1 Timoteyo 2:1-15
2 Nambo chandanda nguŵenda kuti jwalijose ŵapopeleleje ŵandu ŵamtundu uliwose. Apelecheje mapopelo gakuchondelela, mapopelo gakuŵenda, mapopelo gakwapopelela ŵane soni mapopelo gakuyamichila.
2 Agapopeleleje mamwenye soni ŵane ŵakwete maudindo gapenani* ni chakulinga chakuti tutameje umi wamtendele soni wangali chakusokonasya, nambosoni kuti tuŵe ŵakulipeleka mnope kwa Mlungu soni kuti tuŵe ŵaganisya chenene.
3 Yeleyi yili yambone soni yakuŵajilwa pameso pa Mlungu jwali Mkulupusyo jwetu,
4 jwele chakulinga chakwe chili chakuti, ŵandu ŵamtundu uliwose akulupuche ni kuŵa ŵakumanyilila chenene yayili yisyesyene.
5 Pakuŵa pana Mlungu jumo soni namangoswe jumo pasikati pa Mlungu ni ŵandu, jwali Klistu Yesu. Jweleju ali mundu
6 juŵalipeleche kuti aŵe mbopesi jakwanila kwawombola ŵandu wosope.* Yeleyi ni yele ŵandu chachiyitendela umboni pandaŵi jakwe.
7 Ni ligongo lyakwe une nasagulidwe kuŵa jwakulalichila soni ndumetume kuti ndendele umboni yeleyi. Ngusala yisyene, ngangulambusya ata panandi. Nasagulidwe kuti mbe jwakwajiganya ŵandu ŵamitundu jine pakwamba ya chikulupi soni yindu yayili yisyesyene.
8 Myoyo ngusaka kuti kulikose achalume apitilisye kupopela, akwesyeje mwinani makono gawo geswela, pali pangali kutumbililana soni kangana.
9 Ngusakasoni kuti achakongwe alisalalisyeje ni yakuwala yakuŵajilwa.* Awaleje mwakulichimbichisya soni mwakulosya kuti ali ŵaganisya chenene. Kalisalalisye kawo kakaŵaga kakutiŵa wumbo mwakusalala mnope, kulisalalisya ni golide kapena ni ngale* kapenasoni ni yakuwala yamtengo wapenani,
10 nambo alisalalisyeje mwakamulana ni mwakusalisalalichisya achakongwe ŵakutumichila Mlungu. Alisalalisyeje ni yitendo yambone.
11 Jwamkongwe atameje jii soni aŵeje jwakupikanila mnope pandaŵi jakwiganyidwa.*
12 Ngangwitichisya kuti jwamkongwe ajiganyeje kapena kuti amlamulileje jwamlume, nambo atameje jii.
13 Pakuŵa Adamu ni juŵapanganyidwe chandanda, kaneko Hawa.
14 Nambosoni, ngaŵa kuti Satana ŵamlambwisye Adamu nambo ŵamlambwisye jwamkongwejo mwamti jwaŵele jwakulemwa.
15 Nambope, jwamkongwe chachiŵa jwakuteteyeka mwakuŵeleka ŵanache, naga akupitilisya kuŵa ni chikulupi, chinonyelo soni kuŵa jwamswela pameso pa Mlungu nambosoni naga akupitilisya kuŵa jwaganisya chenene.
Maloŵe Gamwiŵanda
^ Kapena kuti, “soni ŵane ŵali ŵakulamulila.”
^ Kapena kuti, “ŵandu ŵamtundu uliwose.”
^ Kapena kuti, “yakulichimbichisya.”
^ Ngale jili mtundu wa liganga lya mtengo wapenani mnope.
^ Pelepa akwamba pandaŵi jakwiganyidwa mumpingo.