1 Akolinto 4:1-21
4 Jwalijose atuwoneje m’weji mpela ŵakutumichila ŵa Klistu soni mpela ŵakulolela yindu yakusisika ya Mlungu.
2 Sambano chindu chakusosekwa kwa ŵakulolelaŵa chili chakuti aŵe ŵakulupichika.
3 Kwa une nganingola nayo kandu kuwungunyidwa ni jemanja kapena ni luŵala lwamagambo. Atamose unejo, jwangaliwungunya namsyene.
4 Pakuŵa ngangumanyilila naga ndesile chilichose chakulemwecheka. Nambotu yeleyi ngayikulosya kuti ndili jwakulungama. Yehofa ni jwakusawungunya naga yindesile yili yambone kapena iyayi.
5 Myoyo mkam’welusyaga jwalijose ndaŵi jakwe mkanijikwane, mpaka pachachiyika Ambuje. Ambujewo chachiŵika pakulanguka yakusisika yiliyose yakutendekwa m’chipi soni chachisala peswela nganisyo sya m’mitima ja ŵandu. Pelepo Mlungu chachimpa jwalijose uchimbichimbi wakwe.
6 Sambano achalongo achimjangu, mbechetetu yindu yeleyi pakamulichisya masengo chisyasyo cha Apolo ni unejo kuti yimkamuchisye jemanja. Ndesile yeleyi ni chakulinga chakuti kupitila mwa m’weji mlijiganye lilamusi lyakuti, “Mkuyeje yayalembedwe m’Malemba.” Mtendeje yeleyi kuti mkalikwesyaga, ni kwawonaga ŵane kuŵa ŵakusosekwa kupunda ŵane.
7 Ana ŵani ŵakumtendekasya kuŵa ŵakulekangana ni ŵane? Soni ana mkwete chichi chele nganimtenda kupochela? Ni naga mwatesile kupochela, sambano ligongo chichi mkulikwesya mpelaga nganimtenda kupochela?
8 Ana nikuti mkwete yosope yimkusosechela? Ana msichile kala? Ana mtandite kala kulamulila mpela mamwenye pali pangali m’weji? Nditu nganonyele mli mtandite kulamulila mpela mamwenye pakwikana apano, ni chakulinga chakuti m’wejisoni tulamulile mpela mamwenye yimpepe ni jemanja.
9 Pakuŵa kwa une yili mpela Mlungu atuŵisile m’weji ŵandumetume kumbesi mpela ŵandu ŵakwenela kuwulajidwa. Yeleyi yili myoyo ligongo m’weji tuŵele mpela yindu yakuyilosya kwa ŵandu ŵa pachilambo soni kwa malayika.
10 Ŵandu akusatuwonaga mpela ŵakuloŵela ligongo tukusamkuyaga Klistu, nambo jemanja mkuliwonaga mpela ŵalunda ligongo lyakumkuya Klistu pejo. M’weji tuli ŵangali machili, nambo jemanja mli ŵakulimbangana. Ŵandu akumchimbichisyaga jemanja, nambo m’weji akutunyosya.
11 Mpaka apano tukwamba kutamila kulaga ni sala, njota, soni usawuchi. Ŵandu akwamba kutuputa, tukusoŵa pagona
12 soni tukukamula masengo gakupweteka ni makono getu. Ŵandu pakutunyosya, tukusasosela yambone. Pakutulagasya, tukusapilila mwakuwusimana mtima.
13 Pakutuŵechetela yachabe, tukusajanga mwakufasa. Mwamti mpaka apano, ŵandu akutuwona mpela yiswani ya pachilambo, akutuwona mpela yindu yakunyalaya yakwenela kuyijasa.
14 Lembile yeleyi, ngaŵa pakusaka kumtesya sooni jemanja, nambo kuti namkamuchisye mpela ŵanache ŵangu ŵapamtima.
15 Pakuŵa atamose mli mkwete ŵakumjiganya 10,000 pasikati pa ŵakumkuya Klistu, nambo nganimkola baba ŵajinji. Unepe ni jwambele baba ŵenu kupitila mwa Klistu Yesu, ligongo namjiganyisye ngani syambone.
16 Myoyo ngumŵenda kuti, musyasyeje une.
17 Ni ligongo lyakwe ngumtumisya Timoteyo kwa jemanja, ligongo jwalakwejo ali mwanache jwangu jwapamtima soni jwakulupichika jwanampatile mwa Ambuje. Jwalakwe chachimkumbusya jemanja yindu yangusatenda pakumtumichila Klistu Yesu. Yindu yeleyi ni yangusajiganyasoni ku mpingo uliwose.
18 Ŵane atandite kulikwesya mpela kuti une ngasiyika kweleko.
19 Nambo sampano chiyiche kukoko, naga Yehofa akusaka. Pachiyichepo, ngangusaka kupikana maloŵe ga ŵandu ŵakulikwesyawo, nambo ngusaka kugawona machili gawo.
20 Pakuŵa Uchimwene wa Mlungu wangawonechela mwa mundu ni yakuŵecheta yakwe, nambo ni machili ga Mlungu.
21 Sambano msagule mwachimsyene, ana mkusaka yiche ni chikoti kapena ni chinonyelo soni kufasa?*
Maloŵe Gamwiŵanda
^ Ŵane akusati “kulijinichila.”