Maliko 16:1-8
-
Yesu akwimuka ku chiwa (1-8)
16 Sambano lisiku lya Sabata lili lipite, Maliya jwa ku Magadala, Maliya mamagwe Yakobo, soni Salome, ŵasumile mawuta gakununjila kuti akapakasye chilu cha Yesu.
2 Kundaŵindaŵipe pa lisiku lyandanda* lya wikijo* lyuŵa palyakopokaga, achakongweŵa ŵakopochele kumalembe kula.
3 Jemanjaji ŵaliji mkuwusyana kuti, “Ana ŵani ŵachakatutyochesye liganga pa mlango wa lilembe?”
4 Nambo paŵalolechesye, ŵayiweni kuti liganga lila lityosyedwe kala, atamose kuti lyaliji lyekulungwa mnope.
5 Paŵajinjile mwilembemo, ŵam’weni mnyamata ali atemi kumbali ja kumkono wamlyo, ali awete mkanjo weswela, mwamti jemanjajo ŵasimonjile mnope.
6 Mnyamatajo jwasalile achakongwewo kuti, “Mkasimonga. Nayimanyi kuti jemanja mkumsosa Yesu jwa ku Nasaleti jwele ŵamkomele pachitela. Jwalakwejo ajimwiche ku chiwa soni nganaŵa akuno. Mlole, aga ni malo gaŵamgoneche.
7 Myoyo jemanja mjawule mkasalile ŵakulijiganya ŵakwe soni Petulo kuti, ‘Jwalakwejo alongolele kala kwawula ku Galileya, soni chimkasimane najo kweleko, mpela mujwaŵechetele msyene.’”
8 Myoyo jemanjajo paŵakopweche mwilembemo, ŵatandite kuwutuka ali mkutetemela soni ali ŵakusimonga mnope. Jemanjajo nganaŵecheta kandu kwa jwalijose ligongo wakamwile woga mnope.*
Maloŵe Gamwiŵanda
^ Lyeleli lili lisiku lyatukusalikolanga apano kuti Lyamlungu. Kwa Ayuda, lyeleli lyaliji lisiku lyandanda lya wiki.
^ Ŵane akusati “chijuma.”
^ Mu yakulemba yakala yakusosekwa mnope, buku ja Ngani Syambone sya Maliko jikusamalila pa ndime 8.