Mary da bɔŋ, John a dikaa lɔii-ŋuŋ ta su ɓɛi nua tamaa da kula Philippines lɔii su di pa naa tii kɛ mɛni ma. Nyaŋ Mary da bɔ lii a kɛ a nɛ̃ɛ a gɛɛ di ɣala-woo ɓo dia. COVID-19 kɔlɔ-fela tãi ma, Mary e pɛlɛ Ŋala-kɔlɔi ŋaa lɛi nua dia ŋɔlɔii-ŋuŋ su da lɔii-ŋuŋ takpɛni-ŋa su. E nyiŋi kɛ leŋ?

Mary a kaa Ŋɔɣala-kɔlɔ maa-kɔri-ɓelai mare kɛ, nyɛɛ diai: “I nuu ta kɔlɔŋ nyii ŋwɛlii e Ŋala-kɔlɔi maa-kɔri?” Da kɛ ma oowei, a ŋɔnɔ di mare kɛ a gɛɛ di nɛ dia. Mare-kɛɛ loŋ kɛɛ ŋi a pa a mɛni lɛlɛɛ-ŋa. Le mɛni ma? Kpɛni fei tãi tamaa, nua nyii-ŋai da diyee see Ŋala-kɔlɔi maa-kɔriɛ mui lii a kɛ a nɛ̃ɛ a gɛɛ di mɛnii da maa-kɔrii lɛ dikaayɔɔi kpaa dilaoi-ni dia. Le ɓe Mary Ŋɔɣala-kɔlɔ maa-kɔri-ɓelai da gɛ a dimare kɛ a mare-kɛɛ ŋi?

Mary Ŋɔɣala-kɔlɔ maa-kɔri-nuui, Jasmin e nuu naaŋ lɛ ma nyii-ŋai kɛ ŋwɛlii di Ŋala-kɔlɔi maa-kɔri. Kristine nyii kɛ a nuu naaŋ ŋi tɔnɔi e Ŋɔɣala-kɔlɔ maa-kɔriɛ ŋaa nɛ̃ɛ kpɔɔi kula nyii gɛ e mo Mary ma a gɛɛ dikɛ Ŋala-kɔlɔ maa-kɔriɛ kɛ giei feerɛ nɔɔ-kuui su. Tãi Mary e mare kɛ la a kɛ e nuu ta kɔlɔŋ nyii ŋwɛlii e Ŋala-kɔlɔi maa-kɔrii, Kristine e kɛ mai: “Oowei, ŋa pai I lɛi naoi-ni dia.” Lɔɔ-kuu kpulu tɛɛ polu ma, Kristine e nuu naaŋ lɛ Mary ma nyii-ŋai kɛ ŋwɛlii di Ŋala-kɔlɔi maa-kɔrii. Naa polu ma, Kristine e Mary lɛ naoi kpeli-ŋai dia, nyaŋ dia maŋ di nua takpɛni-ŋa lɛ nyii-ŋai kɛ ŋwɛlii di Ŋala-kɔlɔi maa-kɔrii.

Kristine e kɛ ŋɔnɔ ŋwɛlii ŋɔkaayɔɔi su-ɓela nyii-ŋai kɛ Philippines lɔii sui di Ŋala-kɔlɔi maa-kɔri. Mɛni ma e lono noŋ nɛnii, Andrea pɔ. Gɔɔ pilani e kɛ Andrea kili-ŋa a gɛɛ Ziova Ŋɔsere-faa kɛ-ɓelai dikpɔŋ-gie-mai kaa a lɛɛ ɣala-mɛni kpɛni fei dife laa ni a Zisɛ, nyaŋ Gbanaŋ-woo-kɛɛ pɔlɔi nɔ ɓe da tii kɛ la. Kɛlɛ, gɛɛ daa Ŋala-kɔlɔ maa-kɔriɛ kɛ nɔ tɔnɔ, e gaa a gɛɛ ŋɔkili-ŋa-siai e pilaŋ Ziova Ŋɔsere-faa-kɛ-ɓelai dia fe kɛ ni a tɔ̃ya. Tãi kelee a kaa mɛni-ŋuŋ nina ta maa-kɔri la Ŋala-kɔlɔi sui, a kaa mo nyɛɛi, “Gaa Ŋala-kɔlɔi su, mɛni ma gaa a tɔ̃ya!”

Tãi taŋa tɛɛ polu ma, Andrea e Mary lɛ naoi feerɛ ma da maraŋ-tii-kɛ-nuu tɔnɔ nyii-ŋai pɛlɛ Ŋala-kɔlɔi maa-kɔrii. Andrea naŋ zaaɓɔlɔ, Angela nyii kɛ a ŋɛi puɔɔi a kaa kɛ ŋoli-tɔɔi Andrea Ŋɔɣala-kɔlɔ maa-kɔriɛ ma, kɛlɛ Mary fe kɛ ni a gɔlɔŋɔɔ. Gɛ ni tãi tɔnɔ, Angela e Andrea mare kɛ a gɛɛ e mo Mary ma a gɛɛ a ŋwɛlii e Ŋala-kɔlɔi maa-kɔri. Mɛnii Angela e kɛ maa-kɔrii wɛli e kɛ ma. Ɣaloŋ tɔnɔ yee mu, e ɣala-kɔlɔ-kpua tamaa laa a gili, nyaŋ e kɛ ŋwɛlii di Ŋala-kɔlɔ maa-kɔriɛ kɛ giei naaŋ lɔɔ-kuu tɔnɔ yee mu! Andrea e kpɔŋ maa tɛɛ bɔ a gɛɛ e pɔri ŋoli-tɔɔi goyaŋ-ŋai dia Zoom mɛi.

Tãi Mary e gɔlɔŋ la a gɛɛ Kristine bɔŋ, Joshua a kaa kɛ di kɔlɛ ma dakɛ Ŋala-kɔlɔ maa-kɔriɛ kɛi, Mary e mare kɛ a kɛ nyaa maŋ a ŋwɛlii e Ŋala-kɔlɔi  maa-kɔri. Joshua e mo ma nyɛɛi, “Ŋa pai ŋwoli tɔɔi nɔ, kɛɛ ife mare-kɛɛ kelee ta tɛɛ mbɔ. Ya mare kɛ, gɛ ni ŋa pai kulai kawoo mu.” Di kɛɛ Ŋala-kɔlɔ maa-kɔriɛ kɛi, mini lɔɔlu yee mu, Joshua e mare-kɛɛ tamaa kɛ e tɛɛ Kristine ma, nyaŋ e mo a gɛɛ nyaa maŋ a ŋwɛlii e Ŋala-kɔlɔi maa-kɔri.

Mary ŋɔmare-kɛɛ loŋ e gɛ e pɛlɛ Ŋala-kɔlɔi ŋaa lɛi nua tamaa dia. Gɛɛ Ŋala-kɔlɔ maa-kɔri-ɓelai daa tamaai, e mɛni-kpɛtɛɛ kɛ a gɛɛ maraŋ Korai-ɓela di kpɔŋ maa tɛɛ bɔ a Ŋala-kɔlɔi ŋaa lɛɛ nuai taŋa dia. Mare-kɛɛ loŋ ŋi sarai, Mary e pɛlɛ Ŋala-kɔlɔi ŋaa lɛi nuu buu-feerɛ kao lɔɔlu mɛi saaɓa (28) ma, lɔii-ŋuŋ naaŋ su.

Jasmin, nyii kɛ a Ŋala-kɔlɔ maa-kɔri-nuui maa-ŋuŋ nyii ku lono e pilaŋ mai, e batai kɛ Dɛniŋ 2021 su. Kristine nyaa maŋ e batai kɛ Gali-kalai 2022 su, nyaŋ aa li polu ŋɔkaayɔɔi pɔ Philippines lɔii su. Ŋala-kɔlɔ maa-kɔri-ɓela feerɛi nyii Kristine e di lɛ Mary mai dia maŋ di batai kɛ. Ɣaloŋ kpulu tɛɛ polu ma, Angela e batai kɛ, nyaŋ gaa naa a lɔigula panĩa. Kristine bɔŋ Joshua, e pɛlɛ la diloŋ nɛnii Andrea ma, da Ŋala-kɔlɔ maa-kɔri-ɓelai kpeli-ŋai dikaa nii diɣala-kɔlɔ maa-kɔriɛ kɛi, nyaŋ da dimaa tɛi a nɛlɛɛ Diɣala-kɔlɔ maa-kɔriɛ su.

Zia-ɓelai ditãi ma nua tamaa di lono dikaayɔɔi su-ɓela da dilaoi-ni pɔ e pilaŋ mɛnii ma di maa-kɔri e pilaŋ Zisɛ mai. (Zɔŋ 1:​41, 42; Dikɛ-mɛni-ŋai 10:​24, 27, 48; 16:​25-33) Iɣala-kɔlɔ maa-kɔri-nuui da nua takpɛni-ŋa nyii-ŋai ŋwɛlii di Ŋala-kɔlɔi maa-kɔrii, mare kɛ a mare-kɛɛ ŋi: “I nuu ta kɔlɔŋ nyii ŋwɛlii e Ŋala-kɔlɔi maa-kɔri?” A kɛ ya mare-kɛɛ loŋ ŋi kɛ, tãi ta ya maŋ ya pai nua tamaa kaai nyii-ŋai ŋwɛlii di Ŋala-kɔlɔi maa-kɔri.