Nee da Naŋ dikɛ a Catholic-ɓela. Kɛlɛ tãi di Ɣala laa Ziova kɔlɔŋ la Ŋala-kɔlɔi sui, di feerɛŋɔɔ dikɛ a Ziova Ŋɔsere-faa Kɛ-ɓelai ta. Naŋ e kpera Zisɛ maa fotoo-ŋa kpɛtɛi, e tii kɛ a ŋɔwuru-saa tarei a gɛɛ e kupɛrɛi gwaa ta ma kpɛtɛ a Galoŋ-laa Pɛrɛi maa-ŋuŋ San Juan del Monte, nyii gaa Manila Philippines lɔii sui.

Maa-sɔlɔ-ɓoɔɔ polu ma goraŋ 1952 su, ŋgaa-ɓela di pɛlɛ Ziova maa mɛni lɛi ma yɛɛ berei nɔ dikɛ nɛi la nia-ni diai. Ŋgɛɛ ɓɔlɔi naŋ e mvɔrɔ a gɛɛ ŋa Ŋala-kɔlɔi ŋuŋ tɔnɔ lono a ɣele kelee, nyaŋ a kaa Ŋala-kɔlɔi ŋaa lɛ ma kɔlɔ takpɛni-ŋa su. Tãi taŋa ŋgaa-ɓela da kaa faa ma a gɛɛ di sakiu mɛi-ɓelai da bɔlɔ-ŋa nyii-ŋai kula ekwatai lai, laai kula kupɛrɛi la. Bɔlɔ-ŋai ŋi dimɛni-kɔɔŋ-maa-ŋai e kulii nɛ̃ɛ, e ku fɔrɔ, e ŋɔnɔ kulii kula a gɛɛ ku ŋala-woo-ɓoo tii maa mɛni pu fulɔi kukɛ-ɣeniɛi su.

Ŋa mɛni lɛlɛɛ tamaa maa-kɔri ŋgaa-ɓela dilaa-lai su. Tãi Nee e saa la kɔlɔ-fela yeei, kwa naŋ ku pɛlɛ panĩa tii kɛi gie ma goraŋ 1971 su. Kɛɛ goraŋ 1973 su, naŋ e saa ŋgɛɛ a koraŋ 20. Nee da naŋ kɛɛ daa saai, nii e too kpɔ polu a ŋanaa. Kɛɛ ‘gili-kɛ-zu kpanaŋɔɔi’ Ŋala-kɔlɔi sui e kpɔŋ ma a gɛɛ nii fe too polu a ŋanaa, ŋa lɛɛ a ŋdɔɔi kpanaŋɔɔ Ziova polu. (Ib. 6:19) Tãi kpua yee mu, naŋ saa polu ma, di ŋgɛ a pesiɔ panĩa, di ndɛɛ Coron nyii kɛ Palawan kpiniŋ sui.

Ŋa kɛ a koraŋ buu feerɛ kao tɔnɔ (21) tãi ŋa li la Coron taai su. Ee ŋa ɓɔlɔ taa-lee kɛtɛ sui, e kɛ a gulaa a nyãa a gɛɛ daa-loŋ ŋa li zui, lɛi, kpele ya da keleŋ mɛni e kɛ a gbanaŋɔɔ naa. Berei maŋ bɔlɔ tɛi-tɛi dikɛ la naai, kɛlɛ nuu ta fe kɛ ni naa a gɛɛ kwa nyaa ku panĩa tii kɛ gie ma. Mɛni ma tãi taŋa nyãa tɔnɔ nɔ ɓe ŋa kaa li ŋala-woo ɓo tii su. Ŋa kaayɔɔi da naoi-ni wɛli kpɔɔi e nzoŋ ŋaloŋ maa-ŋuŋ su. Ŋa kaa kɛ nɔ ŋele-kɔlɔŋ su kaai a kpini tãi ŋgɛ wɔlɔ. Ŋa kɛ nɔ ŋwɛlii ŋa panĩa tii lɛɛ, ŋa li polu mbɔ taai.

 Ŋgɛɛ tɛɛi mɛni-ŋai ti sui, ŋa kaa nii su mɛni kelee ɓo Ziova ma. Vɔrɔ-woo-ŋai ŋa kaa nono Ŋala-kɔlɔi da kukɔlɔ-ŋai sui e pɛlɛ pai polu ŋgili-ŋa. Ŋule-wooi 19:14 a kaa pa ŋgili-ŋa a tãi tamaa. Ŋaa gaa a gɛɛ Ziova a pai kɛi a ‘Ŋakili-tɔɔ-maa Kɔnii da Maa-kɔ̃ɔ-nuu’ a kɛ ŋa ŋgilli-ŋa sia e pilaŋ mɛni-ŋai dia nyii a nii lai, yɛɛ gbɛtɛ-sãa da ŋɔtua-pere lɛlɛɛ-ŋai. Zɛŋ-lɛɛi Nyeŋkeŋ sui, nyii zɛlɛŋ-kpau ɓa “You Are Never Alone” a e kpɔŋ maa kpɔɔi tɛɛ mbɔ. Mɛni ma ŋa nono a tãi tamaa. Tãi ŋa kaa kɛ la ndɔnɔ kwaa mai e kɛ nɔ yɛɛ Ziova a kɛ ŋgɔlɛ, nyaŋ ŋa kaa tii kɛ a tãi ŋi a gɛɛ ŋa Ŋala-kɔlɔi lono, ŋa ŋgili-ŋa sia e pilaŋ ma.

Niɛɛ Coron, di ŋgɛ a korai-toli-kpɔŋ laa-tuɛ-nuu. Ee nyãa nɔ ɓe kɛ a korai-toli-kpɔŋ laa-tuɛ-nuu tɔnɔi, ŋa kaa Gɔlɔ-pɛrɛi Ŋala-woo-ɓo Tii Mɛni Mai, Goyaŋ Ŋala-woo-ɓo Tii Mɛni Mai, Korai-toli-kpɔŋ Ɣala-kɔlɔ Maa-kɔriɛ, da Nyeŋkeŋ teniŋ tɔɔ. Ŋa kaa ŋɔnɔ kpɔŋ lono tɛɛ a lɔɔ-kuu kelee. Kɛɛ mɛni lɛlɛɛi mai ɓa—mɛni-ŋai ŋi kelee e kpɔŋ ma a gɛɛ ŋa ŋgili kula ŋalii-too-polu mɛni-ŋai dia!

Ŋa ŋaɣala-woo-ɓo tii ŋaa nɛ̃ɛ kpɔɔi kula Coron. Nyaŋ Ŋaɣala-kɔlɔ maa-kɔri-ɓelai taŋa di batai kɛ. Kɛlɛ mɛni-kpanaŋ takpɛni-ŋa dikɛ ŋɔnɔ naa. Tãi taŋa ŋa kaa sia a zu koyaa ŋa lɛɛ pai serii ŋala-woo-ɓo kpiniŋ su, nyaŋ mva kaa kɛ kpiŋ a ɓɛi kɔlɔŋɔɔ ŋa pai nyii naa ŋa seri. Berei maŋ mve kɛ ni a ya-ŋa kɛ-pere kɔlɔŋɔɔ lai, tãi tamaa ya-ŋa keleŋ ɓe a kaa li a nyãa gwaa-ŋai ŋi ma! Ŋa gaa a gɛɛ Ziova a kaa maa kɔ̃ɔ mɛni-kpanaŋ-ŋai ŋi su. Nyaŋ e kɛ ŋgbɛtɛɛi mɛni-kpanaŋ takpɛni-ŋa mɛni ma tinaa-tuɛ-pere.

Goraŋ 1978 su, di ndɛɛ Papua New Guinea nyii gaa Australia lɔii kpiniŋ sui. Nɔii-ŋuŋ ŋi kɛtɛ pere kaa nɔ yɛɛ Spain, nyaŋ yee kpaya-kpaya tamaa kaa zu. E kɛ a gulaa a nyãa gɛɛ ŋaa gaa a gɛɛ nuu ŋɔmiliyɔŋ saaɓai kɛ nɔii-ŋuŋ ti sui da sii-woo 800 da bolu ɓo. Mɛni lɛlɛɛi mai ɓa di tamaa ɣele da Melanesian Pidgin, kpaa Tok Pisin sii-wooi ɓo.

Di ndɛɛ Port Moresby Kwii-woo ɓo korai-toli-kpɔŋ ta su tãi kpua mɛni ma. Naa fe tua ni ŋgɛ li Tok Pisin korai-toli-kpɔŋ su ɓɛi ŋa pɛlɛ zii-wooi maa-kɔrii naai. Ŋa kaa tii kɛ a mɛnii ŋa kɛ maa-kɔrii zii-woo kɔlɔ-pɛrɛi mu ŋala-woo-ɓo tii su. Nyiŋi e kpɔŋ ma a gɛɛ ŋa zii-wooi kɔlɔŋ a maa felaa. Tãi kpua yee mu, ŋa pɔri kpɔŋ lono tɛɛi Tok Pisin sii-wooi su. Ɣaloŋ kpulu tɛɛ polu ma, e kɛ a gulaa a nyãa a gɛɛ di ŋgɛ a sakiu mɛi-nuui Tok Pisin sakiui su.

Ee korai-toli-kpɔŋ-ŋai kɛi e kɛ a goyaa gie mai, ŋa mɛni-kpɛtɛɛ kɛ a gɛɛ ku sakiu kpɔŋ tamaa too nyaŋ nyiŋi a kaa gɛ ŋgɛ sia tamaa kɛ. Gɔɔ pilani, ve kɛ ni a mɛni loŋ kpɛni fei ŋa kɛ lɔii-ŋuŋ nina su nyii naa-ɓela disii-wooi da dimɛni kɛ-pere e kɛ a dakpɛni ŋɔi ma. Ee yee kpaya-kpaya tamaa e kɛ naai, ŋa kaa kooŋ keleŋ siɣe a lɔɔ-kuu kelee a gɛɛ ŋa li korai-toli-kpɔŋ-ŋai naa-kaai. Nyãa tɔnɔ nɔ ɓe ŋa kaa kɛ gooŋ keleŋ saai taŋa su. Nyaŋ nyiŋi a kaa nyao e tɛɛ la niɛɛ ma ya-ŋa keleŋ su!

Toli-ɓo-kɔli fe kɛ ni nua tamaa yeei a tãi ti, mɛni ma ŋa kaa worɛ-woo kɔlɔ-ŋa tɛɛ korai-toli-kpɔŋ-ŋai diɛ. Tãi tamaa ŋa kaa seri gwaa-ŋai ŋi ma, ŋa pɛlɛ bɔlɔ-ŋai naa mare kɛi kpɛni fei  ŋaworɛ-woo kɔlɔi fa kaa seri dia a sumoɔɔ. Tãi kelee ŋa kaa bɔlɔ-ŋai kaa lai, dilii a kaa kɛ a nɛ̃ɛ a gɛɛ di ŋgaa. Da kaa diyee see mu a nɛlɛɛ nyii a kaa gɛ ŋa gɔlɔŋ a gɛɛ ŋatii fe kpɛni-kpɛni. Ŋaa Ziova ŋɔkpɔŋ maai kaa a pere sii takpɛni-ŋa, nyaŋ nyiŋi e kwa nyaa kulaoi-laai su kpanaŋ.

Niɛɛ ŋakoyaŋ maa-ŋuŋ su Bougainville taai sui, naloŋ tɔnɔ da bɔŋ di pa mbɔ dikɛ ɣɛlɛ, di mare kɛ diyɛɛi: “I ku kɔlɔŋ?” Gɛɛ ŋaa ŋgili-ŋa siai, ŋa gaa a gɛɛ niɛɛ Port Moresby a ninai ŋa ɣala-woo ɓo dua-laa su-ɓelai ŋi dia. Tãi ti ma ŋa pɛlɛ Ŋala-kɔlɔi ŋaa lɛi dia. Naa polu ma ŋa di tɛɛ bɔlɔ ta pɔ a gɛɛ gɛ Diɣala-kɔlɔ maa-kɔriɛ kɛ. Dikɛ naa a di batai kɛɛ. Nyaŋ nyiŋi e kɛ a nuwa tamaai tɔnɔ nyii ŋa zɔlɔ ɓo a goraŋ saaɓai ŋa gɛ Papua New Guinea.

Ŋa sisɛ lɛlɛɛ tɔnɔ kaa nyii da kɛ ma Adel, ŋa lɛɛ pai kulai Coron 1978 su. E kɛ a lɔigula panĩa, nĩa-pɛlɛɛ feerɛ kɛ ɓo nyeei, Samuel da Shirley. E kɛ ŋɔnɔ nee nɛ̃i-pɔlɔi mɛi kaai a tãi tɔnɔi ti. Ŋa li polu Philippines lɔii su Gali-kalai 1981 su a gɛɛ kwa Adel ku too tua-laa su. Gɛɛ kwaa too tua-laa sui, ku pɛlɛ lɔigula panĩa tii kɛi gie ma, kwa nyaa kukɛ ŋɔnɔ kukaayɔɔi mɛi kaa.

Berei maŋ nĩa-pɛlɛɛ dikɛ la kuyeei, di ŋɔnɔ ŋgɛ a pɛsiɔ panĩa goraŋ 1983 su, nyaŋ di ndɛɛ Linapacan Palawan kpiniŋ su. Kukaayɔɔi su-ɓela kelee di li gwaai ŋi ma, nyaŋ Ziova Ŋɔsere-faa Kɛ-ɓelai ta fe kɛ ni naa. Koraŋ tɔnɔ tɛɛ polu ma, Adel nee e saa. Kɛlɛ ku kanaŋ ŋala-woo-ɓo tii kɛi, nyaŋ nyiŋi e kpɔŋ maa tɛɛ kupɔ mɛni-kpanaŋ ŋi su. Ku pɛlɛ Ŋala-kɔlɔi ŋaa lɛi nua tamaa dia nyii-ŋai kɛ ŋwɛlii di pɛlɛ pai goyaŋ-ŋai su. Mɛni ma ku kukpɔɔi Kaloŋ-laa Pɛrɛ tɔɔ. Gɛɛ kwaa koraŋ saaɓa kɛ naai, kulii e kɛ a nɛ̃ɛ gɛɛ kwaa gaa a gɛɛ nuu 110 di pɔri pai Zisɛ Ŋɔsaa Kili-too-ŋa Kpɔŋ ma. Ku siɣeɛ naai, di tamaa ɣele di batai kɛ.

Goraŋ 1986 su, di ndɛɛ Culion ɓɛi gboto kɔlɔ-fela-ɓela tamaa dikɛ naai. Naa polu ma di Adel kɛ a pɛsiɔ panĩa. Gɔɔ pilani, kwa kaa kɛ yaoi ɣala-woo ɓoi gboto-ɓelai dia, kɛlɛ bɔlɔ da sisɛ-ŋai di mo kua a gɛɛ gɔlɔ-felai ŋi fa pɔri nɔ taa-taai kpɛni fei daa sale tɛɛ gɔlɔ-fela-ɓelai pɔ. Di taŋa da kaa kpiŋ pa goyaŋ su nyii kwa kaa doo sisɛ ta ŋɔpɛrɛi la. Ku naa pɛlɛ lonoi dipɔ e pilaŋ gili-kɛ-zui Ŋala-kɔlɔi sui ma, berei maŋ e kɛ la dikili-ŋa a gɛɛ Ɣala kpaa nuu-kpune fe kpaaŋ ni dimɛni mai. Dilii e kɛ a nɛ̃ɛ tãi di gɔlɔŋ la a gɛɛ Ɣala a pai kɔlɔ-fela mɛni kelee kpɛɛi tinaa-tuɛ-pere, nyaŋ nyiŋi e pa a lii-nɛ̃ɛ kua maŋ kupɔ.—Luu 5:​12, 13.

Kɛ-ɣeniɛ e kɛ leŋ kunĩa-pɛlɛɛi mɛni ma Culion taai su? Ku sisɛ feerɛ toli Coron nyii-ŋai kɛ a nuu-tɔɔ-ŋa a gɛɛ di pa kupɔ a gɛɛ kunĩa-pɛlɛɛi di pɔri laoi-laa lɛlɛɛ kɛi. Samuel, da Shirley, e pɛlɛ la sisɛ feerɛi ŋi dia di ŋala-woo ɓo tii ŋaa-nɛ̃ɛ kpɔɔi kula. Di pɛlɛ Ŋala-kɔlɔi ŋaa lɛi nĩa-pɛlɛɛ tamaa dia, gɛ ni kwa Adel kukɛ Ŋala-kɔlɔi ŋaa lɛ dikaa-ɓela dia. Tãi tɔnɔ, ku kpiŋ pɛlɛ Ŋala-kɔlɔi ŋaa lɛi kaayɔɔ 11 ma. Ee Kuɣala-kɔlɔ maa-kɔri-ɓelai tamaa ɣele dikɛ di maa tɛi Diɣala-kɔlɔ maa-kɔriɛ  sui, ku pɔri korai-toli-kpɔŋ nina kɔɔ pilani tãi kpua yee mu!

Gɔɔ pilani, nyãa nɔ ɓe kɛ a korai-toli-kpɔŋ laa-tuɛ-nuui gwaa ŋi ma. Mɛni ma ekwatai e mo ma a gɛɛ ŋgɛ goyaŋ teniŋ tɔɔ ŋala-woo ɓo-ɓela lɔɔlu mɛi saaɓai kɛ Culion mɛni ma. Gɛ ni ŋa kaa li daa loŋ su nyii dakɛ ma Marily, a gɛɛ ŋa goyaŋ teniŋ tɔɔ ŋala-woo ɓo-ɓela lɔɔlu mɛi naaŋ kɛ naai mɛni ma. Kwa kaa aɓa saaɓa siɣe ya-ŋa keleŋ su a gɛɛ ku li gwaai ŋi ma. Goyaŋ a kpɛɛ, kwa ŋakaayɔɔi kwa kaa sia yee kwaa ma a aɓa tamaa a gɛɛ ku li ku Ŋala-kɔlɔi ŋaa lɛ nuai dia nyii-ŋai kɛ Halsey taai sui.

Tãi kpulu tɛɛi, nua tamaa nyii-ŋai kɛ Marily da Halsey taai sui di pa dɔ̃yai su. Mɛni ma ku gaa a gɛɛ maa nɛ̃ɛi ku Kaloŋ-laa Pɛrɛ-ŋa tɔɔ gwaa feerɛi ŋi ma. Yɛɛ berei Linapacan ɓela di gɛ lai, bɔlɔ-ŋai da Ŋala-kɔlɔ maa-kɔri-ɓelai ɓe dii ŋi tamaa ɣele kɛ. Di kpiŋ pa a zãai ku tii kɛ la Galoŋ-laa Pɛrɛi tɔɔ mɛni mai tamaa ɣele. Galoŋ-laa Pɛrɛi ku dɔɔ Marily a kaa nuu ŋuŋ feerɛ (200) siɣe, nyaŋ ku dɔɔ a pere sii nyii kwa pɔri da kulai ma. Mɛni ma kwa kaa kpiŋ sakiu kpɔŋ-ŋa too naa.

Goraŋ 1993 su, kwa Adel ku pɛlɛ sakiu tii kɛi Philippines lɔii su kunĩa-pɛlɛɛi kɛɛ daa kɛtɛi. Gɛ ni goraŋ 2000 su, di ndɛɛ Ministerial Training Kɔlɔ Pɛrɛi mu a gɛɛ ŋa mɛni maa-kɔri e pilaŋ berei ma ŋa pɔri kɔlɔ lɛi la gɔlɔ pɛrɛi ti mui. Ŋa kɛ gaai yɛɛ mve pai pɔrii dii ŋi kɛi, kɛlɛ Adel e mvɔrɔ a tãi kelee. E mo ma a gɛɛ Ziova a pai kponoi kpanaŋ tɛɛi mbɔ a gɛɛ ŋa pɔri dii ninai ŋi kɛi. (Fe. 4:13) Adel e mɛni-ŋai ŋi ɓo kpɛni fei, nyaa maŋ e kɛ nii ŋɔɣala-woo-ɓo tii kɛi berei maŋ e kɛ kɔlɛi lai.

Goraŋ 2006 su ŋgɛɛ kɔlɔ lɛi, di mo a gɛɛ Parkinson kɔlɔ-fela kaa mbɔŋ Adel ma. Nyiŋi e kɛ a gulaa a kua! Mɛni ma ŋa gbɛtɛ ŋgili-ŋa a gɛɛ ŋa gɔlɔ lɛ tii lɛɛ a gɛɛ ŋa pɔri mɛi kaai. Kɛlɛ Adel e mo ma nyɛɛi: “Ye dada ta kɔri mi nyii pai sale tɛɛi mbɔ ŋakɔlɔ-felai mɛni ma, nyaŋ ŋa gɔlɔŋ Ziova a pai kpɔnii kua a gɛɛ ku kanaŋ kutii kɛi.” E siɣe tãi ti ma, ŋanɛnii Adel e kanaŋ ŋɔɣala tii kɛi a nii kelee koraŋ lɔɔlu mɛi da yee mu. Tãi va kaa kpiŋ sia lai, a kaa kɛ seei wii su gɛ ɣala-woo ɓo.  Nyaŋ tãi ve kɛ ni kpiŋ pɔrii lonoi la a nɛlɛɛi, a kaa kɔ a gɛɛ e ŋɔmare-kɛɛ sukula wooi kɛ nɔ a gbuaa goyaŋ su. Bɔlɔ da sisɛ-ŋai da kaa worɛ-woo kɔlɔ-ŋa tɛɛ Adel pɔ, dikɛ zɛɣɛi fe ŋɔmɛni-kɔɔŋ-maa lɛlɛɛi mɛni ma. Adel e lɛɛ a dɔɔi kpanaŋɔɔ e lɛɛ la zu e saa goraŋ 2013 su. Kwa ŋawɛli-kɛ-maa nɛnii ku koraŋ buu saaɓa (30) kɛ gie ma. Mɛni ma, tãi e saa lai, lii-too-polu ŋanaa e ŋɔnɔ pa ŋakɛ-ɣeniɛi su.

Ŋanɛnii Adel kɛɛ ɣele mai, e mvɔrɔ a gɛɛ ŋa kanaŋ tii kɛi a ŋatãi kelee Ziova mi. Nyaŋ nyiŋi kɛɛ aa kpɔŋ ma a gɛɛ nyee e tɛɛ ŋalii-too-polu mɛni-ŋai dia. E siɣe goraŋ 2014 ma e too 2017 ma, di ndɛɛ a sakiu-mɛi-nuu Tagalog-sii-woo ɓo korai-toli-kpɔŋ-ŋai su ɓɛi di wuru laa naa ŋala-woo ɓo tii mɛi. Naa polu ma, ŋa kaa Tagalog-sii-woo ɓo korai-toli-kpɔŋ-ŋai naa kaa nyii-ŋai kɛ Taiwan, Yuo-ŋa da Canada lɔii-ŋuŋ-ŋai su. Goraŋ 2019 su, ŋa kɔlɔ lɛ SKE kɔlɔ-pɛrɛi mu nyii-ŋai kɛ India da Thailand. Ŋa gaa a gɛɛ ŋa kɛ tii tamaa kɛi Ziova mi a nii kelee, ŋa lii-nɛ̃ɛ tamaa sɔlɔ ɓo.

Dii ninai kelee ŋa zɔlɔ ɓo Ziova ŋɔkpɔŋ-gie-mai sui, a kpɔŋ ma a gɛɛ ŋa lɛɣɛ a bɔlɔ da sisɛ-ŋai. Mɛni ma va kɛ a mɛni loŋ da ndɛɛ korai-toli-kpɔŋ takpɛni su. Kɛlɛ ŋa ŋgili tɔɔ Ziova ma, ŋa gaa a gɛɛ a kpɔŋ ma a tãi kelee. Nyiŋi aa kpɔŋ ma a gɛɛ ŋa nyee see mɛni maa faleŋɔɔ kelee ta mu ŋakɛ-ɣeniɛi su. Ŋgaa naa a pɛsiɔ panĩa Philippines lɔii su. Nyaŋ nii nɛ̃ɛi bɔlɔ da sisɛ-ŋai mɛni ma korai-toli-kpɔŋ ninai ŋi su nyii-ŋai dikaa yɛɛ ŋakaayɔɔi su-ɓelai. Nii nɛ̃ɛi ŋɔnɔ a gɛɛ ŋa Samuel da Shirley kaa dikɛ dilee ŋɔmɛni-kɔɔŋ-maa lɛlɛɛi pɔɔkɔɔŋ.—3 Zɔŋ 4.

Tɔ̃ya ma, ŋaa tɛɛ mɛni-kpanaŋ tamaa su ŋakɛ-ɣeniɛi su, yɛɛ mbɔŋ kaa gɛ mɔ̃lɛ kɔlɔ-fela nyɔmɔɔ yeei e lɛɛ la zu e saa da nyee seeɛ mɛni maa faleŋɔɔ tamaa mu ŋakɛ-ɣeniɛi su. Kɛlɛ mɛni-ŋai ŋi kelee su, ŋa gaa a gɛɛ Ziova ‘kɛi fe koyaa ni kuta kua.’ (Dikɛ-mɛni-ŋai 17:27) ‘Sɛŋ kelee ta’ fe pɔrii Ziova kperai kpɔŋ maa tɛɛi vɛli-ɓela pɔ a nɛɛ maŋ e kɛ yɛɛ dikaa ditee-tee kwa ma. (Aza. 59:1) Ziova aa kpɔŋ maa tɛɛ mbɔ ŋakɛ-ɣeniɛi kelee su, nyaŋ nii nɛ̃ɛi mɛni ma. Tɔ̃ya ma Ziova fe wɔlɔ nĩa ni ma.