1 Akolinto 16:1-24
16 Sambano pakwamba ya ngani ja yakupeleka yakwawula kwa ŵaswelawo, mkusosekwa mkuye yanajisalile mipingo ja ku Galatiya.
2 Lisiku lyandanda* lya wiki jilijose, jwalijose aŵicheje kanekakwe pambali mwakamulana ni kapate ka mundujo. Mtendeje yeleyi ni chakulinga chakuti mkasimtanda kulokotela yakupelakayo pandaŵi jachinjiyika.
3 Pachinjiyika kweleko, chinjatuma achalume ŵamwajitichisye mu yikalata yenu ŵala kuti akapeleche mituka jenujo ku Yelusalemu.
4 Nambope, naga jemanja chimchiyiwona kuŵa yakuŵajilwa kuti une longane nawo, chinjilongana nawo.
5 Chinjiyika kweleko pachinjityochelaga ku Makedoniya pakuŵa chimbitile ku Makedoniyako.
6 Mwinesoni chinjitama nawo kweleko kwakandaŵi atamose pa ndaŵi josope jakusisima, kuti pachinjityokaga chimumbechesye panandi paulendo wangu.
7 Pakuŵa paulendo awuno ngangusaka kuti chinamlole jemanja mwakwamba kupita, ligongo ngusaka kutama ni jemanja kwa kandaŵi nditu, naga Yehofa akusaka.
8 Nambo chimbepe ku Efeso mpaka pandaŵi ja chisangalalo cha Pentekosite
9 ligongo upile wekulungwa wakutenda utumiki umbuguchile, atamose kuti pana ŵakusisya ŵajinji.
10 Sambano Timoteyo pachachiyika, mlolechesye kuti akasatenda woga ni chilichose pasikati penu, pakuŵa jwalakwe akukamula masengo ga Yehofa mpela mwangutendela une.
11 Myoyo pakaŵa jwalijose jwakumdelela jwalakwejo. Mlolechesye kuti mumpechesye jwalakwejo mwamtendele pakwika akuno, ligongo une pampepe ni achalongo achimjetu ŵali akuno tukumjembecheya.
12 Sambano pakwamba ya mlongo mjetu Apolo, namchondelele jwalakwejo kuti ayiche kwa jemanja pampepe ni achalongo achimjetu. Jwalakwe nganasaka kwika kwa jemanja pandaŵi ajino, nambo chayichepe pachapate mpatapo.
13 Mŵeje mesope, mŵeje ŵakulimba m’chikulupi, mtendeje yindu mwachilumelume,* mŵeje ŵakulimbangana.
14 Yosope yamkutenda myitendeje mwachinonyelo.
15 Jemanja mkumanyilila kuti wosope ŵam’nyumba ja Sitefana ali yisogosi yandanda ku Akaya soni kuti ŵalipeleche mnope pakwatumichila ŵaswelawo. Myoyo achalongo achimjangu, ngumlimbikasya kuti,
16 mpitilisye kwapikanila ŵandu mpela ŵeleŵa soni wosope ŵakulipeleka mnope pakukamula nawo masengoga.
17 Nambo ngusangalala ligongo lyakuti Sitefana soni Fotunato nambosoni Akayiko ali akuno. Jemanjaji alipeleche kuti aŵe ni une mmalo mwa jemanja.
18 Jemanjaji atamiche pasi mtima wangu soni wa jemanja. Myoyo mkusosekwa mwayamichileje ŵandu mpela ŵeleŵa.
19 Mipingo ja ku Asiya jikumpa moni. Akula ni Pulisika pampepe ni mpingo wawukusasongana m’nyumba jawo akumpasoni moni wakutyochela pasi pamtima jemanja wosope ŵamkwatumichila Ambuje.
20 Achalongo achimjetu wosope akuno akumpa moni. Mpeleganeje moni mwachinonyelo.
21 Mpochelesoni moni wangu wangulemba jika ni mkono wangu, une Paulo.
22 Naga mundu jwine ngakwanonyela Ambuje, mundu jwelejo aŵe jwamlweseche.* Ambuje ŵetu, chonde ayiche.
23 Umbone mtima wekulungwa wa Ambuje Yesu uŵe ni jemanja.
24 Mmanyilile kuti ngusinamnonyela jemanja wosope ŵamli ŵakamulana ni Klistu Yesu.
Maloŵe Gamwiŵanda
^ Lyeleli lili lisiku lyatukusalikolanga apano kuti Lyamlungu. Kwa Ayuda, lyeleli lyaliji lisiku lyandanda lya wiki.
^ Kapena kuti, “mŵeje ŵakulimba mtima.”
^ Ŵane akusati “kutapana; kutembelela.”