kpɛɛ lonoi, Angelena e Ɣala fɛli nii su a maa felaa. Gɛ ni e ŋoo su too a ɓaa-kɛ-maa pere nyɛɛi: “Ŋa mɛni-kɔɔŋ-maai ɓoloŋɔɔi iwɔi ma. Ŋgaa-ɓela dikɛ a Ziova  Ŋɔsere-faa Kɛ-ɓelai ta, nyaŋ lonii ma ŋgaa nii a di ta.” Berei maŋ Angelena e kɛ yaoi lai; kɛlɛ nii ŋaa e lɛɛ a nyeŋɔɔ. E nyaa da naoi-ni maa fotoo lɛ maraŋ tii-kɛ-ɓela dia, dikɛ Ziova fɛli a lii-nɛ̃ɛ pere gie ma. Nyaŋ e ŋɔnɔ lono e pilaŋ ŋɔlaa-lai ma a ɓaa-kɛ-maa pere. (1 Pi. 3:15) Le ɓe nyiŋi e gɛi? Angelena kɛɛ aa kpɛɛ lonoi, naloŋ lii ŋaa e yeŋ. E kpiŋ lono e pilaŋ mɛni lɛlɛɛ-ŋai taŋa dia nyii e ŋaa-nɛɛ kula gɛɛ Ziova fɛlii tãi e kɛ la a nuu-tɔɔi. Angelena e mo nyɛɛi: “Maa nɛ̃ɛi ku dɔ̃yai lɛ e pilaŋ Ziova ma. Nii nɛ̃ɛi a gɛɛ ŋa lono e pilaŋ naa mɛni ma.” Kua maŋ kwa pɔri Ziova laa maa tɛi a nɛ̃ɛ maŋ nua di naa kara. Nyiŋi kaa a tii mɛni kpanaŋɔɔ.

11. Ziova fɛli-ɓela daa tua leŋ tii kɛi a dɔ̃ya-ŋuŋ nyii gaa Ŋule-wooi 96:8 sui?

¹¹ Ŋule-wooi 96:8 lono. Kwa Ziova laa maa tɛ a kuyeei sãa. Tɔ̃ya Ɣala fɛli-ɓela daa tua Ziova laa maa tɛi a bere sii ŋi. (Tá. 3:9) Gɔɔŋ-maa ɓa, Eezuɛ-ŋai di wɔlɔ kapa da diyeei sãa tɛɛ Ŋala-pɛrɛ kɛtɛi tɔɔ mɛni da maa kpɛtɛ mɛni ma. (2 Ka. 12:​4, 5; 1 Kɔ. 29:​3-9) Korai polu-ɓela taŋa di kpɔŋ maa tɛɛ nyaa da ŋɔsia-ɓelai pɔ “a diyeei sãa.” (Luu 8:​1-3) Korai-ɓelai kɛ zia-ɓelai ditãi mai, di kpɔŋ maa tɛɛ bɔlɔ-ŋai pɔ a tãi puru kɛtɛ e too la diai. (Dikɛ-mɛni-ŋai 11:​27-29) Saa, kua maŋ kwa Ziova laa maa tɛ a kukpɔŋ maa kapa-ŋai.

12. Kukpɔŋ maa kapa-ŋai da pa leŋ a laa-maa-tɛ Ziova pɔ? (Ya pɔri ŋɔnɔ votooi kaai.)

¹² Kwaa mɛni-kɔɔŋ-maa tɔnɔ kaa nyii berei lɛi kukpɔŋ maa kapai a Ziova laa maa tɛ lai. Goraŋ 2020 su, lopo ta e nɛ a gɛɛ tuna fe pu ni Zimbabwe lɔii su a tãi su koyaa. Nyaŋ nyiŋi e gɛ puru kɛ pa nuu ŋɔmiliyɔŋ tamaa paai, yɛɛ kusisɛi nyii naa ɓa Prisca. Berei maŋ kɛ-ɣeniɛ e kɛ a gbanaŋɔɔ lai, Prisca a kaa nii li ɣala-woo ɓoi a Wɛ̃ɛde da Falade ɣele berei maŋ e kɛ la a kwaa-si tãi. Ŋɔkolii su-ɓela da kaa ɣɛlɛ-maa kula gbonoi kpɛni fei a kaa ŋɔtii lɛɛ ŋala-woo-ɓo tii mɛni ma, diyɛɛ mai: “Ya pai saai puru yeei.” Prisca e kɛ a naa la a gɛɛ Ziova a pai mɛi kaai. Mɛni ma a kaa mo dia a tãi kelee nyɛɛi: “Ziova fe taa wɔlɔ nĩa-ni vɛli-ɓela dia.” Nyaŋ naa fe tua ni kukpɔŋ-gie-mai kɛ kpɔŋ maa tɛɛ bɔ. Prisca e mii-sãa da sãa takpɛni-ŋa sɔlɔ ɓo kukpɔŋ maa kapa-ŋai sarai. Prisca ŋɔkolii su-ɓela lii e nɛ̃ɛ di mo ma diyɛɛi: “Ɣala fe ta wɔlɔ kula ni ipolu. Mɛni ma kwa ŋwɛlii ku mɛni maa-kɔri e pilaŋ ma.” Ŋɔkolii su-ɓela nɔɔlu-mɛi feerɛ di pɛlɛ lii goyaŋ-ŋai su.

13. Yɛɛ berei Ŋule-wooi 96:9 e mo lai, kutua-pere a pɔri Ziova laa maa tɛi leŋ?

 ¹³ Ŋule-wooi 96:9 lono. Kwa Ziova laa ma tɛ kutua-pere su. Maa nɛ̃ɛi kɛ zala-laa soŋ-ɓelai nyii-ŋai kɛ tii kɛi ŋala-pɛrɛ kɛtɛi mui, di dikpono soŋ a maa waa. (Ɛs. 40:​30-32) Berei maŋ maa nɛ̃ɛi ku kukpono soŋ la a maa waai, kɛlɛ maa nɛ̃ɛi ku ŋɔnɔ kɛ a kumaa waa kutua-pere su. (Ŋu. 24:​3, 4; 1 Pi. 1:​15, 16) Ŋala-kɔlɔi e mo a gɛɛ maa nɛ̃ɛi ku “kutua-pere pɔlɔ-ŋai” lɛɛ ku “dua-pere ninai” siɣe. Nyiŋi sukulai ɓa, ku kili-ŋa-sia da tua-pere nyɔŋ maa laa nyii ŋwɛli fe Ziova mai. Kɛlɛ ku kɔ a gɛɛ ku kukili-ŋa sia, ku tua a bere sii nyii pai nɛi a gɛɛ kukaa Ziova ŋɔtua-pere lɛlɛɛ-ŋai pɔɔ-kɔɔni. (Ko. 3:​9, 10) Ziova ŋɔkpɔŋ maai sarai, diai kpiŋ kɛ a wulu-wulu-kɛ-ɓela da ŋwana-lɔɔ-ɓelai da pɔri dimaa faleni, di dua-pere ninai siɣe.

14. Le ɓe I maa-kɔri Jack ŋɔmɛni-kɔɔŋ-maai su? (Ya pɔri ŋɔnɔ votooi kaai.)

¹⁴ Kwaa mɛni-kɔɔŋ-maai ŋi kaa nyii bilaŋɔɔi Jack mai. E kɛ a ŋwana-lɔɔ-nuu kɛtɛ, nyaŋ da kaa kpiŋ dolii a Nyinaŋ Nyɔmɔɔi. Ee e kɛ a tɔŋ-kala-nuu kɛtɛi, kotii e mo a gɛɛ da pai baai. Kɛlɛ Jack kɛɛ baa tãi maa kpɛnii, bɔlɔ ta nyii a kaa li gbini-pɛrɛi lai e pɛlɛ Ŋala-kɔlɔi maa-kɔrii a nyaa. Berei maŋ Jack e mɛni nyɔmɔɔ tamaa kɛ lai, kɛlɛ e maa faleŋ. Nyaŋ naa polu ma, e batai kɛ e kɛ a Ziova Ŋɔsere-faa Kɛ-ɓelai ta. Jack e maa faleŋ kpɔ a bere sii nyii voloi dikɛ pai baai lai, gbini-pɛrɛ mɛi-kaa-ɓelai taŋa di kpiŋ pɛlɛ wɔlɔi mɛni ma. Soya-nuu kɛtɛi dɔnɔ nyii kɛ tii kɛi gbini-pɛrɛi lai e mo nyɛɛi: “Jack e wɔlɔ kɛ a ŋwana-lɔɔ e tɛɛ nuu kelee ma gbini-pɛrɛi ŋi mu. Kɛlɛ lonii ma, gaa naa a nuu lɛlɛɛ.” Nɔɔ-kuui kɛ Jack paa polu mai, bɔlɔ-ŋai kɛɛ daa li a gɛɛ di goyaŋ too gbini-pɛrɛi lai, di gaa a gɛɛ gbini-pɛrɛ mu-ɓelai dɔnɔ e pa goyaŋ su a tãi maa-ŋuŋ. Le ɓe nii kula a gɛɛ e pa goyaŋ sui? Jack maa faleŋ pere ɓe nii kula. Nyaŋ e kɛ ŋwɛlii e mɛnii kɔlɔŋ a pɔri gɛi a gɛɛ e Ziova fɛli. Tɔ̃ya ma, kutua-pere a pɔri pai a laa-maa-tɛ kuɣala-taa Naŋ pɔ!—1 Pi. 2:12.

ZIOVA A PAI ŊƆFOLO-LAAI LƐI LEŊ TINAA-TUƐ-PERE?

15. Ziova a pai ŋɔfolo-laai lɛi leŋ tinaa-tuɛ-pere? (Ŋule-wooi 96:​10-13)

¹⁵ Ŋule-wooi 96:​10-13 lono. Ŋala-kɔlɔ-kpua-ŋai Ŋule-wooi 96 kpɛɛ-ŋai e nɛ a gɛɛ  Ziova kaa a Mɛni-ŋa-tee-nuu da Kaloŋ lɛlɛɛ. Ziova a pai ŋɔfolo-laai lɛi leŋ tinaa-tuɛ-pere? A pai gɛi ŋɔmɛni-ŋa-teeɛi sarai. Tãi kpua yee mu, Ziova a pai Babelɔŋ Kɛtɛi su karai kpɛni fei daa naa kara a tãi su koya. (Mɛ. 17:​5, 16; 19:​1, 2) Babelɔŋ Kɛtɛi su karaa polu ma, tãi ta nua taŋa da pai mɛni-kpɛtɛɛ kɛi a gɛɛ di pɛlɛ Ziova fɛlii. Ziova a pai Setɔŋ ŋɔɣeniɛi sukarai Amagidɔŋ kɔi su e pɛlɛ la gbɔara-ɓela kelee dia da diai kelee lɛɛ kɛi a naai. Kɛlɛ a pai diai kelee ɓaloi nyii-ŋai ŋwɛlini, dikɛ ŋoo mɛni, dikɛ naa maa tɛi. (Maki 8:38; 2 Tɛ. 1:​6-10) Zuu-kɔɔŋ gbɛɛ-ŋai nyii pai kɛi Korai Ŋɔkoraŋ Wala Tɔnɔi kpɛɛ-ŋai, Ziova a pai nɛi a zu ponoɔ a gɛɛ nyaa nɔ ɓe maa nɛ̃ɛi nuu kelee e vɛli. (Mɛ. 20:​7-10) Tãi ti ma, “nɔii laa a pai fɛɛi a Yawɛɛ ŋɔfolo-laai, yɛɛ berei nya-ŋai da yuo laa fɛɛ lai.”—Ab. 2:14.

16. Le ɓe yaa gbɛtɛ ikili-ŋa a gɛɛ I gɛi? (Ya pɔri ŋɔnɔ votooi kaai.)

¹⁶ A pai kɛi a lii-nɛ̃ɛ mɛni kɛtɛ kpɛni fei nuui kelee pai kɛi ɣele mai, da pai kɛi naa-maa-tɛi gaa Ziova mɛni mai tɛɛi bɔ! Kɛlɛ tãi ti e lɛɛ pai serii, maa nɛ̃ɛi ku kelee ku lono e pilaŋ Kuɣalai ma, ku tua a bere sii nyii pa pai a laa-maa-tɛ bɔi. A gɛɛ kuŋɛi e kɛ dii mɛni kpanaŋɔɔi ŋi ma, Gbɔŋ-gie-mai Teniŋ-tɔɔ-ɓelai daa Ŋule-wooi 96:8 siɣe a kukoraŋ ɣala-kɔlɔ-kpuai 2025 mɛni ma. E mo nyɛɛi: “Ka Ziova laa maa tɛ ŋɔfolo-laai mɛni ma.”