•  Maloŵe Gandanda 2

•  Chipanje Chakusimanikwa M’Maloŵe ga Mlungu 3-5

  •  Ngani 3

  •  Mfundo Syakamuchisya 4

  •  Kuŵalanga Baibulo 5

•  Kulipeleka mu Utumiki wa Mumgunda 6-14

  •  Kutanda Kuŵechetana ni Mundu 7

  •  Kutenda Ulendo Wakuwilisya 8

  •  Twajiganyeje Ŵandu 9

  •  Kwasalila Ŵane Yakusakulupilila 10

  •  Ngani 11

  •  Mwampaka Atendele Chisyasyo 12

  •  Mtundu wa Chisyasyo 13

  •  Kukamulichisya Masengo Mafidiyo Soni Mabuku 14

•  Umi Wetu Wachiklistu 15-16

  •  Lijiganyo lya Baibulo lya Mpingo 16

•  Maloŵe Gakumalisya 17

•  Kuyamichila Soni Kwamuka 18

•  Kusunga Ndaŵi 19

•  Jwakulolela Dela Pakwendela Mpingo 20

•  Wiki ja Msongano Wadela Kapena Wachigawo 21

•  Wiki ja Chikumbuchilo 22

•  Jwakulolela Msongano wa Utumiki ni Umi Wetu Wachiklistu 23

•  Cheyamani jwa Msongano wa Utumiki ni Umi Wetu Wachiklistu 24

•  Jwakwamuka Jwakamuchisya 25

•  Makalasi Gane 26

•  Mafidiyo 27

1. Malangiso gagali mu fomu ajino chigakamuchisye wosope ŵakwete mbali mu Msongano wa Utumiki ni Umi Wetu Wachiklistu. Jemanjaji akusosekwa kuŵalangasoni malangiso ga ngani syawo mpela mwasalile mu fomuji soni mu kabuku ka Msongano wa Utumiki ni Umi Wetu Wachiklistu mkanaŵe kutanda kosechela mbali syawo. Ŵakulalichila wosope mpaka asalilidwe kuti alembesye ni chakulinga chakuti atendeje nawo yisyasyo mu mbali sya ŵakulijganya sya mu Kulipeleka mu Utumiki wa Mumgunda. Ŵane ŵatukusasongana nawo ndaŵi ni katema soni akusajitichisya yijiganyo ya m’Baibulo nambosoni kutenda yindu mwakamulana ni ndamo sya Chiklistu mpaka akolesoni upile wakutenda mbaliji. Naga mundu nganaŵa jwakulalichila soni akusachilila kujigalaga nawo mbali mu ngani sya ŵakulijiganya, Jwakulolela Msongano wa Utumiki ni Umi Wetu Wachiklistu akusosekwa kukambilana najo yindu yakusosekwa kukwanilisya kuti mundu ajigaleje mbali mu ngani sya ŵakulijiganya soni amsalile naga jwalakwe ali jwakuŵajilwa. Akusosekwa kutenda yeleyi ali yimpepe ni jwakusamjiganya Baibulo mundujo (kapena yimpepe ni nangolo jwali jwa Mboni). Yindu yakusosekwa kuyikwanilisyayi yili yakulandana ni yele mundu akusasosekwa kuyikwanilisya kuti aŵe jwakulalichila jwangabatisidwa—od mtwe 8 ndime 8.

2. Miniti jimo. Wiki jilijose, panyuma pa nyimbo ni lipopelo lyakuwugulila, cheyamani jwa Msongano wa Utumiki ni Umi Wetu Wachiklistu chasaleje mwakata yachitulijiganye. Jwalakwe chasaleje mfundo syele abale ni alongo chapindule nasyo mnope.

3. Ngani: Maminisi 10. Mu kabuku ka Msongano wa Utumiki ni Umi Wetu Wachiklistu chaŵicheje mtwe soni mfundo siŵili kapena sitatu. Nganiji jipelechedweje kwa jwamkulungwa jwa mumpingo kapena jwakutumichila jwakamuchisya jwakuŵajilwa. Naga ndandanda ja kuŵalanga Baibulo ja wikijo jikulosya kuti tukutanda kuŵalanga buku jine ja m’Baibulo, chitutandeje ni kulolela fidiyo jakulondesya bukujo. Jwakuŵecheta nganiji akusosekwa kamulanya yayili mu fidiyojo ni ngani jakwe. Nambope, jwalakwe akusosekwa kusalasoni mfundo syasisasile mu kabuku ka Msongano wa Utumiki ni Umi Wetu Wachiklistu. Akusosekwasoni kamulichisya masengo chenene yiwulili ya m’kabukuka yakusayilinganya mwakamulana ni nganijo. Mpaka ajonjechesyesoni mfundo sine syakamuchisya naga sikamulana ni mfundo sya mu nganijo.

 4. Mfundo Syakamuchisya: Maminisi 10. Jeleji jili ngani ja yiwusyo ni kwanga jangali maloŵe gandanda soni gakumalisya. Nganiji akusosekwa kujiŵecheta jwamkulungwa jwa mumpingo kapena jwakutumichila jwakamuchisya jwakuŵajilwa. Jwalakwe akusosekwa kuwusya yiwusyo yosope. Nambosoni, mpaka asagule kuŵalanga ndime syosope sya malemba gagaŵichidwe mu nganiji kapena iyayi. Wosope ŵakwanga akusosekwa kwanga kwa masekandi 30 kapena ngakwana.

 5. Kuŵalanga Baibulo: Maminisi 4. Nganiji ajipelecheje kwa m’bale. Jwakulijiganyajo akusosekwa kutanda kuŵalanga mwangasala maloŵe gandanda kapena gakumalisya. Cheyamani jwa msonganowu chachilolechesya kuti m’balejo akuŵalanga mwangaguluka maloŵe, akupikanichisya yakuŵalangayo, akuŵalanga mwangadodoma, akugombelechesya chenene mfundo, akwesya kapena kutulusya maloŵe mwakuŵajilwa, akupumula pamalo gakuŵajilwa soni akuŵalanga mwakusaŵechetela. Ligongo lyakuti ndime sine syakusaŵalanga sikusaŵaga syelewu pele sine syejipi, Jwakulolela Msongano wa Utumiki ni Umi Wetu Wachiklistu akusosekwa kuganichisya luso lwa jwakulijiganya jwalijose pakupeleka ngani.

6. Maminisi 15. Mbali jeleji jikusapeleka upile wakulosya mwampaka tutendele utumiki wetu soni mbali syatukusosekwa kongolela patukulalichila soni kwiganya. Naga pakusosechela, achakulungwa mpaka apocheleje ngani sya ŵakulijiganya. Jwakulijiganya jwalijose akusosekwa kukamulilapo masengo pa lijiganyo lyakutyochela chinga mu kabuku ka Kajiganye kapena ka Twanonyeleje Ŵandu lyakusaŵikaga kumbesi kwa ngani jawo mu kabuku ka Msongano wa Utumiki ni Umi Wetu Wachiklistu. Ndaŵi sine, chaŵicheje ngani jakambilana. Ngani jeleji jiŵechetedweje ni jwamkulungwa jwa mumpingo kapena jwakutumichila jwakamuchisya jwakuŵajilwa.—Alole  ndime 15 yakwamba mwampaka atendele ngani syakambilana.

 7. Kutanda Kuŵechetana ni Mundu: M’bale kapena mlongo mpaka atende mbali jeleji. Naga m’bale ni jwakutenda mbaliji, jwakamuchisya jwakwe akusosekwa kuŵasoni m’bale. Naga mlongo ni jwakutenda mbaliji, jwakamuchisya jwakwe akusosekwa kuŵasoni mlongo. Nambo ŵamuliŵasa limo mpaka atende mbaliji mwangajigalila yeleyi. Ŵakulijiganya mpaka asagule kutama kapena kwima.—Kuti amanyilile yejinji ya mwampaka atendele chisyasyo soni mtundu wa chisyasyo pa ngani jeleji, alole  ndime 12 ni  13.

 8. Kutenda Ulendo Wakuwilisya: M’bale kapena mlongo mpaka atende mbali jeleji. Naga m’bale ni jwakutenda mbaliji, jwakamuchisya jwakwe akusosekwa kuŵasoni m’bale. Naga mlongo ni jwakutenda mbaliji, jwakamuchisya jwakwe akusosekwa kuŵasoni mlongo. (km-CN 5/97 peji 2) Jwakulijiganya soni jwakumkamuchisyajo mpaka asagule kutama kapena kwima. Jwakulijiganya alosye yampaka tuŵechete patukutenda ulendo wakuwilisya kwa mundu jutwaŵechetene najo paulendo wupite.—Kuti amanyilile yejinji ya mwampaka atendele chisyasyo soni mtundu wa chisyasyo pa ngani jeleji, alole  ndime 12 ni  13.

 9. Twajiganyeje Ŵandu: M’bale kapena mlongo mpaka atende mbali jeleji. Naga m’bale ni jwakutenda mbaliji, jwakamuchisya jwakwe akusosekwa kuŵasoni m’bale. Naga mlongo ni jwakutenda mbaliji, jwakamuchisya jwakwe akusosekwa kuŵasoni mlongo. (km-CN 5/97 peji 2) Jwakulijiganya soni jwakumkamuchisyajo mpaka asagule kutama kapena kwima. Mbaliji jilosye lijiganyo lili mkati, ngaŵaga kuti likutanda kwene. Pangali ligongo lyakutandila ni maloŵe gandanda kapena gakumalisya, kulekapo naga lijiganyo liŵapele likusala yeleyo. Nganiyiŵa yakusosechela kuŵalanga ndime syosope mwakwesya maloŵe atamose kuti yili yakomboleka kutenda yeleyo.

 10. Kwasalila Ŵane Yakusakulupilila: Naga jili ngani, jipelechedweje kwa m’bale. Naga chili chisyasyo mpaka chipelechedwe kwa m’bale kapena mlongo. Naga m’bale ni jwakutenda mbaliji, jwakamuchisya jwakwe akusosekwa kuŵasoni m’bale. Naga mlongo ni jwakutenda mbaliji, jwakamuchisya jwakwe akusosekwa kuŵasoni mlongo. Nambo ŵamuliŵasa limo mpaka atende mbaliji mwangajigalila yeleyi. Jwakulijiganya akusosekwa kwanga chiwusyo chakukambilana mwalunda soni mwakusamala nambo mwakupikanika chenene pakamulichisya masengo lifalesi jajipelechedwe. Jwakulijiganya mpaka asagule kusala lifalesi jakamulichisye masengo mu ngani jakwe kapena iyayi.

 11. Ngani: Mbaliji jipelechedweje kwa m’bale soni ajiŵecheteje mpela ngani syasikusaŵechetedwa pa mpingo. Naga ngani jityochele pa mfundo jakutyochela pa Yakonjechesya 1 mu kabuku kakuti Twanonyeleje Ŵandu, jwakulijiganya akusosekwa kugombelechesya mwampaka tugakamulichisye masengo malembago muutumiki. Mwachisyasyo, mpaka alondesye ndaŵi jampaka tukamulichisye masengo malembago, ngopolelo jakwe soni mwampaka tugalondechesye kwa mundu. Naga nganijo jityochele mu lijiganyo lya m’kabuku kakuti Twanonyeleje Ŵandu, jwakulijiganya akusosekwa kulondesya mnope mwampaka tukamulichisye masengo mfundojo muutumiki. Mpaka agombelechesye chisyasyo chachili pa mfundo 1 ja lijiganyolyo kapena mpaka agombelechesye malemba galigose gagali mu lijiganyolyo, naga yili yakamuchisya.

   12. Mwampaka Atendele Chisyasyo: Malangiso gagali mu ndime ajino soni jakuyichisya gakamula masengo pa ngani sya “Kutanda Kuŵechetana ni Mundu” soni “Kutenda Ulendo Wakuwilisya”. Kulekapo naga pana magongo gane, chakulinga cha jwakulijiganya chiŵe kulalichila yisyesyene ya m’Baibulo m’litala lyangasawusya mwakamulana ni mundu jwakuŵechetana najo soni kuwugula lipesa lyakuti chaŵechetanesoni msogolo. Jwakulijiganya akusosekwa kusagula ngani jakamulana ni yayikutendekwa kudelako. Jwalakwe mpaka asagule kupeleka buku kapena kulosya fidiyo kutyochela pa Yindu Yakwiganyila kapena iyayi. Mmalo mwakutenda chisyasyo chele ŵagambile kwinjisya mu mtima, ŵakulijiganya akusosekwa kulinjilila maluso gane gakuŵechetanilana ni mundu, mpela kuŵecheta yakwasangalasya ŵane soni ngamkanganichisya mundu kuti tumlalichile.

   13. Mtundu wa Chisyasyo: Jwakulijiganya akusosekwa kukamulichisya masengo mtundu wa kalalichile uliwose wakamulana ni mwayiŵelele yindu kudelako. Mwachisyasyo:

1.  (1) Kunyumba ni Nyumba: Mtundu wakalalichile welewu ukusapwatika kulalichila kunyumba ni nyumba chinga pameso ni pameso, pa foni kapena mwakulemba yikalata soni kutenda ulendo wakuwilisya kwa mundu jutwaŵechetene najo ulendo wupite patwalalichilaga kunyumba ni nyumba.

2.  (2) Kulalichila Mwaupile: Mtundu wakalalichile welewu ukusasala yakamulichisya masengo upile wakuchenga ngani wamba kuŵa ulaliki. Ulaliki welewu mpaka upwatiche kwasalila mfundo ja m’malemba achimjetu ŵakumasengo, kusukulu, ŵakuŵandikana nawo nyumba, patukwesile galimoto kapena kulikose patukutenda yindu yatukusatenda lisiku ni lisiku.

3.  (3) Ulaliki wa Pamalo Gakusimanikwa Ŵandu Ŵajinji: Mtundu wakalalichile welewu mpaka upwatiche ulaliki wa pashelefu, kwalalichila ŵandu pamalo gakutendela malonda, ulaliki wa mumsewu kapena kulalichila kwakwichila achalendo, kwakwimika magalimoto kapenasoni kulikose kwele ŵandu mpaka asimanikwe.

 14. Kukamulichisya Masengo Mafidiyo Soni Mabuku: Jwakulijiganya mpaka asagule kulosya fidiyo kapena kugaŵila buku, pakujigalila ni mwayiŵelele yindu. Naga nganijo jikupwatika fidiyo kapena jwakulijiganya asagwile kukamulichisya masengo fidiyo, jwalakwe akusosekwa kusala soni kambilana fidiyojo nambo akalosya.

15. Panyuma pa nyimbo jakutandila mbali jeleji, kwa maminisi 15, chipaŵeje ngani jimo kapena siŵili, syakwakamuchisya ŵakupikanila kukamulichisya masengo Maloŵe ga Mlungu. Jwamkulungwa jwa mumpingo kapena jwakutumichila jwakamuchisya jwakuŵajilwa mpaka atende mbali jeleji, kulekapo naga alosisye kuti mbalijo atende jwamkulungwa jwa mumpingo basi. Nambo yakusosekwa ya mumpingo atende jwamkulungwa jwa mumpingope. Naga ngani jili jakambilana, jwakuŵecheta ngani mpaka awusye yiwusyo mungani jakwe josope konjechesya pa yiwusyo yayili mu nganijo. Jwalakwe ngakusosekwa kutupiya maloŵe gakwe gandanda kuti akole ndaŵi jakwanila jakumalisya mfundo syekulungwakulungwa syosope soni kuti ŵakupikanila ajigale mbali. Naga chipasosekwe kum’wusya mundu, yikusaŵa chenene kuti mundu jwakuwusidwajo ajawule kupulatifomu naga yili yakomboleka, mmalo mwakwanga ali atemi pasi.

  16. Lijiganyo lya Baibulo lya Mpingo: Maminisi 30. Jwamkulungwa jwa mumpingo jwakuŵajilwa ni jwakusosekwa kutenda mbali jeleji. (Mipingo janganijikola achakulungwa ŵa mumpingo ŵakwanila, mbaliji mpaka ŵapejesoni ŵakutumichila ŵakamuchisya ŵakuŵajilwa.) Likuga lya achakulungwa likusosekwa kusagula achakulungwa ŵakuŵajilwa kutendesya Lijiganyo lya Baibulo lya Mpingo. Ŵachatendesyeje lijiganyoli akusosekwa gombelechesya malemba gagakukamulana mnope ni nganijo, soni kwakamuchisya ŵandu kulola mwampaka akamulichisye masengo mfundo sya mu lijiganyolyo paumi wawo, nambo ngakusosekwa kulya ndaŵi. Ŵandu ŵaŵajitichisye kuti atendesyeje Lijiganyo lya Baibulo lya Mpingo mpaka apindule pakuŵalangasoni malangiso gele Likuga lyetu lyakopwesye gakwamba mwampaka atendechesye ngani sya yiwusyo ni kwanga. (w23.04 peji 24, libokosi) Naga amalisisye kukambilana mfundo syosope sya mu lijiganyolyo ngakusosekwa konjechesya mfundo sine ni chakulinga chakuti amalisye ndaŵi jawo. Naga yili yakomboleka, ŵakutendesya ni ŵakuŵalanga lijiganyoli akusosekwa kuchenganaga wiki jilijose. Naga pamagongo gane cheyamani jwa Msongano wa Utumiki ni Umi Wetu Wachiklistu asasile kuti lijiganyolyo litendekwe mwakata, jwakutendesyajo asagule jika litala lyambone lyakutendela yeleyi. Mpaka asagule ngaŵalanga ndime sine.

17. Maminisi 3. Cheyamani jwa Msongano wa Utumiki ni Umi Wetu Wachiklistu chasaleje mfundo syekulungwakulungwa syakamuchisya syakambilene pamsonganopo. Jwalakwe chasalejesoni mfundo syekulungwakulungwa syatuchilijiganya wiki jakuyichisya. Naga ndaŵi jipali, mpaka asale mena ga ŵandu ŵakwete mbali wiki jakuyichisya. Naga pana yimanyisyo soni yikalata mpaka aŵalanje pandaŵi jeleji, nambo naga alosisye kala ndaŵi jakuyiŵalanjila, ayiŵalanje pandaŵi jelejo. Ngakusosekwa kusala yimanyisyo yakwamba ndandanda jakwinjilila mu utumiki soni ŵakusyejesya pa Nyumba ja Uchimwene, mmalo mwakwe agambeje kuyiŵika pa bolodi ja yimanyisyo. Naga yimanyisyo soni yikalatayi ngaŵa mkomboleka kuŵalanga pa ndaŵi ja maloŵe gakumalisya, cheyamani jwa msonganowu mpaka ŵasalile abale ŵakutenda mbali ja Umi Wetu Wachiklistu kuti anandiye ndaŵi ja mbali syawo. (Alole  ndime 16 ni  19.) Msongano umaleje ni nyimbo soni lipopelo.

18. Panyuma pakuti jwakulijiganya jwalijose atesile mbali jakwe, cheyamani jwa Msongano wa Utumiki ni Umi Wetu Wachiklistu, kwa miniti jimo chasaleje yindu yatesile chenene soni yakusosekwa kongolela jwakulijiganyajo mwakamulana ni lijiganyo liŵampele. Cheyamani ngasalaga lijiganyo lyaŵampele jwakulijiganya pakumŵilanga kuti atende mbali jakwe. Nambo jwakulijiganya pamalisisye kuŵecheta ngani jakwe, cheyamani chachisala yindu yatesile chenene, soni lijiganyo lyaŵakamulene, kaneko chachisala ligongo lyakwe yatesileyo yaliji yakuŵajilwa kapena naga jwalakwejo akusosekwa kongolelape mbali jelejo. Cheyamani mpaka ayamichile mbali sinesoni sya chisyasyocho naga akuyiwona kuti mpaka yimkamuchisye jwatesile chisyasyojo kapena ŵakupikanila. Naga pana yinesoni yakusosekwa kongolela, alinganye yakuti asimane ni jwalijose pajika panyuma pa misongano kapena ndaŵi jine kuti amkamuchisye mwakamulana ni kabuku ka Twanonyeleje Ŵandu, Kajiganye kapena buku ja Sukulu ya Utumiki. Mpaka akamulichisye masengo lijiganyo lyaŵampele kuti ajongolele lila kapena lijiganyo linesoni lyaliweni kuti mpaka limkamuchisye.—Kuti amanyilile udindo wakwete cheyamani jwa Msongano wa Utumiki ni Umi Wetu Wachiklistu soni jwakwamuka jwakamuchisya alole  ndime 19,  24, ni  25.

19. Ngani jilijose, soni maloŵe ga cheyamani, gakapunda ndaŵi jakwe. Atamose kuti ndaŵi ja ngani jilijose nganajilosya mwachindunji kuti “kapena jikapunda,” pangali ligongo lyakupitilichisya ngani naga mfundo syosope sya mu nganijo siŵechetedwe ndaŵi jakwe mkanijikwane. Naga jwakutenda mbali ja ŵakulijiganya ndaŵi jakwe jimasile, cheyamani akusosekwa kumjimisya mwakusamala soni mwalunda. Naga ŵakuŵecheta ngani ŵane alile ndaŵi, cheyamani jwa Msongano wa Utumiki ni Umi Wetu Wachiklistu kapena jwakwamuka jwakamuchisya akusosekwa kwapa malangiso pambali. (Alole  ndime 24 ni  25.) Msongano wosope kupwatikapo nyimbo ni mapopelo wukusosekwa kujigala awala jimo ni maminisi 45.

20. Naga jwakulolela dela akwendela mpingo wawo, misongano jikusosekwa kutendekwape mpela mwasalile mu kabuku ka Msongano wa Utumiki ni Umi Wetu Wachiklistu. Nambo mbali ja Lijiganyo lya Baibulo lya Mpingo ja mu mbali ja Umi Wetu Wachiklistu jichijinjilidwa mmalo ni ngani ja utumiki ja jwakulolela dela ja maminisi 30. Mkanamŵilanje jwakulolela dela kuti aŵechete ngani jakwe, cheyamani jwa Msongano wa Utumiki ni Umi Wetu Wachiklistu chachisala mwakata yatulijiganyisye soni yachitulijiganye wiki jakuyichisya soni kusala yimanyisyo yakusosekwa yayipali, kaneko chamŵilanjeje jwakulolela dela kuti aŵechete ngani jakwe. Pambesi pa ngani jakwe, jwakulolela delajo chamalisyeje misonganojo ni nyimbo jachasagule msyenejo. Jwalakwe mpaka amŵilanje m’bale jwine kuti apeleche lipopelo lyakumalisya. Ngakusosekwa kola makalasi gane gachiŵecheto cha mpingo wawo jwakulolela dela pakwendela mpingo. Nambo kakuga ka chiŵecheto chine kakali mbali ja mpingowo mpaka katende misongano jawo pajika. Nambope, pandaŵi ja ngani ja utumiki ja jwakulolela dela akusosekwa kuwujila kuti akapikanile nganijo.

21. Wiki ja msongano wadela kapena wachigawo, ngakusosekwa kutenda misongano ja mpingo. Ngani syatukalijiganyisye pa msongano wa mpingo akusosekwa kulijiganya pajika kapena kukambilana pa kulambila kwa peŵasa.

22. Naga Lisiku lya Chikumbuchilo lili mkati mwa wiki, Msongano wa Utumiki ni Umi Wetu Wachiklistu ngasiwupagwa.

23. Jwamkulungwa jwasagulidwe ni likuga lya achakulungwa ni jwakusosekwa kuŵa Jwakulolela Msongano wa Utumiki ni Umi Wetu Wachiklistu. Jwalakwe ni juchalolechesyeje kuti msonganowu ukutendekwa mwakamulana ni yatusasile m’malangisoga. Jwalakwe akusosekwa kuŵechetana ni jwakwamuka jwakamuchisya naga pana yakusosekwa kukambilana. Pakagambile kopoka kabuku ka Msongano wa Utumiki ni Umi Wetu Wachiklistu, Jwakulolela Msongano wa Utumiki ni Umi Wetu Wachiklistu akusosekwa kugaŵa ngani syosope sya miyesi jiŵili sya mu msongano wamkati mwa wiki. Yeleyi yikupwatikapo ngani sya ŵakulijiganya soni ngani syele nganisiŵa sya ŵakulijiganya nambosoni kusagula cheyamani jwa msongano wamkati mwa wiki kutyochela pa achakulungwa ŵele likuga lya achakulungwa lyajitichisye kuti mpaka aŵeje macheyamani. (Alole  ndime 3-16 ni  24.) Jwalakwe pakugaŵa ngani sya ŵakulijiganya akusosekwa kuganichisya ya yaka ya jwakulijiganyajo, yindu yakumanyilila soni naga akwete ufulu wakuŵecheta pa nganijo. Akusosekwasoni kutenda yeleyi pakugaŵa mbali sine sya misongano. Jwakulijiganya jwalijose ampe ngani jakwe kuli kusigele mawiki gatatu kapena kupunda pelepa kuti aŵechete nganijo. Atende yeleyi pakamulichisya masengo fomu jakuti Ngani ja pa Msongano wa Utumiki ni Umi Wetu Wachiklistu (S-89). Jwakulolela Msongano wa Utumiki ni Umi Wetu Wachiklistu akusosekwa kulolechesya kuti ndandanda ja ŵakwete mbali pa misongano jiŵichidwe pa bolodi ja yimanyisyo. Likuga lya achakulungwa mpaka lisagule jwamkulungwa kapena jwakutumichila jwakamuchisya kuti amkamuchisyeje jwalakwe. Nambope, achakulungwa ŵa mumpingope ni ŵakusosekwa kugaŵa ngani syanganisiŵa sya ŵakulijiganya.

24. Wiki jilijose, jwamkulungwa jwa mumpingo jumo chaŵeje cheyamani jwa Msongano wa Utumiki ni Umi Wetu Wachiklistu. (Naga mumpingo mwawo mwana achakulungwa ŵa mumpingo ŵamnono, ŵakutumichila ŵakamuchisya ŵakuŵajilwa mpaka atende mbaliji.) Jwalakwe akwete udindo wakuŵecheta maloŵe gandanda ni gakumalisya. Chaŵilanjejesoni ŵakwete mbali jakuyichisya. Naga mumpingo mwawo mwana achakulungwa ŵamnono, jwalakweju mpaka akolejesoni mbali mu msonganowu mnopemnope mbali syasikwete mafidiyo gangasosekwa kugalondechesya. Ngakusosekwa kutupiya maloŵe pakumŵilanjila mundu kuti atende mbali jakwe kapena pakumyamichila. Likuga lya achakulungwa likusosekwa kusagula achakulungwa ŵa mumpingo ŵakuŵajilwa kutenda mbaliji. Achakulungwa ŵakuŵajilwaŵa mpaka achenganeje ndaŵi ni katema. Nambo mwakamulana ni mwayiŵelele yindu kumangwawoko, Jwakulolela Msongano wa Utumiki ni Umi Wetu Wachiklistu akusosekwa kutendaga kaŵilikaŵili mbali ja cheyamani jwa msonganowu kulekangana ni achakulungwa ŵakuŵajilwa ŵanewo. Naga jwamkulungwa jwa mumpingo akusatendesya Lijiganyo lya Baibulo lya Mpingo nikuti ali jwakuŵajilwa kuŵa cheyamani jwa Msonganowu. Akumbuchileje kuti jwamkulungwa jwa mumpingo jwakutenda mbali ja cheyamani jwa Msongano wa Utumiki ni Umi Wetu Wachiklistu ni jwakusosekwa kwayamichila ŵakulijiganya soni kwajamuka mwachinonyelo. Cheyamani ni jwakusosekwasoni kulolechesya kuti misongano jikumala pandaŵi jakwe. (Alole  ndime 17 ni  19.) Naga cheyamani akusaka, soni naga papulatifomu pana malo, mpaka aŵilanjeje ŵakutenda mbali pakamulichisya masengo mayikolofoni gane, jwakuŵecheta nganijo ali kumlinganyichisya mayikolofoni gakwe pa sitandi jakuŵechetela ngani. Jwalakweju mpaka asagulesoni kutama pa mpando ku pulatifomu peko pakuŵilanga soni kwapa chamuko ŵakulijiganya. Kutenda yeleyi mpaka kukamuchisye kusunga ndaŵi.

25. Naga yili yakomboleka, jwalakweju akusosekwa aŵe jwamkulungwa jwa mumpingo jwakusakombola kuŵecheta chenene ngani. Masengo ga jwakwamuka jwakamuchisya gali kwakamuchisya achakulungwa ŵa mumpingo kapena ŵakutumichila ŵakamuchisya kongolela kaŵechete kawo ka ngani naga pakusosechela. Mpaka ŵakamuchisye paŵechete ngani mu Msongano wa Utumiki ni Umi Wetu Wachiklistu, ngani sya wosope, paŵalasile Baibulo kapena kutendesya lijiganyo lya Sanja ja Mlonda kapena Lijiganyo lya Baibulo lya Mpingo. (Alole  ndime 19.) Naga mu mpingomo mwana achakulungwa ŵajinji ŵakusakombola kwiganya soni kuŵecheta chenene ngani, komboleka kusagulaga jwakwamuka jwakamuchisya chaka chilichose. Jwakwamuka jwakamuchisya ngakusosekwa kwambaga kwakamuchisya achakulungwa ŵa mumpingo kapena ŵakutumichila ŵakamuchisya pambesi pa ngani jilijose jaŵechete.

26. Naga mumpingo mwawo mwana ŵakulijiganya ŵajinji, mpaka akoleje makalasi gane. Kalasi jilijose jikusosekwa kola jwakulongolela jwakwe. Jwalakweju akusosekwa kuŵa jwamkulungwa jwa mumpingo. Nambo mpaka akamulichisye masengo jwakutumichila jwakamuchisya jwakuŵajilwa naga pakusosekwa kutenda myoyo. Likuga lya achakulungwa likusosekwa kusagula mundu jwakuŵajilwa kuti aŵe jwakulongolela jwa kalasi jine. Mpaka lisagulesoni naga chasosekweje kuchengana ni jwine mkupita kwa ndaŵi. Jwalakweju akusosekwa kukuya yatusasile mu  ndime 18. Naga akwete kalasi jine, ŵasalile ŵakulijiganya ŵa kalasijo kuti ajawuleje ku kalasi jawo panyuma pa mbali ja Mfundo Syakamuchisya mu mbali ja Chipanje Chakusimanikwa m’Maloŵe ga Mlungu. Akusosekwa kuwujila pambesi pa mbali ja Kulipeleka mu Utumiki wa Mumgunda.

27. Pa misonganoji chituloleleje mafidiyo gagasagulidwe. Mafidiyo ga msongano wa mkati mwa wiki chigasimanikweje pa JW Library^® soni chigawuguleje payipangiso yamakono yakulekanganalekangana.

© 2023 Watch Tower Bible and Tract Society of Pennsylvania

S-38-YA 11/23