ZƐŊ-LƐƐI 7
ŊULEI 15 Praise Jehovah’s Firstborn!
Mɛni Lɛlɛɛ-ŋa Kɛɛ Leŋ Ɓe Kwa Zɔlɔ Ɓo Ziova Ŋɔsu-mɛni-lɛɛi Su?
‘Ya kusɔnyɔŋ su mɛni lɛɛ a tɔ̃ya pere.’—ŊU. 130:4.
MƐNI-ŊUŊ
Kwa pai lonoi e pilaŋ mɛni-kɔɔŋ-maa-ŋa dia Ŋala-kɔlɔi su, nyii berei lɛi Ziova a ku su mɛni lɛɛ lai. Nyaŋ nyiŋi kɛɛ a pai kuyee-see-mui su kpanani Ziova ŋɔsu-mɛni-lɛɛi mɛni ma.
1. Le mɛni ɓe a kɛ a gbanaŋɔɔ la a gɛɛ ku nuu-kpune ŋɔsu-mɛni-lɛɛi ŋaa kaai?
“ŊAA I SU MƐNI LƐƐ.” Kulii a nɛ̃ɛ a ŋanaa a kɛ nuu ta nyii ku nii ŋwana mɛni kɛi a ŋoo-ŋai ti ɓo kua! Kɛlɛ ŋooi “Ŋaa I su mɛni lɛɛ” sukulai kpɔɔi ɓa le? I laai la nuui a moi a gɛɛ a ŋwɛlii kalaoi-laai e kɛ ŋɔnɔ yɛɛ berei e kɛ la a bɔlɔi? Kpaa ve ŋɔnɔ ŋwɛlii e lono e pilaŋ mɛnii ti ma? Tɔ̃ya ma, nuu-kpune ŋɔsu-mɛni-lɛɛi ŋa kaai a kɛ a gbanaŋɔɔ.
2. Le ɓe Ŋala-kɔlɔi e mo e pilaŋ Ziova ŋɔsu-mɛni-lɛɛi ma? (Ya pɔri ŋɔnɔ fonoi kaai.)
2 Berei Ziova a kusu mɛni lɛɛ lai, kaa a dakpɛni berei ma kwa kukie-ni su mɛni lɛɛ lai. Ŋule-woo pɔ̃yɛ-nuui kɛɛ lonoi e pilaŋ Ziova ma e mo nyɛɛi: ‘Ya kusɔnyɔŋ su mɛni lɛɛ a tɔ̃ya pere a gɛɛ ku ŋumɛ-maa tɛɛ ipɔ.’ a (Ŋu. 130:4) Tɔ̃ya ma, Ziova ŋɔsu-mɛni-lɛɛi kaa a “tɔ̃ya su-mɛni-lɛɛ.” Nya nɔ ɓe a su-mɛni-lɛɛ sukulai kpɔɔi lɛ kua. Ibulu Ɣala-kɔlɔ pɔ̃yɛ-ɓelai taŋa di tii kɛ a woo-ŋa di kɛɛ lonoi e pilaŋ Ziova ŋɔsu-mɛni-lɛɛi ma nyii dife wɔlɔ tii kɛ ni la di kɛɛ lonoi e pilaŋ nuu-kpune ŋɔsu-mɛni-lɛɛi ma.
3. Ziova ŋɔsu-mɛni-lɛɛi kaa leŋ a dakpɛni kuwɔi ma? (Azaya 55:6, 7)
3 Ziova a nuu ta su mɛni lɛɛ, a ŋɔsɔnyɔŋ waa ma. Nyaŋ nuui ti a pɔri ŋɔnɔ laoi-laa lɛlɛɛ ŋaa-nɛ̃ɛ kulai a nyaa. Kulii nɛ̃ɛi a gɛɛ Ziova a kusɔnyɔŋ su mɛni lɛɛ a nii kelee a tãi tamaa.—Azaya 55:6, 7 lono.
4. Ziova a kpɔŋ leŋ kua a gɛɛ ku tɔ̃ya su-mɛni-lɛɛ ŋaa kaa a nɛlɛɛ?
4 A kɛ Ziova ŋɔsu-mɛni-lɛɛi kaa a dakpɛni kuwɔi ma, kwa pɔri tɔ̃ya su-mɛni-lɛɛ ŋa kaai leŋ a nɛlɛɛ? Ziova e tii kɛ a mɛni-kɔɔŋ-maa lɛlɛɛ-ŋa a gɛɛ e kpɔŋ kua ku ŋɔsu-mɛni-lɛɛi ŋa kaa ma. Kwa pai mɛni-kɔɔŋ-maa-ŋai ti taŋa kaai zɛŋ-lɛɛi ŋi su. Mɛni-kɔɔŋ-maa-ŋai ŋi da pai berei lɛi Ziova a kusɔnyɔŋ waa la kuai, e ŋɔnɔ nɛɛ naa ku laoi-laa lɛlɛɛ ŋaa-nɛ̃ɛ kula a nyaa. Da pai ŋɔnɔ kpɔnii kua a gɛɛ ku kuyee-see-mui su kpanaŋ kuŋɛi-maloŋ-kaa Naŋ mɛni ma, nyii a ku su mɛni lɛɛ a pere sii takpɛni-ŋai.
ZIOVA A NĨA KUSƆNYƆŊ MA
5. Le ɓe a kɛ Ziova a kusɔnyɔŋ su mɛni lɛɛ?
5 Ŋala-kɔlɔi e sɔnyɔŋ kɔɔŋ kpiri wuyɛɛ ma. Galoŋ Deeɓe kɛɛ lonoi e pilaŋ ŋɔsɔnyɔŋ-ŋai dia e mo nyɛɛi: “Ŋasɔnyɔŋ su a kɛtɛ, ŋuyɛ a tɛɛ ŋgbono ma.” (Ŋu. 38:4) Kɛlɛ Ziova a sɔnyɔŋ-ɓela nyii-ŋai da dilii penei, disɔnyɔŋ-ŋai su mɛni lɛɛ. (Ŋu. 25:18; 32:5) Ibulu wooi “su-mɛni-lɛɛ” mɛni ma, sukulai ɓa “sɛŋ ta kulaa kuŋua.” Mɛni ma, kwa pɔri Ziova kaai nɔ yɛɛ naloŋ kponoi kpanaŋɔɔ nyii a kusɔnyɔŋ nyii gaa yɛɛ kpiri wuyɛɛi siɣe e li lai.
‘Su-mɛni-lɛɛ’ (Ŋu. 32:5)
6. Pere sii kɛɛ leŋ ɓe Ziova a ku su mɛni lɛɛ lai?
6 Gɔɔŋ-maa ɓa, Ŋule-wooi 103:12 e ŋɔnɔ mɛni-kɔɔŋ-maa takpɛni lɛ nyii berei lɛi Ziova a kusɔnyɔŋ kɛi koyaa la kuai. E mo nyɛɛi: “Berei nɔ voloi kulai-pere koyaai la voloi lii-pere mai, bere nɔ ɓe a pai kusɔnyɔŋ-ŋai waai la kua, kumaa e koyaa dia.” Nyiŋi sukulai ɓa berei voloi kula-pere koyaai la voloi lii-pere mai, bere nɔ ɓe Ziova a kusɔnyɔŋ-ŋai kɛi koyaa la kua. Gaa a ŋaa-nɛnɛ mɛni a gɛɛ Ziova a ku su mɛni lɛɛ a bere sii lɛlɛɛ ŋi!
“Berei nɔ voloi kulai-pere koyaai la voloi lii-pere mai” (Ŋu. 103:12)
7. Le ɓe Ŋala-kɔlɔi e mo e pilaŋ mɛnii ma Ziova a gɛ a kusɔnyɔŋ? (Maka 7:18, 19)
7 Berei maŋ Ziova a kusɔnyɔŋ maa koyaa la kuai, I laai la a kɛ nii gili-ŋa siai e pilaŋ ma? Kpa. Mɛnii kaa Galoŋ Ɛsekaya e mo e pilaŋ Ziova mai. E mo nyɛɛi: “Yaa ŋasɔnyɔŋ-ŋai kelee pili ipolu pere.” Kpaa yɛɛ berei fonoi e mo lai, “Yaa ŋasɔnyɔŋ-ŋai kelee kula iŋɛi.” (Az. 38:9, 17; ftn, NWT.) Mɛni-kɔɔŋ-maai ŋi a nɛi a gɛɛ Ziova a sɔnyɔŋ-ɓela nyii-ŋai da dilii penei su mɛni lɛɛ, va ŋɔnɔ gili-ŋa sia e pilaŋ disɔnyɔŋ ma. Kwa pɔri ŋɔnɔ ŋala-kɔlɔ-kpuai ŋi laai a bere sii ŋi: “Yaa ŋasɔnyɔŋ-ŋai kɛ yɛɛ nya ɓe dife wɔlɔ kɛ ni naa.” Ŋala-kɔlɔi e ŋɔnɔ tii kɛ a mɛni-kɔɔŋ-maa takpɛni a gɛɛ e mɛni-ŋuŋ ŋi lɛ a zu ponoɔ. (Maka 7:18, 19 lono.) Ŋala-kɔlɔ-kpuai ŋi e mo a gɛɛ Ziova a kusɔnyɔŋ-ŋai pili yuo kpoŋ ma. Wɔlɔ ti kɛi, a kaa kɛ a gbanaŋɔɔ a gɛɛ nuu ta e sɛŋ ta nyii di bili yuo kpoŋ mai sɔlɔ ɓo polu.
“Yaa ŋasɔnyɔŋ-ŋai kelee pili ipolu pere” (Az. 38:17)
‘Yaa disɔnyɔŋ-ŋai kelee pili yuo kao ma’ (Ma. 7:19)
8. Le ɓe kwaa naa maa-kɔrii?
8 Kwaa gaa mɛni-kɔɔŋ-maa-ŋai ŋi su a gɛɛ Ziova a ku su mɛni lɛɛ, a nĩa kusɔnyɔŋ-ŋai dia. Mɛnii Deeɓe e moi kaa a tɔ̃ya, e mo nyɛɛi: “Luwa kaa diai dia Ɣala a disu-mɛni lɛɛ disɔnyɔŋ-ŋai mɛni ma, e nĩa maa sɔnyɔŋ-ŋai kpiŋ mɛni mai; luwa kaa nuui ma Kunuu-namui fa ŋɔsɔnyɔŋ-ŋai siɣe a zɔŋ.” (Lo. 4:6-8) Nyiŋi kaa a tɔ̃ya su-mɛni-lɛɛ!
ZIOVA A KUSƆNYƆŊ WAA KUA
9. Mɛni-kɔɔŋ-maa kɛɛ leŋ ɓe Ziova e tii kɛ la a gɛɛ ku berei kɔlɔŋ a kusɔnyɔŋ su mɛni lɛɛ lai?
9 Ziova e ŋɔnɔ tii kɛ a mɛni-kɔɔŋ-maa takpɛni-ŋa a gɛɛ e kpɔŋ kua ku berei kaa a kusɔnyɔŋ-ŋai waa la kua maa-tee-sɛŋ sarai. Ŋala-kɔlɔi e mo a gɛɛ Ziova a sɔnyɔŋ-ɓela nyii-ŋai da dilii penei disɔnyɔŋ-ŋai waa dia. (Ŋu. 51:7; Az. 4:4; Zl. 33:8) Ziova nya kpiŋ e mo nyɛɛi: “Berei maŋ kasɔnyɔŋ a kpului la yɛɛ doloi, ŋa pai kawaai ka kɛ kole yɛɛ yee fũa. Berei maŋ kasɔnyɔŋ a kpɔlu la yɛɛ lolo-mãlaŋ, ŋa pai kawaai ka kɛ yɛɛ ɓala leɣa kole.” (Az. 1:18) Lolo-mãlaŋ a lɛɛ seɣe ma, a kɛ a gbanaŋɔɔ a gɛɛ e kula ma. Kɛlɛ, Ziova e tii kɛ a mɛni-kɔɔŋ-maai ŋi a gɛɛ ku berei kaa a kusɔnyɔŋ waa kua, va ŋɔnɔ lɛɛ la kuai.
“Berei maŋ kasɔnyɔŋ a kpɔlui la yɛɛ doloi, ŋa pai kawaai ka kɛ kole yɛɛ yee fũa” (Az. 1:18)
10. Mɛni-kɔɔŋ-maa takpɛni kɛɛ leŋ ɓe Ziova e ŋɔnɔ tii kɛ la a gɛɛ ku berei kaa a kusɔnyɔŋ su mɛni lɛɛ lai?
10 Yɛɛ berei ku maa-kɔri la zɛŋ-lɛɛi ku tɛɛ mai sui, sɔnyɔŋ kaa nɔ yɛɛ kpa. (Mf. 18:32-35) Tãi kelee kwa sɔnyɔŋ kɛ lai, a kɛ nɔ yɛɛ kwa kɛ kpa sonii Ziova ma. Ziova ŋɔkpa kɛtɛ kaa kua! Kɛlɛ Ziova a ku su mɛni lɛɛ, a kɛ nɔ yɛɛ a kɛ nĩai ŋɔkpai ma gaa kuai, nyaŋ va ŋɔnɔ ku soŋ zɔnyɔŋ ti mɛni ma. Mɛni-kɔɔŋ-maa lɛlɛɛ ŋi a berei lɛi kulii a nɛ̃ɛ la Ziova a kusɔnyɔŋ su mɛni lɛɛ!
‘Ŋa ikpai kelee su-mɛni lɛɛ’ (Mf 18:32-35)
11. Kusɔnyɔŋ ‘kulaa kua’ sukulai ɓa le? (Dikɛ-mɛni-ŋai 3:19)
11 Ziova fa nĩa nɔ kukpa-ŋai kpaa kusɔnyɔŋ-ŋai dia, kɛlɛ a gula kua kpaa e zu kara. (Dikɛ-mɛni-ŋai 3:19 lono.) Nuu ta a gbɛtɛ gili-ŋa a gɛɛ e nĩa ikpai ma, a kɛ nɔ yɛɛ a kɛ peeŋ laai ilaa ma gba kɔlɔi su. Kɛlɛ da pɔri nii ilaa kaai beeŋ mu. Kɛlɛ sɛŋ ta kulaa kpaa ŋwaa kɔlɔ ma kaa a dakpɛni. A gɛɛ ku mɛni-kɔɔŋ-maai ŋi ŋaa kaa ma, kwaa kukili-ŋa sia e pilaŋ zɛŋ ma nua da kaa wɔlɔ tii kɛ la a gɛɛ di kɔlɔ pɔ̃yɛi. Va kaa kɛ a gbanaŋɔɔ a gɛɛ nuu ta e tii kɛ a ya a gɛɛ e gɔlɔ-pɔ̃yɛi su kara. Mɛni ma, da kaa nuu ta laa “kula” kpa-kɔlɔ ta ma kpaa di zu kara, difa kaa ŋɔnɔ gaa. A kaa kɛ nɔ yɛɛ nuui ti fe kpiŋ kpa soŋ ni. Gaa a lii-nɛ̃ɛ mɛni a gɛɛ Ziova fa nĩa nɔ kusɔnyɔŋ-ŋai dia, kɛlɛ a ŋwaa kua kpaa e disu kara!—Ŋu. 51:9.
“A gɛɛ kasɔnyɔŋ e kula kaa” (Dikɛ-mɛni-ŋai 3:19)
12. Le ɓe ku maa-kɔri mɛni-kɔɔŋ-maai su nyii bilaŋɔi luu kɛtɛ mai?
12 Ziova e tii kɛ a mɛni-kɔɔŋ-maa takpɛni a gɛɛ e berei lɛ a kusɔnyɔŋ-ŋai su mɛni lɛɛ lai. E mo nyɛɛi: “Ŋa kasu mɛni lɛɛ kasɔnyɔŋ kelee mɛni ma yɛɛ luu kɛtɛ a pɛlɛ ŋele-kɔlɔŋ mɛi.” (Az. 44:22, NWT) Ziova a kusɔnyɔŋ su mɛni lɛɛ, a kɛ nɔ yɛɛ a luu kɛtɛ siɣe e bɛlɛ kusɔnyɔŋ mɛi a gɛɛ ve ŋɔnɔ gaa.
“Ŋa kasu mɛni lɛɛ kasɔnyɔŋ kelee mɛni ma yɛɛ luu kɛtɛ a pɛlɛ ŋele-kɔlɔŋ mɛi” (Az. 44:22, NWT)
13. Kulii a kɛ leŋ Ziova a kusɔnyɔŋ-ŋai su mɛni lɛɛ?
13 Le ɓe kwa maa-kɔri mɛni-kɔɔŋ-maa-ŋai ŋi su? Da nɛi a gɛɛ Ziova a kusɔnyɔŋ-ŋai su mɛni lɛɛ, maa fe nɛ̃ɛ ni kulii e ŋɔnɔ too polu zɔnyɔŋ ti mɛni ma. Zisɛ ŋɔmaa-tee-sɛŋ e pere laa ɓo a gɛɛ Ziova e pɔri kusɔnyɔŋ-ŋai waai kua. Va ŋɔnɔ kpiŋ gili-ŋa sia e pilaŋ dia. Kwa kulii pene ku kuyee kula kusɔnyɔŋ-ŋai su, Ziova a ku su mɛni lɛɛ a tɔ̃ya pere.
ZIOVA A ŊƆNƆ NYEE SEE KU MU A NAOI LƐLƐƐ-ŊA
Kuɣala-taa Naŋ ŋɔsu-mɛni-lɛɛi a nɛɛ naa a gɛɛ ku laoi-laa lɛlɛɛ kɛ a nyaa (Ŋoo-ɣɛli-kpului 14 kaa)
14. Le mɛni ɓe kwa pɔri laai la a gɛɛ Ziova a ku su mɛni lɛɛ a tɔ̃ya perei? (Ya pɔri ŋɔnɔ votoo-ŋai kaai.)
14 Berei Ziova a ku su mɛni lɛɛ la a tɔ̃ya perei a nɛɛ naa a gɛɛ ku laoi-laa lɛlɛɛ kɛ a nyaa. A ŋɔnɔ kpɔŋ maa tɛɛ kupɔ a gɛɛ kuyee e tɛɛ lii-too-polu mɛni kelee ta ma. Maa fe nɛ̃ɛ ni e kɛ kukili-ŋa a gɛɛ Ziova a kusɔnyɔŋ laai a gili, nyaŋ a pere kɔrii a gɛɛ e ŋɔnɔ ku kula maa kɛ mɛni ma. Mɛni kɛɛ ti fe pai wɔlɔ kɛi. Le mɛni ɓe maa nɛ̃ɛi ku laa la a Ziova ŋɔsu-mɛni-lɛɛi? Ɣala ŋɔlono-kɛ-nuui Zɛlemaya kɛɛ lonoi e pilaŋ Ziova ma, e mo nyɛɛi: “Ŋa pai disɔnyɔŋ su mɛni lɛɛi. Nyaŋ, dimɛni nyɔmɔɔ-ŋai kili fe pai lɛɛi ŋgili-ŋa.” (Zl. 31:34) Zia-nuui Pɔɔ kɛɛ lonoi e pilaŋ mɛni-ŋuŋ tɔnɔi ŋi ma e mo nyɛɛi: ‘Ŋa pai nĩai disɔnyɔŋ ma.’ (Ib. 8:12) Kɛɛ nyiŋi sukulai kpɔɔi ɓa le?
“Dimɛni nyɔmɔɔ-ŋai kili fe pai lɛɛi ŋgili-ŋa” (Zl. 31:34, NWT)
15. Ziova a mo a gɛɛ kusɔnyɔŋ-ŋai fe pai lɛɛi gili-ŋa, zukulai ɓe le?
15 Ŋala-kɔlɔi a tii kɛ a ŋooi “e lɛɛ ikili-ŋa” sukulai fe nɔ a gɛɛ nuu ta e pɛlɛ gili-ŋa siai e pilaŋ mɛni ta ma nyii kɛ a bɔlɔi. Kɛɛ zukulai a pɔri ŋɔnɔ kɛi a gɛɛ nuui ti e mɛni ta kɛ. Dɔŋ kara-nuui nyii kɛ sɛlɛni Zisɛ kɔlɛ ma zaa wurui mai, e mo ma nyɛɛi: “Zisɛ maa mɛni e lɛɛ ikili-ŋa, tãi ya pa la ikaloŋ-laai sui.” (Luu 23:42, 43) Ve kɛ ni nɔ moi Zisɛ ma a gɛɛ e gili-ŋa sia e pilaŋ ma a tãi ti. Nyaŋ berei Zisɛ e ŋoo su too lai e nɛ a gɛɛ a pai dɔŋ kara-nuui mu-siɣei saa yeei tinaa-tuɛ-pere. Mɛni ma Ziova a mo a gɛɛ kusɔnyɔŋ fe pai ŋɔnɔ lɛɛi gili-ŋa, a nɛi a gɛɛ ve pai ŋɔnɔ ku kula maa kɛi sɔnyɔŋ mɛni ma nyii aa ku su mɛni lɛɛ mɛni mai.
16. Ŋala-kɔlɔi e lono leŋ e pilaŋ ŋuŋ-maa-ɓoi ma kwa zɔlɔ ɓo Ziova a ku su mɛni lɛɛi?
16 Ŋala-kɔlɔi e ŋɔnɔ tii kɛ a mɛni-kɔɔŋ-maa takpɛni a gɛɛ ku ŋuŋ-maa-ɓoi kaa Ziova ŋɔsu-mɛni-lɛɛi a pa lai. Ee kumaa fe waa nii, kukaa a “sɔnyɔŋ ŋɔluɛ-ŋa.” Kɛlɛ Ziova a ku su mɛni lɛɛ, a kɛ yɛɛ a “ku kula sɔnyɔŋ ŋɔluɛ-laai su.” (Lo. 6:17, 18; Mɛ. 1:5) Tɔ̃ya ma, Ziova ŋɔsu-mɛni-lɛɛi a pa a lii-nɛ̃ɛ tamaa kupɔ yɛɛ luɛ nyii daa ŋuŋ maa ɓoi.
“Ka naa kula sɔnyɔŋ ŋɔluɛ-laai su” (Lo. 6:18)
17. Su-mɛni-lɛɛ a pa leŋ a kɔlɔi pono kupɔ? (Azaya 53:5)
17 Azaya 53:5 lono. Ŋala-kɔlɔi e mo a gɛɛ ee kukaa a sɔnyɔŋ-ɓelai, kukaa yɛɛ nua nyii-ŋai kɔlɔ-fela nyɔmɔɔ kaa diai. Kɛlɛ Ziova aa kɔlɔi pono tɛɛ kupɔ a Noŋ tɛɛ a gɛɛ e saa kumɛni ma. (1 Pi. 2:24) Kwa sɔnyɔŋ kɛ, a kulaoi-laai a Ziova su kara. Kɛlɛ maa-tee-sɛŋ sarai, kwa ŋɔnɔ pɔri laoi-laa lɛlɛɛ kɛi a nyaa. Yɛɛ berei nɔ kɔlɔ-fela-nuu lii a nɛ̃ɛ la a ɓalo ŋɔkɔlɔ-felai yeei, bere nɔ ɓe kulii a nɛ̃ɛ la Ziova a kusɔnyɔŋ su mɛni lɛɛ ku ŋɔnɔ pɔri laoi-laa lɛlɛɛ kɛi a nyaa.
“Kwa kɔlɔ pono sɔlɔ ɓo ŋɔmɛni-soli kaai su” (Az. 53:5)
MƐNI LƐLƐƐ-ŊAI KWA ZƆLƆ ƁO ZIOVA ŊƆSU-MƐNI-LƐƐI SUI
18. Le ɓe kwaa maa-kɔri mɛni-kɔɔŋ-maa takpɛni-ŋai su e pilaŋ Ziova ŋɔsu-mɛni-lɛɛi ma? (Ya pɔri ŋɔnɔ basii “Berei Ziova A Ku Su Mɛni Lɛɛ Lai” kaai.)
18 Le ɓe kwaa maa-kɔri mɛni-kɔɔŋ-maa takpɛni-ŋai su e pilaŋ Ziova ŋɔsu-mɛni-lɛɛi ma? Kwaa maa-kɔri a gɛɛ Ziova a ku su mɛni lɛɛ, a nĩa kusɔnyɔŋ ma. Nyaŋ nyiŋi a nɛɛ naa a gɛɛ ku ŋɔnɔ pɔri laoi-laa lɛlɛɛ kɛi a kuɣala-taa Naŋ. Kɛlɛ e lɛɛ kukili-ŋa a gɛɛ su-mɛni-lɛɛ kaa a ɓɛlɛ-see nyii kula Ziova yeei. Nyaŋ wɛli-kɛ-maa ɓe a nii kula a gɛɛ e ku su mɛni lɛɛ. Kɛɛ ve ma a kpa a gɛɛ e gɛ ti.—Lo. 3:24.
19. (a) Le ɓe maa nɛ̃ɛi kulii e kɛ a nɛ̃ɛ mɛni mai? (Lomaŋ 4:8) (b) Le ɓe kwa pai maa-kɔrii zɛŋ-lɛɛi nɛɛ polui su?
19 Lomaŋ 4:8 lono. Kulii nɛ̃ɛi a gɛɛ Ziova a ‘kusu mɛni lɛɛ a tɔ̃ya pere’! (Ŋu. 130:4) Kɛlɛ a gɛɛ Ziova e ku su mɛni lɛɛ, maa nɛ̃ɛi ku mɛni ta kɛ. Zisɛ e mo nyɛɛi: “A kɛ ka nua su-mɛni lɛɛ ditɔŋ-karaa-ŋai mɛni ma, Kaɣala-taa Naŋ a pai maŋ kasu-mɛni lɛɛi.” (Mf. 6:14, 15) Mɛni ma, maa nɛ̃ɛi ku Ziova ŋɔsu-mɛni-lɛɛi pɔɔkɔɔŋ. Kɛɛ kwa pɔri nyiŋi kɛi leŋ? Kwa pai mare-kɛɛ ŋi sukulai kaai zɛŋ-lɛɛi ŋi nɛɛ polui su.
ŊULEI 46 We Thank You, Jehovah
a Ibulu Ɣala-kɔlɔi e tii kɛ a ŋooi ‘zu-mɛni-lɛɛi’ nyii nɛi a gɛɛ berei maŋ su-mɛni-lɛɛ takpɛni-ŋa kaa la naai, kɛlɛ nyiŋi nɔ ɓa dɔ̃ya su-mɛni-lɛɛi. Ɣala-kɔlɔ tamaa dife mɛni-ŋuŋ ŋi lɛ ni a zu ponoɔɔ Ŋule-wooi 130:4 su, kɛɛ New World Translation of the Holy Scriptures e mɛni-ŋuŋ ŋi lɛ a zu ponoɔɔ.
