ZƐŊ-LƐƐI 5
ŊULEI 108 God’s Loyal Love
Mɛni Lɛlɛɛ-ŋa Kɛɛ Leŋ Ɓe Kwa Pɔri Zɔlɔ Ɓoi Ziova Ŋɔwɛli-kɛ-maai Su
“Zisɛ Korai e pa nɔii su ɓɛ a gɛɛ e sɔnyɔŋ-ɓela ɓalo.”—1 TE. 1:15.
MƐNI-ŊUŊ
Berei kwa pɔri mɛni lɛlɛɛ sɔlɔ ɓoi la maa-tee-sɛŋ sui da berei kwa pɔri yee-see-mu lɛi la Ziova mai.
1. Le ɓe kwa pɔri gɛi a gɛɛ ku Ziova lii nɛ̃ɛ?
IKILI-ŊA sia a kɛ ya ɓɛlɛ-see-sɛŋ lɛlɛɛ mɛni kpanaŋɔɔ ta tɛɛ iwɛli-kɛ-maa nuu ta pɔ nyii a pɔri tii kɛi lai. Ilii a pai tooi polu a kɛ nuui ti a zɛŋ ti siɣe nɔ e naai kɛ, nyaŋ va ŋɔnɔ gili-ŋa sia e pilaŋ ma! Kɛlɛ ilii a pai nɛ̃ɛi a kɛ nuui ti a tii kɛ a mɛlɛ-see-sɛŋ ti a nɛlɛɛ, e yee-see-mu lɛ mɛni ma. Le ɓa mɛni-ŋuŋ? Ziova aa Noŋ tɛɛ a gɛɛ e saa kumɛni ma. Mɛni ma, Ziova lii a nɛ̃ɛ a ŋanaa kwa yee-see-mu lɛ mɛlɛ-see-sɛŋ mɛni kpanaŋɔɔi ŋi mɛni ma da ŋwɛli-kɛ-maai nyii nii kula a gɛɛ e maa-tee-sɛŋ tɛɛi!—Zɔŋ 3:16; Lo. 5:7, 8.
2. Le ɓe kwa pai maa-kɔrii zɛŋ-lɛɛi ŋi su?
2 Kɛlɛ kwa wala tãi siɣe, kwa pɔri pɛlɛi kuŋɛi naɣiŋ ni mɛlɛ-see-sɛŋ mɛni kpanaŋɔɔi ŋi mɛi a bɛlɛ-pɛlɛɛ. Eei pa kɛi yɛɛ kwa kɛ Ɣala ŋɔsama-sɛŋ siɣei kukɛ naai kɛ. Berei maŋ kulii a kɛ a nɛ̃ɛ la mɛni mai, kɛlɛ kwa pɔri naai kwaa ta ma nyii kufa ŋɔnɔ kukili-ŋa sia e pilaŋ ma. A gɛɛ nyiŋi fe kɛ a kua, maa nɛ̃ɛi ku kukili-ŋa sia a tãi kelee e pilaŋ mɛnii ma Ɣala da Korai daa gɛ kumɛni mai. Zɛŋ-lɛɛi ŋi a pai kpɔnii kua a gɛɛ ku nyiŋi kɛ. Kwa pai berei kaai kwa pɔri mɛni lɛlɛɛ sɔlɔ ɓoi la maa-tee-sɛŋ su saa da tinaa-tuɛ-pere. Kwa pai ŋɔnɔ lonoi e pilaŋ berei ma kwa pɔri kuyee-see-mui lɛi la Ziova ŋɔwɛli-kɛ-maai mɛni ma a Korai Ŋɔsaa-kili-too-ŋa Kpɔŋ tãi ŋi.
BEREI KWA PƆRI MƐNI LƐLƐƐ SƆLƆ ƁOI LA LONII MAI
3. Le ɓa bere sii dɔnɔ kwa pɔri mɛni lɛlɛɛ sɔlɔ ɓoi la maa-tee-sɛŋ su lonii mai?
3 Ku kaa mɛni lɛlɛɛ sɔlɔ ɓoi maa-tee-sɛŋ su lonii ma. Gɔɔŋ-maa ɓa, Ziova a kusɔnyɔŋ-ŋai su mɛni lɛɛ maa-tee-sɛŋ sarai. Ve ma a kpa a gɛɛ e ku su mɛni lɛɛ. Kɛlɛ a ŋwɛlii e gɛ. Ŋule-woo pɔ̃yɛ-nuui e ŋɔyee-see-mui lɛ Ziova ŋɔsu-mɛni-lɛɛi mɛni ma. E mo nyɛɛi: “I sɔŋ lɛlɛɛi, ikɛ kusɔnyɔŋ su mɛni lɛɛ.”—Ŋu. 86:5; 103:3, 10-13.
4. Gbɛɛ-ni ɓe Ziova e maa-tee-sɛŋ tɛɛ dimɛni ma? (Luu 5:32; 1 Temete 1:15)
4 Gaa nua taŋa kili-ŋa a gɛɛ maa fe nɛ̃ɛ ni di Ziova ŋɔsu-mɛni-lɛɛi sɔlɔ ɓo. Tɔ̃ya ma, maa fe nɛ̃ɛ ni ku kelee ta ku Ziova ŋɔsu-mɛni-lɛɛi sɔlɔ ɓo. Zia-nuui Pɔɔ e kɛ a gɔlɔŋɔɔ a gɛɛ ‘maa fe nɛ̃ɛ ni di doli a sia-nuu.’ E ŋɔnɔ mo nyɛɛi: “Kɛlɛ Ɣala ŋɔɓɛlɛ-seei su, ŋgaa yɛɛ berei ŋgaa lai.” (1 Kl. 15:9, 10) Kwa kupolu tɔɔ kusɔnyɔŋ-ŋai dia ku kulii pene, Ziova a ku su mɛni lɛɛ. Le mɛni ma? Va gɛ ti kpɛni fei maa nɛ̃ɛi e gɛ, kɛlɛ a gɛ ti kpɛni fei ku wɛli kaa ma. A kɛ ilii toɔɔi polu kpɛni fei ya gaai yɛɛ maa fe nɛ̃ɛ ni Ziova e isɔnyɔŋ-ŋai su mɛni lɛɛ, e lɛɛ ikili-ŋa a gɛɛ Ziova fe maa-tee-sɛŋ tɛɛ ni maa-waa-ɓela mɛni ma, kɛlɛ e dɛɛ sɔnyɔŋ-ɓela mɛni ma.—Luu 5:32; 1 Temete 1:15 lono.
5. I laai la gaa Ziova ma a kpa a gɛɛ e kusɔnyɔŋ su mɛni lɛɛ? Ŋaa-lɛ.
5 Maa fe nɛ̃ɛ ni e kɛ kukili-ŋa a gɛɛ gaa Ziova ma a kpa a gɛɛ e ku su mɛni lɛɛ kpɛni fei kwaa koraŋ tamaa kɛ dɔ̃yai su. Tɔ̃ya ma, Ziova fa nĩa mɛni lɛlɛɛ-ŋai kwaa gɛ mii mɛni ma. (Ib. 6:10) E maa-tee-sɛŋ tɛɛ kumɛni ma kpɛni-kpɛni, ve dɛɛ ni a gɛɛ e ku fela fe. Mɛni ma maa fe nɛ̃ɛ ni e kɛ kukili-ŋa a gɛɛ gaa Ziova ma a kpa a gɛɛ e ku su mɛni lɛɛ kpɛni fei kwaa tii tamaa kɛ mi. A kɛ bere ɓe gaa la kukili-ŋa, gɛ ni kwa moi a gɛɛ, maa fe nɛ̃ɛ ni kɛ Zisɛ e saa kumɛni ma.—Ya pɔri Galesiɛŋ 2:21 kaai.
6. Le mɛni ɓe Pɔɔ e tii tamaa kɛ la Ziova fɛliɛ su?
6 Pɔɔ e kɛ a gɔlɔŋɔɔ a gɛɛ ve Ziova ma a kpa a gɛɛ e zu mɛni lɛɛ ŋɔtii tamaai mɛni ma. Gɛ ni le mɛni ɓe e tii tamaa kɛ la Ziova fɛliɛ sui? E gɛ a gɛɛ e yee-see-mu lɛ Ziova ma ŋɔŋɛi-maloŋ-kaai e nɛ mai mɛni ma. (If. 3:7) Yɛɛ Pɔɔ, kwa tii kɛ Ziova mi a kulii kelee a gɛɛ ku yee-see-mu lɛ ma ŋɔŋɛi-maloŋ-kaai mɛni ma.
7. Pere sii takpɛni kɛɛ leŋ ɓe kwa ŋɔnɔ mɛni lɛlɛɛ sɔlɔ ɓo la maa-tee-sɛŋ su lonii ma? (Lomaŋ 5:1; Zĩi 2:23)
7 Bere sii dɔnɔ kwa pɔri ŋɔnɔ mɛni lɛlɛɛ sɔlɔ ɓoi la maa-tee-sɛŋ su lonii mai ɓa, kwa pɔri laoi-laa lɛlɛɛ kɛi a Ziova. a Yɛɛ berei ku gaa la zɛŋ-lɛɛi ku tɛɛ mai sui, laoi-laa lɛlɛɛ fe kɛ ni kuloai a Ɣala e siɣe kumaa sɔlɔ ɓo tãi ma. Kɛɛ maa-tee-sɛŋ sarai, ‘lii-see a pɔri kɛi kuloai kwa Ɣala-ni,’ nyaŋ nyiŋi a pɔri ku lɛɣɛi a nyaa.—Lomaŋ 5:1; Zĩi 2:23 lono.
8. Le mɛni ɓe maa nɛ̃ɛi ku yee-see-mu lɛ la Ziova ma mɛlɛ-seei mɛni ma a gɛɛ kwa pɔri vɛlii?
8 Ziova fɛliɛ kaa a mɛlɛ-seei tɔnɔ nyii laoi-laa lɛlɛɛ kɛɛ a nyaa a pa lai. Ziova a vɛli-ɓela diɣala-fɛli-woo-ŋai mɛni da pa dikie ma. Nyaŋ a ŋɔnɔ ku kelee kufɛli-woo-ŋai mɛni tɛitɛi. Ɣala-fɛliɛ a kulii ŋaa-yeŋ, e pa a lii-see kupɔ. Kɛlɛ mɛnii nɔ Ɣala-fɛliɛ a pa lai kelee fe ti. A kulaoi-laai su kpanaŋ a Ɣala. (Ŋu. 65:2; Zĩ. 4:8; 1 Zɔŋ 5:14) Zisɛ kɛɛ nɔii mai, a kaa Ziova fɛli a tãi kelee kpɛni fei, e kɛ a gɔlɔŋɔɔ a gɛɛ e kɛ ŋoli tɔɔi ma, nyaŋ ɣala-fɛliɛ e ŋɔlaoi-laai su kpanaŋ a Naŋ. (Luu 5:16) Kulii nɛ̃ɛi a gɛɛ Zisɛ ŋɔmaa-tee-sɛŋ sarai, kwa pɔri kɛi a Ziova naoi, ku kpiŋ pɔri lonoi bɔ ɣala-fɛliɛ su!
BEREI KWA PƆRI MƐNI LƐLƐƐ SƆLƆ ƁOI LA TINAA-TUƐ-PEREI
9. Mɛni lɛlɛɛ kɛɛ leŋ ɓe maa-tee-sɛŋ a pa pai la Ɣala fɛli-ɓela pɔ tinaa-tuɛ-pere?
9 Pere sii kɛɛ leŋ ɓe Ziova fɛli-ɓela da pai mɛni lɛlɛɛ sɔlɔ ɓoi la maa-tee-sɛŋ sarai tinaa-tuɛ-pere? Da pai wɔlɔ-wɔlɔ fulu-laa sɔlɔ ɓoi. Nua tamaa da gaa yɛɛ nyiŋi fa pɔri kɛi kpɛni fei nuu-kpune aa tua saai a koraŋ wala tamaa. Kɛlɛ Ziova kpɛtɛ-mɛni ɓe kɛ a gɛɛ nuu-kpune e kɛ ɣele ma wɔlɔ-wɔlɔ da wɔlɔ-wɔlɔ. Adaŋ da Il dii wala sɔnyɔŋ kɛ, nuu-kpune eei pa kɛi nɔii ma ɓɛ wɔlɔ-wɔlɔ da wɔlɔ-wɔlɔ. Nyaŋ berei maŋ gbanaŋɔɔi la a gɛɛ nua tamaa di laa a nyiŋi lonii mai, kɛlɛ kwa pɔri laai la kpɛni fei, ku gɔlɔŋ a gɛɛ Ziova e Noŋ tɛɛ a gɛɛ e saa kumɛni ma.—Lo. 8:32.
10. Le ɓe ziɣe-zu korai-ɓelai da mala kpeli-ŋai ŋɛi kaa berei?
10 Berei maŋ kwa pai wɔlɔ-wɔlɔ fulu-laa sɔlɔ ɓoi la tinaa-tuɛ-perei, Ziova a ŋwɛlii ku kukili-ŋa sia e pilaŋ ma lonii ma. Ziɣe-zu Korai-ɓelai ŋɛi kaa kɛ-ɣeniɛ lɛlɛɛ perei ɣala-taa ɓɛi da Korai-ni da pai kaloŋ tii kɛi naa nɔii mɛi. (Mɛ. 20:6) Mala kpeli-ŋai ŋɛi kaa tãi perei da pai kɛi la Paredai lɔii ma ɓɛi mɛni-soli kelee ta fe pai kɛi naai. (Mɛ. 21:3, 4) Ikaa a mala kpeli-ŋai su-ɓela ta nyii-ŋai kili-kɛ-zu kaa diyeei a gɛɛ dikɛ nɔii ma wɔlɔ-wɔlɔ da wɔlɔ-wɔlɔ? Nuwai ŋi kaa a luwa kɛtɛ! Nyiŋi ɓe Ziova e nuu-kpune kpɛtɛ mɛni ma. Kulii a pai kɛi a nɛ̃ɛ a ŋanaa nɔii ma ɓɛ.
11-12. Le luwa-ŋa ɓe kuŋɛi kaa perei mɛni ma Paredai? (Ya pɔri ŋɔnɔ votoo-ŋai kaai.)
11 Ikili-ŋa sia e pilaŋ berei ma kɛ-ɣeniɛ a pai kɛi la imɛni ma Paredai. Kɔlɔ-fela da saa mɛni fe pai wɔlɔ ilii sɛlɛni. (Az. 25:8; 33:24, NWT) Ziova a pai mɛni lɛlɛɛ-ŋai kelee ya ŋwɛlii tɛɛi ipɔ. Mɛni takpɛni-ŋa kɛɛ leŋ ɓe ya pai ŋwɛlii I mɛni maa-kɔri e pilaŋ mai? Ya pai ŋwɛlii I mɛni maa-kɔri e pilaŋ zua-ŋai dia, kpaa wule toɔɔ, kpaa maŋ fotoo pɔ̃yɛɛ? Kwa pai ŋwɛlii a pɛrɛ tɔɔ-ɓela da kpalaŋ-ŋa tii-kɛ-ɓela Paredai ɣeniɛi su. Tɔ̃ya ma, kwa pai ŋɔnɔ ŋwɛlii a nua nyii-ŋai da mii-sɛŋ kpɛtɛ, di kɔli-sãa kpɛtɛ kpalaŋ-ŋa tii kɛ mɛni ma, kpaa maŋ nua nyii-ŋai pai nɔii ma kpɛtɛi a nɛlɛɛ. (Az. 35:1; 65:21) Ya kɛ ɣele ma wɔlɔ-wɔlɔ da wɔlɔ-wɔlɔ, tãi a pai kɛi iyeei a gɛɛ I pɔri mɛni-ŋai ŋi kelee kɛi.
12 A pai kɛi a lii-nɛ̃ɛ mɛni tamaa a gɛɛ ku kuyee see mu-siɣe saa-yeei-ɓelai mu! (Dikɛ-mɛni-ŋai 24:15) Ikili-ŋa sia ŋɔnɔ e pilaŋ nii-seei ma ya pai zɔlɔ ɓoi a mɛni tamaa maa-kɔriɛ e pilaŋ Ziova kpɛtɛ-sãa dia. (Ŋu. 104:24; Az. 11:9, NWT) Nyaŋ mɛni kɛtɛi ɓa, ilii a pai kɛi a nɛ̃ɛ a gɛɛ I Ziova fɛli a ilii kelee, nyaŋ ifa sɔnyɔŋ kɛ! Ya pai ŋwɛlii a gɛɛ I ɓalaŋ mɛni-ŋai ŋi kelee su ‘sɔnyɔŋ lii-nɛ̃ɛ mɛni ma nyii pai tɛɛi’? (Ib. 11:25) Kpa! Nuwa-ŋai ŋi tɛɛi sɛŋ kelee ta ma nyii kwa pɔri kupolu tɔɔi ma lonii ma. E lɛɛ ikili-ŋa a gɛɛ Paredai lɔii fe pai kɛi nɔ a kili-kɛ-zu a tãi kelee. Ŋaa-see a pai kɛi tãi kpua yee mu. Mɛni-ŋai ŋi kelee fei pa kɛi a kɛ Ziova fe ku wɛlini a ŋanaa nyii gɛ e maa-tee-sɛŋ tɛɛi!
Luwa-ŋa titi kɛɛ leŋ ɓe iŋɛi kaa perei mɛni ma Paredai? (Ŋoo-ɣɛli-kpului 11-12 kaa)
YEE-SEE-MU LƐ ZIOVA ŊƆWƐLI-KƐ-MAAI MƐNI MA
13. Kwa pɔri yee-see-mu lɛi leŋ Ziova ŋɔwɛli-kɛ-maai mɛni ma? (2 Kɔleŋtiɛŋ 6:1)
13 Kwa pɔri yee-see-mu lɛi leŋ Ziova ma maa-tee-sɛŋ mɛni ma? Kwa pɔri nyiŋi kɛi a maa mɛni puɔɔ fulɔi kukɛ-ɣeniɛi su. (Mf. 6:33) Zisɛ e saa “nuu kelee mɛni ma a gɛɛ diai dikaa ɣele mai, dife kɛ ɣele ma dikpiŋ mɛni ma, kɛlɛ, dikɛ ɣele ma Korai mɛni ma, nyii saa dimɛni ma e mu siɣe saa yeei.” (2 Kl. 5:15) Tɔ̃ya ma, kufe wɔlɔ ŋwɛlii ku kuŋɛi naɣiŋ Ziova ŋɔɓɛlɛ-see mɛni kpanaŋɔɔi ŋi mɛi. —2 Kɔleŋtiɛŋ 6:1 lono.
14. Kwa pɔri nɛi leŋ a gɛɛ ku laai a nia-woo-ŋai Ziova a dɛɛi?
14 Kwa ŋɔnɔ pɔri yee-see-mu lɛi Ziova ŋɔwɛli-kɛ-maai mɛni ma a kukili tɔɔ ma, ku sia a ŋɔlia-woo-ŋai. A pere sii kɛɛ leŋ? Kwa kɛ mɛni-kpɛtɛɛ kɛi e pilaŋ kɔlɔ tamaa kɔlɔŋɔɔ ma kpaa dii sii kwa pai gɛi, maa nɛ̃ɛi ku kukili-ŋa sia e pilaŋ mɛnii ma Ziova a ŋwɛlii ku gɛi. (1 Kl. 10:31; 2 Kl. 5:7) Kwa kulaa-lai pu tii kɛɛ su, kwa mɛni lɛlɛɛ tamaa sɔlɔ ɓo. Kulaa-lai da kulaoi-laai a Ziova su a kpanaŋ. Nyaŋ a ŋɔnɔ kukili-kɛ-zui su kpanaŋ.—Lo. 5:3-5; Zĩ. 2:21, 22.
15. Kwa pɔri yee-see-mu lɛi leŋ a Korai Ŋɔsaa Kili-too-ŋa Kpɔŋ tãi?
15 Pere sii takpɛni-ŋa kaa nii naa nyii kwa pɔri yee-see-mu lɛi la Ziova ŋɔwɛli-kɛ-maai mɛni ma. Nyaa ɓa tii kɛɛ a gbanaŋɔɔ a Korai Ŋɔsaa Kili-too-ŋa Kpɔŋ tãi ŋi a gɛɛ ku yee-see-mu lɛ maa-tee-sɛŋ mɛni ma. E tee mɛni-kpɛtɛɛ kɛɛ ma a gɛɛ ku li Korai Ŋɔsaa Kili-too-ŋa Kpɔŋ ma, kwa ŋɔnɔ pɔri nua tolii a gɛɛ di too kupɔ. (1 Te. 2:4) Mɛnii pai kɛi Korai Ŋɔsaa Kili-too-ŋa Kpɔŋ mai ɓo nuai dia ya pai di tolii. A pai kɛi a nɛlɛɛ a kɛ ya vilo-ŋai ŋi lɛ dia nyii gaa jw.org mai: Le Mɛni Ɓe Zisɛ E Saa Lai? da Zisɛ Ŋɔsaai Kili E Lɛɛ Iŋa. Maa nɛ̃ɛi korai-toli-kpɔŋ laa-tuɛ-ɓelai di diai ditɔɔi fe ŋɔnɔ kpanani dɔ̃yai sui toli gbɔŋ ŋi ma. Ikili-ŋa sia e pilaŋ nii-nɛ̃ɛi ma a kɛ ŋelei su da nɔii ma Ziova fɛli-nuu ta a pa polu dɔ̃yai su! (Luu 15:4-7) Kwa li Korai Ŋɔsaa Kili-too-ŋa Kpɔŋ ma, kwa ŋwɛlii ku kulaa ti nuu kelee ma, yɛɛ nuu nina-ŋai titi da diai dife nii pa ni gbɔŋ ŋi ma a tãi su koyaai. Kwa ŋwɛlii ku kuyee see dimu a nɛlɛɛ!—Lo. 12:13.
16. Le mɛni ɓe nɛlɛɛi la a gɛɛ ku tii tamaa kɛ ŋala-woo-ɓo tii su a Korai Ŋɔsaa Kili-too-ŋa Kpɔŋ tãi?
16 Ya pai ŋwɛlii I tii tamaa kɛ ŋala-woo-ɓo tii su a Korai Ŋɔsaa Kili-too-ŋa Kpɔŋ tãi? Nyiŋi kɛɛ kaa a bere sii lɛlɛɛ dɔnɔ kwa pɔri yee-see-mu lɛi la Ɣala da Korai ma mɛnii daa gɛ kuɛi mɛni ma. Kwa li ŋala-woo-ɓo tii su a tãi tamaa, kwa pai berei kaai Ziova a kpɔŋ maa tɛɛ la kupɔ nyii pai kulaa-lai su kpananii. (1 Kl. 3:9, NWT) E tee nyiti ma, kɔ a gɛɛ I Korai Ŋɔsaa Kili-too-ŋa Kpɔŋ ɣala-kɔlɔ-kpua-ŋai kelee lono nyii gaa Examining the Scriptures Daily kɔlɔ-kpuai kpaa goyaŋ su kɔlɔ-kpuai su. Ya pɔri kpiŋ mɛni maa-kɔriɛ kɛi e pilaŋ Ŋala-kɔlɔ-kpua-ŋai ŋi dia ikpɔɔ yee ma.
17. Le ɓe a Ziova lii laai? (Ya pɔri ŋɔnɔ basii ŋi kaai: “ Bere Sii Takpɛni-ŋai Ya Pɔri Yee-see-mu Lɛi La Ziova Ŋɔwɛli-kɛ-maai Mɛni Mai.”)
17 Tɔ̃ya ma, tãi ta ife pai pɔrii mɛni-ŋai kelee kɛi zɛŋ-lɛɛi ŋi e lono e pilaŋ mai. Kɛɛ e lɛɛ ikili-ŋa a gɛɛ Ziova fa mɛnii ya gɛ mii kɔɔŋ nua takpɛni-ŋa diwɔi ma; a mɛnii kaa ilii sui. Nii a laa a berei kaa ya yee-see-mu lɛ la maa-tee-sɛŋ mɛni ma nyii gaa a ɓɛlɛ-see-sɛŋ mɛni kpanaŋɔɔi.—1 Sa. 16:7; Maki 12:41-44.
18. Le mɛni ɓe kwa yee-see-mu lɛ la Ziova Ɣala da Zisɛ Korai mai?
18 Maa-tee-sɛŋ sarai nɔ ɓe kwa pɔri su-mɛni-lɛɛ sɔlɔ ɓoi la, ku laoi-laa kɛ a Ziova, kili-kɛ-zu e kɛ kuyeei wɔlɔ-wɔlɔ fulu-laa mɛni ma. Kwa ŋwɛlii ku yee-see-mu lɛ Ziova ŋɔwɛli-kɛ-maai mɛni ma a tãi kelee nyii pere laa ɓo a gɛɛ ku nuwa-ŋai ŋi sɔlɔ ɓo. (1 Zɔŋ 4:19) Kwa ŋɔnɔ ŋwɛlii ku kuyee-see-mui lɛ Zisɛ ma ŋɔwɛli-kɛ-maai mɛni ma nyii nii kula a gɛɛ e ŋɔfulu-laai tɛɛ kumɛni ma!—Zɔŋ 15:13.
ŊULEI 154 Unfailing Love
