Aefeso 2:1-22
2 Nambosoni, Mlungu ŵamtesile jemanja kuŵa ŵaumi, atamose kuti mwaliji ŵawe ligongo lya yakulepela soni ulemwa wenu.
2 Jemanja mwaliji mkwenda mu yindu yeleyi mwakuya matala gakusakala ga chilambochi, soni mwatendaga yindu mwakumpikanila jwakulamulila jwa mpweya wawukusajendesya nganisyo sya ŵandu. Mpweya welewu apano ukukamula masengo mwa ŵandu ŵangapikanila.
3 M’wejisoni patwaliji pasikati pa jemanjaji, twatendaga yindu mwakuya yakumbila ya chilu chetu. Twaliji mkutenda yakusaka ya chilu soni nganisyo syetu, soni twaliji ŵanache ŵakuŵajilwa kupochela chilango* mwakulandana ni ŵane wosopewo.
4 Nambo Mlungu, pakuŵa ali jwagumbala ni chanasa, soni ligongo lya chinonyelo chakwe chekulungwa chiŵachilosisye pa m’weji,
5 ŵatutesile kuŵa ŵaumi pampepe ni Klistu. Ŵatesile yeleyi atamose kuti twaliji ŵawe ligongo lya ulemwa wetu. Jemanjatu mkulupwiche ligongo lya umbone mtima wakwe wekulungwa.
6 Pajatu Mlungu ŵatutesile kuŵa ŵaumi, soni ŵatupele malo kwinani kuti tukatame, ligongo jwalakwe atutendekasisye kuti tuŵe ŵakamulana ni Klistu.
7 Ŵatesile yeleyi kuti mu ndaŵi* jajikwikajo alosye chipanje chakwe chapenani cha umbone mtima wakwe wekulungwa soni kuti atulosye umbone wakwe m’weji ŵatuli ŵakamulana ni Klistu Yesu.
8 Kupitila mu umbone mtima wakwe wekulungwawo jemanja mkulupwiche ligongo mlosisye chikulupi, ngaŵaga ligongo lya machili genu, nambo uli mtuka wa Mlungu.
9 Ngaŵagasoni ligongo lya masengo ga mundu jwinejwakwe, iyayi. Yeleyi yili myoyo kuti pakasimanikwa jwalijose jwakulilapilila.
10 M’weji tuli masengo ga makono ga Mlungu, soni ligongo lyakuti tuli ŵakamulana ni Klistu Yesu, ŵatupanganyisye kuti tutendeje masengo gambone gele Mlungu ŵagalinganyisye chile kuti tugatendeje.
11 Myoyo mkumbuchileje kuti pandanda jemanja mwaliji ŵandu ŵamitundu jine mwakuchilu. Pandaŵijo ŵandu ŵakusati ali “ŵawumbale,” nambo kuwumbala kwakwe kwakutendedwa ni makono ga ŵandu, ŵamtendaga jemanja kuti “ŵangawumbala.”
12 Pandaŵi jelejo jemanja mwaliji ŵangali Klistu, mwaliji ŵakutalikangana ni mtundu wa Yisalayeli, soni mwaliji achalendo ku yilanga yakwamba yindu yiŵasasile Mlungu kuti chachapa ŵandu ŵakwe. Mwaliji ŵangali chembecheyo soni nganimkola Mlungu m’chilambochi.
13 Pakuŵa mli ŵakamulana ni Klistu Yesu, jemanja ŵamwaliji kwakutalikangana ni Mlungu sambano mli pakuŵandikana ni jwalakwe ligongo lya myasi ja Klistu.
14 Jwalakwe atupele mtendele, soni ni juŵalumbikenye magulu gaŵiligo ni kuŵa gulu jimo. Jwalakwe ŵagumulenye lipupa lilyaliji pasikati pawo lyele lyalekanganyaga.
15 Mwakupeleka chilu chakwe, jwalakwe jwamasisye chindu chachaliji mkwaŵenganya, chachili Chilamusi cha Mose chakola malamusi gejinji. Ŵatesile yeleyi kuti atendekasye magulu gaŵiligo kuŵa gakamulana ni jwalakwejo ni kuŵa chilu chimpepe chasambano soni kuti paŵe mtendele.
16 Ŵatesilesoni yeleyi kuti ŵajilanye ŵandu wosopewo kwa Mlungu kuti aŵe chilu chimpepe ligongo lya chitela chakulagasichila,* pakuŵa jwalakwe ŵawuleje chindu chakwaŵenganya chila mwakupeleka chilu chakwe.
17 Jwalakwe ŵayiche ni kulalichila ngani syambone sya mtendele kwa jemanja ŵamwaliji ŵakutalikangana ni Mlungu soni kwa ŵele ŵaŵaliji ŵakuŵandikana najo.
18 Ligongo lya jwalakwejo, wosope ŵakutyochela m’magulu gaŵili, tukusakombola kwika kwa Atati mwagopoka kupitila mwa msimu umpepe.
19 Myoyo jemanja nganimŵasoni achalendo kapena ŵandu ŵangamanyika, nambo mli ŵamo pampepe ni ŵaswelawo soni wosope mli ŵa m’nyumba ja Mlungu.
20 Jemanja amtaŵile mpela nyumba soni fendeshoni* jakwe jili ŵandumetume soni ŵakulochesya, nambo Klistu Yesu ni jwali liganga lyapakona* lya fendeshonijo.
21 Nyumba josopejo, pakuŵa jili jakamulana ni jwalakwe soni jili jakulumbikana chenene, jikukula ni kuŵa nyumba jeswela ja Yehofa.
22 Ligongo lyakuti mli ŵakamulana ni jwalakwejo jemanjasoni akumtaŵa pampepe ni kuŵa malo gakuti Mlungu atameje mwa msimu.
Maloŵe Gamwiŵanda
^ Ŵane akusati “chamuko.”
^ Alole Kugopolela kwa Maloŵe Gane.
^ Alole Kugopolela kwa Maloŵe Gane.
^ Ŵane akusati “yilimbilimbi.”
^ Kapena kuti, “lyapandumba.”