1 Timoteyo 6:1-21
6 Wosope ŵali achikapolo apitilisye kwawona achambuje ŵawo kuŵa ŵakuŵajilwa kwapa uchimbichimbi wekulungwa, ni chakulinga chakuti ŵandu akaliŵechetela yachipongwe lina lya Mlungu soni chijiganyo chakwe.
2 Nambosoni, achikapolo ŵele achambuje ŵawo ali ŵakulupilila ngakusosekwa kwatendela yachipongwe achambuje ŵawowo pakuyiwona kuti ali achalongo achimjawo mwa Ambuje. Mmalomwakwe akusosekwa ŵatumichileje mwakulipeleka mnope, ligongo ŵele ŵakupindula ni masengo gawo gambonego ali ŵakulupilila soni ŵakunonyeledwa.
Mpitilisye kwajiganya soni kwadandawulila kuti atendeje yindu yeleyi.
3 Naga mundu jwine jwalijose akwiganya chijiganyo chine soni ngakwitichisya maloŵe gasyesyene* gakutyochela kwa Ambuje ŵetu Yesu Klistu, nambosoni ngakwitichisya chijiganyo chachili chakamulana ni kulipeleka kwetu kwa Mlungu,
4 mundu jwelejo ali jwakulikwesya soni jwakupoka mwamti ngakumanyilila chilichose. Jwalakwejo ali jwakunonyela yakangana soni kusisyana pa maloŵe. Yindu yeleyi yikusatandikasya jelasi,* kulimbana, kuŵecheta yachipongwe soni kuganichisyana yakusakala.
5 Yeleyi yikusatandikasyasoni kukangana pa yindu yamwanamwana pasikati pa ŵandu ŵa nganisyo syepindiche soni ŵangamanyilila yayili yisyesyene. Jemanjaji akusaganisya kuti kuŵa ŵakulipeleka kwa Mlungu lili litala lyakupatila yineyakwe.
6 Kusala yisyene, kuŵa ŵakulipeleka kwa Mlungu soni kuŵa ŵakwikutila ni yindu yatukwete kukusapindulisya mnope.
7 Pakuŵa nganituyika ni kalikose m’chilambochi, soni ngasitujigala kalikose pakutyoka m’chilambochi.
8 Myoyo, naga tukwete yakulya soni yakuwala,* tukusosekwa tujikutileje ni yindu yeleyi.
9 Nambo ŵandu ŵele ŵakusasachilila kuŵa ŵakusichila akusagwila mu yakulingwa soni mu chitega, nambosoni akusalitanjisya mu yakumbila yejinji yangali lunda soni yakonanga. Yindu yeleyi yikusiyatendekasya kusimana ni yakupweteka soni chiwa.
10 Pakuŵa kunonyela mbiya ni kwakukusatandikasya yakupweteka ya mtundu uliwose, soni ligongo lyakusachilila kuchikusya chinonyelo chelechi, ŵane asokonechele ni kwasa chikulupi soni asimene ni yakupweteka yejinji paumi wawo.
11 Nambo mmwe mundu jwa Mlungu, mtile yindu yeleyi. Mmalomwakwe mtendeje yiliyose yayili yakuŵajilwa pameso pa Mlungu, soni mŵeje ŵakulipeleka kwa Mlungu. Mlinjelinjeje kuti mkole chikulupi, chinonyelo, soni kuti mŵe ŵakupilila soni ŵakufasa.
12 Mpute ngondo jambone jakuchenjela chikulupi chenu. Mkamule mwamachili chembecheyo chimkwete cha umi wangamala chele chiŵamŵilanjile soni mwasasile ya chembecheyo cha umi welewu pameso pa mboni syejinji.
13 Pameso pa Mlungu, jwele jwakusasamalila yindu yosope kuti yipitilisye kuŵa ni umi, soni pameso pa Klistu Yesu, jwele ŵapeleche umboni kwa wosope pameso pa Pontiyo Pilato, ngumlamula kuti
14 mpikanileje malamusi mli ŵangali chakulemwa soni mli ŵangali magambo ni jwalijose mpaka pachachiwonechela Ambuje ŵetu Yesu Klistu.
15 Yisyene, Ambuje ŵetu ŵakusangalala soni ŵamachili chachililosya pandaŵi jakwe. Ambujewo ali Mwenye jwa wosope ŵakusalamulila mpela mayimwene soni ali Ambuje ŵa wosope ŵakusalamulila mpela achambuje.
16 Alisoni ŵelepewo ŵakwete umi wangawa, soni akusatama kumalo gakuŵala mnope kwele jwalijose nganaŵa aŵandichile. Pangali jwalijose juŵam’weni jwalakwejo soni pangali jwampaka akombole kumwona. Kwa jwalakwejo kuŵe uchimbichimbi soni machili gangamala. Ame.
17 Mwalamule ŵandu ŵakusichila ŵa mu ndaŵi* ajino kuti akaŵa ŵakulikwesya,* soni kuti akaŵikaga chembecheyo chawo pa yipanje yayili yangatamilisya, nambo aŵicheje chembecheyo chawo pa Mlungu jwakusapeleka mwakoloŵa makono yindu yosope yatukusasangalala nayo.
18 Mwasalileje kuti atendeje yambone, aŵeje ŵakusichila ni yitendo yambone, aŵeje ŵakoloŵa makono, soni aŵeje ŵakoseka kugaŵana ni ŵane yindu yawo.
19 Naga akutenda yeleyi chachiŵa kuti akusonganganya yipanje yakutyochela kwa Mlungu. Yeleyi yichakamuchisya kuti akole sogolo jambone. Pambesi pakwe chachikamula mwamachili chembecheyo cha umi usyesyene.
20 Mmweji Timoteyo, myisunjeje chenene yindu yimwapochele kutyochela kwa Mlungu. Mkajinjililaga ngani syangakamuchisya syasikusasakasya yindu yeswela soni ngani syakusisyana syele mwaunami ŵandu akusaŵecheta kuti sili “kumanyilila yindu.”
21 Ligongo lyakukuya nganisyo syelesi, ŵandu ŵane alesile chikulupi.
Umbone mtima wekulungwa uŵe ni jemanja.
Maloŵe Gamwiŵanda
^ Kapena kuti, “gambone; gakupindulisya.”
^ Ŵane akusati “dumbo.”
^ Kapena kuti, “pagona.” Maloŵe gakwe gandanda, “chakuliwunichila.”
^ Alole Kugopolela kwa Maloŵe Gane.
^ Kapena kuti, “ŵakulipikana.”