YA TA WƆLƆ tɛɛ mɛni-kpanaŋ ta su ikɛ gaa yɛɛ ikpɔŋ-maa-nuu fe ma? Ŋeniɛi kukaa zui laa fɛɛi a ‘mɛni-kpɔlu tamaa’ nyii a gɛ kulii e too polu kpaa ku gaa yɛɛ kukpɔŋ-maa-nuu fe ma. (2 Te. 3:1) Kɛlɛ maa fe nɛ̃ɛ ni ku tɛɛ mɛni-kpanaŋ-ŋai ŋi su kukpɔɔi yee ma, kpɛni fei Ŋala-kɔlɔi e mo a gɛɛ laoi-laa su-ɓela lɛlɛɛ-ŋa da kpɔŋ maa tɛɛ kupɔ a “mɛni-kpulu tãi.”—Tá. 17:​17, NWT.

Zia-nuui Pɔɔ e kpɔŋ maa tamaa sɔlɔ ɓo maraŋ Korai-ɓela yeei ŋɔmisɔ̃ŋnalee tii su. (Ko. 4:​7-11) Pɔɔ kɛɛ kpini-pɛrɛ mu Luŋ, maraŋ-ŋa di kpɔŋ maa tɛɛ bɔ a pere sii takpɛni-ŋa. Gɔɔŋ-maa ɓa, Ipafulɔditɔ a kaa li a zama-sãai Pɔɔ pɔ nyii bɔlɔ da sisɛ-ŋai kɛ Felepai di dɛɛi. (Fe. 4:18) Tasikɔ a kaa li a Pɔɔ ŋɔworɛ-woo kɔlɔ-ŋai korai-toli-kpɔŋ takpɛni-ŋa pɔ. (Ko. 4:7) Bɔlɔ da sisɛ-ŋai dikpɔŋ-maai sarai, Pɔɔ e pɔri ŋɔɣala-woo-ɓo tii kɛi berei maŋ e kɛ la kpini-pɛrɛ mui. Ya pɔri saa kɛi leŋ a laoi-laa su-nuu lɛlɛɛ?

Bɔlɔ da sisɛ tamaa dimɛni-kɔɔŋ-maai a berei lɛ laoi-laa su-ɓela lɛlɛɛ da kpɔŋ-maa tɛɛ la dikie-ni pɔi. Elisabet nyii a lɔigula panĩa Spain lɔii sui, e berei lɛ naoi lɛlɛɛ tɔnɔ e kpɔŋ maa tɛɛ la bɔ gɛɛ kpɛ̃ɛ kɔlɔ-fela aa nee soŋ. Sisɛi a kaa fɔrɔ-woo-ŋa pɔ̃yɛ e dɛɛ Elisabet pɔ nyii kɛ kulai Ŋala-kɔlɔi sui. Elisabet e mo nyɛɛi “Ŋɔworɛ-woo-ŋai a kaa kponoi kpanaŋ tɛɛ mbɔ a ɣele kelee a gɛɛ nii fe too polu a ŋanaa.”—Tá. 18:24.

Kwa pɔri kulaoi-laai su kpananii a kuɓaraŋ korai-ɓela a kpɔŋ maa tɛɛ dipɔ a pa diɣala tii ma. Gɔɔŋ-maa ɓa, ya pɔri lii a nuu-pɔlɔ ta ŋala-woo-ɓo tii su kpaa goyaŋ su. Nyiŋi kɛɛ a pai kpɔnii ya a gɛɛ ka pɔri kakie-ni fɔrɔi. (Lo. 1:12) Kɛlɛ bɔlɔ da sisɛ-ŋa taŋa difa pɔri kulai dipɛrɛi la. Kwa pɔri kɛi leŋ a laoi-laa su-ɓela lɛlɛɛ di mɛni ma?

Kuɓaraŋ korai-ɓela taŋa da tɛɛi kɔlɔ-fela kpaa mɛni-kpanaŋ takpɛni-ŋa su, nyii a gɛ difa pɔri pai goyaŋ-ŋai su Galoŋ-laa Pɛrɛi la. Kwaa David nyii kpɛ̃ɛ kɔlɔ-fela e kɛ mai ŋɔmɛni-kɔɔŋ-maai kaa. E kɛ sale siɣei gɔlɔ-felai ŋi mɛni ma a ɣaloŋ lɔɔlu mɛi-da nyii gɛ va kaa pɔri lii goyaŋ-ŋai su Galoŋ-laa Pɛrɛi la. Mɛni ma, da bɔŋ Lidia da kaa diwoli tɔɔ goyaŋ-ŋai dia Zoom mɛi.

Pere sii kɛɛ leŋ ɓe David da bɔŋ Lidia di kpɔŋ maa sɔlɔ ɓo la dilaoi-ni yeei korai-toli-kpɔŋ sui? Tãi kelee goyaŋ a kaa kpɛɛ lai, bɔlɔ da sisɛ-ŋai taŋa da kaa tãi siɣe a gɛɛ di lono dipɔ Zoom mɛi. E tee nyiti ma, da kaa worɛ-woo kɔlɔ-ŋa tɛɛ diɛ a gɛɛ di disɛɣɛi fe dimare-kɛɛ sukula woo lɛlɛɛ-ŋai  mɛni ma. Nyiŋi e gɛ a gɛɛ David da Lidia lii fe too polu a ŋanaa.

Tãi ta kwa pɔri mɛni-kpɛtɛɛ kɛi a gɛɛ ku ɣala-woo-ɓo a bɔlɔ kpaa sisɛ ta nyii ve pɔrii kulai ŋɔpɛrɛi lai. Kwa pɔri nyiŋi kɛi a mɛni maa faleŋɔɔ-ŋa kɛɛ kuɣala-woo-ɓo perei su. Nyiŋi kɛɛ a nɛ a gɛɛ ku kpaaŋɔɔi nii dimɛni ma. (Tá. 3:27) Tãi ta ka pɔri mɛni-kpɛtɛɛ kɛi a gɛɛ ka nyaa ka ŋala-woo-ɓo tii kɛ gie ma doli-ɓo-kɔlii mɛi. E tee nyiti ma, korai-toli-kpɔŋ laa-tuɛ-ɓelai da pɔri mɛni-kpɛtɛɛ kɛi a gɛɛ di goyaŋ ŋala-woo-ɓo tii mɛni mai kɛ Zoom mɛi. David da Lidia nyii ku lono e pilaŋ diai lii e kɛ a nɛ̃ɛ nyiŋi mɛni ma. David e mo nyɛɛi: “A gɛɛ nɔ kwa bɔlɔ-ŋai ku tãi kpua loŋ siɣe gie ma, ku kuwoli tɔɔ ɣala-fɛli-woo ma, e ku fɔrɔ a ŋanaa.” Ya pɔri ŋɔnɔ bɔlɔ kpaa sisɛ ta nyii ve pɔrii kulai ŋɔpɛrɛi la mare kɛi a kɛ ya pɔri pai a Iɣala-kɔlɔ maa-kɔri-nuui bɔ bɛrɛ la a tãi kelee a gɛɛ ka nyaa ka gɛ gie ma.

Kwa tii kɛ gie ma a kubɔlɔ da sisɛ-ŋai ŋala-woo-ɓo tii su nyii-ŋai dife pɔrii kulai dipɛrɛi lai, kwa ditua-pere lɛlɛɛ-ŋai kaa, nyaŋ nyiŋi a ku lɛɣɛ a dia. Gɔɔŋ-maa ɓa, ya berei kaa da tii kɛ la a Ŋala-kɔlɔi a nɛlɛɛ a gɛɛ di sɛŋ lɛ nua dia e dilii soŋ, nyiŋi a I lɛɣɛ a dia e tɛɛ bɔlɔi ma. A ŋɔnɔ kpɔŋ ya a gɛɛ I laoi-laa kɛ a bɔlɔ da sisɛ takpɛni-ŋa korai-toli-kpɔŋ su.—2 Kl. 6:13.

Pɔɔ e ŋaa-nɛnɛ sɔlɔ ɓo naoi Taitɔ yeei gɛɛ tɛɛi mɛni-kpanaŋ sui. (2 Kl. 7:​5-7) Mɛni-kɔɔŋ-maai ŋi a nɛi a gɛɛ berei maŋ nɛlɛɛi la ku kubɔlɔ da sisɛ-ŋai fɔrɔ dakɛ tɛɛi mɛni-kpanaŋ sui, kɛɛ maa nɛ̃ɛi ŋɔnɔ ku zãai maa kpaaŋ kaa diai tɛɛ dipɔ.—1 Zɔŋ 3:18.

Kubɔlɔ da sisɛ-ŋai nyii-ŋai Russia lɔii sui, dikaa a mɛni-kɔɔŋ-maa lɛlɛɛ a pa kpɔŋ maa tɛɛ ma dikie-ni pɔ. Kwaa Sergey da ŋɔnɛnii Tatyana dimɛni-kɔɔŋ-maai kaa. Poli-ŋai kɛɛ daa kpɛɛ dipɛrɛi mu kɔrii, di disoŋ di li a dia a gɛɛ di dimare kɛ. Tatyana ɓe kɛ a nuui maa-ŋuŋ diŋuŋ ma ɓo, nyaŋ e pa polu bɛrɛi la. Sergey e mo nyɛɛi: “Gɛɛ Tatyana aa pa polu bɛrɛi lai, sisɛ lii-kpeleɛ tɔnɔ e pa ku naa kaai. Naa polu ma, kulaoi-ni tamaa ɣele di pa a gɛɛ di kpɔŋ maa tɛɛ kupɔ a gɛɛ ku kupɛrɛi mu kpɛtɛ polu.”

Sergey e ŋɔnɔ mo nyɛɛi: “Tãi kukɛ tɛɛi la mɛni-kpanaŋ ŋi sui, ŋa kɛ kpɔ ŋwɛlii a kpɔŋ maa naoi-ni yeei. Ŋaa gaa a gɛɛ mɛnii Tare-woo-ŋa 17:17 e moi kaa a tɔ̃ya. Ŋala-kɔlɔ-kpuai ti e mo New World Translation su nyɛɛi: “Nuu naoi lɛlɛɛ a wɛli-kɛ-maa lɛ a tãi kelee, nyaŋ gaa a nuu nyii a kpɔŋ maa tɛɛ a mɛni-kpɔlu tãi.” Ziova aa laoi-laa su-ɓela lɛlɛɛ-ŋa tɛɛ mbɔ, nyii-ŋai dilii-kpeleɛ, dikɛ kpɔŋ ma a tãi kelee.”

Kwa kɛ tɛɛi mɛni-kpanaŋ-ŋa su, kwa ŋwɛli a ŋaa-nɛnɛ kulaoi-ni yeei. Kwa pai ŋaa-nɛnɛi ŋi wɛlii e tɛɛ bɔlɔi ma a mɛni-kpɔlu kɛtɛ tãi. Mɛni ma, kwaa kanaŋ kɔi a gɛɛ kukɛ a laoi-laa su-ɓela lɛlɛɛ-ŋa lonii ma!—1 Pi. 4:​7, 8.