1 Akolinto 6:1-20
6 Naga jumo mwa jemanja akwete magambo ni mjakwe, ligongo chichi mkusajawula ku luŵala lwamagambo kuti ŵandu ŵangakulupilila akam’welusye mmalo mwakwawula kwa ŵaswelawo?
2 Ana kapena ngamkumanyilila kuti ŵaswelawo chachiwelusya chilambo? Naga jemanja chimchiwelusya chilambo, ana nganimŵa mkombwele kuwelusya tumagambo mpela tweleto?
3 Ana ngamkumanyilila kuti tuchigawelusya malayika? Naga yili myoyo, ana mpaka tulepele kuwelusya ngani sya umi awuno?
4 Pamkwete ngani sya umi awuno syamkusosekwa kuwelusya, ana mkusimwasagulaga ŵandu ŵangachimbichika mumpingo kuti awelusyeje nganisyo?
5 Nguŵecheta yeleyitu kuti namtesye sooni jemanja. Ana pasikati penu pangali mundu jwalunda atamose jumo jwampaka akombole kwawelusya achalongo achimjakwe?
6 Mmalomwakwe mkujigalilana ku luŵala lwamagambo kuti mkawelusidwe ni ŵandu ŵangakulupilila.
7 Kusala yisyene, naga mkwajigalila achalongo achimjenu ku luŵala lwamagambo, nikuti pelepa jemanja mlepele basi. Ŵane pamleŵele, uli ngagamba kuyileka? Soni naga ŵane amjiŵile, uli ngagamba kuyileka?
8 Nambotu jemanja ni ŵamkusimwaleŵela ŵane soni kwajiŵila, atamose kuti ali achalongo achimjenu ŵasyesyene.
9 Ana ngamkumanyilila kuti ŵandu ŵakusakala ngasajinjila mu Uchimwene wa Mlungu? Mkasimlilambusya.* Ŵandu ŵakutenda yamsese,* ŵakutindiŵalila milungu jakusepa, ŵachikululu,* achalume ŵakusagonedwa ni achalume achimjawo, achalume ŵakusiŵagona achalume achimjawo,
10 ŵawiyi, ŵaumbombo, ŵakolelwa, ŵakulalata, kapena ŵakusumula ngasajinjila mu Uchimwene wa Mlungu.
11 Nambotu ŵane mwa jemanja mwatendaga yeleyi. Nambo Mlungu ŵamswejesye kuti mŵe ŵakweŵakwepe soni ŵamtesile kuŵa ŵakulungama mu lina lya Ambuje Yesu Klistu soni ni msimu weswela.
12 Kwa une, yindu yosope yili yakundidwa, nambo ngaŵa kuti yosope yili yakamuchisya. Kwa une, yindu yosope yili yakundidwa, nambo ngasingunda kuti chilichose chindamulileje.
13 Yakulya, kwakwe kuli kwinjila m’matumbo, soni m’matumbo, kwakwe kuli kupochela yakulya, nambo Mlungu chachijonanga lutumbo pampepe ni yakulya yakwe. Chilu nganichiŵa chakutendela yachikululu* nambo chili chakwatumichilila Ambuje, soni Ambujewo ali msyene chilucho.
14 Mlungu ŵajimwisye Ambuje ku chiwa, soni chachitujimusya m’weji ni machili gakwe.
15 Ana ngamkumanyilila kuti yilu yenu yili yiŵalo ya chilu cha Klistu? Sambano ana jemanja mkusaka kuti une njigale yiŵalo ya Klistu ni kuyilumbikanya ni lihule? Nganimba ndesile yeleyo.
16 Ana ngamkumanyilila kuti jwalijose jwakulilumbikanya ni lihule ali chilu chimpepe ni lihulelyo? Pakuŵa ŵatite, “Ŵaŵiliwo chachiŵa chilu chimpepe.”
17 Nambo jwalijose jwali jwakulumbikana ni Ambuje akusaganisyaga mpela Ambujewo.
18 Mtile ndamo ja chikululu.* Ulemwa uliwose wakusatenda mundu ukusaŵaga kusa kwa chilu chakwe, nambo jwalijose jwakutenda chikululu akusachilemwechesya chilu chakwe.
19 Ana jemanja ngamkumanyilila kuti yilu yenu yili nyumba jawukusatama msimu weswela wele Mlungu ŵampele? Jemanjatu mli ŵa Mlungu,
20 pakuŵa jwalakwe ŵamsumile mwakudula. Myoyo, mlolechesyeje kuti mkumchimbichisya Mlungujo ni yilu yenu.
Maloŵe Gamwiŵanda
^ Kagopolele kanesoni, “Mundu jwalijose akasamlambusya.”
^ Mu Chigiliki akusati, por·neiˈa. Alole maloŵe gakuti “Chikululu,” pa mbali jakuti Kugopolela kwa Maloŵe Gane.
^ Mu Chigiliki akusati, moi·kheiʹa. Alole Kugopolela kwa Maloŵe Gane.
^ Mu Chigiliki akusati, por·neiˈa. Alole Kugopolela kwa Maloŵe Gane.
^ Mu Chigiliki akusati, por·neiˈa. Alole Kugopolela kwa Maloŵe Gane.