ZƐŊ-LƐƐI 8
ŊULEI 130 Be Forgiving
Ya Pɔri Ziova Ŋɔsu-mɛni-lɛɛi Pɔɔkɔɔni Leŋ?
“Yɛɛ berei Kunuu-namui e kasu-mɛni lɛɛ lai, ka gɛ ti maŋ.”—KO. 3:13.
MƐNI-ŊUŊ
Zɛŋ-lɛɛi ŋi a pai kpɔnii kua a gɛɛ ku berei kaa kwa pɔri nua su mɛni lɛɛi la da mɛni nyɔmɔɔ kɛ a kua.
1-2. (a) Mi tãi titi ɓe a kɛ a gbanaŋɔɔ la a gɛɛ ku nuu ta su mɛni lɛɛi? (b) Denise e su-mɛni-lɛɛ lɛ leŋ?
A KƐ A gbanaŋɔɔ a gɛɛ I nua su mɛni lɛɛ? Nyiŋi kɛi a kɛ a gbanaŋɔɔ ku tamaa ɣele kumɛni ma a kɛ nuu ta a mɛni ta kɛ a kua nyii a kulii too polu a ŋanaa. Kɛlɛ kuyee a pɔri tɛɛi kulii-too-polui ma, ku nua su mɛni lɛɛ. Kwaa ku sisɛi dɔnɔ nyii da kɛ ma Denise a ŋɔmɛni-kɔɔŋ-maai kaa nyii su-mɛni-lɛɛ kɛtɛ lɛi. Goraŋ 2017 su, Denise da ŋɔkaayɔɔi di li a gɛɛ di ku Ekwata Kɛtɛ ninai naa kaa. Di kɛɛ pai polu dipɛrɛi lai, keleŋ takpɛni e sɔɔ dikeleŋ ma. Tãi geleŋ e pu lai, Denise e foa. Gɛɛ Denise aa pa gbɔɔ mai, e gaa a gɛɛ bɔŋ Brian aa saa, nyaŋ ŋɔnĩa-pɛlɛɛi di di ŋwana a ŋanaa. Denise kɛɛ gili-ŋa siai e pilaŋ tãi ti ma e mo nyɛɛi: “Nii e too polu a ŋanaa, ŋgili-ŋa e pu.” Naa polu ma, e gaa a gɛɛ lɔɔ fe kɛ ni geleŋ sia-nuui ma. Mɛni ma, Denise e Ziova fɛli lii-see mɛni ma.
2 Di mo a gɛɛ geleŋ sia-nuui e nuu paa nyaŋ mɛnii a lɛɛ ma, kotii a pai dɛɛi kpini-pɛrɛ mu. Kɛlɛ kotii e mo a gɛɛ Denise ŋɔsere-faa kɛ wooi a pai nɛi a kɛ da pai naloŋ pilii kpini-pɛrɛ mu. Denise e mo nyɛɛi: “A gɛɛ ŋa mɛni ŋanaai ŋa tɛɛ zui ɓo polu, e kɛ nɔ yɛɛ nuu ta a kɛ ŋapalai ŋa kulai gɛ kpolo liyeŋ tamaa pu zu.” Lɔɔkuu taŋa tɛɛ polu ma, Denise e kɛ kotii su a gɛɛ e ŋoo sukula nuui ŋɛi nyii pa a mɛni-soli ŋanaai ŋi ŋɔkaayɔɔi pɔi. Le ɓe e moi? Denise e mo mɛni-saa ɓo-nuui ma a gɛɛ e naloŋ su mɛni lɛɛ. b Gɛɛ a kpɛɛ lonoi, mɛni-saa ɓo-nuui e pɛlɛ wɔlɔi, e mo nyɛɛi: “Goraŋ puu feerɛ kao lɔɔluui (25) ŋaa gɛ ɓɛi, mve ta wɔlɔ mɛni sii kɛɛ ŋi ta kaa ni kotii ŋi su. Mve ta wɔlɔ nuui di mɛni nyɔmɔɔi kɛ lai ŋɔkaayɔɔi kaa ni gɛ kpera fe kɛ mɛni nyɔmɔɔ kɛ-nuui mɛni ma. Mve ta wɔlɔ wɛli-kɛ-maa da su-mɛni-lɛɛ kɛɛ ŋi kaa ni a bɔlɔ.”
3. Le ɓe Denise lii kula a gɛɛ e naloŋ su mɛni lɛɛ?
3 Le ɓe Denise lii kula a gɛɛ e naloŋ su mɛni lɛɛ? E gili-ŋa sia e pilaŋ Ziova ŋɔsu-mɛni-lɛɛi ma. (Ma. 7:18) Kwa yee-see-mu lɛ berei Ziova aa ku su mɛni lɛɛ lai mɛni ma, a pai kulii kulai a gɛɛ ku nua su mɛni lɛɛ.
4. Le ɓe Ziova a ŋwɛlii ku gɛ? (Ifisiɛŋ 4:32)
4 Ziova a ŋwɛlii a gɛɛ ku nua su mɛni lɛɛ a kulii kelee yɛɛ berei nɔ aa ku su mɛni lɛɛ lai. (Ifisiɛŋ 4:32 lono.) A ŋɔnɔ ŋwɛlii a gɛɛ kukɛ a ku kpɛtɛɛ a tãi kelee a gɛɛ ku diai da kulii too polui su mɛni lɛɛ. (Ŋu. 86:5; Luu 17:4) Zɛŋ-lɛɛi ŋi su, kwa pai mɛni saaɓa kaai nyii a pɔri kpɔnii kua a gɛɛ ku nua su mɛni lɛɛ.
IFE IŊƐI NAƔIŊ ILII-TOO-POLUI MƐI
5. Yɛɛ berei gaa la Tare-woo-ŋa 12:18 sui, kulii a kɛ leŋ nuu ta a mɛni nyɔmɔɔ kɛ a kua?
5 Kulaoi lɛlɛɛ kpaa kukaayɔɔi su nuu ta a tua a kua a nyɔmɔɔ, nyiŋi a pɔri kulii tooi polu a ŋanaa. (Ŋu. 55:12-14) Tãi taŋa, mɛni-solii ŋi a kɛ nɔ yɛɛ da ku ɓɔ a ɓoa-sɔkpɔ. (Tare-woo-ŋa 12:18 lono.) Kwa pɔri kɔi a gɛɛ ku kuŋɛi naɣiŋ nii-too-polui mɛi. Kɛlɛ nyiŋi kɛɛ a pɔri kɛi nɔ yɛɛ nuu ta a ku sɔɔ a ɓoa, gɛ ni ku moai lɛɛ naa. Bere sii tɔnɔi ti su, kulii-too-polui ŋaa fe pai yenii a kɛ kwa kuŋɛi naɣiŋ mɛi.
6. Kwa tua leŋ nuu ta a mɛni nyɔmɔɔ kɛ a kua?
6 Nuu ta a tua a kua a nyɔmɔɔ, mɛnii maa-ŋuŋ kwa gɛi ɓa ku kulii ŋwana. Ŋala-kɔlɔi e kpiŋ mo a gɛɛ kulii a pɔri ŋwanai. Kɛlɛ e ŋɔnɔ ku lia-woo ɓo a gɛɛ kufe lɛɛ a kulii ŋwanaa a tãi su koyaa. (Ŋu. 4:4; If. 4:26) Le mɛni ma? Kpɛni fei lii-ŋwana a pɔri gɛi ku tua a pere sii nyɔmɔɔ. Nyaŋ lii-ŋwana fa wɔlɔ pa a mɛni lɛlɛɛ kelee ta. (Zĩ. 1:20) E lɛɛ kukili-ŋa a gɛɛ wala-wala-laa fe kuyeei a pa berei ma kwa pai kulii ŋwanai la nua da tua a kua a nyɔmɔɔ. Kɛlɛ wala-walalaa kaa kuyeei a kɛ kulii a pai lɛɛi a ŋwanaa a tãi su koyaa.
Wala-wala-laa fe kuyeei a pa berei ma kwa pai kulii ŋwanai la nua da tua a kua a nyɔmɔɔ. Kɛlɛ wala-walalaa kaa kuyeei a kɛ kulii a pai lɛɛi a ŋwanaa a tãi su koyaa
7. Tãi ta kulii a ŋɔnɔ kɛ leŋ nuu ta a mɛni nyɔmɔɔ kɛ a kua?
7 Nua da tua a kua a nyɔmɔɔ, a pɔri pai a lii-too-polu mɛni takpɛni-ŋa kupɔ. Gɔɔŋ-maa ɓa, sisɛ tɔnɔ nyii naa ɓa Ann e mo nyɛɛi: “Ŋgɛɛ a loloŋ, naŋ e nee lɛɛ e too tua-laa su a nɛnii nyii kɛ mɛi kaai. E kɛ nɔ yɛɛ ŋgbɔŋ maa-nuu fe ŋɔnɔ ma. Tãi di nĩa-pɛlɛɛ maa sɔlɔ ɓo lai, e kɛ nɔ ŋgili-ŋa yɛɛ nĩa-pɛlɛɛi daa mbɔɔ-ŋa siɣe. Ŋa ɓɔrɔ a gili-ŋa-siai a gɛɛ nuu ta fe kpaaŋ ni mɛni ma.” Sisɛi nyii naa ɓa Georgette e lono e pilaŋ berei ma nii e too la polu tãi bɔŋ e wulu-wulu kpɛ lai. E mo nyɛɛi: “Kukɛ a laoi-laa su-ɓela lɛlɛɛ e siɣe kuloloŋ tãi ma. Ku kpiŋ panĩa tii kɛ gie ma. Nii e too polu a ŋanaa.” Naomi nya maŋ e mo nyɛɛi: “Ve wɔlɔ kɛ ni ŋgili-ŋa a gɛɛ mbɔŋ e kɛ pai nii tooi polu. Mɛni ma tãi e mo la ma a gɛɛ e kɛ nuu-kaŋ fotoo kaai loo pere sui, e kɛ nɔ ŋgili-ŋa yɛɛ aa tua mbɛlɛi a tãi su koyaa.”
8. (a) Le mɛni-ŋa ɓe maa nɛ̃ɛi ku nua su mɛni lɛɛ lai? (b) Le mɛni lɛlɛɛ-ŋa ɓe kwa zɔlɔ ɓo kwa nua su mɛni lɛɛ? (Ya pɔri basii “ Le Ɓe Kwa Pɔri Gɛi Nuu Ta A Kulii Too Polu A Ŋanaa?” kaai.)
8 Wala-wala-laa fe kuyeei a pa berei ma nua da tua la a kuai, kɛlɛ wala-wala-laa kaa kuyeei a pa berei ma kwa tua la a diai. Nyaŋ tãi tamaa mɛni lɛlɛɛi maa nɛ̃ɛi ku gɛi ɓa ku di su mɛni lɛɛ. Le mɛni ma? Kpɛni fei ku Ziova wɛli-ni, nyaŋ a ŋwɛlii a gɛɛ ku nua su mɛni lɛɛ. Kɛɛ kwa wala nua su mɛni lɛɛ, a gɛ ku tua a pere sii nyii ve lɛlɛ ni, nyii a pɔri kpiŋ pai a mɛni ŋanaa kupɔ. (Tá. 14:17, 29, 30) Kwaa sisɛ Christine ŋɔmɛni-kɔɔŋ-maai kaa. E mo nyɛɛi: “Nii a kɛ a ŋwanaa, mva ɣɛlɛ a damaa kpaa ŋa mɛni-kpɛtɛɛ lɛlɛɛ kɛ a pa mii-sɛŋ ma ŋa mii. Lii-ŋwana a gɛ mva kpiŋ nyii a nɛlɛɛ, nyaŋ a kɛ a gbanaŋɔɔ a gɛɛ ŋa tua a nɛlɛɛ. Nyiŋi a gɛ ŋgɛ tua a mbɔŋ da nua takpɛni-ŋa a nyɔmɔɔ.”
9. Le mɛni ɓe maa fe nɛ̃ɛ ni la a gɛɛ ku nua sɔŋ too kukoi?
9 A kɛ kpiŋ nuui kulii too polui a wala ku kpera fe, kwa pɔri nĩai mɛnii ma e gɛi. A pere sii kɛɛ leŋ? Georgette nyii ku lono e pilaŋ mai e mo nyɛɛi: “Berei maŋ e tãi su koyaa siɣe lai, kɛlɛ nii fe ŋɔnɔ kɛ ni a ŋwanaa ŋasurɔŋ pɔlɔi ma. Nyiŋi e pa a lii-see kpɔɔi mbɔ.” Kwa nua su mɛni lɛɛ, kufe pai nɛɛi naa nii-ŋwanai e gɛ ku tua a nua takpɛni-ŋa a nyɔmɔɔ. Nyiŋi a kɛ a nɛlɛɛ kumɛni ma kpɛni fei, kwa kpera ku kili-ŋa siai mɛnii ti ma, ku ŋɔnɔ pɛlɛ kukɛ-ɣeniɛi ŋaa-nɛ̃ɛ kulai. (Tá. 11:17) Kɛlɛ le ɓe maa nɛ̃ɛi I gɛ ya gaa a gɛɛ ife nii gbɛtɛ ni ikili-ŋa a gɛɛ I nuui su mɛni lɛɛ?
BEREI KWA PƆRI KULII-ŊWANAI YEE MƐI ƔALEI LAI
10. Le mɛni ɓe maa nɛ̃ɛi ku tãi tɛɛ la kukpiŋ pɔ a gɛɛ kulii ŋaa e yeŋ? (Ya pɔri ŋɔnɔ votoo-ŋai kaai.)
10 Ya pɔri lii-ŋwana yee mɛi ɣalei leŋ? Mɛnii ya pɔri gɛi tɔnɔ ɓa I tãi tɛɛ ikpiŋ pɔ a gɛɛ ilii-too-polui ŋaa e yeŋ. Gɔɔŋ-maa ɓa, nuu nyii pala kɛtɛ kaa mai a kpɛɛ sale siɣei, a tãi siɣe a gɛɛ balai e kpɛɛ. Bere sii tɔnɔi ti su, a tãi siɣe a gɛɛ kulii-too-polui ŋaa e yeŋ ku lɛɛ pai nuui ti su mɛni lɛɛi a kulii kelee.—Ik. 3:3; 1 Pi. 1:22.
Yɛɛ berei nɔ a tai siɣe la a gɛɛ kɔlɔ-fela-nuu e ɓaloi, bere nɔ ɓe a tãi siɣe la a gɛɛ kulii ŋaa e yeŋ lii-too-polu ŋanaa su (Ŋoo-ɣɛli-kpului 10 kaa)
11. Ɣala-fɛliɛ a kpɔŋ leŋ ya a gɛɛ I nua su mɛni lɛɛ?
11 Ziova fɛli kpɔŋ maa mɛni ma a gɛɛ I nua su mɛni lɛɛ. c Ann nyii ku lono e pilaŋ mai e berei lɛ Ɣala e kpɔŋ la mai. E mo nyɛɛi: “Ŋa Ziova fɛli a gɛɛ e kukaayɔɔi su-ɓela kelee su mɛni lɛɛ mɛni nyɔmɔɔ-ŋai ku gɛi mɛni ma. Gɛ ni ŋa worɛ-woo kɔlɔ tɛɛ naŋ da ŋɔnɛni ninai pɔ ŋa mo dia a gɛɛ ŋaa di su mɛni lɛɛ.” Ann e mo a gɛɛ nyiti kɛi fe kɛ ni a mɛni loŋ. Kɛlɛ e mo nyɛɛi: “Ŋa gaa a gɛɛ ŋa kɔ a gɛɛ ŋa Ziova ŋɔsu-mɛni-lɛɛi pɔɔkɔɔŋ, tãi ta nyiŋi a pai naŋ da bɔŋ lii kulai a gɛɛ di mɛni maa-kɔri e pilaŋ Ziova ma.”
12. Le mɛni ɓe maa nɛ̃ɛi ku laa la a Ziova e tɛɛ la kukpiŋ kili-ŋa-siai ma? (Tare-woo-ŋa 3:5, 6)
12 Laa a Ziova, kɛɛ ikpɔɔi kili-ŋa-siai fei. (Tare-woo-ŋa 3:5, 6 lono.) Ziova e mɛnii kɔlɔŋ nɛlɛɛi kumɛni mai. (Az. 55:8, 9) Nyaŋ ve pai wɔlɔ ku mare kɛi a gɛɛ ku mɛni ta kɛ nyii pai mɛni ŋanaa kɛi a kuai. Nyiŋi a ku fɔrɔ a gɛɛ ku nua su mɛni lɛɛ. Kwa pɔri laai la a gɛɛ nyiŋi kɛɛ a pa pai a mɛni lɛlɛɛ kupɔ. (Ŋu. 40:4; Az. 48:17, 18) Kɛlɛ kwa laa a kukpiŋ kili-ŋa-siai, kufe pai wɔlɔ pɔrii nua su mɛni lɛɛi. (Tá. 14:12; Zl. 17:9 NWT) Naomi nyii ku lono e pilaŋ mai e mo nyɛɛi: “Ŋa kɛ a naa la a gɛɛ ve kɛ ni ma a kpa a gɛɛ ŋa mbɔŋ su mɛni lɛɛ nuu-kaŋ fotoo kaa mɛni ma. Ŋa kɛ yaoi a gɛɛ e kɛ ŋɔnɔ pai nii tooi polu kpaa e nĩa mɛni-solii ma e gɛ ŋa tɛɛ zui. Nyaŋ ŋa kɛ a gɔlɔŋɔɔ a gɛɛ Ziova e ŋakili-ŋa-siai kɔlɔŋ. Kɛlɛ ŋa pɛlɛ gaai a gɛɛ berei maŋ Ziova e ŋakili-ŋa-siai kɔlɔŋ lai, nyiŋi fe nɛi a gɛɛ nyee seeɛi mu. E berei kɔlɔŋ nii kaa lai, nyaŋ e gɔlɔŋ a gɛɛ a tãi siɣe nuu lii ŋaa e lɛɛ pai yenii. Kɛlɛ a ŋɔnɔ ŋwɛlii a gɛɛ ŋa nua su mɛni lɛɛ.” d
BEREI KWA PƆRI KILI-ŊA-SIA LƐLƐƐ SƆLƆ ƁOI LAI
13. Yɛɛ berei gaa la Lomaŋ 12:18-21 sui, le ɓe maa nɛ̃ɛi ku gɛi?
13 Kwa nuu ta su mɛni lɛɛ, kufe ŋwɛlii nɔ ku kpera lonoi e pilaŋ mɛnii ma e gɛi. Kɛɛ a kɛ nuui kulii too polui kaa a kuɓaraŋ Korai-nuu, kwa ŋwɛlii ku kɔ a gɛɛ ku kuloai kpɛtɛ. (Mf. 5:23, 24) Kwa ŋɔnɔ ŋwɛlii ku ŋɛi-maloŋ-kaa lɛ dia, ku di su mɛni lɛɛ. (Lomaŋ 12:18-21 lono; 1 Pi. 3:9) Le ɓe a kpɔŋ kua a gɛɛ ku nyiŋi kɛ?
14. Le ɓe maa nɛ̃ɛi ku kɔ a gɛɛ ku gɛi, nyaŋ le mɛni ma?
14 Ziova ŋɛi a kɛ nɔ nua ditua-pere lɛlɛɛ-ŋai dia. Mɛni ma, maa nɛ̃ɛi ku kɔ a gɛɛ ku Ziova pɔɔkɔɔŋ a kuŋɛi kɛɛ nɔ nuui kulii too polui ŋɔtua-pere lɛlɛɛ-ŋai dia. (2 Kɔ. 16:9 Ŋu. 130:3) Kuŋɛi a kɛ nɔ nua dipɔara-mɛni-maa-ŋai dia, nya nɔ ɓe kwa pai gaai. Kɛɛ kuŋɛi a kɛ nua ditua-pere lɛlɛɛ-ŋai dia, ve pai kɛi a gbanaŋɔɔ a gɛɛ ku di su mɛni lɛɛ. Gɔɔŋ-maa ɓa, bɔlɔ ta nyii naa ɓa Jarrod e mo nyɛɛi: “Va kɛ a gbanaŋɔɔ a gɛɛ ŋa bɔlɔ ta su mɛni lɛɛ a kɛ ŋa ŋgili-ŋa sia e pilaŋ mɛni lɛlɛɛ tamaai ma ŋwɛli kaa ma e pilaŋ mai e tɛɛ la ŋɔpɔara-mɛni-maai ma.”
15. Le mɛni ɓe nɛlɛɛi la a gɛɛ I mo nuu ta ma a gɛɛ yaa zu mɛni lɛɛ?
15 Mɛni lɛlɛɛi ya pɔri ŋɔnɔ gɛi tɔnɔ ɓa, moɔɔ nuui ma a gɛɛ yaa zu mɛni lɛɛ. Le mɛni ma? Kwaa mɛnii kaa Naomi nyii ku lono e pilaŋ mai e moi. “Mbɔŋ e mare kɛ nyɛɛ mai: ‘Yaa zu mɛni lɛɛ?’ Tãi ŋa kɛ ŋwɛlii ŋa mo la ma a gɛɛ ŋaa I zu mɛni lɛɛi, ŋoo fe kpiŋ pɔri ni kulai na a nɛlɛɛ. Ŋa gaa a gɛɛ mve nii zu mɛni lɛɛ ni a nii kelee. Tãi taŋa tɛɛi, ŋa pɔri moi ma nyɛɛi: ‘Ŋaa I su mɛni lɛɛ.’ Tãi ŋa zu mɛni lɛɛ lai, mbɔŋ ŋɛi ya e tɛ ŋɛi. E kɛ a gulaa a nyãa berei e pa la a lii-see kupɔi. Naa polu ma, ŋa pɛlɛ laai a nyaa, nyaŋ laoi-laa lɛlɛɛ e ŋɔnɔ kɛ kuloai.”
16. Le ɓe yaa maa-kɔri e pilaŋ su-mɛni-lɛɛ ma?
16 Ziova a ŋwɛlii kukɛ a su-mɛni-lɛlɛɛ ɓela. (Ko. 3:13) Tãi taŋa, a kɛ a gbanaŋɔɔ a gɛɛ ku kukie-ni su mɛni lɛɛ. Kɛlɛ kwa pɔri gɛi ti a kɛ kwa wala kuŋɛi naɣiŋ kulii-too-polui mɛi, ku kɔ a gɛɛ ku kulii ŋaa yeŋ. Nyiŋi kɛɛ a pa pai a kili-ŋa-sia lɛlɛɛ kupɔ.—Basii ŋi kaa: “ Mɛni-ŋuŋ Saaɓai Ya Pɔri Gɛi A Gɛɛ I Nua Su Mɛni Lɛɛi.”
IŊƐI E KƐ MƐNI LƐLƐƐ-ŊAI DIA SU-MƐNI-LƐƐ A PA LAI
17. Mɛni lɛlɛɛ-ŋa kɛɛ leŋ ɓe kwa zɔlɔ ɓo kwa nua su mɛni lɛɛ?
17 Mɛni-ŋuŋ tamaa kaa naa nyii kwa nua su mɛni lɛɛ mɛni mai. Kwaa lono nɔ e pilaŋ daŋa dia. Maa-ŋuŋ, kwa kuŋɛi-maloŋ-kaa Naŋ Ziova pɔɔkɔɔŋ, ku nii laa. (Luu 6:36) Veerɛi, kwa kuyee-see-mui lɛ Ziova ŋɔsu-mɛni-lɛɛi mɛni ma. (Mf. 6:12) Zaaɓai, ku kɔlɔi a kɛ a bonoɔ, laoi-laa su-ɓela lɛlɛɛ tamaa kɛ ɓo kuyeei.
18-19. Le ɓe a kɛ kwa nua su mɛni lɛɛ?
18 Kwa nua su mɛni lɛɛ, kwa luwa tamaa sɔlɔ ɓo nyii kukili fe kɛ ni mai. Gɔɔŋ-maa ɓa, mɛnii kaa nyii kɛ a Denise nyii ku lono e pilaŋ mai. Berei maŋ ve kɛ ni la a gɔlɔŋɔɔ a tãi tii, naloŋ nyii bɔŋ paai e gbɛtɛ gili-ŋa a gɛɛ e gbiŋ paa mɛni saai ŋa-teeɛ polu ma. Berei Denise e zu mɛni lɛɛ lai, e nii kula a gɛɛ e pɛlɛ Ŋala-kɔlɔi maa-kɔrii a Ziova Ŋɔsere-faa Kɛ-ɓelai.
19 Kwa pɔri kɛi gaai yɛɛ nua su mɛni lɛɛ kaa a mɛni kpanaŋɔɔi nyii kwa pai wɔlɔ gɛi. Kɛlɛ gaa a mɛni-ŋuŋ-ŋai dɔnɔ nyii a pa a mɛni lɛlɛɛ tamaa kupɔi. (Mf. 5:7) Mɛni ma, ku kelee kwa ŋwɛlii ku kɔ a gɛɛ ku Ziova ŋɔsu-mɛni-lɛɛi pɔɔkɔɔŋ.
ŊULEI 125 “Happy Are the Merciful!”
a Di naa-ŋai taŋa maa faleŋ.
b Mɛni-ŋai ŋi su, maa nɛ̃ɛi Korai-ɓela kelee di dikpɔɔi mɛni-kpɛtɛɛ kɛ a pa mɛnii ma da pai gɛi.
c Ŋule-woo vilo-ŋai ŋi su kaa jw.org fãai ŋa: “Forgive One Another,” “Forgive Freely,” da “Friends Again.”
d Berei maŋ nuu-kaŋ fotoo kaa fe lɛlɛ ni tua-laa sui, kɛɛ Ŋala-kɔlɔi fe mo ni a gɛɛ tua-laa su-ɓela da pɔri taai nyiŋi mɛni ma.
